Read Aramaic Peshita Psalms 51 Bible Online

Psalms 51 - Aramaic Peshita bible

Psalms 51

¹ܪܲܚܸܡܥܠܲܝ ܐܲܠܵܗܵܐ ܐܲܝܟ݂ ܛܲܝܒ̇ܘܼܬ̣ܵܟ݂.

²ܘܐܲܝܟ݂ ܣܘܿܓ̣ܐܵܐ ܕܪ̈ܲܚܡܲܝܟ ܥܛܝܼ ܚܛܵܗܲܝ̈.

³ܐܲܣܓܵܐ ܐܲܫܝܼܓܲܝܢܝ ܡ̣ܢ ܥܲܘܠܝ.

⁴ܘܡ̣ܢ ܚܛܵܗܲܝ̈ ܕܲܟܵܢܝ.

⁵ܡܸܛܠ ܕܣܲܟ݂ܠ̱ܘܵܬ̣ܝ ܝܵܕܲܥ ܐ̄ܢܵܐ.

⁶ܘܲܚܛܵܗܲܝ̈ ܠܘܼܩܒܲܠܝ ܐܸܢܘܿܢ ܒܟ̣ܠܙܒܲܢ.

⁷ܠܵܟ݂ ܒܲܠܚܘܿܕܲܝܟ ܚܛܹ݁ܝܬ̣.

⁸ܘܒ̣ܝܼ̈ܫܵܬ̣ܵܐ ܩܕ݂ܵܡܲܝܟ ܥܸܒ̣݁ܕܹ̇ܬ̣.

⁹ܡܸܛܠ ܕܬܸܙܕܲܕܲܩ ܒܡܸܠܬ̣ܵܟ݂ ܘܬܸܙܟܹ̇ܐ ܒܕ݂ܝܼܢܲܝ̈ܟ.

¹⁰ܡܸܛܠ ܕܲܒ̣ܥܲܘܠܵܐ ܐܸܬ̣ܒܲܛܢܹܬ̣ ܘܒܲܚܛܵܗܹ̈ܐ ܒܛܸܢܬܲܢܝ ܐܹܡܝ.

¹¹ܐܲܢ̄ܬ̇ ܕܹܝܢ ܒܩܘܼܫܬܵܐ ܨܒܲܝܬ̇.

¹²ܘܟܲܣ̈ܝܵܬ̣ܵܐ ܕܚܸܟ̣ܡܬ̣ܵܟ݂ ܐܲܘܕܲܥܬܵܢܝ.

¹³ܪܘܿܣ ܥܠܲܝ ܒܙܘܿܦܵܐ ܘܐܸܬ̇ܕܲܟܸܐ.

¹⁴ܚܲܠܸܠܲܝܢܝ ܒܹܗ ܡ̣ܢ ܬܲܠܓܵܐ ܐܸܚܘܲܪ.

¹⁵ܐܲܣܒܲܥܲܝܢܝ ܒܘܼܣܵܡܵܟ݂ ܘܚܲܕ݂ܘܼܬ̣ܵܟ݂.

¹⁶ܘܢܸܚܕ̇ܘܿܢ ܓܲܖ̈ܡܲܝ ܡܲܟ̇ܝܼܟܹ̈ܐ.

¹⁷ܐܲܗܦܸܟ݂ ܐܲܦܲܝ̈ܟ ܡ̣ܢ ܚܛܵܗܲܝ̈.

¹⁸ܘܟ̣ܠܗܹܝܢ ܣܲܟ̣ܠ̱ܘܵܬ̣ܝ ܥܛܝܼ.

¹⁹ܠܸܒܵܐ ܕܲܟ̣ܝܵܐ ܒܪܝܼ ܒܝܼ ܐܲܠܵܗܵܐ.

²⁰ܘܪܘܼܚܵܟ݂ ܬܩܲܢܬ̣ܵܐ ܚܲܕܸ̇ܬ̣ ܒܓ̣ܵܘܝ.

²¹ܠܵܐ ܬܸܫܕܹ̇ܝܢܝ ܡ̣ܢ ܩܕ݂ܵܡܲܝܟ.

²²ܘܪܘܼܚܵܟ݂ ܩܲܕܝܼܫܵܐ ܠܵܐ ܬܸܣܲܒ̣ ܡܹܢܝ.

²³ܐܸܠܵܐ ܐܲܗܦܸܟ݂ ܠܝܼ ܒܘܼܣܵܡܵܟ݂ ܘܦܘܼܪܩܵܢܵܟ݂.

²⁴ܘܪܘܼܚܵܟ݂ ܡܫܲܒܲܚܬܵܐ ܬܣܲܡܟܲܢܝ.

²⁵ܕܐܲܠܸܦ ܠܥܲܘܵܠܹ̈ܐ ܐܘܼܪܚܵܟ݂.

²⁶ܘܚܲܛܵܝܹ̈ܐ ܠܘܵܬ̣ܵܟ݂ ܢܸܬ̣ܦܢܘܿܢ.

²⁷ܦܲܨܵܢܝ ܡ̣ܢ ܕܡܵܐ ܐܲܠܵܗܝ ܐܲܠܵܗܵܐ ܕܙܲܕ̇ܝܼܩܘܼܬ̣ܝ.

²⁸ܘܲܢܫܲܒܲܚ ܠܸܫܵܢܝ ܙܲܕ̇ܝܼܩܘܼܬ̣ܵܟ݂.

²⁹ܡܵܪܝܵܐ ܦܬܲܚ ܠܝܼ ܣܸܦ̈ܘܵܬ̣ܝ.

³⁰ܘܦܘܼܡܝ ܢܲܦܸܩ ܬܸܫ̈ܒܚܵܬ̣ܵܟٍ.

³¹ܡܸܛܠ ܕܠܵܐ ܨܒ݂ܲܝܬ̇ ܒܕܸܒ̣ܚܹ̈ܐ.

³²ܘܐܵܦܠܵܐ ܒܝܲܩ̈ܕܹ̇ܐ ܫܲܠܡܹ̈ܐ ܐܸܬ̣ܪܲܥܝܼܬ̇.

³³ܕܸܒ̣ܚܵܘ̈ܗܝ ܕܐܲܠܵܗܵܐ ܪܘܼܚܵܐ ܗ̄ܝ̣ ܡܲܟ̇ܝܼܟ̣ܬܵܐ.

³⁴ܠܸܒܵܐ ܫܚܝܼܩܵܐ ܐܲܠܵܗܵܐ ܠܵܐ ܡܲܣܠܸܐ.

³⁵ܐܲܛܐܸܒ̣ ܒܨܸܒ̣ܝܵܢܵܟ݂ ܠܨܸܗܝܘܿܢ.

³⁶ܘܲܒ̣ܢܝܼ ܫܘܼܖܹ̈ܝܗ̇ ܕܐܘܿܪܸܫܠܸܡ.

³⁷ܗܵܝܕܹ̇ܝܢ ܬܸܨܛܒܸܐ ܒܕܸܒ̣ܚܹ̈ܐ ܕܩܘܼܫܬܵܐ ܘܲܒ̣ܝܲܩ̈ܕܹ̇ܐ ܫܲܠܡܹ̈ܐ.

³⁸ܘܗܵܝܕܹ̇ܝܢ ܢܲܣܩܘܼܢ ܬܲܘܖܹ̈ܐ ܥܲܠ ܡܲܕ݂ܒܚܵܟ݂.