Read Aramaic Peshita Psalms 68 Bible Online

Psalms 68 - Aramaic Peshita bible

Psalms 68

¹ܢܩܘܼܡ ܐܲܠܵܗܵܐ ܘܢܸܬ̣ܒܲܕ̇ܪܘܼܢ ܟܠܗܘܿܢ ܒܥܸܠܕ̇ܒ̣ܵܒ̣ܵܘ̈ܗܝ.

²ܘܢܸܥܪ̱ܩܘܼܢ ܣܵܢܐܵܘ̈ܗܝ ܡ̣ܢ ܩܕ݂ܵܡܵܘܗܝ.

³ܐܲܝܟ݂ ܕܡܸܬ̇ܛܲܠܲܩ ܬܸܢܵܢܵܐ ܢܸܬ̇ܛܲܠܩܘܼܢ.

⁴ܘܐܲܝܟ݂ ܕܡܸܬ̣ܦܲܫܪܵܐ ܫܥܘܿܬ̣ܵܐ ܡ̣ܢ ܩܕ݂ܵܡ ܢܘܼܪܵܐ.

⁵ܢܹܐܒ̣ܕ̇ܘܼܢ ܪ̈ܵܫܝܼܥܹܐ ܡ̣ܢ ܩܕ݂ܵܡ ܐܲܠܵܗܵܐ.

⁶ܘܙܲܕ̇ܝܼܩܹ̈ܐ ܢܸܚܕ̇ܘܿܢ ܘܢܸܬ̣ܥܲܫܢܘܼܢ ܩܕ݂ܵܡ ܐܲܠܵܗܵܐ.

⁷ܘܢܸܚܕ̇ܘܼܢ ܒܒ̣ܘܼܣܵܡܹܗ.

⁸ܙܡܲܪܘ ܠܐܲܠܵܗܵܐ ܘܫܲܒܲܚܘ ܠܲܫܡܹܗ.

⁹ܫܲܒܲܚܘ ܠܕܲܪܟ̣ܝܼܒ̣ ܠܡܲܥܪ̱ܒ̣ܵܐ ܡܵܪܝܵܐ ܫܡܹܗ.

¹⁰ܐܸܬ̣ܥܲܫܲܢܘ ܩܕ݂ܵܡܵܘܗܝ ܕܐܲܒ̣ܵܐ ܕܝܲܬ̣ܡܹ̈ܐ.

¹¹ܘܕܲܝܵܢܵܐ ܕܐܲܪ̈ܡ̱ܠܵܬ̣ܵܐ.

¹²ܐܲܠܵܗܵܐ ܒܡܲܥܡ̱ܪܹܗ ܩܲܕ̇ܝܼܫܵܐ.

¹³ܐܲܠܵܗܵܐ ܡܲܘܬܸ̇ܒ̣ ܝܑܼܚܝܼܕ݂ܵܝܵܐ ܒܒܲܝܬܵܐ.

¹⁴ܘܡܲܦܸܩ ܐܲܣܝܼܪܹ̈ܐ ܒܟܲܫܝܼܪܘܼܬ̣ܵܐ.

¹⁵ܘܡܵܪ̈ܘܿܕܹܐ ܢܸܫܪܘܿܢ ܒܹܝܬ̣ ܩܒ̣ܘܼܪܹ̈ܐ.

¹⁶ܐܲܠܵܗܵܐ ܟܲܕ݂ ܢܦܲܩ̣ܬ̇ ܩܕ݂ܵܡ ܥܲܡܵܟ݂.

¹⁷ܘܟܲܕ݂ ܥܒ݂ܲܪܬ̇ ܒܐܲܫܝܼܡܘܿܢ ܐܲܪܥܵܐ ܙܵܥܲܬ̤.

¹⁸ܘܐܵܦ ܫܡܲܝܵܐ ܢܲܛܸܦܘ.

¹⁹ܡ̣ܢ ܩܕ݂ܵܡ ܐܲܠܵܗܵܐ ܗܵܢܵܐ ܛܘܼܪܵܐ ܕܣܝܼܢܲܝ.

²⁰ܡ̣ܢ ܩܕ݂ܵܡ ܐܲܠܵܗܵܐ ܐܲܠܵܗܹܗ ܕܝܼܣܪܵܝܹܠ.

²¹ܡܸܛܪܵܐ ܕܨܸܒ̣ܝܵܢܵܐ ܝܲܗ̄ܒ̣ܬ̇ ܐܲܠܵܗܵܐ ܠܝܵܪܬ̇ܘܼܬ̣ܵܟ݂.

²²ܐܸܬ̣ܟܲܪܗܲܬ̤ ܘܐܲܢ̄ܬ̇ ܬܲܩܸܢܬܵܗ̇.

²³ܘܚܲܝ̈ܘܵܬ̣ܵܟ݂ ܥܡܲܪܹ̈ܝܢ ܒܵܗ̇.

²⁴ܬܲܩܸܦܬ̇ ܒܛܲܝܒ̇ܘܼܬ̣ܵܟ݂ ܠܒ̣ܵܝܫܹ̈ܐ ܐܲܠܵܗܵܐ.

²⁵ܡܵܪܝܵܐ ܢܸܬܸ̇ܠ ܡܸܠܬ̣ܵܐ ܕܲܣܒܲܪܬ̣ܵܐ ܒܚܲܝܠܵܐ ܪܲܒܵܐ.

²⁶ܡܲܠ̈ܟܹ̇ܐ ܕܚܲܝ̈ܠܵܘܵܬ̣ܵܐ ܢܸܬ̣ܟܲܢܫܘܼܢ.

²⁷ܘܫܘܼܦܪܹܗ ܕܒܲܝܬܵܟ݂ ܢܦܲܠܸܓ̣ ܒܸܙܬ̣ܵܐ.

²⁸ܐܸܢ ܬܸܕ݂ܡ̱ܟ̣ܘܼܢ ܒܹܝܬ̣ ܫܦܵܝܹ̈ܐ.

²⁹ܓܸܦܹ̈ܐ ܕܝܲܘܢܵܐ ܕܲܩܪܝܼܡܝܼܢ ܒܟܸܣܦܵܐ.

³⁰ܘܐܸܒ̣ܪܹ̈ܝܗ̇ ܒܕܲܗܒ̣ܵܐ ܣܢܝܼܢܵܐ.

³¹ܟܲܕ݂ ܦܪܲܫ ܐܲܠܵܗܵܐ ܡܲܠܟܵܐ ܒܹܗ ܐܲܬ̣ܠ̱ܓܲܬ̤.

³²ܒܨܲܠܡܘܼܢ ܛܘܼܪܹܗ ܕܐܲܠܵܗܵܐ.

³³ܛܘܼܪܹ̈ܐ ܕܒܲܝܫܵܢ ܛܘܼܪܹ̈ܐ ܕܲܓ̣ܒܸܢܝܲܡ.

³⁴ܛܘܼܪܹ̈ܐ ܕܒܲܝܫܵܢ ܡܵܢܵܐ ܨܵܒܹ̇ܝܢ ܐܢ̄ܬ̇ܘܿܢ ܛܘܼܪܹ̈ܐ ܕܲܓ̣ܒܸܢܝܲܡ.

³⁵ܛܘܼܪܵܐ ܕܲܓ̣ܒ̣ܵܐ ܠܹܗ ܐܲܠܵܗܵܐ ܠܡܸܬܲܒ̣ ܒܹܗ.

³⁶ܡܵܪܝܵܐ ܢܸܫܪܸܐ ܒܹܗ ܠܥܵܠܲܡ.

³⁷ܪܟܸܒ̣ ܐܲܠܵܗܵܐ ܒܪܸ̈ܒ̇ܘܵܬ̣ܵܐ ܘܒܲܐܠܦܹ̈ܐ ܕܚܲܝܠܵܐ.

³⁸ܡܵܪܝܵܐ ܒܗܘܿܢ ܣܝܼܢܲܝ ܒܩܘܼܕ݂ܫܹܗ.ܦܣܘܩܐ.

³⁹(1) ܣܠܸܩܬ̇ ܠܲܡܪܲܘܡܵܐ ܘܲܫܒܲܝܬ̇ ܫܒ̣ܝܼܬ̣ܵܐ.

⁴⁰(2) ܘܲܢܣܲܒ̣ܬ̇ ܡܲܘ̈ܗ̱ܒ̣ܵܬ̣ܵܐ ܠܲܒ̣ܢܲܝ̈ܢܵܫܵܐ.

⁴¹(3) ܐܵܦ ܡܵܪ̈ܘܿܕܹܐ ܠܵܐ ܢܸܥܡ̱ܪܘܼܢ ܩܕ݂ܵܡ ܐܲܠܵܗܵܐ.

⁴²(4) ܒܪܝܼܟ̣ܘܼ ܡܵܪܝܵܐ ܒܟ̣ܠܝܘܿܡ ܕܐܲܓ̣ܒ̇ܝܲܢ ܝܵܪܬ̇ܘܼܬܹܗ.

⁴³(5) ܐܲܠܵܗܵܐ ܦܵܪܘܿܩܲܢ ܐܲܠܵܗܵܐ ܡܦܲܨܝܵܢܲܢ.

⁴⁴(6) ܡܵܪܝܵܐ ܐܲܠܵܗܵܐ ܡܵܪܹܗ ܕܡܵܘܬܵܐ ܘܡܲܦܩܵܢܵܐ.

⁴⁵(7) ܒܪܲܡ ܐܲܠܵܗܵܐ ܢܸܦܣܘܿܩ ܪܹܫܵܐ ܕܲܒ̣ܥܸܠܕ̇ܒ̣ܵܒ̣ܵܘ̈ܗܝ.

⁴⁶(8) ܒܹ̈ܥܵܬ̣ܵܐ ܕܣܲܥܪܵܐ ܕܐܲܝܠܹܝܢ ܕܲܡܗܲܠܟ̣ܝܼܢ ܒܲܚܛܵܗܲܝ̈ܗܘܿܢ.

⁴⁷(9) ܐܸܡܲܪ݂ ܡܵܪܝܵܐ ܕܡ̣ܢ ܒܹܝܬ̣ ܫܸܢܹ̈ܐ ܐܲܗܦܸܟ݂.

⁴⁸(10) ܘܐܲܗܦܸܟ݂ ܡ̣ܢ ܥܘܼܡܩܵܘ̈ܗܝ ܕܝܲܡܵܐ.

⁴⁹(11) ܡܸܛܠ ܕܬܸܨܛܒܲܥ ܪܸܓ̣ܠܵܟ݂ ܒܲܕ݂ܡܵܐ.

⁵⁰(12) ܘܠܸܫܵܢܵܐ ܕܟܲܠܒܲܝ̈ܟ ܡ̣ܢ ܒܥܸܠܕ̇ܒ̣ܵܒܲܝ̈ܟ.

⁵¹(13) ܚܙ݂ܵܘ ܗܲܠ̈ܟ̣ܵܬ̣ܵܟ݂ ܐܲܠܵܗܵܐ.

⁵²(14) ܗܲܠ̈ܟ̣ܵܬܹܗ ܕܐܲܠܵܗܝ ܘܲܕ݂ܡܲܠܟ̇ܝ ܩܲܕ̇ܝܼܫܵܐ.

⁵³(15) ܩܲܕܸ̇ܡܘ ܪܲܘ̱ܪ̈ܒ̣ܵܢܹܐ ܒܵܬܲܪ ܡܫܲܒ̇ܚܵܢܹ̈ܐ.

⁵⁴(16) ܒܲܝܢܵܬ̣ ܥܠܲܝ̈ܡܵܬ̣ܵܐ ܕܢܵܩ̈ܫܵܢ ܒܲܦ̈ܠܲܓܹܐ ܒܲܟ̣ܢܘܼ̈ܫܵܬ̣ܵܐ.

⁵⁵(17) ܒܲܪܸܟ̣ܘ ܠܡܵܪܝܵܐ ܡ̣ܢ ܡܲܒܘܼܥܵܐ ܕܝܼܣܪܵܝܹܠ.

⁵⁶(18) ܬܲܡܵܢ ܒܸܢܝܵܡܹܝܢ ܙܥܘܿܪܵܐ ܒܫܸܠܝܵܐ.

⁵⁷(19) ܪܲܘ̱ܪ̈ܒ̣ܵܢܹܐ ܕܲܝܗܘܼܕ݂ܵܐ ܘܫܲܠܝܼܛܵܢܲܝ̈ܗܘܿܢ.

⁵⁸(20) ܪܲܘ̱ܪ̈ܒ̣ܵܢܹܐ ܕܲܙܒ̣ܘܿܠܘܿܢ ܘܪܲܘ̱ܪ̈ܒ̣ܵܢܹܐ ܕܢܲܦ̮ܬܵܠܝܼ.

⁵⁹(21) ܦܩܘܿܕ݂ ܐܲܠܵܗܵܐ ܥܘܼܫܢܵܟ݂.

⁶⁰(22) ܘܐܲܥܫܸܢ ܐܲܠܵܗܵܐ ܠܗܵܕܹܐ ܕܥܲܬܸ̇ܕ̇ܬ̇ ܠܲܢ.

⁶¹(23) ܡ̣ܢ ܗܲܝܟ̇ܠܵܟ݂ ܠܐܘܿܪܸܫܠܸܡ.

⁶²(24) ܠܵܟ݂ ܢܲܝܬ̇ܘܿܢ ܡܲܠ̈ܟܹ̇ܐ ܩܘܼܪ̈ܒܵܢܹܐ.

⁶³(25) ܟܐܝܼ ܒܚܲܝܘ̱ܬ̣ܵܐ ܕܕܲܒ̣ܪܵܐ ܟܢܘܼܫܬܵܐ ܕܐܲܪ̈ܘܵܢܹܐ.

⁶⁴(26) ܥܸܓ̣ܠܹ̈ܐ ܕܥܲܡܡܹ̈ܐ ܕܲܩܪܝܼܡܝܼܢ ܒܣܹܐܡܵܐ.

⁶⁵(27) ܒܲܕܲܪ ܥܲܡܡܹ̈ܐ ܕܨܵܒܹܝ݁ܢ ܩܪܵܒ̣ܵܐ.

⁶⁶(28) ܢܹܐܬ̣ܘܿܢ ܐܝܼ̈ܙܓܲܕܹ̇ܐ ܡ̣ܢ ܡܸܨܪܹܝܢ.

⁶⁷(29) ܘܟ̣ܘܼܫ ܬܲܫܠܸܡ ܐܝܼܕ݂ܵܐ ܠܐܲܠܵܗܵܐ.

⁶⁸(30) ܡܲܠ̈ܟ̇ܘܵܬ̣ܵܐ ܕܐܲܪܥܵܐ ܫܲܒܲܚܹ̈ܝܢ ܠܐܲܠܵܗܵܐ.

⁶⁹(31) ܙܡܲܪܘ ܠܡܵܪܝܵܐ ܕܲܪܟ̣ܝܼܒ̣ ܒܲܫܡܲܝ̈ ܫܡܲܝܵܐ.

⁷⁰(32) ܡ̣ܢ ܡܲܕ݂ܢ̱ܚܵܐ ܝܲܗ݂̄ܒ̣ ܩܵܠܹܗ ܩܵܠܵܐ ܥܲܫܝܼܢܵܐ.

⁷¹(33) ܗܲܒ̣ܘ ܬܸܫܒ̇ܘܿܚܬܵܐ ܠܐܲܠܵܗܵܐ.

⁷²(34) ܘܠܝܼܣܪܵܝܹܠ ܪܲܒ̇ܘܼܬ̣ ܝܵܐܝܘܼܬ̣ܵܐ.

⁷³(35) ܕܥܘܼܫܢܹܗ ܒܲܫܡܲܝ̈ ܫܡܲܝܵܐ.

⁷⁴(36) ܕܚܝܼܠܲܬ̇ ܐܲܠܵܗܵܐ ܡ̣ܢ ܡܲܩܕ̇ܫܵܟ݂.

⁷⁵(37) ܐܲܠܵܗܹܗ ܕܝܼܣܪܵܝܹܠ.

⁷⁶(38) ܗܘ̤ ܢܸܬܸ̇ܠ ܚܲܝܠܵܐ ܘܥܘܼܫܢܵܐ ܠܥܲܡܹܗ ܒܪܝܼܟ̣ܘܼ ܐܲܠܵܗܵܐ.