Read Aramaic Peshita Psalms 42 Bible Online

Psalms 42 - Aramaic Peshita bible

Psalms 42

¹ܐܲܝܟ݂ ܐܲܝܠܵܐ ܕܓ݂ܵܥܹܐ݁ ܥܲܠ ܦܨܝܼܕ݂ܵܐ ܕܡܲܝ̈ܵܐ.

²ܗܵܟܲܢ ܐܵܦ ܢܲܦ̮ܫܝ ܓܵܥ̇ܝܵܐ ܠܘܵܬ̣ܵܟ݂ ܡܵܪܝܵܐ.

³ܨܲܗܝܵܐ ܗ̄ܝ̣ ܠܵܟ݂ ܢܲܦ̮ܫܝ ܐܲܠܵܗܵܐ ܚܲܝܵܐ.

⁴ܕܐܸܡܲܬ̣ܝ ܐܹܬܸܐ ܘܐܸܚܙܸܐ ܐܲܦܲܝ̈ܟ.

⁵ܐܲܠܵܗܵܐ ܗ̤ܘܵܬ̣ ܠܝܼ ܕܸܡܥܲܬ̣ܝ ܡܹܐܟ̣ܘܼܠܬܵܐ.

⁶ܒܐܝܼܡܵܡܵܐ ܘܲܒ̣ܠܸܠܝܵܐ.

⁷ܟܲܕ݂ ܐܵܡܪܝܼܢ ܗ̄ܘ̣ܵܘ ܟܠܝܘܿܡ ܐܲܝܟܵܘ ܐܲܠܵܗܵܟ݂.

⁸ܗܵܠܹܝܢ ܐܸܬ̇ܕܲܟ̣ܪܹܬ̣ ܘܐܸܬ̇ܛܲܪܦܲܬ̤ ܢܲܦ̮ܫܝ.

⁹ܡܸܛܠ ܕܐܸܥܒܲܪ ܒܣܸܬܵܪܵܟ݂ ܥܲܫܝܼܢܵܐ.

¹⁰ܥܕܲܡܵܐ ܠܒܲܝܬܹܗ ܐܲܠܵܗܵܐ.

¹¹ܒܩܵܠܵܐ ܕܬܸܫܒ̇ܘܿܚܬܵܐ ܘܲܕ̇ܬ݂ܲܘܕܝܼܬ̣ܵܐ ܣܲܓܝܼ̈ܐܹܐ ܚܵܕܹܝ݁ܢ.

¹²ܠܡܵܢܵܐ ܡܸܬ̇ܛܲܪܦܲܬ̇ܝ ܢܲܦ̮ܫܝ ܘܲܠܡܵܢܵܐ ܬܲܡܝܼܗܲܬ̇ܝ.

¹³ܣܲܟܵܝ ܠܐܲܠܵܗܵܐ ܡܸܛܠ ܕܬ̣ܘܼܒ̣ ܐܲܘܕܸ̇ܐ ܠܹܗ.

¹⁴ܠܦܵܪܘܿܩܵܐ ܕܐܲܦܲܝ̈ ܘܐܲܠܵܗܝ.

¹⁵ܥܠܲܝ ܢܲܦ̮ܫܝ ܐܸܬ̇ܛܲܪܦܲܬ̤.

¹⁶ܡܸܛܠ ܗܵܢܵܐ ܐܸܬ̇ܕ̇ܟܲܪܬܵܟ݂ ܡ̣ܢ ܐܲܪܥܵܐ ܕܝܘܿܪܕܢܲܢ.

¹⁷ܡ̣ܢ ܚܸܪܡܘܿܢ ܘܡ̣ܢ ܛܘܼܪܵܐ ܙܥܘܿܪܵܐ.

¹⁸ܬܗܘܿܡܵܐ ܠܲܬ̣ܗܘܿܡܵܐ ܩܵܪܹܐ.

¹⁹ܩܵܠܵܐ ܠܩܵܠܵܐ ܕܡܲـ̈ܝܵܐ ܕܢܵܣܟܲܝ̈ܟ.

²⁰ܟܠܗܘܿܢ ܡܲܚܫܘܼܠܲܝ̈ܟ ܘܓܲܠܠܲܝ̈ܟ ܥܠܲܝ ܥܒܲܪ݂ܘ.

²¹ܒܐܝܼܡܵܡܵܐ ܢܸܦܩܘܿܕ݂ ܡܵܪܝܵܐ ܪ̈ܲܚܡܵܘܗܝ.

²²ܘܲܒ̣ܠܸܠܝܵܐ ܬܸܫ̈ܒ̇ܚܵܬܹܗ.

²³ܥܲܡܝ ܨܠܘܿܬ̣ܵܐ ܠܐܲܠܵܗܵܐ ܚܲܝܵܐ.

²⁴ܐܸܡܪܹܬ̣ ܠܐܲܠܵܗܵܐ ܕܲܠܡܵܢܵܐ ܛܥܲܝܬܵܢܝ.

²⁵ܘܲܠܡܵܢܵܐ ܡܗܲܠܸܟ݂ ܐ̄ܢܵܐ ܟܡܝܼܪܵܐܝܼܬ̣.

²⁶ܒܐܘܼܠܨܵܢܵܐ ܕܲܒ̣ܥܸܠܕ̇ܒ̣ܵܒܲܝ̈.

²⁷ܒܲܬ̣ܒ̣ܵܪܵܐ ܕܓܲܪ̈ܡܲܝ ܚܲܣܕ݂ܘܼܢܝ ܒܥܸܠܕ̇ܒ̣ܵܒܲܝ̈.

²⁸ܘܐܵܡ̇ܪܝܼܢ ܗ̄ܘܵܘ ܠܝܼ ܟܠܝܘܿܡ ܐܲܝܟܵܘ ܐܲܠܵܗܵܟ݂.

²⁹ܠܡܵܢܵܐ ܡܸܬ̇ܛܲܪܦܲܬ̇ܝ ܢܲܦ̮ܫܝ ܘܲܠܡܵܢܵܐ ܬܲܡܝܼܗܲܬ̇ܝ.

³⁰ܣܲܟܵܝ ܠܐܲܠܵܗܵܐ ܡܸܛܠ ܕܬ̣ܘܼܒ̣ ܐܲܘܕܸ̇ܐ ܠܹܗ.

³¹ܠܦܵܪܘܿܩܵܐ ܕܐܲܦܲܝ̈ ܘܐܲܠܵܗܝ.