Read Aramaic Peshita Psalms 37 Bible Online

Psalms 37 - Aramaic Peshita bible

Psalms 37

¹ܠܵܐ ܬܸܚܣܲܡ ܒܪ̈ܲܫܝܼܥܹܐ.

²ܘܠܵܐ ܬܸܛܲܢ ܒܥܵܒ̣ܕܲܝ̈ ܥܲܘܠܵܐ.

³ܡܸܛܠ ܕܐܲܝܟ݂ ܓܸܠܹ̈ܐ ܒܲܥܓܲܠ ܝܵܒ̣ܫܝܼ݁ܢ.

⁴ܘܐܲܝܟ݂ ܝܘܼܪܵܩܵܐ ܕܥܸܣܒܵܐ ܚܵܡܹܝ݁ܢ.

⁵ܣܲܒܲܪ ܒܐܲܠܵܗܵܐ ܘܲܥܒܸܕ݂ ܛܵܒ̣ܬ̣ܵܐ.

⁶ܥܡܲܪ ܒܐܲܪܥܵܐ ܘܲܒ̣ܥܝܼ ܗܲܝܡܵܢܘܼܬ̣ܵܐ.

⁷ܣܲܒܲܪ ܒܡܵܪܝܵܐ ܘܢܸܬܸ̇ܠ ܠܵܟ݂ ܫܸܐܠܬܹܗ ܕܠܸܒܵܟ݂.

⁸ܬܪܘܿܨ ܩܕ݂ܵܡ ܡܵܪܝܵܐ ܐܘܼܪܚܵܟ ܘܣܲܒܲܪ ܒܹܗ.

⁹ܘܗܘ̤ ܥܵܒܹܕ݂ ܘܡܲܦܸܩ ܐܲܝܟ݂ ܢܘܼܗܪܵܐ ܙܲܕܝܼܩܘܼܬ̣ܵܟ݂.

¹⁰ܘܕ݂ܝܼܢܲܝ̈ܟ ܐܲܝܟ݂ ܛܲܗܪܵܐ.

¹¹ܒܥܝܼ ܡ̣ܢ ܡܵܪܝܵܐ ܘܨܲܠܵܐ ܩܕ݂ܵܡܵܘܗܝ.

¹²ܘܠܵܐ ܬܸܚܣܲܡ ܒܓܲܒ̣ܪܵܐ ܕܥܵܒܹܕ݂ ܥܲܘܠܵܐ ܘܡܲܨܠ̱ܚܵܐ ܐܘܼܪܚܹܗ.

¹³ܐܸܬ̇ܬ̇ܢܝܼܚ ܡ̣ܢ ܚܸܡܬ̣ܵܐ ܘܐܸܬ̇ܬ̇ܢܝܼܚ ܡ̣ܢ ܪܘܼܓ̣ܙܵܐ.

¹⁴ܘܠܵܐ ܬܸܚܣܲܡ ܠܡܸܥܒܲܕ݂ ܒܝܼܫܬܵܐ.

¹⁵ܡܸܛܠ ܕܒ̣ܝܼܫܹ̈ܐ ܣܵܝܦ݁ܝܼܢ.

¹⁶ܘܐܲܝܠܹܝܢ ܕܲܡܣܲܒ̇ܪܝܼܢ ܒܡܵܪܝܵܐ ܝܵܪܬܝܼܢ ܐܲܪܥܵܐ.

¹⁷ܒܙܲܒ̣ܢܵܐ ܙܥܘܿܪܵܐ ܒܵܥܹܐ݁ ܐܲܢ̄ܬ ܠܹܗ ܠܪܲܫܝܼܥܵܐ ܘܠܲܝܬܵܘܗܝ.

¹⁸ܘܚܵܐܲܪ ܐܲܢ̄ܬ ܒܕ݂ܘܼܟ̣ܬܹܗ ܘܠܵܐ ܡܸܫܬ̇ܟܲܚ.

¹⁹ܘܡܸܣܟܹܢܹ̈ܐ ܝܵܪܬܝܼܢ ܐܲܪܥܵܐ.

²⁰ܘܡܸܬ̣ܒܲܣܡܝܼܢ ܒܲܫܠܵܡܵܐ ܣܲܓܝܼܐܵܐ.

²¹ܡܸܬ̣ܚܲܡܲܬ̣ ܪܲܫܝܼܥܵܐ ܥܲܠ ܙܲܕܝܼܩܵܐ.

²²ܘܲܡܚܲܪܸܩ ܫܸܢܵܘ̈ܗܝ ܥܠܵܘܗܝ.

²³ܘܡܵܪܝܵܐ ܢܸܓ̣ܚܲܟ݂ ܥܠܵܘܗܝ.

²⁴ܡܸܛܠ ܕܝܼܕܲܥ ܕܲܡܛܵܐ ܝܲܘܡܹܗ.

²⁵ܣܲܝܦܵܐ ܫܡܲܛܘ ܪ̈ܲܫܝܼܥܹܐ ܘܲܡܬܲܚܘ ܩܸܫܬܵܐ.

²⁶ܕܢܸܩܛܠܘܼܢ ܠܡܸܣܟܹܢܹ̈ܐ ܘܲܠܒ̣ܵܝܫܹ̈ܐ ܘܠܲܐܝܠܹܝܢ ܕܲܬ̣ܪ̈ܝܼܨܵܢ ܐܘܼܪ̈ܚܵܬ̣ܗܘܿܢ.

²⁷ܣܲܝܦܗܘܿܢ ܢܸܥܘܿܠ ܒܠܸܒ̇ܗܘܿܢ.

²⁸ܘܩܸܫ̈ܬܵܬ̣ܗܘܿܢ ܢܸܬ̇ܬܲܒ̇ܪ̈ܵܢ.

²⁹ܦܲܩܵܚ ܩܲܠܝܼܠ ܠܙܲܕܝܼܩܵܐ.

³⁰ܡ̣ܢ ܩܸܢܝܵܢܵܐ ܣܲܓܝܼܐܵܐ ܕܪ̈ܲܫܝܼܥܹܐ.

³¹ܡܸܛܠ ܕܲܕ݂ܪ̈ܵܥܲܝܗܘܿܢ ܕܪ̈ܲܫܝܼܥܹܐ ܢܸܬ̇ܬܲܒ̇ܪܘܼܢ.

³²ܡܣܲܡܸܟ݂ ܠܙܲܕܝܼܩܹ̈ܐ ܡܵܪܝܵܐ.

³³ܘܝܵܕܲܥ ܡܵܪܝܵܐ ܝܲܘ̈ܡܵܬ̣ܗܘܿܢ ܕܬܲܡܝܼܡܹ̈ܐ.

³⁴ܘܝܵܪܬ̇ܘܼܬ̣ܗܘܿܢ ܠܥܵܠܲܡ ܬܸܗܘܸܐ.

³⁵ܘܠܵܐ ܢܸܒ̣ܗ̱ܬ̣ܘܼܢ ܒܫܵܥܬ̣ܵܐ ܒܝܼܫܬܵܐ.

³⁶ܘܲܒ̣ܝܲܘ̈ܡܵܬ̣ܵܐ ܕܟܲܦܢܵܐ ܢܸܣܒ̇ܥܘܼܢ.

³⁷ܡܸܛܠ ܕܪ̈ܲܫܝܼܥܹܐ ܐܵܒ̣ܕ̇ܝܼܢ.

³⁸ܘܲܒ̣ܥܸܠܕܒ̣ܵܒܵܘ̈ܗܝ ܕܡܵܪܝܵܐ ܡܦܲܛܡܹ̈ܐ ܓܵܡܪܝܼܢ ܘܐܲܝܟ݂ ܬܸܢܵܢܵܐ ܣܵܝܦܝܼܢ.

³⁹ܝܵܙܹܦ ܪܲܫܝܼܥܵܐ ܘܠܵܐ ܦܵܪܲܥ.

⁴⁰ܘܙܲܕܝܼܩܵܐ ܡܪܲܚܸܡ ܘܝܵܗܹܒ̣.

⁴¹(1) ܡܸܛܠ ܕܒ̣ܵܪ̈ܟܵܘܗܝ ܕܡܵܪܝܵܐ ܝܵܪܬ̇ܝܼܢ ܐܲܪܥܵܐ.

⁴²(2) ܘܠܵܝܛܵܘ̈ܗܝ ܢܣܘܼܦܘܼܢ.

⁴³(3) ܡ̣ܢ ܩܕ݂ܵܡ ܡܵܪܝܵܐ ܡܲܬ̣ܩ̈ܢܵܢ ܗܲܠ̈ܟ̣ܵܬܹܗ ܕܓܲܒ̣ܪܵܐ.

⁴⁴(4) ܘܐܘܼܪܚܹܗ ܗܘ̤ ܡܲܬ̣ܩܸܢ.

⁴⁵(5) ܡܸܛܠ ܕܐܸܢ ܢܵܦܹܠ ܠܵܐ ܡܲܗܲܪ.

⁴⁶(6) ܕܡܵܪܝܵܐ ܐܲܚܝܼܕ݂ ܒܐܝܼܕܹܗ.

⁴⁷(7) ܛܠܸܐ ܗ̄ܘܹ̇ܝܬ̣ ܘܣܹܐ݁ܒܹܬ̣ ܘܠܵܐ ܚܙܹ݁ܝܬ̣ ܙܲܕܝܼܩܵܐ ܕܐܸܫܬ̇ܒܸܩ.

⁴⁸(8) ܘܐܵܦܠܵܐ ܙܲܪܥܹܗ ܕܲܒ̣ܥܵܐ ܠܲܚܡܵܐ.

⁴⁹(9) ܐܸܠܵܐ ܟܠܹܗ ܝܲܘܡܵܐ ܡܪܲܚܸܡ ܘܡܲܘܙܸܦ.

⁵⁰(10) ܘܙܲܪܥܹܗ ܡܸܬ̣ܒܲܪܲܟ݂.

⁵¹(11) ܥܒܲܪ ܡ̣ܢ ܒܝܼܫܬܵܐ ܘܲܥܒܸܕ݂ ܛܵܒ̣ܬ̣ܵܐ.

⁵²(12) ܐܸܬ̇ܬ̇ܢܝܼܚ ܠܥܵܠܲܡ ܡܸܛܠ ܕܡܵܪܝܵܐ ܕܝܼܢܵܐ ܪܵܚܹ̇ܡ.

⁵³(13) ܘܠܵܐ ܫܵܒܹ݁ܩ ܠܙܲܕܝܼܩܵܘ̈ܗܝ.

⁵⁴(14) ܐܸܠܵܐ ܠܥܵܠܲܡ ܡܢܲܛܲܪ ܠܗܘܿܢ.

⁵⁵(15) ܘܙܲܪܥܗܘܿܢ ܕܪ̈ܲܫܝܼܥܹܐ ܡܲܘܒܸܕ݂.

⁵⁶(16) ܘܙܲܕܝܼܩܹ̈ܐ ܝܵܪܬ̇ܝܼܢ ܐܲܪܥܵܐ.

⁵⁷(17) ܘܫܵܪܹܝ݁ܢ ܥܠܹܝܗ̇ ܠܥܵܠܲܡ.

⁵⁸(18) ܚܸܟ̣ܡܬ̣ܵܐ ܪܵܢܹ̇ܐ ܦܘܼܡܹܗ ܕܙܲܕܝܼܩܵܐ.

⁵⁹(19) ܘܠܸܫܵܢܹܗ ܡܡܲܠܸܠ ܕܝܼܢܵܐ.

⁶⁰(20) ܢܵܡܘܿܣܹܗ ܕܐܲܠܵܗܵܐ ܒܠܸܒܹܗ ܘܠܵܐ ܙܵܝ̈ܥܵܢ ܕܘܼܪ̈ܟܵܬܹܗ.

⁶¹(21) ܡܣܲܟܸ̇ܐ ܪܲܫܝܼܥܵܐ ܠܙܲܕܝܼܩܵܐ ܘܒ̣ܵܥܹܐ݁ ܠܡܸܩܛܠܹܗ.

⁶²(22) ܘܡܵܪܝܵܐ ܠܵܐ ܢܸܫܒ̇ܩܝܼܘܗܝ ܒܐܝܼ̈ܕ݂ܵܘܗܝ.

⁶³(23) ܐܸܠܵܐ ܢܚܲܝܒ̣ܝܼܘܗܝ ܒܕ݂ܝܼܢܵܐ

⁶⁴(24) ܣܲܒܲܪ ܒܡܵܪܝܵܐ ܘܛܲܪ ܐܘܼܪܚܹܗ.

⁶⁵(25) ܘܲܢܪܝܼܡܵܟ݂ ܠܡܹܐܪܲܬ̣ ܐܲܪܥܵܐ.

⁶⁶(26) ܡܵܐ ܕܣܵܝܦ݁ܝܼܢ ܪ̈ܲܫܝܼܥܹܐ ܬܸܚܙܸܐ.

⁶⁷(27) ܡܸܛܠ ܕܲܚܙܹ݁ܝܬ̣ ܪ̈ܲܫܝܼܥܹܐ ܕܡܸܫܬܲܒ̣ܗ̱ܪܝܼܢ.

⁶⁸(28) ܘܡܸܬ̇ܬ̇ܪܝܼܡܝܼܢ ܐܲܝܟ݂ ܐܝܼܠܵܢܹ̈ܐ ܕܥܵܒ̣ܵܐ.

⁶⁹(29) ܟܲܕ݂ ܥܸܒ̣ܪܹܬ̣ ܠܲܝܬܵܘܗܝ.

⁷⁰(30) ܘܲܒ̣ܥܹܝܬ݂ܹܗ ܘܠܵܐ ܐܸܫܟܲܚܬܹ̇ܗ.

⁷¹(31) ܛܲܪ ܬܲܡܝܼܡܘܼܬ̣ܵܐ ܘܲܓ̣ܒ̣ܝܼ ܬܪܝܼܨܘܼܬ̣ܵܐ.

⁷²(32) ܡܸܛܠ ܕܐܝܼܬ̣ ܚܲܪܬ̣ܵܐ ܛܵܒ̣ܬ̣ܵܐ ܠܓܲܒ̣ܪܹ̈ܐ ܕܲܫܠܵܡܵܐ.

⁷³(33) ܘܚܲܛܵܝܹ̈ܐ ܢܣܘܼܦܘܼܢ ܐܲܟ̣ܚ̄ܕ݂ܵܐ.

⁷⁴(34) ܘܚܲܪܬ̣ܵܐ ܕܪ̈ܲܫܝܼܥܹܐ ܠܐܲܒ̣ܕܵܢܵܐ.

⁷⁵(35) ܦܵܪܘܿܩܵܐ ܕܙܲܕܝܼܩܹ̈ܐ ܡܵܪܝܵܐ.

⁷⁶(36) ܘܲܡܥܲܕܲܪ ܠܗܘܿܢ ܒܙܲܒ̣ܢܹ̈ܐ ܕܥܵܩܬ̣ܵܐ.

⁷⁷(37) ܡܥܲܕܲܪ ܠܗܘܿܢ ܡܵܪܝܵܐ ܘܲܡܦܲܨܸܐ ܠܗܘܿܢ.

⁷⁸(38) ܘܲܡܦܲܨܸܐ ܠܗܘܿܢ ܡ̣ܢ ܪ̈ܲܫܝܼܥܹܐ.

⁷⁹(39) ܘܦܵܪܹ݁ܩ ܠܗܘܿܢ ܡܸܛܠ ܕܣܲܒܲܪܘ ܒܹܗ.