Read Aramaic Peshita Psalms 62 Bible Online

Psalms 62 - Aramaic Peshita bible

Psalms 62

¹ܠܐܲܠܵܗܵܐ ܡܣܲܟ̇ܝܵܐ ܢܲܦ̮ܫܝ ܕܡܸܢܹܗ ܗܘ݀ ܦܘܼܪܩܵܢܝ.

²ܘܗܘ݀ܝܘܼ ܐܲܠܵܗܝ ܘܦܵܪܘܿܩܝ.

³ܘܒܹܝܬ̣ ܓܲܘܣܝ ܪܲܒܵܐ ܕܠܵܐ ܐܹܙܘܼܥ.

⁴ܥܕܲܡܵܐ ܠܐܸܡܲܬ̣ܝ ܡܸܬ̣ܓܲܪܓ̣ܝܼܢ ܐܢ̄ܬ̇ܘܿܢ ܥܲܠ ܓܲܒ̣ܪܵܐ ܕܬܸܩܛܠܘܼܢ.

⁵ܐܲܝܟ݂ ܐܸܣܬ̣ܵܐ ܕܡܵܛܲܬ݀ ܘܐܲܝܟ݂ ܣܝܵܓ̣ܵܐ ܕܲܕ݂ܚܝܼܩ.

⁶ܐܸܠܵܐ ܐܵܦ ܡ̣ܢ ܐܝܼܩܵܪܹܗ ܐܸܬ̣ܪܲܥܝܼܘ ܠܡܸܕ݂ܚܝܹܗ.

⁷ܘܲܪܗܸܛ̣ܘ ܒܕܲܓܵܠܘܼܬ̣ܵܐ.

⁸ܒܦܘܼܡܗܘܿܢ ܡܒܲܪܟ̣ܝܼܢ ܘܲܒ̣ܠܸܒ̇ܗܘܿܢ ܠܵܝܛ݁ܝܼܢ.

⁹ܠܐܲܠܵܗܵܐ ܣܲܟܵܝ ܢܲܦ̮ܫܝ ܕܡܸܢܹܗ ܗܘ݀ ܦܘܼܪܩܵܢܝ.

¹⁰ܘܗܘ݀ܝܘܼ ܐܲܠܵܗܝ ܘܦܵܪܘܿܩܝ.

¹¹ܘܒܹܝܬ̣ ܓܲܘܣܝ ܕܠܵܐ ܐܹܙܘܼܥ.

¹²ܒܐܲܠܵܗܵܐ ܗ̄ܘ̣ ܦܘܼܪܩܵܢܝ ܘܐܝܼܩܵܪܝ.

¹³ܬܘܼܩܦܝ ܘܥܵܕ݂ܘܿܪܝ ܘܣܲܒ̣ܪܝ ܐܲܠܵܗܵܐ ܗ̄ܘ̣.

¹⁴ܣܲܒܲܪܘ ܒܹܗ ܟܠ ܫܵܥܵܐ ܥܲܡܵܐ.

¹⁵ܘܐܲܫܘܿܕ݂ܘ ܩܕ݂ܵܡܵܘܗܝ ܠܸܒ̇ܟ̣ܘܿܢ.

¹⁶ܡܸܛܠ ܕܐܲܠܵܗܵܐ ܗ̄ܘ̣ ܣܸܬܵܪܵܐ ܕܝܼܠܲܢ.

¹⁷ܘܐܲܝܟ݂ ܠܲܗܓܵܐ ܐܸܢܘܿܢ ܟܠܗܘܿܢ ܒܢܲܝ̈ܢܵܫܵܐ ܕܲܓܵܠܹ̈ܐ.

¹⁸ܕܲܒ̣ܡܲܐܣܲܬ̣ܵܐ ܡܲܥܠܹܝܢ ܘܲܣܪܝܼܩܝܼܢ ܐܲܟ̣ܚ̄ܕ݂ܵܐ.

¹⁹ܠܵܐ ܬܸܬܲܟ̣ܠܘܼܢ ܥܲܠ ܛܠܘܼܡܝܵܐ.

²⁰ܘܲܚܛܘܼܦܝܵܐ ܠܵܐ ܬܸܪܚܡܘܼܢ.

²¹ܩܸܢܝܵܢܵܐ ܡܵܐ ܕܣܵܓܹܐ݁ ܠܵܐ ܢܸܚܕܸ̇ܐ ܒܹܗ ܠܸܒ̇ܟ̣ܘܿܢ.

²²ܚܕ݂ܐ ܗ̄ܝ̣ ܕܐܸܡܲܪ ܐܲܠܵܗܵܐ.

²³ܘܲܕ̇ܬܲܪܬܹܿܝܢ ܗܵܠܹܝܢ ܫܸܡܥܹ̇ܬ̣.

²⁴ܡܸܛܠ ܕܥܘܼܫܢܵܐ ܕܐܲܠܵܗܵܐ ܗ̄ܘ̣.

²⁵ܘܠܵܟ݂ ܡܵܪܝܵܐ ܛܲܝܒ̇ܘܼܬ̣ܵܐ.

²⁶ܡܸܛܠ ܕܐܲܢ̄ܬ̇ ܦܵܪܲܥ ܐܲܢ̄ܬ̇ ܠܓܲܒ̣ܪܵܐ ܐܲܝܟ݂ ܥܒ̣ܵܕ݂ܵܘ̈ܗܝ.