Read Aramaic Peshita Psalms 38 Bible Online

Psalms 38 - Aramaic Peshita bible

Psalms 38

¹ܡܵܪܝܵܐ ܠܵܐ ܒܪܘܼܓ̣ܙܵܟ݂ ܬܲܟ̇ܣܲܢܝ.

²ܘܐܵܦܠܵܐ ܒܚܸܡܬ̣ܵܟ݂ ܬܸܪܕܹ̇ܝܢܝ.

³ܡܸܛܠ ܕܓܹܐܪ̈ܲܝܟ ܐܸܬ̣ܩܲܒܲܥܘ ܒܝܼ.

⁴ܘܐܸܬ̇ܬ̇ܢܝܼܚܲܬ̤ ܐܝܼܕ݂ܵܟ݂ ܥܠܲܝ.

⁵ܠܲܝܬ̇ ܫܠܵܡܵܐ ܠܒܸܣܪ̱ܝ ܡ̣ܢ ܩܕ݂ܵܡ ܚܸܡܬ̣ܵܟ݂.

⁶ܘܠܲܝܬ̇ ܫܠܵܡܵܐ ܠܓܲܪ̈ܡܲܝ ܡ̣ܢ ܩܕ݂ܵܡ ܚܛܵܗܲܝ̈.

⁷ܡܸܛܠ ܕܣܲܟ̣̈ܠܘܵܬ̣ܝ ܥܒ݂ܲܪ ܠܪܹܫܝ.

⁸ܘܐܲܝܟ݂ ܡܲܘܒ̇ܠܵܐ ܝܲܩܝܼܪܬܵܐ ܝܑܼܩܲܪ ܠܝܼ.

⁹ܣܪ݂ܝܼ ܘܐܸܬ̣ܡ̱ܣܝܼ ܚܒ̣ܵܪ̈ܵܬ̣ܝ.

¹⁰ܡ̣ܢ ܩܕ݂ܵܡ ܣܲܟ̣̈ܠܘܵܬ̣ܝ ܙܵܥܹ̇ܬ̣ ܛܵܒ̣.

¹¹ܘܟ̣ܠܹܗ ܝܲܘܡܵܐ ܒܲܟ̣ܡܝܼܪܘܼܬ̣ܵܐ ܗܲܠ̇ܟܹܬ̣.

¹²ܡܸܛܠ ܕܩܘܼܪ̈ܨܠܲܝ ܐܸܬ̣ܡܠܝܼܘ ܙܲܘܥ̱ܬ̣ܵܐ.

¹³ܘܠܲܝܬ̇ ܫܠܵܡܵܐ ܠܒܸܣܪ̱ܝ.

¹⁴ܙܵܥܹ̇ܬ̣ ܘܐܸܬ̇ܕ̇ܘܝܼܬ̣ ܛܵܒ̣.

¹⁵ܘܢܵܗܹ݁ܓ̣ ܗ̄ܘܹ̇ܝܬ̣ ܡ̣ܢ ܢܸܗܡ̱ܬܹܗ ܕܠܹܒ̇ܝ.

¹⁶ܡܵܪܝܵܐ ܩܕ݂ܵܡܲܝܟ ܗ̄ܝ̣ ܟܠܵܗ̇ ܪܸܓܲܬ̣ܝ.

¹⁷ܘܬܸܢ̈ܚܵܬ̣ܝ ܡܸܢܵܟ݂ ܠܵܐ ܡܛܲܫ̈ܝܵܢ.

¹⁸ܠܹܒ̇ܝ ܐܸܬ̣ܗ̱ܦܸܟ ܘܚܲܝܠ̱ܝ ܫܲܒ̣ܩܲܢܝ.

¹⁹ܘܢܘܼܗܪܵܐ ܕܥܲܝܢܲܝ̈ ܠܵܐ ܗ̄ܘܵܐ ܠܘܵܬ̣ܝ.

²⁰ܪ̈ܵܚܡܲܝ ܘܚܲܒ̣ܪ̈ܲܝ ܠܘܼܩܒܲܠ ܟܹܐܒ̣ܝ ܩܵܡܘ.

²¹ܘܩܲܪ̈ܝܼܒܲܝ ܒܪܘܼܚܩܵܐ ܩܵܝܡ݁ܝܼܢ ܗ̄ܘܵܘ.

²²ܘܐܲܚܕ̇ܘܼܢܝ ܐܲܝܠܹܝܢ ܕܒ̣ܵܥܹܝ݁ܢ ܠܢܲܦ̮ܫܝ ܘܨܵܒܹܝ݁ܢ ܠܒ̣ܝܼܫܬܝ.

²³ܘܡܲܠܸܠܘ ܫܘܼܩܪܵܐ ܘܢܸܟ̣ܠܵܐ.

²⁴ܝܲܘܡܵܐ ܟܠܹܗ ܪܵܢܹܝ݁ܢ ܗ̄ܘܵܘ.

²⁵ܐܸܢܵܐ ܐܲܝܟ݂ ܚܲܪܫܵܐ ܠܵܐ ܫܵܡܲ݁ܥ ܗ̄ܘܹ̇ܝܬ̣.

²⁶ܘܐܲܝܟ݂ ܕܘܼܓܵܐ ܠܵܐ ܦܸܬ̣ܚܹ݁ܬ̣ ܦܘܼܡܝ.

²⁷ܘܲܗܘܹ̇ܝܬ̣ ܐܲܝܟ݂ ܓܲܒ̣ܪܵܐ ܕܠܵܐ ܫܵܡܲ݁ܥ.

²⁸ܘܠܲܝܬ̇ ܡܲܟ̇ܣܵܢܘܼܬ̣ܵܐ ܒܦܘܼܡܹܗ.

²⁹ܡܸܛܠ ܕܠܵܟ݂ ܣܲܟ̇ܝܼܬ̣ ܡܵܪܝܵܐ.

³⁰ܘܲܥܢܲܝܬܵܢܝ ܡܵܪܝܵܐ ܐܲܠܵܗܝ.

³¹ܡܸܛܠ ܕܐܸܡ݁ܪܹܬ̣ ܕܠܵܐ ܢܸܚܕ̇ܘܿܢ ܠܝܼ.

³²ܘܠܵܐ ܢܸܬ̇ܬ̇ܪܝܼܡܘܼܢ ܥܠܲܝ ܒܙܲܘܥ̱ܬ̣ܵܐ ܕܪܸ̈ܓ̣ܠܲܝ.

³³ܡܸܛܠ ܕܐܸܢܵܐ ܠܚܲܫܵܐ ܡܛܲܝܲܒ̣ ܐ̄ܢܵܐ.

³⁴ܘܟܹܐܒ̣ܝ ܠܘܼܩܒܲܠܝ ܒܟ̣ܠܙܒܲܢ.

³⁵ܡܸܛܠ ܕܐܹܚܲܘܹܝܟ݂ ܣܲܟ̣̈ܠܘܵܬ̣ܝ.

³⁶ܘܐܸܬ̇ܕܲܟܸ̇ܐ ܡ̣ܢ ܚܛܵܗܲܝ̈.

³⁷ܒܥܸܠܕ̇ܒ̣ܵܒܲܝ̈ ܐܸܬ̣ܥܲܫܲܢܘ ܘܲܚܙ݂ܵܘ.

³⁸ܘܲܣܓ̣ܝܼܘ ܣܵܢ̈ܐܲܝ ܕܫܘܼܩܪܵܐ.

³⁹ܦܲܪܥܘܼܢܝ ܒܝܼܫܬܵܐ ܚܠܵܦ ܛܵܒ̣ܬ̣ܵܐ.

⁴⁰ܘܣܲܩܪܘܼܢܝ ܥܲܠ ܕܲܒ̣ܥܹܝ݁ܬ̣ ܛܵܒ̣ܬ̣ܵܐ.

⁴¹ܠܵܐ ܬܸܫܒ̇ܩܲܢܝ ܡܵܪܝܵܐ ܐܲܠܵܗܝ ܘܠܵܐ ܬܲܪܚܸܩ ܡܹܢܝ.

⁴²ܐܸܠܵܐ ܟܲܬܲܪ ܠܥܘܼܕ݂ܪܵܢܝ ܘܲܦܪܘܿܩܲܝܢܝ.