Read Aramaic Peshita Psalms 55 Bible Online

Psalms 55 - Aramaic Peshita bible

Psalms 55

¹ܨܘܼܬ̣ ܐܲܠܵܗܵܐ ܨܠܘܿܬ̣ܝ ܘܠܵܐ ܬܲܗܡܸܐ ܡ̣ܢ ܒܵܥܘܼܬ̣ܝ.

²ܫܡܲܥܲܝܢܝ ܘܲܥܢܝܼܢܝ ܘܐܸܬ̣ܦܲܢ ܠܲܓ̣ܥܵܬ̣ܝ ܘܲܫܡܲܥܲܝܢܝ.

³ܡܸܛܠ ܒܥܸܠܕ̇ܒ̣ܵܒܲܝ̈ ܘܡܸܛܠ ܐܘܼܠܨܵܢܹܗ ܕܥܲܘܵܠܵܐ.

⁴ܡܸܛܠ ܕܲܨܠ̣ܵܘ ܥܠܲܝ ܥܲܘܵܠܹ̈ܐ ܘܣܲܩܪܘܼܢܝ.

⁵ܘܢܸܦܠܲܬ̤ ܒܝܼ ܕܸܚܠ̱ܬ̣ܵܐ.

⁶ܘܟܲܣܝܘܼܢܝ ܛܸܠܵܠܲܝ̈ ܡܲܘܬܵܐ.

⁷ܐܸܡ̇ܪܹܬ̣ ܡܲܢ ܕܹܝܢ ܝܲܗ̄ܒ̣ ܠܝܼ ܓܸܦܹ̈ܐ ܐܲܝܟ݂ ܕܝܲܘܢܵܐ.

⁸ܘܦܸܪܚܹ̇ܬ̣ ܘܫܸܟ̣ܢܹ݁ܬ̣ ܘܐܲܪܚܩܹ݁ܬ̣.

⁹ܘܦܸܪܚܹ̇ܬ̣ ܘܲܫܪܹܝ݁ܬ̣ ܒܡܲܕ݂ܒ̇ܪܵܐ.

¹⁰ܘܟܲܬ̇ܪܹܬ̣ ܠܡܲܢ ܕܲܡܦܲܨܸܐ ܠܝܼ ܡ̣ܢ ܪܘܼܚܵܐ ܕܥܲܠܥܵܠܵܐ.

¹¹ܛܲܒܲܥ ܡܵܪܝ ܗܘܼܦܵܟ̣ܵܐ ܕܠܸܫܵܢܲܝ̈ܗܘܿܢ.

¹²ܡܸܛܠ ܕܲܚܙܹ̇ܝܬ̣ ܚܸܪܝܵܢܵܐ ܘܕ݂ܝܼܢܵܐ ܒܲܩܪܝܼܬ̣ܵܐ.

¹³ܒܐܝܼܡܵܡܵܐ ܘܲܒ̣ܠܸܠܝܵܐ ܟܪܝܼܟ̣ܝܼܢ ܠܫܘܼܪܹ̈ܝܗ̇.

¹⁴ܥܲܘܠܵܐ ܘܫܘܼܩܪܵܐ ܒܓ̣ܵܘܵܗ̇ ܘܥܸܬܵܐ.

¹⁵ܘܠܵܐ ܥܵܢܹ̇ܕ݂ ܡ̣ܢ ܫܘܼܩܹ̈ܝܗ̇ ܬܘܼܟܵܐ ܘܢܸܟ̣ܠܵܐ.

¹⁶ܠܵܐ ܗ̄ܘ̣ܵܐ ܓܹܝܪ ܒܥܸܠܕ̇ܒ̣ܵܒ̣ܝ ܚܲܣܕܲܢܝ ܕܐܹܣܲܝܒܲܪ.

¹⁷ܘܐܵܦܠܵܐ ܣܲܢܐ̱ܝ ܐܸܬ̇ܬ̇ܪܝܼܡ ܥܠܲܝ ܕܐܸܛܫܸܐ ܡܸܢܹܗ.

¹⁸ܐܲܢ̄ܬ̇ܘܼ ܒܲܪܢܵܫܵܐ ܕܐܲܟ̣ܘܵܬ̣ܝ.

¹⁹ܩܲܪܝܼܒ̣ܝ ܘܪܵܚܹܡܝ.

²⁰ܕܐܲܟ̣ܚ̄ܕ݂ܵܐ ܠܥܸܣܢ ܫܵܪܘܼܬ̣ܵܐ ܒܒܲܝܬܹ̇ܗ ܕܐܲܠܵܗܵܐ.

²¹ܟܲܕ݂ ܡܗܲܠܟ̣ܝܼܢ ܗ̄ܘܲܝܢ ܒܐܵܘܝܘܼܬ̣ܵܐ.

²²ܐܲܝܬܵܐ ܥܠܲܝܗܘܿܢ ܡܲܘܬܵܐ.

²³ܘܢܸܚܬ̣ܘܼܢ ܟܲܕ݂ ܚܲܝܝܼܢ ܠܲܫܝܘܿܠ.

²⁴ܡܸܛܠ ܕܒ̣ܝܼܫܬܵܐ ܐܝܼܬ̣ ܒܓ̣ܵܘܗ̱ܘܿܢ.

²⁵ܐܸܢܵܐ ܕܹܝܢ ܠܐܲܠܵܗܵܐ ܐܸܩܪܸܐ ܘܐܲܠܵܗܵܐ ܢܸܦ̱ܪܩܲܢܝ.

²⁶ܒܪܲܡܫܵܐ ܘܲܒ̣ܨܲܦܪܵܐ ܘܲܒ̣ܛܲܗܪܵܐ.

²⁷ܐܸܪܢܸܐ ܘܐܹܡܲܪ ܘܐܲܫܡܲܥ ܩܵܠܝ.

²⁸ܦܲܨܵܗ̇ ܠܢܲܦ̮ܫܝ ܡ̣ܢ ܐܲܝܠܹܝܢ ܕܚܵܟ̣ܡܝܼܢ ܠܝܼ.

²⁹ܡܸܛܠ ܕܲܒ̣ܚܸܪܝܵܢܵܐ ܗܘ݀ܵܘ ܥܲܡܝ.

³⁰ܢܸܫܡܲܥ ܐܲܠܵܗܵܐ ܘܲܢܡܲܟܸ̇ܟ݂ ܐܸܢܘܿܢ.

³¹ܗܵܘ̇ ܕܐܝܼܬ̣ܵܘܗܝ ܡ̣ܢ ܩܕ݂ܵܡ ܥܵܠܡܹ̈ܐ.

³²ܠܲܝܬ̇ ܠܗܘܿܢ ܬܲܚܠܘܼܦܵܐ ܘܠܵܐ ܕܚܸܠ݂ܘ ܡ̣ܢ ܐܲܠܵܗܵܐ.

³³ܐܲܘܫܸܛܘ ܐܝܼܕ݂ܵܐ ܥܲܠ ܩܲܪܝܼܒܹܗ ܘܛܲܘܸܫܘ ܩܝܵܡܹܗ.

³⁴ܐܸܬ̇ܕܲܠܲܚܘ ܡ̣ܢ ܪܘܼܓ̣ܙܵܐ ܕܐܲܦܵܘ̈ܗܝ ܘܡ̣ܢ ܚܸܡܬ̣ܵܐ ܕܠܸܒܹ̇ܗ.

³⁵ܪ̈ܲܟ̇ܝܼܟ̣ܵܢ ܡܸܠܵܘ̈ܗܝ ܡ̣ܢ ܡܸܫܚܵܐ ܘܗܸܢܹܝܢ ܠܘܿܠ̈ܝܵܬ̣ܵܐ.

³⁶ܫܕ݂ܝܼ ܨܸܦܬ̣ܵܟ݂ ܥܲܠ ܡܵܪܝܵܐ ܘܗܘ̤ ܢܬܲܪܣܹܝܟ݂.

³⁷ܘܠܵܐ ܢܸܬܸ̇ܠ ܠܥܵܠܲܡ ܙܲܘܥ̱ܬ̣ܵܐ ܠܙܲܕ̇ܝܼܩܵܘ̈ܗܝ.

³⁸ܐܲܢ̄ܬ̇ ܕܹܝܢ ܐܲܠܵܗܵܐ ܐܲܚܸܬ̣ ܐܸܢܘܿܢ ܠܓ̣ܘܼܒܵܐ ܕܐܲܒ̣ܕܵܢܵܐ.

³⁹ܠܓܲܒ̣ܪܹ̈ܐ ܐܵܫܕܲܝ̈ ܕܡܵܐ ܘܢܵܟ̣ܠܲܝ̈ ܢܸܟ̣ܠܵܐ.

⁴⁰ܘܠܵܐ ܢܫܲܠܡܘܼܢ ܝܲܘܡܵܬ̣̈ܗܘܿܢ ܘܐܸܢܵܐ ܐܹܣܲܒܲܪ ܒܵܟ݂.