Read Aramaic Peshita Psalms 58 Bible Online

Psalms 58 - Aramaic Peshita bible

Psalms 58

¹ܐܹܝܢ ܫܲܪܝܼܪܵܐܝܼܬ̣ ܙܲܕ̇ܝܼܩܘܼܬ̣ܵܐ ܡܡܲܠܠܝܼܢ ܐ̄ܢܬ̇ܘܿܢ.

²ܘܲܬ̣ܪܝܼܨܘܼܬ̣ܵܐ ܕܵܝ̇ܢܝܼܢ ܐ̄ܢܬ̇ܘܿܢ ܒܢܲܝ̈ܢܵܫܵܐ.

³ܗܵܐ ܟܠܟ̣ܘܿܢ ܥܲܘܠܵܐ ܡܡܲܠܠܝܼܢ ܐ̄ܢܬ̇ܘܿܢ ܒܐܲܪܥܵܐ.

⁴ܘܲܒ̣ܥܲܘܠܵܐ ܡܥܲܪ̈ܙܠܵܢ ܐܝܼܕܲܝ̈ܟ̇ܘܿܢ.

⁵ܐܸܬ̣ܦܪܸܫܘ ܥܲܘܵܠܹ̈ܐ ܡ̣ܢ ܟܲܪܣܵܐ.

⁶ܘܲܛܥ݂ܵܘ ܡ̣ܢ ܡܲܪܒ̇ܥܵܐ ܕܲܡܡܲܠܠܝܼܢ ܕܲܓܵܠܘܼܬ̣ܵܐ.

⁷ܚܸܡܬ̣ܗܘܿܢ ܐܲܝܟ݂ ܕܚܸܘܝܵܐ ܚܲܪܡܵܢܵܐ.

⁸ܘܐܲܝܟ݂ ܕܐܸܣܦܸܣ ܚܲܪܫܬ̣ܵܐ.

⁹ܕܲܡܣܲܟ̇ܪܵܐ ܐܸܕ݂ܢܹ̈ܝܗ̇ ܕܠܵܐ ܬܸܫܡܲܥ.

¹⁰ܩܵܠܵܐ ܕܠܵܚܘܿܫܵܐ ܘܲܕ݂ܚܲܒܵܪܵܐ ܘܲܕ݂ܚܲܟ̇ܝܼܡܵܐ.

¹¹ܐܲܠܵܗܵܐ ܢܬܲܒܲܪ ܫܸܢܲܝ̈ܗܘܿܢ ܒܦܘܼܡܗܘܿܢ.

¹²ܘܢܝܼܒܲܝ̈ܗܘܿܢ ܕܐܲܪ̈ܝܵܘܵܬ̣ܵܐ ܥܵܩܲܪ ܡܵܪܝܵܐ.

¹³ܢܸܣܬ̇ܠܘܼܢ ܐܲܝܟ݂ ܡܲܝ̈ܵܐ ܕܡܸܬ̣ܐܲܫܕ̇ܝܼܢ.

¹⁴ܘܢܸܫܕܸ̇ܐ ܓܹܐܪ̈ܵܘܗܝ ܥܕܲܡܵܐ ܕܲܢܣܘܼܦܘܼܢ.

¹⁵ܐܲܝܟ݂ ܫܥܘܿܬ̣ܵܐ ܕܡܸܬ̣ܦܲܫܪܵܐ ܘܢܵܦ݁ܠܵܐ ܡ̣ܢ ܩܕ݂ܵܡ ܢܘܼܪܵܐ ܢܸܬ̣ܚܲܪܒ̇ܘܼܢ.

¹⁶ܢܸܦܠܲܬ̤ ܢܘܼܪܵܐ ܘܠܵܐ ܚܙ݂ܵܘ ܫܸܡܫܵܐ ܘܠܵܐ ܐܸܣܬܲܟܲܠܘ.

¹⁷ܢܸܗܘܘܿܢ ܟܘܼܒܲܝ̈ܗܘܿܢ ܗܲܛܛܹ̈ܐ.

¹⁸ܘܪܘܼܓ̣ܙܵܐ ܢܕܲܠܲܚ ܐܸܢܘܿܢ.

¹⁹ܢܸܚܕܸ̇ܐ ܙܲܕ̇ܝܼܩܵܐ ܕܚܵܙܹ̇ܐ ܦܘܼܪܥܵܢܵܐ.

²⁰ܘܐܝܼܕ݂ܵܘ̈ܗܝ ܢܫܝܼܓ̣ ܒܲܕ݂ܡܹܗ ܕܪܲܫܝܼܥܵܐ.

²¹ܘܢܹܐܡܲܪ ܒܲܪܢܵܫܵܐ ܐܝܼܬ̣ ܗ̄ܘ̣ ܦܹܐܪܹ̈ܐ ܠܙܲܕ̇ܝܼܩܵܐ.

²²ܘܐܝܼܬ̣ ܐܲܠܵܗܵܐ ܕܲܢܕ݂ܘܼܢ ܐܸܢܘܿܢ ܒܐܲܪܥܵܐ.