Read Aramaic Peshita Psalms 59 Bible Online

Psalms 59 - Aramaic Peshita bible

Psalms 59

¹ܦܲܨܵܢܝ ܡ̣ܢ ܒܥܸܠܕ̇ܒ̣ܵܒܲܝ̈ ܐܲܠܵܗܵܐ.

²ܘܡ̣ܢ ܐܲܝܠܹܝܢ ܕܩܵܝ̇ܡܝܼܢ ܥܠܲܝ ܐܲܪܝܼܡܲܝܢܝ.

³ܦܲܨܵܢܝ ܡ̣ܢ ܥܵܒ̣ܕܲܝ̈ ܫܘܼܩܪܵܐ.

⁴ܘܡ̣ܢ ܓܲܒ̣ܪܹ̈ܐ ܐܵܫܕܲܝ̈ ܕܡܵܐ ܦܪܘܿܩܲܝܢܝ.

⁵ܡܸܛܠ ܕܗܸܢ̣ܘܿܢ ܟܡܸܢ̣ܘ ܠܢܲܦ̮ܫܝ.

⁶ܘܐܲܥܫܸܢܘ ܥܠܲܝ ܒܝܼܫܘܼܬ̣ܗܘܿܢ.

⁷ܠܵܐ ܒܣܲܟ̣̈ܠ̱ܘܵܬ̣ܝ ܘܠܵܐ ܒܲܚܛܵܗܲܝ̈ ܡܵܪܝ.

⁸ܕܠܵܐ ܒܣܲܟ̣ܠܘܼܬ̣ܵܐ ܪܗܸܛ̣ܘ ܥܠܲܝ ܘܐܸܬ̇ܛܲܝܲܒ̣ܘ ܥܠܲܝ.

⁹ܐܸܬ̇ܬ̇ܥܝܼܪ ܘܲܚܙܝܼ ܐܲܢ̄ܬ̇ ܡܵܪܝܵܐ ܐܲܠܵܗܵܐ ܚܲܝܠ̱ܬ̣ܵܢܵܐ.

¹⁰ܐܲܠܵܗܹܗ ܕܝܼܣܪܵܝܹܠ ܐܸܬ̇ܬ̇ܥܝܼܪ.

¹¹ܘܲܦܩܘܿܕ݂ ܠܟ̣ܠܗܘܿܢ ܥܲܡܡܹ̈ܐ.

¹²ܠܵܐ ܬܸܫܒ̇ܘܿܩ ܠܟ̣ܠܗܘܿܢ ܥܲܘܵܠܹ̈ܐ.

¹³ܢܸܗܦܟ̣ܘܿܢ ܒܪܲܡܫܵܐ ܘܲܢܥܲܘܘܿܢ ܐܲܝܟ݂ ܟܲܠ̈ܒܹ̇ܐ.

¹⁴ܘܢܸܬ̣ܟܲܪܟ̇ܘܼܢ ܡܕ݂ܝܼܢ̄ܬܵܐ.

¹⁵ܡܹܐܡܪܵܐ ܕܦܘܼܡܗܘܿܢ ܣܲܦ̮ܣܹܪܵܐ ܒܣܸܦ̈ܘܵܬ̣ܗܘܿܢ.

¹⁶ܘܐܵܡ̇ܪܝܼܢ ܡܲܢ̣ܘܼ ܫܵܡܲ݁ܥ.

¹⁷ܘܐܲܢ̄ܬ̇ ܡܵܪܝܵܐ ܓܚܲܟ݂ ܥܠܲܝܗܘܿܢ.

¹⁸ܘܡܲܝܸܩ ܥܲܠ ܟܠܗܘܿܢ ܥܲܡܡܹ̈ܐ.

¹⁹ܐܲܠܵܗܵܐ ܠܵܟ݂ ܐܹܫܲܒܲܚ.

²⁰ܡܸܛܠ ܕܐܲܢ̄ܬ̇ܘܼ ܒܹܝܬ̣ ܓܲܘܣܝ.

²¹ܐܲܠܵܗܵܐ ܛܲܝܒ̇ܘܼܬ̣ܵܟ݂ ܬܩܲܕ̇ܡܲܢܝ.

²²ܐܲܠܵܗܵܐ ܚܲܘܵܢܝ ܒܲܒ̣ܥܸܠܕ̇ܒ̣ܵܒܲܝ̈.

²³ܠܵܐ ܬܸܩܛܘܿܠ ܐܸܢܘܿܢ ܕܠܵܐ ܢܲܛܥܘܿܢ ܠܥܲܡܝ.

²⁴ܐܸܠܵܐ ܐܲܙܝܼܥ ܐܸܢܘܿܢ ܒܚܲܝܠܵܟ݂ ܘܐܲܢܝܼܕ݂ ܐܸܢܘܿܢ ܡܵܪܝܵܐ ܬܘܼܟ̣ܠܵܢܝ.

²⁵ܚܛܝܼܬ̣ܵܐ ܕܦܘܼܡܗܘܿܢ ܡܲܠܸܠ ܣܸܦ̈ܘܵܬ̣ܗܘܿܢ.

²⁶ܢܸܬ̇ܬܲܚܕ̇ܘܼܢ ܒܫܘܼܒ̣ܗܵܪܗܘܿܢ.

²⁷ܡܸܛܠ ܕܠܲܘܛܬ̣ܵܐ ܘܕܲܓܵܠܘܼܬ̣ܵܐ ܡܸܫܬܲܥܹܝܢ.

²⁸ܐܲܘܒܸ̇ܕ݂ ܐܸܢܘܿܢ ܒܪܘܼܓ̣ܙܵܟ݂ ܐܲܘܒܸ̇ܕ݂ ܐܸܢܘܿܢ ܘܠܵܐ ܢܸܫܬܲܟ̣ܚܘܼܢ.

²⁹ܕܢܸܕ̇ܥܘܼܢ ܕܐܲܠܵܗܵܐ ܫܲܠܝܼܛ ܥܲܠ ܝܲܥܩܘܿܒ̣ ܘܥܲܠ ܥܸܒ̣ܪܹ̈ܝܗ̇ ܕܐܲܪܥܵܐ.

³⁰ܢܸܗܦܟ̣ܘܼܢ ܒܪܲܡܫܵܐ ܘܲܢܥܲܘܘܿܢ ܐܲܝܟ݂ ܟܲܠ̈ܒܹ̇ܐ.

³¹ܘܢܸܬ̣ܟܲܪܟ̇ܘܼܢ ܡܕ݂ܝܼܢ̄ܬܵܐ.

³²ܢܸܒ̣ܥܘܿܢ ܠܡܹܐܟܲܠ ܘܠܵܐ ܢܸܣܒ̇ܥܘܼܢ ܘܠܵܐ ܢܒ̣ܘܼܬ̣ܘܼܢ.

³³ܘܐܸܢܵܐ ܐܹܫܲܒܲܚ ܠܚܲܝܠܵܟ݂.

³⁴ܘܐܹܫܲܒܲܚ ܒܨܲܦܪܵܐ ܠܛܲܝܒ̇ܘܼܬ̣ܵܟ݂.

³⁵ܡܸܛܠ ܕܲܗ݀ܘܲܝܬ̇ ܠܝܼ ܒܹܝܬ̣ ܓܲܘܣܵܐ.

³⁶ܘܲܡܦܲܨܝܵܢܵܐ ܒܝܲܘܡܵܐ ܕܐܘܼܠܨܵܢܵܐ.

³⁷ܐܲܠܵܗܵܐ ܠܵܟ݂ ܐܹܙܲܡܲܪ.

³⁸ܡܸܛܠ ܕܐܲܢ̄ܬ̇ܘܼ ܐܲܠܵܗܵܐ ܕܒܹܝܬ̣ ܓܲܘܣܝ ܘܐܲܠܵܗܵܐ ܕܛܲܝܒ̇ܘܼܬ̣ܝ.