Read Aramaic Peshita Psalms 27 Bible Online

Psalms 27 - Aramaic Peshita bible

Psalms 27

¹ܡܵܪܝܵܐ ܢܘܼܗܪ̱ܝ ܘܦܘܼܪܩܵܢܝ ܡ̣ܢ ܡܲܢ ܐܸܕ݂ܚܲܠ.

²ܡܵܪܝܵܐ ܥܘܼܫܢܵܐ ܕܚܲܝܲܝ̈ ܡ̣ܢ ܡܲܢ̣ܘܼ ܙܵܐܲܥ̇ ܐ̄ܢܵܐ.

³ܟܲܕ݂ ܩܪܸܒ̣ܘ ܠܝܼ ܒܝܼܫܹ̈ܐ ܠܡܹܐܟܲܠ ܒܸܣܪ̱ܝ.

⁴ܒܥܸܠܕ̇ܒ̣ܵܒܲܝ̈ ܘܣܵܢܐܲܝ̈.

⁵ܐܲܟ̣ܚ̄ܕ݂ܵܐ ܐܸܣܬܲܚܲܦܘ ܘܲܢܦܲܠ̣ܘ.

⁶ܐܸܢ ܬܸܫܪܸܐ ܥܠܲܝ ܡܲܫܪܝܼܬ̣ܵܐ ܠܵܐ ܕܵܚܹܠ ܠܹܒ̇ܝ.

⁷ܘܐܸܢ ܢܩܘܼܡ ܥܠܲܝ ܩܪܵܒ̣ܵܐ ܒܗܵܕܹܐ ܬܟ̣ܝܼܠ ܐ̄ܢܵܐ.

⁸ܕܲܚܕ݂ܵܐ ܫܸܐ݁ܠܹܬ̣ ܡ̣ܢ ܡܵܪܝܵܐ ܘܠܵܗ̇ ܗܘ̤ ܒܵܥܹܐ݁ ܐ̄ܢܵܐ.

⁹ܕܐܸܥܡܲܪ ܒܒܲܝܬܹܗ ܕܡܵܪܝܵܐ ܟܠܗܘܿܢ ܝܲܘ̈ܡܵܬ̣ܵܐ ܕܚܲܝܲܝ̈.

¹⁰ܘܐܸܚܙܹܐ ܒܒܲܣܝܼܡܘܼܬܹܗ ܕܡܵܪܝܵܐ ܘܐܸܦܩܘܿܕ݂ ܗܲܝܟ̇ܠܹܗ.

¹¹ܡܸܛܠ ܕܲܢܛܲܫܹܝܢܝ ܒܣܸܬܵܪܹܗ ܒܝܲܘܡܵܐ ܒܝܼܫܵܐ.

¹²ܘܲܢܛܲܫܹܝܢܝ ܒܛܸܠܵܠܵܐ ܕܡܲܫܟ̇ܢܹܗ ܘܥܲܠ ܫܘܿܥܵܐ ܢܪܝܼܡܲܢܝ.

¹³ܡ̣ܢ ܗܵܫܵܐ ܢܸܬ̇ܬ̇ܪܝܼܡ ܪܹܫܝ ܥܲܠ ܒܥܸܠܕ̇ܒ̣ܵܒܲܝ̈ ܕܚܲܕ݂ܪܘܼܢܝ.

¹⁴ܐܹܕܲܒܲܚ ܒܡܲܫܟ̇ܢܹܗ ܕܸܒ̣ܚܹ̈ܐ ܕܫܘܼܒ̣ܚܵܐ.

¹⁵ܐܹܫܲܒܲܚ ܘܐܹܙܲܡܲܪ ܠܡܵܪܝܵܐ.

¹⁶ܫܡܲܥ ܡܵܪܝܵܐ ܩܵܠܝ ܡܵܐ ܕܲܩܪܹܝܬ̣ܵܟ݂.

¹⁷ܪܲܚܸܡܥܠܲܝ ܘܲܥܢܝܼܢܝ.

¹⁸ܠܵܟ݂ ܐܵܡܲܪ ܠܹܒܝ ܘܒ̣ܵܥ̈ܝܵܢ ܐܲܦܲܝ̈ ܠܐܲܦܲܝ̈ܟ.

¹⁹ܡܵܪܝܵܐ ܠܵܐ ܬܲܗܦܸܟ݂ ܐܲܦܲܝ̈ܟ ܡܹܢܝ.

²⁰ܘܠܵܐ ܬܐܲܠܨܝܼܘܗܝ ܒܪܘܼܓ̣ܙܵܐ ܠܥܲܒ̣ܕܵܟ݂.

²¹ܥܵܕ݂ܘܿܪܝ ܗ̤ܘܲܝܬ̇ ܡܵܪܝܵܐ.

²²ܠܵܐ ܬܸܫܕܹ̇ܝܢܝ ܘܠܵܐ ܬܸܫܒ̇ܩܲܢܝ ܐܲܠܵܗܝ ܘܦܵܪܘܿܩܝ.

²³ܡܸܛܠ ܕܐܵܒ̣ܝ ܘܐܹܡܝ ܫܲܒ̣ܩܘܼܢܝ ܘܡܵܪܝܵܐ ܚܲܡܠܲܢܝ.

²⁴ܐܲܠܸܦܲܝܢܝ ܡܵܪܝܵܐ ܐܘܼܪܚܵܟ݂.

²⁵ܘܕܲܒܲܪܲܝܢܝ ܒܲܫܒ̣ܝܼܠܲܝ̈ܟ ܬܪ̈ܝܼܨܹܐ.

²⁶ܘܠܵܐ ܬܲܫܠܸܡܲܝܢܝ ܠܲܒ̣ܥܸܠܕ̇ܒ̣ܵܒܲܝ̈.

²⁷ܡܸܛܠ ܕܩܵܡ݂ܘ ܥܠܲܝ ܣܵܗ̈ܕܹ̇ܐ ܕܫܘܼܩܪܵܐ ܘܡܲܠܸܠܘ ܥܲܘܠܵܐ.

²⁸ܐܸܢܵܐ ܕܹܝܢ ܗܲܝܡ̱ܢܹ̇ܬ̣ ܕܐܸܚܙܹܐ ܒܛܵܒ̣ܵܬܹ̈ܗ ܕܡܵܪܝܵܐ ܒܐܲܪܥܵܐ ܕܚܲܝܹ̈ܐ.

²⁹ܣܲܒܲܪܘ ܒܡܵܪܝܵܐ ܘܢܸܬ̣ܚܲܝܲܠ ܠܸܒ̇ܟ̣ܘܿܢ.

³⁰ܣܲܒܲܪܘ ܒܡܵܪܝܵܐ.