Read Aramaic Peshita Psalms 33 Bible Online

Psalms 33 - Aramaic Peshita bible

Psalms 33

¹ܫܲܒܲܚܘ ܙܲܕܝܼܩܹ̈ܐ ܠܡܵܪܝܵܐ.

²ܘܠܲܬ̣ܪ̈ܝܼܨܹܐ ܝܵܐܝܵܐ ܬܸܫܒ̇ܘܿܚܬܵܐ.

³ܐܲܘܕܵܘ ܠܹܗ ܒܟܸܢܵܪܵܐ.

⁴ܘܲܒ̣ܩܝܼܬ̣ܵܪܵܐ ܕܲܥܣܲܪ ܡܸܢܝܼ̈ܢ ܙܲܡܲܪܘ ܠܹܗ.

⁵ܫܲܒܲܚܘ ܠܹܗ ܬܸܫܒ̇ܘܿܚܬܵܐ ܚܕܲܬܵܐ.

⁶ܘܐܸܡܲܪܘ ܫܲܦܝܼܪ ܒܩܵܠܵܐ.

⁷ܡܸܛܠ ܕܲܬ̣ܪܝܼܨ ܗ̄ܘ̣ ܦܸܬ̣ܓ̣ܵܡܹܗ ܕܡܵܪܝܵܐ.

⁸ܘܟ̣ܠܗܘܿܢ ܥܒ̣ܵܕ݂ܵܘ̈ܗܝ ܒܗܲܝܡܵܢܘܼܬ̣ܵܐ.

⁹ܪܵܚܹܡ݁ ܙܲܕܝܼܩܘܼܬ̣ܵܐ ܘܕ݂ܝܼܢܵܐ.

¹⁰ܛܲܝܒ̇ܘܼܬܹܗ ܕܡܵܪܝܵܐ ܡܲܠܝܵܐ ܐܲܪܥܵܐ.

¹¹ܒܡܸܠܬܹܗ ܕܡܵܪܝܵܐ ܐܹܬ̣ܥܒܸܕ݂ ܫܡܲܝܵܐ.

¹²ܘܲܒ̣ܪܘܼܚܵܐ ܕܦܘܼܡܹܗ ܟܠܗܘܿܢ ܚܲܝ̈ܠܵܘܵܬܹܗ.

¹³ܟܢܲܫ̣ܘ ܐܲܝܟ݂ ܕܲܒ̣ܙܸܩܹ̈ܐ ܡܲܝ̈ܵܐ ܕܝܲܡܵܐ.

¹⁴ܘܣܵܡ݂ ܒܐܲܘܨܪܹ̈ܐ ܬܗܘܿܡܹ̈ܐ.

¹⁵ܢܸܕ݂ܚܠܘܼܢ ܡ̣ܢ ܡܵܪܝܵܐ ܟܠܵܗ̇ ܐܲܪܥܵܐ.

¹⁶ܘܲܢܙܘܼܥܘܼܢ ܡ̣ܢ ܩܕ݂ܵܡܵܘܗܝ ܟܠܗܘܿܢ ܥܵܡܘܿܪܹ̈ܝܗ̇ ܕܬܹܒܹܝܠ.

¹⁷ܡܸܛܠ ܕܗ̤ܘ ܐܸܡܲܪ ܘܲܗ̤ܘܵܘ ܘܗ̤ܘ ܦܩܲܕ݂ ܘܐܲܩܝܼܡ.

¹⁸ܡܵܪܝܵܐ ܡܒܲܛܸܠ ܡܸܠܟܵܐ ܕܥܲܡܡܹ̈ܐ.

¹⁹ܘܲܡܒܲܛܸܠ ܡܵܪܝܵܐ ܡܲܚ̈ܫܒ̣ܵܬ̣ܗܘܿܢ ܕܥܲܡܡܹ̈ܐ.

²⁰ܬܲܪܥܝܼܬܹܗ ܕܡܵܪܝܵܐ ܠܥܵܠܲܡ ܩܲܝܵܡܵܐ.

²¹ܘܡܲܚܫܲܒ̣ܬ̣ܵܐ ܕܠܸܒܹܗ ܠܕ݂ܵܪܕܵܪ̈ܝܼܢ.

²²ܛܘܼܒ̣ܵܘܗܝ ܠܥܲܡܵܐ ܕܡܵܪܝܵܐ ܗ̄ܘ̣ ܐܲܠܵܗܹܗ.

²³ܥܲܡܵܐ ܕܲܓ̣ܒܵܐ ܠܹܗ ܠܝܵܪܬ̇ܘܼܬ̣ܵܐ.

²⁴ܡ̣ܢ ܫܡܲܝܵܐ ܐܲܕ݂ܝܼܩ ܡܵܪܝܵܐ.

²⁵ܘܲܚ݂ܙܵܐ ܠܟ̣ܠܗܘܿܢ ܒܢܲܝ̈ܢܵܫܵܐ.

²⁶ܘܡ̣ܢ ܡܲܘܬܒܹܗ ܚܙ݂ܵܐ ܠܟ̣ܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ.

²⁷ܕܲܓ̣ܒܲܠ ܐܲܟ̣ܚ̄ܕ݂ܵܐ ܠܸܒ̇ܗܘܿܢ.

²⁸ܘܡܸܬ̣ܒܲܝܲܢ ܒܟ̣ܠܗܘܿܢ ܥܒ̣ܵܕܲܝ̈ܗܘܿܢ.

²⁹ܡܲܠܟܵܐ ܠܵܐ ܡܸܬ̣ܦܪܸܩ ܒܣܘܿܓ̣ܐܵܐ ܕܚܲܝܠܵܐ.

³⁰ܘܐܵܦܠܵܐ ܓܲܢ̄ܒܵܪܵܐ ܡܸܬ̣ܦܲܨܸܐ ܒܣܘܿܓ̣ܐܵܐ ܕܚܲܝܠܹܗ.

³¹ܕܲܓܵܠ ܗ̄ܘ̣ ܦܘܼܪܩܵܢܹܗ ܕܣܘܼܣܝܵܐ.

³²ܕܲܒ̣ܣܘܿܓ̣ܐܵܐ ܕܚܲܝܠܹܗ ܠܵܐ ܡܦܲܨܸܐ ܠܪܵܟ̣ܒܹ̇ܗ.

³³ܥܲܝܢܵܘ̈ܗܝ ܕܡܵܪܝܵܐ ܥܲܠ ܙܲܕܝܼܩܹ̈ܐ.

³⁴ܕܲܡܣܲܟܹ̇ܝܢ ܠܛܲܝܒ̇ܘܼܬܹܗ.

³⁵ܕܲܡܦܲܨܸܐ ܢܲܦ̮̈ܫܵܬ̣ܗܘܿܢ ܡ̣ܢ ܡܲܘܬܵܐ.

³⁶ܘܢܲܚܸܐ ܐܸܢܘܿܢ ܒܟܲܦܢܵܐ.

³⁷ܢܲܦ̮ܫܲܢ ܣܲܟ̇ܝܲܬ̤ ܠܡܵܪܝܵܐ.

³⁸ܡܸܛܠ ܕܗܘ̤ܝܘܼ ܡܥܲܕ̇ܪܵܢܲܢ ܘܲܡܣܲܝܥܵܢܲܢ.

³⁹ܘܒܹܗܘ̤ ܢܸܚܕܸ̇ܐ ܠܸܒܲܢ.

⁴⁰ܕܒܲܫܡܹܗ ܩܲܕܝܼܫܵܐ ܣܲܒܲܪܢ.

⁴¹ܬܸܗܘܸܐ ܛܲܝܒ̇ܘܼܬ̣ܵܟ݂ ܥܠܲܝܢ ܡܵܪܝܵܐ.

⁴²ܐܲܝܟ݂ܢܵܐ ܕܣܲܟ̇ܝܼܢܲܢ ܠܵܟ݂.