Read Aramaic Peshita Psalms 41 Bible Online

Psalms 41 - Aramaic Peshita bible

Psalms 41

¹ܛܘܼܒ̣ܵܘܗܝ ܠܡܲܢ ܕܚܵܐܲܪ ܒܡܸܣܟܹ̇ܢܵܐ.

²ܒܝܲܘܡܵܐ ܕܒ̣ܝܼܫܬܵܐ ܢܦܲܠܛܝܼܘܗܝ ܡܵܪܝܵܐ.

³ܡܵܪܝܵܐ ܢܢܲܛܪܝܼܘܗܝ ܘܢܲܚܹܝܘܗܝ ܘܢܲܛܐܸܒ̣ ܠܹܗ ܒܐܲܪܥܵܐ.

⁴ܘܠܵܐ ܢܲܫܠ̱ܡܝܼܘܗܝ ܠܲܒ̣ܥܸܠܕ̇ܒ̣ܵܒ̣ܵܘ̈ܗܝ.

⁵ܡܵܪܝܵܐ ܢܣܲܡܟ̣ܝܼܘܗܝ ܥܲܠ ܥܲܪܣܵܐ ܕܟܹܐܒ̣ܵܘ̈ܗܝ.

⁶ܘܟ̣ܠܹܗ ܡܲܫܟ̇ܒܹܗ ܗܦܲܟ݂ ܒܟ̣ܘܼܪܗܵܢܹܗ.

⁷ܐܸܢܵܐ ܐܸܡܪܹܬ̣ ܕܐܲܢ̄ܬܘܼ ܡܵܪܝ ܪܲܚܸܡܥܠܲܝ.

⁸ܘܐܲܣܵܗ̇ ܠܢܲܦ̮ܫܝ ܡܸܛܠ ܕܲܚܛܹܝܬ̣ ܠܵܟ݂.

⁹ܒܥܸܠܕ̇ܒ̣ܵܒܲܝ̈ ܐܸܡܲܪܘ ܥܠܲܝ ܒܝܼܫܬܵܐ.

¹⁰ܐܸܡܲܬ̣ܝ ܕܹܝܢ ܡ̣ܝܼܬ̣ ܘܐܸܒܲܕ݂ ܫܡܹܗ.

¹¹ܘܐܸܡܲܬ̣ܝ ܕܐܵܬܹܝ݁ܢ ܗ̄ܘ̣ܵܘ ܠܡܸܚܙܝܲܢܝ.

¹²ܕܲܓܵܠܘܼܬ̣ܵܐ ܡܡܲܠܠܝܼܢ ܗ̄ܘ̣ܵܘ.

¹³ܘܲܒ̣ܠܸܒ̇ܗܘܿܢ ܚܵܫܠ݁ܝܼܢ ܗ̄ܘܼܵܘ ܒܝܼܫܬܵܐ.

¹⁴ܢܵܦܩܝܼ݁ܢ ܗ̄ܘ̣ܵܘ ܠܫܘܼܩܵܐ ܘܲܡܡܲܠܠܝܼܢ.

¹⁵ܐܸܬ̣ܠܲܚܲܫܘ ܥܠܲܝ ܐܲܟ̣ܚ̄ܕ݂ܵܐ ܟܠܗܘܿܢ ܣܵܢ̈ܐܲܝ.

¹⁶ܘܐܸܬ̣ܚܲܫܲܒ̣ܘ ܥܠܲܝ ܒܝܼܫܬܵܐ.

¹⁷ܒܡܸܠܬ̣ܵܐ ܕܥܲܘܠܵܐ ܪܵܢܹܝ݁ܢ ܗ̄ܘ̣ܵܘ.

¹⁸ܡܸܟܹ̇ܝܠ ܕܲܫܟ݂ܸܒ̣ ܠܵܐ ܡܲܘܣܸܦ ܠܲܡܩܵܡ.

¹⁹ܐܵܦ ܓܲܒ̣ܪܵܐ ܫܵܐܹ݁ܠ ܫܠܵܡܝ ܕܲܬ̣ܟ̣ܝܼܠ ܐ̄ܢܵܐ ܥܠܵܘܗܝ.

²⁰ܐܵܟܹܠ݁ ܠܲܚܡܝ ܕܲܬ̣ܟ̣ܝܼܠ ܐ̄ܢܵܐ ܥܠܵܘܗܝ ܣܲܓܝܼ ܐܸܬ̣ܢܟܸܠ ܥܠܲܝ.

²¹ܘܐܲܢ̄ܬ̇ ܡܵܪܝܵܐ ܪܲܚܸܡܥܠܲܝ.

²²ܘܐܲܩܝܼܡܲܝܢܝ ܘܐܸܦܪܘܿܥ ܐܸܢܘܿܢ.

²³ܒܗܵܕܹܐ ܝܸܕ݂ܥܥ̇ܬ̣ ܕܨܵܒܹܐ ܐܲܢ̄ܬ̇ ܒܝܼ.

²⁴ܡܸܛܠ ܕܠܵܐ ܡܲܒ̣ܐܸܫ ܠܝܼ ܒܥܸܠܕ̇ܒ̣ܵܒ̣ܝ.

²⁵ܠܝܼ ܕܹܝܢ ܒܬܲܡܝܼܡܘܼܬ̣ܝ ܣܲܡܸܟ̣ܬܵܢܝ.

²⁶ܘܐܲܩܝܼܡܬܵܢܝ ܩܕ݂ܵܡܲܝܟ ܠܥܵܠܲܡ.

²⁷ܒܪܝܼܟ̣ܘܼ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

²⁸ܡ̣ܢ ܥܵܠܲܡ ܘܲܥܕܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ.