Read Aramaic Peshita Psalms 40 Bible Online

Psalms 40 - Aramaic Peshita bible

Psalms 40

¹ܡܣܲܒܵܪܘܼ ܣܲܒ̇ܪܹܬ̣ ܒܡܵܪܝܵܐ.

²ܘܐܸܬ̣ܦܢܝܼ ܠܘܵܬ̣ܝ ܘܲܫܡܲܥ ܒܵܥܘܼܬ̣ܝ.

³ܘܐܲܣܩܲܢܝ ܡ̣ܢ ܓܘܼܒܵܐ ܕܕ݂ܵܘܘܿܢܵܐ.

⁴ܘܡ̣ܢ ܣܝܵܢܵܐ ܕܲܚܒ̣ܵܠܵܐ.

⁵ܐܲܩܝܼܡ ܥܲܠ ܫܘܿܥܵܐ ܪܸ̈ܓ̣ܠܲܝ ܘܐܲܬ̣ܩܸܢ ܗܲܠ̈ܟ̣ܵܬ̣ܝ.

⁶ܝܲܗ̄ܒ̣ ܒܦܘܼܡܝ ܬܸܫܒ̇ܘܿܚܬܵܐ ܚܕܲܬܵܐ ܬܸܫܒ̇ܘܿܚܬܵܐ ܠܐܲܠܵܗܵܐ.

⁷ܕܢܸܚܙܘܿܢ ܣܲܓܝܼ̈ܐܹܐ ܘܢܸܚܕܘܿܢ.

⁸ܘܲܢܣܲܒ̇ܪܘܼܢ ܒܡܵܪܝܵܐ.

⁹ܛܘܼܒ̣ܵܘܗܝ ܠܒܲܪܢܵܫܵܐ ܕܥܲܠ ܫܡܹܗ ܕܡܵܪܝܵܐ ܬܟ̣ܝܼܠ.

¹⁰ܘܠܵܐ ܦܵܢܹ̇ܐ ܠܲܣܪܝܼܩܘܼܬ̣ܵܐ.

¹¹ܘܐܵܦܠܵܐ ܠܡܲܡܠܠܵܐ ܕܲܓܵܠܵܐ.

¹²ܣܲܓܝܼـ̈ܐܵܢ ܐܸܢܹܝܢ ܕܲܥ̣ܒܲܕ̇ܬ̇ ܡܵܪܝܵܐ ܐܲܠܵܗܲܢ.

¹³ܬܸܕ݂ܡܪ̈ܵܬ̣ܵܟ݂ ܘܡܲܚܫ̈ܒ̣ܵܬ̣ܵܟ݂ ܥܠܲܝܢ ܘܠܲܝܬ̇ ܐܲܟ̣ܘܵܬ̣ܵܟ݂.

¹⁴ܚܲܘ݁ܝܼܬ̣ ܘܐܹܡ݁ܪܹܬ̣ ܘܣܲܓܝܼ̈ܐܵܢ ܐܸܢܹܝܢ ܡ̣ܢ ܡܸܢܝܵܢܵܐ.

¹⁵ܒܕܸܒ̣ܚܹ̈ܐ ܘܩܘܼܪ̈ܒܵܢܹܐ ܠܵܐ ܨܒ݂ܲܝܬ̇.

¹⁶ܐܸܕ݂ܢܹ̈ܐ ܕܹܝܢ ܢܲܩܸܒ̣ܬ̇ ܠܝܼ.

¹⁷ܘܝܲܩ̈ܕܹ̇ܐ ܫܲܠܡܹ̈ܐ ܕܲܚܠܵܦ ܚܛܵܗܹ̈ܐ ܠܵܐ ܫܐܸܠ̣ܬ̇.

¹⁸ܗܵܝܕܹܝܢ ܐܸܡ݁ܪܹܬ̣ ܕܗܵܐ ܐܸܬܹܝ݁ܬ̣.

¹⁹ܕܲܒ̣ܪܹܫ ܟܬ̣ܵܒܹ̈ܐ ܟܬ̣ܝܼܒ̣ ܥܠܲܝ.

²⁰ܠܡܸܥܒܲܕ݂ ܨܸܒ̣ܝܵܢܵܟ݂ ܐܲܠܵܗܵܐ ܨܒܹ݁ܝܬ̣.

²¹ܘܢܵܡܘܿܣܵܟ݂ ܒܓ̣ܵܘ ܟܲܪܣܝ.

²²ܣܲܒ̇ܪܹܬ̣ ܙܲܕܝܼܩܘܼܬ̣ܵܟ݂ ܒܥܹܕ̄ܬܵܐ ܪܲܒ̇ܬ̣ܵܐ.

²³ܘܣܸܦ̈ܘܵܬ̣ܝ ܠܵܐ ܟܠܹ݁ܝܬ̣.

²⁴ܡܵܪܝܵܐ ܐܲܢ̄ܬ̇ ܝܵܕܲܥ ܐܲܢ̄ܬ̇.

²⁵ܕܠܵܐ ܛܲܫ݁ܝܼܬ̣ ܙܲܕܝܼܩܘܼܬ̣ܵܟ݂ ܒܓ̣ܵܘ ܠܹܒܝ.

²⁶ܐܸܠܵܐ ܦܘܼܪܩܵܢܵܟ݂ ܘܗܲܝܡܵܢܘܼܬ̣ܵܟ݂ ܐܸܡ݁ܪܹܬ̣.

²⁷ܘܠܵܐ ܛܲܫܝܼ݁ܬ̣ ܛܲܝܒ̇ܘܼܬ̣ܵܟ݂ ܘܗܲܝܡܵܢܘܼܬ̣ܵܟ݂ ܡ̣ܢ ܥܹܕ̄ܬܵܐ ܪܲܒܬ̣ܵܐ.

²⁸ܐܵܦ ܐܲܢ̄ܬ ܡܵܪܝܵܐ ܠܵܐ ܬܸܟ̣ܠܸܐ ܡܹܢܝ ܪ̈ܲܚܡܲܝܟ.

²⁹ܐܸܠܵܐ ܪ̈ܲܚܡܲܝܟ ܘܗܲܝܡܵܢܘܼܬ̣ܵܟ݂ ܒܟ̣ܠܙܒܲܢ ܢܢܲܛܪܘܼܢܵܢܝ.

³⁰ܡܸܛܠ ܕܚܲܕ݂ܪ̈ܵܢܝ ܒܝܼ̈ܫܵܬ̣ܵܐ ܕܠܵܐ ܡܸܢܝܵܢ.

³¹ܘܐܲܕ݂ܪ̱ܟ̣ܘܼܢܝ ܚܛܵܗܲܝ̈ ܘܠܵܐ ܐܸܫܟ݁ܚܹܬ̣ ܠܡܸܚܙܵܐ.

³²ܘܲܥ݂ܫܸܢܘ ܡ̣ܢ ܣܲܥܪܵܐ ܕܪܹܫܝ ܘܠܹܒ̇ܝ ܫܲܒ̣ܩܲܢܝ.

³³ܨܒ̣ܝܼ ܡܵܪܝܵܐ ܠܲܡܦܲܨܵܝܘܼܬ̣ܵܢܝ.

³⁴ܡܵܪܝܵܐ ܠܥܘܼܕ݂ܪܵܢܝ ܟܲܬܲܪ.

³⁵ܢܸܒ̣ܗ̱ܬ̣ܘܼܢ ܘܢܸܚܦܪܘܼܢ ܐܲܝܠܹܝܢ ܕܒ̣ܵܥܹܝ݁ܢ ܠܡܸܩܛܲܠ ܠܢܲܦ̮ܫܝ.

³⁶ܢܸܗܦܟ̣ܘܼܢ ܠܒܸܣܬܲܪܗܘܿܢ ܘܢܸܚܦܪܘܼܢ.

³⁷ܐܲܝܠܹܝܢ ܕܨܵܒܹܝ݁ܢ ܠܒ̣ܝܼܫܬܝ.

³⁸ܢܸܬ̣ܡ̱ܗܘܼܢ ܒܬܸܢܝܵܐ ܕܒܸܗܬܲܬ̣ܗܘܿܢ.

³⁹ܐܲܝܠܹܝܢ ܕܐܸܡܲܪ݂ܘ ܥܠܲܝ ܐܹܗܹܐ ܐܹܗܹܐ.

⁴⁰ܢܸܚܕ̇ܘܿܢ ܒܵܟ݂ ܟܠ ܕܒ̣ܵܥܹܝ݁ܢ ܠܵܟ݂.

⁴¹ܘܢܹܐܡܪܘܼܢ ܒܟ̣ܠܙܒܲܢ ܕܪܲܒ̇ܘܼ ܐܲܠܵܗܵܐ.

⁴²ܐܲܝܠܹܝܢ ܕܪܵܚܡ݁ܝܼܢ ܦܘܼܪܩܵܢܵܟ݂.

⁴³ܘܐܸܢܵܐ ܡܸܣܟܹ̇ܢܵܐ ܐ̄ܢܵܐ ܘܒ̣ܵܝܫܵܐ.

⁴⁴ܡܵܪܝ ܐܸܬ̣ܚܲܫܲܒ̣ܘ ܥܠܲܝ.

⁴⁵ܡܥܲܕ̇ܪܵܢܝ ܐܲܢ̄ܬ̇ ܘܲܡܦܲܨܝܵܢܝ ܐܲܠܵܗܝ ܠܵܐ ܬܲܘܚܲܪ.