Read Aramaic Peshita Psalms 19 Bible Online

Psalms 19 - Aramaic Peshita bible

Psalms 19

¹ܫܡܲܝܵܐ ܡܸܫܬܲܥܹܝܢ ܫܘܼܒ̣ܚܹܗ ܕܐܲܠܵܗܵܐ.

²ܘܲܥܒܵܕ݂ ܐܝܼܕ݂ܵܘ̈ܗܝ ܡܚܲܘܸܐ ܪܩܝܼܥܵܐ.

³ܝܲܘܡܵܐ ܠܝܲܘܡܵܐ ܡܲܒܲܥ ܡܹܐܡܪܵܐ.

⁴ܘܠܸܠܝܵܐ ܠܠܸܠܝܵܐ ܡܚܲܘܸܐ ܡܲܕ̇ܥܵܐ.

⁵ܠܲܝܬ̇ ܡܹܐܡܪܵܐ ܐܵܦܠܵܐ ܡܸܠܹ̈ܐ.

⁶ܕܠܵܐ ܢܸܫܬܡܲܥ ܒܩܵܠܗܘܿܢ.

⁷ܒܟ̣ܠܵܗ̇ ܐܲܪܥܵܐ ܢܸܦܩܲܬ̤ ܣܒܲܪܬ̣ܗܘܿܢ.

⁸ܘܲܒ̣ܣܲܘ̈ܦܹܝܗ̇ ܕܬܹܒܹܝܠ ܡܸܠܲܝ̈ܗܘܿܢ.

⁹ܥܲܠ ܫܸܡܫܵܐ ܢܩܲܫ ܡܲܫܟܢܹܗ ܒܗܘܿܢ.

¹⁰ܘܗܘ̤ ܐܲܝܟ݂ ܚܲܬ̣ܢܵܐ ܕܢܵܦܹܩ ܡ̣ܢ ܒܹܝܬ̣ ܓܢܘܿܢܵܐ.

¹¹ܢܕ݂ܘܼܨ ܐܲܝܟ݂ ܓܲܢ̄ܒܵܪܵܐ ܠܡܸܪܗܲܛ ܐܘܼܪܚܹܗ.

¹²ܡ̣ܢ ܣܲܘ̈ܦܲܝ ܫܡܲܝܵܐ ܡܲܦܩܹܗ.

¹³ܘܡܲܣܡ̱ܟܹܗ ܥܲܠ ܣܲܘ̈ܦܲܝ ܫܡܲܝܵܐ.

¹⁴ܘܠܲܝܬ ܕܛܵܫܹܐ ܡ̣ܢ ܠܲܗܓܹܗ.

¹⁵ܢܵܡܘܿܣܹܗ ܕܡܵܪܝܵܐ ܕܠܵܐ ܡܘܼܡ ܘܡܲܦܢܸܐ ܢܲܦ̮ܫܵܐ.

¹⁶ܣܵܗܕܘܼܬܹܗ ܕܡܵܪܝܵܐ ܡܗܲܝܡܢܵܐ ܘܲܡܚܲܟ̇ܡܵܐ ܝܲܠܘܼ̈ܕܹܐ.

¹⁷ܦܘܼܩܕܵܢܵܘ̈ܗܝ ܕܡܵܪܝܵܐ ܬܪܝܼܨܝܼܢ ܘܲܡܚܲܕܹܝܢ ܠܸܒܵܐ.

¹⁸ܦܘܼܩܕܵܢܹܗ ܕܡܵܪܝܵܐ ܓܒܸܐ ܘܡܲܢܗܲܪ ܥܲܝܢܹ̈ܐ.

¹⁹ܕܸܚܠܬܹܗ ܕܡܵܪܝܵܐ ܕܲܟ̣ܝܵܐ ܘܩܲܝܡܵܐ ܠܥܵܠܲܡ.

²⁰ܕܝܼܢܵܘ̈ܗܝ ܕܡܵܪܝܵܐ ܒܩܘܼܫܬܵܐ ܘܟܹܐܢܝܼܢ ܒܟ̣ܠܡܸܕܸܡ.

²¹ܘܲܪܓ̣ܝܼܓ̣ܝܼܢ ܡ̣ܢ ܕܲܗܒ̣ܵܐ ܘܡ̣ܢ ܟܹܐܦܹ̈ܐ ܛܵܒ̣ܵـ̈ــܬ̣ܵܐ.

²²ܘܲܚܠܹܝܢ ܡ̣ܢ ܕܸܒ̣ܫܵܐ ܘܡ̣ܢ ܟܲܟܵܪܝܼܬ̣ܵܐ.

²³ܘܐܵܦ ܥܲܒ̣ܕܵܟ݂ ܢܸܙܕܗܲܪ ܒܗܘܿܢ.

²⁴ܐܸܢ ܢܸܛܲܪ ܐܸܢܘܿܢ ܢܸܬ̣ܦܪܲܥ ܣܲܓܝܼ.

²⁵ܒܫܲܪ̈ܥܵܬ̣ܵܐ ܡܲܢ̣ܘܼ ܡܸܣܬܲܟܲܠ.

²⁶ܘܡ̣ܢ ܛܲܫ̈ܝܵܬ̣ܵܐ ܙܲܟܵܢܝ.

²⁷ܐܵܦ ܡ̣ܢ ܥܲܘܠܵܐ ܚܣܘܿܟܲܝܗܝ ܠܥܲܒ̣ܕܵܟ݂.

²⁸ܕܠܵܐ ܢܸܫܬܲܠܛܘܼܢ ܒܝܼ ܒܝܼܫܹ̈ܐ.

²⁹ܘܐܸܬ̇ܕܲܟܸܐ ܡ̣ܢ ܚܛܵܗܲܝ̈.

³⁰ܢܸܗܘ̈ܝܵܢ ܠܸܨܒ̣ܝܵܢܵܟ݂ ܡܸܠܵܘ̈ܗܝ ܕܦܘܼܡܝ.

³¹ܪܸܢܝܹܗ ܕܠܹܒܝ ܩܕ݂ܵܡܲܝܟ ܡܵܪܝܵܐ ܥܵܕ݂ܘܿܪܝ ܘܦܵܪܘܿܩܝ.