Read Aramaic Peshita Psalms 44 Bible Online

Psalms 44 - Aramaic Peshita bible

Psalms 44

¹ܐܲܠܵܗܵܐ ܫܡܲܥ݂ܢܲܢ ܒܐܸܕ݂ܢܲܝ̈ܢ.

²ܘܐܵܦ ܐܲܒ̣ܗܲܝ̈ܢ ܐܸܫܬܲܥܝܼܘ ܠܲܢ.

³ܡܸܕܸ̇ܡ ܕܲܥܒܲܕ̇ܬ̇ ܒܝܵܘ̈ܡܲܝܗܘܿܢ.

⁴ܒܝܵܘ̈ܡܵܬ̣ܵܐ ܩܲܕ݂ܡܵܝܹ̈ܐ.

⁵ܐܝܼܕ݂ܵܟ݂ ܐܲܘܒ̇ܕܲܬ̤ ܠܥܲܡܡܹ̈ܐ ܘܲܢܨ݂ܲܒ̣ܬ̇ ܐܸܢܘܿܢ.

⁶ܘܐܲܒ̣ܐܸܫܬ̇ ܠܡܲܠ̈ܟ̇ܘܵܬ̣ܵܐ ܘܫܲܪܲܪܬ̇ ܐܸܢܘܿܢ.

⁷ܡܸܛܠ ܕܠܵܐ ܗ̄ܘ̣ܵܐ ܒܚܲܪܒ̇ܗܘܿܢ ܝܑܼܪܸܬ̣ܘ ܐܲܪܥܵܐ.

⁸ܘܐܵܦܠܵܐ ܕܪܵܥܗܘܿܢ ܦܪܲܩ ܐܸܢܘܿܢ.

⁹ܐܸܠܵܐ ܝܲܡܝܼܢܵܟ݂ ܘܲܕ݂ܪܵܥܵܟ݂.

¹⁰ܘܢܘܼܗܪܵܐ ܕܐܲܦܲܝ̈ܟ ܕܲܨܒܲܝܬ̇ ܒܗܘܿܢ.

¹¹ܐܲܢ̄ܬܘܼ ܐܲܠܵܗܵܐ ܡܲܠܟܝ.

¹²ܕܲܦܩܲܕ̇ܬ̇ ܥܲܠ ܦܘܼܪܩܵܢܹܗ ܕܝܲܥܩܘܿܒ̣.

¹³ܒܵܟ݂ ܢܕܲܩܲܪ ܠܲܒ̣ܥܸܠܕ̇ܒ̣ܵܒܲܝ̈ܢ.

¹⁴ܘܡܸܛܠ ܫܡܵܟ݂ ܢܕ݂ܘܼܫ ܠܣܵܢܐܲܝ̈ܢ.

¹⁵ܡܸܛܠ ܕܠܵܐ ܗ̄ܘ̣ܵܐ ܥܲܠ ܩܸܫ̈ܬܵܬܲܢ ܬܟ̣ܝܼܠܝܼܢܲܢ.

¹⁶ܘܐܵܦܠܵܐ ܥܲܠ ܙܲܝܢܲܢ ܕܢܸܦܪܩܲܢ.

¹⁷ܐܲܢ̄ܬ̇ܘܼ ܦܪܲܩܬܵܢ ܡ̣ܢ ܣܵܢ̈ܐܲܝܢ.

¹⁸ܘܐܲܒ̣ܗܸܬ̇ܬ̇ ܠܲܒ̣ܥܸܠܕܒ̣ܵܒܲܝ̈ܢ.

¹⁹ܫܲܒܲܚܢܵܢ ܐܲܠܵܗܵܐ ܟܠܹܗ ܝܲܘܡܵܐ.

²⁰ܘܠܲܫܡܵܟ݂ ܠܥܵܠܲܡ ܢܲܘܕܸ̇ܐ.

²¹ܘܗܵܫܵܐ ܛܥܲܝܬܵܢ ܘܐܲܒ̣ܗܸܬ̇ܬܵܢ.

²²ܘܠܵܐ ܢܵܦܹܩ ܐܲܢ̄ܬ̇ ܒܚܲܝܠܲܢ.

²³ܐܸܠܵܐ ܐܲܗܦܸܟ̣ܬܵܢ ܠܒܸܣܬܪܲܢ ܘܒܲܙܘܼܢ ܒܥܸܠܕܒ̣ܵܒܲܝ̈ܢ.

²⁴ܝܲܗ̄ܒ̣ܬܵܢ ܐܲܝܟ݂ ܥܵـ̈ܢܵܐ ܠܡܹܐܟ̣ܘܼܠܬܵܐ.

²⁵ܘܒܲܕܲܪܬܵܢ ܒܹܝܬ̣ ܥܲܡܡܹ̈ܐ.

²⁶ܙܲܒܸܢܬ̇ ܠܥܲܡܵܟ݂ ܕܠܵܐ ܕܡܲـ̈ܝܵܐ.

²⁷ܘܠܵܐ ܐܲܣܓ̇ܝܼܬ̇ ܚܘܼܠܵܦܗܘܿܢ.

²⁸ܥܒܲܕ̇ܬܵܢ ܚܸܣܕܵܐ ܠܲܫܒ̣ܵܒܲܝ̈ܢ.

²⁹ܘܡܘܼܝܵܩܵܐ ܘܒ̣ܘܼܙܵܚܵܐ ܠܐܲܝܠܹܝܢ ܕܲܚܕ݂ܵܪܲܝܢ ܐܸܢܘܿܢ.

³⁰ܥܒܲܕ̇ܬܵܢ ܠܡܲܬ̣ܠܵܐ ܒܹܝܬ̣ ܥܲܡܡܹ̈ܐ.

³¹ܘܲܢܝܵܕ݂ܵܐ ܕܪܹܫܵܐ ܒܐܸܡ̈ܘܵܬ̣ܵܐ.

³²ܟܠܹܗ ܝܲܘܡܵܐ ܒܸܗܬܲܬ̣ܝ ܩܕ݂ܵܡܲܝ ܗ̄ܝ̣.

³³ܘܒܸܗܬ̇ܬ̣ܵܐ ܕܐܲܦܲܝ̈ ܟܲܣܝܵܬܲܢܝ.

³⁴ܡ̣ܢ ܩܵܠܵܐ ܕܲܡܚܲܣܸܕ݂ ܘܲܡܓܲܕܸܦ.

³⁵ܘܡ̣ܢ ܩܕ݂ܵܡ ܒܥܸܠܕ̇ܒ̣ܵܒ̣ܵܐ ܕܡܸܬ̣ܢܲܩܲܡ.

³⁶ܗܵܠܹܝܢ ܟܠܗܹܝܢ ܓܕܲܫ ܠܲܢ ܘܠܵܐ ܛܥܲܝܢܵܟ݂.

³⁷ܘܠܵܐ ܕܲܓܸܠܢܲܢ ܒܲܩܝܵܡܵܟ݂.

³⁸ܘܠܵܐ ܗܦܲܟ̣ܢ ܠܒܸܣܬ̇ܪܲܢ.

³⁹ܘܠܵܐ ܐܲܗܦܸܟ̣ܢ ܫܒ̣ܝܼ̈ܠܲܝܢ ܡ̣ܢ ܐܘܼܪܚܵܟ݂.

⁴⁰ܡܸܛܠ ܕܡܲܟܸܟ̣ܬܵܢ ܒܐܲܬ̣ܪܵܐ ܬܸܢܝܵܢܵܐ.

⁴¹ܘܟܲܣܝܼܬܵܢ ܒܛܸܠܵܠܲܝ̈ ܡܲܘܬܵܐ.

⁴²ܘܠܵܐ ܛܥܲܝܢ ܫܡܹܗ ܕܐܲܠܵܗܲܢ.

⁴³ܘܠܵܐ ܦܫܲܛܢ ܐܝܼ̈ܕܲܝܢ ܠܘܵܬ̣ ܐܲܠܵܗܹ̈ܐ ܢܘܼܟ̣ܪ̈ܵܝܹܐ.

⁴⁴ܐܲܠܵܗܵܐ ܗ̄ܘ̣ ܒܵܨܹ̇ܐ ܠܵܗ̇ ܠܗܵܕܹܐ.

⁴⁵ܡܸܛܠ ܕܗ̤ܘ ܝܵܕܲܥ ܡܲܚܫ̈ܒ̣ܵܬܹܗ ܕܠܸܒܵܐ.

⁴⁶ܡܸܛܠܵܬ̣ܵܟ݂ ܐܸܬ̣ܩܲܛܠ̱ܢ ܟܠܝܘܿܡ.

⁴⁷ܘܐܸܬ̣ܚܫܸܒ̣ܢ ܐܲܝܟ݂ ܥܵـ̈ܢܵܐ ܠܢܸܟ̣ܣܬ̣ܵܐ.

⁴⁸ܐܸܬ̇ܬ̇ܥܝܼܪ ܘܠܵܐ ܬܸܕ݂ܡܲܟ݂ ܡܵܪܝܵܐ.

⁴⁹ܥܗܲܕܲܝܢ ܘܠܵܐ ܬܸܛܥܹܝܢ.

⁵⁰ܘܠܵܐ ܬܲܗܦܸܟ݂ ܐܲܦܲܝ̈ܟ ܡܸܢܲܢ.

⁵¹ܘܠܵܐ ܬܸܛܥܸܐ ܡܘܼܟܵܟܲܢ ܘܐܘܼܠܨܵܢܲܝ̈ܢ.

⁵²ܡܸܛܠ ܕܡܸܟܲܬ̤ ܥܲܠ ܥܲܦܪܵܐ ܢܲܦ̮ܫܲܢ.

⁵³ܘܕܸܒ̣ܩܲܬ̤ ܟܲܪܣܲܢ ܠܐܲܪܥܵܐ.

⁵⁴ܩܘܼܡ ܥܲܕܲܪܲܝܢ ܘܲܦܪܘܿܩܲܝܢ ܡܸܛܠ ܪ̈ܲܚܡܲܝܟ.