Read Aramaic Peshita Psalms 56 Bible Online

Psalms 56 - Aramaic Peshita bible

Psalms 56

¹ܪܲܚܸܡܥܠܲܝ ܐܲܠܵܗܵܐ ܡܸܛܠ ܕܕ݂ܵܫܲܢܝ ܒܲܪܢܵܫܵܐ.

²ܝܲܘܡܵܐ ܟܠܹܗ ܩܪܲܒ̣ܬ̣ܵܢܵܐ ܐܲܠܨܲܢܝ.

³ܕܵܫܘܼܢܝ ܒܥܸܠܕ̇ܒ̣ܵܒܲܝ̈ ܟܠܹܗ ܝܲܘܡܵܐ.

⁴ܡܸܛܠ ܕܣܘܿܓ̣ܐܵܐ ܕܲܩܪ̈ܲܒ̣ܬ̣ܵܢܹܐ ܐܸܬ̇ܬ̇ܪܝܼܡܘ ܥܠܲܝ.

⁵ܒܐܝܼܡܵܡܵܐ ܠܵܐ ܐܸܕ݂ܚܲܠ ܡܸܛܠ ܕܲܥܠܲܝܟܘܼ ܬܟ̣ܝܼܠ ܐ̄ܢܵܐ.

⁶ܒܐܲܠܵܗܵܐ ܐܸܫܬܲܒܲܚ ܒܐܲܠܵܗܵܐ ܣܲܒ݁ܪܹܬ̣ ܠܵܐ ܐܸܕ݂ܚܲܠ.

⁷ܡܵܢܵܐ ܥܵܒܸ݁ܕ݂ ܠܝܼ ܒܲܪܢܵܫܵܐ.

⁸ܟܠܹܗ ܝܲܘܡܵܐ ܡܸܬ̣ܡܲܠܟ̣ܝܼܢ ܗ̄ܘ̣ܵܘ ܥܠܲܝ.

⁹ܘܡܸܬ̣ܚܲܫܒ̣ܝܼܢ ܗ̄ܘ̣ܵܘ ܥܠܲܝ ܒܝܼܫܬܵܐ.

¹⁰ܢܸܛܫܘܼܢ ܘܢܸܥܡܪܘܼܢ ܘܗܸܢ̣ܘܿܢ ܥܸܩܒܲܝ̈ ܢܸܛܪܘܼܢ.

¹¹ܐܲܝܟ݂ ܕܣܲܟ̇ܝܼܘ ܠܢܲܦ̮ܫܝ ܘܐܸܡܲܪ݂ܘ.

¹²ܕܠܲܝܬ̇ ܠܹܗ ܡܦܲܨܝܵܢܵܐ.

¹³ܒܪܘܼܓ̣ܙܵܐ ܕܥܲܡܡܹ̈ܐ ܕܘܼܢ ܐܸܢܘܿܢ.

¹⁴ܐܲܠܵܗܵܐ ܬܲܘܕ̇ܝܼܬ̣ܝ ܚܲܘܝܼܬܵܟ݂.

¹⁵ܣܝܼܡ ܕܸܡܥܲܝ̈ ܩܕ݂ܵܡܲܝܟ ܘܲܒ̣ܣܸܦܪܵܟ݂.

¹⁶ܗܵܝܕܹ̇ܝܢ ܢܸܗܦܟ̣ܘܼܢ ܒܥܸܠܕ̇ܒ̣ܵܒܲܝ̈ ܠܒܸܣܬܲܪܗܘܿܢ.

¹⁷ܘܐܸܕܲܥ ܕܐܲܠܵܗܵܐ ܐܝܼܬ̣ ܠܝܼ.

¹⁸ܠܡܸܠܬܹܗ ܕܐܲܠܵܗܵܐ ܐܹܫܲܒܲܚ.

¹⁹ܒܐܲܠܵܗܵܐ ܬܟ̣ܝܼܠ ܐ̄ܢܵܐ ܠܵܐ ܐܸܕ݂ܚܲܠ.

²⁰ܡܵܢܵܐ ܥܵܒܸ݁ܕ݂ ܠܝܼ ܒܲܪܢܵܫܵܐ.

²¹ܠܵܟ݂ ܐܲܠܵܗܵܐ ܐܹܫܲܠܸܡ ܢܸܕ݂ܪ̈ܲܝ.

²²ܘܲܒ̣ܬܲܘܕ̇ܝܼܬ̣ܵܐ ܐܹܕܲܒܲܚ ܠܵܟ݂.

²³ܡܸܛܠ ܕܦܲܨܝܼܬ̇ ܢܲܦ̮ܫܝ ܡ̣ܢ ܡܲܘܬܵܐ.

²⁴ܘܪܸ̈ܓܠܲܝ ܡ̣ܢ ܫܲܪ̈ܥܵܬ̣ܵܐ.

²⁵ܕܐܸܫܦܲܪ ܩܕ݂ܵܡܲܝܟ ܐܲܠܵܗܵܐ ܒܐܲܪܥܵܐ ܕܚܲܝܹ̈ܐ.