Read Aramaic Peshita Psalms 69 Bible Online

Psalms 69 - Aramaic Peshita bible

Psalms 69

¹ܦܪܘܿܩܲܝܢܝ ܐܲܠܵܗܵܐ ܡܸܛܠ ܕܲܡܛܵܘ ܡܲܝ̈ܵܐ ܥܕܲܡܵܐ ܠܢܲܦ̮ܫܵܐ.

²ܛܸܒ̣ܥܹܬ̣ ܒܗܲܘܬ̣ܵܐ ܥܲܡܝܼܩܬܵܐ ܘܠܲܝܬ̇ ܒܵܗ̇ ܒܹܝܬ̣ ܩܝܵܡܵܐ.

³ܥܸܠܹ̇ܬ̣ ܠܥܘܼܡܩܵܐ ܕܡܲܝ̈ܵܐ ܘܨܵܡܲܪܬܵܐ ܛܲܒܲܥܬܲܢܝ.

⁴ܠܐܝܼܬ̣ ܒܲܩܪܵܝܝ ܘܚܸܪܲܬ̤ ܓܲܓܲܪܬ̇ܝ.

⁵ܓ̣ܵܙ ܥܲܝ̈ܢܲܝ ܟܲܕ݂ ܡܣܲܟܸܐ ܐ̄ܢܵܐ ܠܐܲܠܵܗܝ.

⁶ܣܓ̣ܝܼܘ ܡ̣ܢ ܣܲܥܪܵܐ ܕܪܹܫܝ ܒܥܸܠܕ̇ܒ̣ܵܒܲܝ̈ ܕܡܲܓܵܢ.

⁷ܘܲܥ̣ܫܸܢܘ ܡ̣ܢ ܓܲܪ̈ܡܲܝ ܒܥܸܠܕ̇ܒ̣ܵܒܲܝ̈ ܕܫܘܼܩܪܵܐ.

⁸ܡܸܕܸܡ ܕܠܵܐ ܛܸܠܡܹ̇ܬ̣ ܡܦܲܢܸܐ ܗ̄ܘܹܝܬ̣.

⁹ܐܲܠܵܗܵܐ ܐܲܢ̄ܬ̇ ܝܵܕܲܥ ܐܲܢ̄ܬ̇ ܣܲܟ̣̈ܠ̱ܘܵܬ̣ܝ.

¹⁰ܘܲܚܛܵܗܲܝ̈ ܡܸܢܵܟ݂ ܠܵܐ ܐܸܬ̣ܟܲܣܝܼܘ.

¹¹ܠܵܐ ܢܸܒ̣ܗ̱ܬ̣ܘܼܢ ܒܝܼ ܐܲܝܠܹܝܢ ܕܲܡܣܲܒ̇ܪܝܼܢ ܒܵܟ݂.

¹²ܡܵܪܝܵܐ ܐܲܠܵܗܵܐ ܚܲܝܠ̱ܬ̣ܵܢܵܐ.

¹³ܠܵܐ ܢܸܚܦܪܘܼܢ ܒܝܼ ܐܲܝܠܹܝܢ ܕܒ̣ܵܥܹܝܢ ܠܵܟ݂ ܐܲܠܵܗܹܗ ܕܝܼܣܪܵܝܹܠ.

¹⁴ܡܸܛܠܵܬ̣ܵܟ݂ ܩܲܒ̇ܠܹ̇ܬ̣ ܚܸܣܕܵܐ.

¹⁵ܘܟܲܣܝܲܬ̤ ܒܸܗܬ̇ܬ̣ܵܐ ܠܐܲܦܲܝ̈.

¹⁶ܢܘܼܟ̣ܪܵܝܵܐ ܗ̤ܘܹܝܬ̣ ܠܐܲܚܲܝ̈.

¹⁷ܘܐܲܟ̣ܣܢܵܝܵܐ ܠܲܒ̣ܢܲܝ̈ ܐܹܡܝ.

¹⁸ܡܸܛܠ ܕܲܛܢܵܢܹܗ ܕܒܲܝܬܵܟ݂ ܐܲܟ̣ܠܲܢܝ.

¹⁹ܘܚܸܣܕܵܐ ܕܲܡܚܲܣܕ݂ܵܢܲܝ̈ܟ ܢܦܲܠ ܥܠܲܝ.

²⁰ܡܲܟ̇ܟܹ̇ܬ̣ ܢܲܦ̮ܫܝ ܒܨܲܘܡܵܐ ܘܲܗ̤ܘܹܝܬ̣ ܠܗܘܿܢ ܠܚܸܣܕܵܐ.

²¹ܥܸܒ݂ܕܹ̇ܬ̣ ܠܒ̣ܘܼܫܝ ܣܲܩܵܐ ܘܲܗ̤ܘܹܝܬ̣ ܠܗܘܿܢ ܠܡܲܬ̣ܠܵܐ.

²²ܘܲܪܢܵܘ̣ ܒܝܼ ܐܲܝܠܹܝܢ ܕܝܵܬ̣ܒ̇ܝܼܢ ܒܬܲܪܥܵܐ.

²³ܘܲܪܢܵܘ̣ ܒܝܼ ܐܲܝܠܹܝܢ ܕܫܵܬܹܝ݁ܢ ܫܲܟ̣ܪܵܐ.

²⁴ܘܐܸܢܵܐ ܨܲܠܝܼ̇ܬ̣ ܩܕ݂ܵܡܲܝܟ ܡܵܪܝܵܐ ܒܙܲܒ̣ܢܵܐ ܡܩܲܒ̇ܠܵܐ.

²⁵ܐܲܠܵܗܵܐ ܒܣܘܿܓ̣ܐܵܐ ܕܛܲܝܒ̇ܘܼܬ̣ܵܟ݂ ܥܢܝܼܢܝ.

²⁶ܘܲܒ̣ܣܘܿܓ̣ܐܵܐ ܕܦܘܼܪܩܵܢܵܟ݂ ܦܲܨܵܢܝ.

²⁷ܡ̣ܢ ܣܝܵܢܵܐ ܕܠܵܐ ܐܸܛܒܲܥ.

²⁸ܘܐܸܬ̣ܦܲܨܸܐ ܡ̣ܢ ܣܵܢ̈ܐܲܝ ܘܡ̣ܢ ܥܘܼܡܩܵܐ ܕܡܲܝ̈ܵܐ.

²⁹ܕܠܵܐ ܬܛܲܒ̇ܥܲܢܝ ܨܵܡܲܪܬܵܐ ܕܡܲܝ̈ܵܐ.

³⁰ܘܠܵܐ ܬܸܒ̣ܠ̱ܥܲܢܝ ܗܲܘܬ̣ܵܐ.

³¹ܘܠܵܐ ܬܹܐܚܘܿܕ݂ ܥܠܲܝ ܒܹܪܵܐ ܦܘܼܡܵܗ̇.

³²ܥܢܝܼܢܝ ܡܵܪܝܵܐ ܡܸܛܠ ܕܛܵܒܲܐ ܗ̄ܝ̣ ܛܲܝܒ̇ܘܼܬ̣ܵܟ݂.

³³ܘܲܒ̣ܣܘܿܓ̣ܐܵܐ ܕܪ̈ܲܚܡܲܝܟ ܐܸܬ̣ܦܲܢ ܥܠܲܝ.

³⁴ܘܠܵܐ ܬܲܗܦܸܟ݂ ܐܲܦܲܝ̈ܟ ܡ̣ܢ ܥܲܒ̣ܕܵܟ݂.

³⁵ܡܸܛܠ ܕܥܵܩܲܬ̤ ܠܝܼ ܒܲܥܓܲܠ ܥܢܝܼܢܝ.

³⁶ܘܩܲܪܸܒ̣ ܢܲܦ̮ܫܝ ܠܦܘܼܪܩܵܢܵܟ݂.

³⁷ܡܸܛܠ ܒܥܸܠܕ̇ܒ̣ܵܒܲܝ̈ ܦܪܘܿܩܲܝܢܝ.

³⁸ܐܲܢ̄ܬ̇ ܝܵܕܲܥ ܐܲܢ̄ܬ̇ ܚܸܣܕ̇ܝ.

³⁹ܘܒܸܗܬܲܬ̣ܝ ܠܘܼܩܒܲܠ ܟܠܗܘܿܢ ܒܥܸܠܕ̇ܒ̣ܵܒܲܝ̈.ܦܵܣܘܿܩܵܐ.

⁴⁰(1) ܐܲܣܵܐ ܬܒ̣ܵܪܹܗ ܕܠܹܒ̇ܝ ܘܲܥܨܘܿܒ̣.

⁴¹(2) ܣܲܟ̇ܝܼܬ̣ ܠܡܲܢ ܕܬܸܟ̣ܪܸܐ ܠܹܗ ܘܠܲܝܬ̇.

⁴²(3) ܘܠܲܡܒܲܝܐܵܢܵܐ ܘܠܵܐ ܐܸܫܟ̇ܚܹܬ̣.

⁴³(4) ܝܲܗ݂̄ܒ̣ܘ ܡܹܐܟ̣ܘܼܠܬ̇ܝ ܡܪܵܪܹ̈ܐ.

⁴⁴(5) ܘܲܠܨܲܗܝܝ ܚܲܠܵܐ ܐܲܫܩܝܘܼܢܝ.

⁴⁵(6) ܢܸܗܘܸܐ ܦܵܬ̣ܘܿܪܗܘܿܢ ܩܕ݂ܵܡܲܝܗܘܿܢ ܦܲܚܵܐ.

⁴⁶(7) ܘܦܘܼܪܥܵܢܗܘܿܢ ܠܬ̣ܘܼܩܠ̱ܬ̣ܵܐ.

⁴⁷(8) ܢܸܚܫ̈ܟ̣ܵܢ ܥܲܝܢܲܝ̈ܗܘܿܢ ܕܠܵܐ ܢܸܚܙܘܿܢ.

⁴⁸(9) ܘܚܲܨܗܘܿܢ ܒܟ̣ܠܙܒܲܢ ܢܸܗܘܸܐ ܟܦܝܼܦ.

⁴⁹(10) ܐܲܫܘܿܕ݂ ܥܠܲܝܗܘܿܢ ܪܘܼܓ̣ܙܵܟ݂.

⁵⁰(11) ܘܚܸܡܬ̣ܵܐ ܕܪܘܼܓ̣ܙܵܟ݂ ܬܲܕ݂ܪܸܟ݂ ܐܸܢܘܿܢ.

⁵¹(12) ܢܸܗܘܸܐ ܒܹܝܬ̣ ܡܲܥܡܲܪܗܘܿܢ ܚܪܸܒ̣.

⁵²(13) ܘܲܒ̣ܡܲܫܟ̇ܢܲܝ̈ܗܘܿܢ ܠܵܐ ܢܸܗܘܸܐ ܕܥܵܡܲܪ.

⁵³(14) ܡܸܛܠ ܕܲܠܡܲܢ ܕܐܲܢ̄ܬ̇ ܡ̣ܚܲܝܬ̇ ܪܕܲܦ̣ܘ.

⁵⁴(15) ܘܐܲܘܣܸܦܘ ܥܲܠ ܟܹܐܒܹܗ ܕܲܩܛܝܼܠܵܐ.

⁵⁵(16) ܗܲܒ̣ܘ ܥܲܘܠܵܐ ܥܲܠ ܥܲܘܠ̱ܗܘܿܢ.

⁵⁶(17) ܕܠܵܐ ܢܸܥܠܘܼܢ ܒܙܲܕ̇ܝܼܩܘܼܬ̣ܵܟ݂.

⁵⁷(18) ܘܢܸܬ̣ܥ̱ܛܘܿܢ ܡ̣ܢ ܣܸܦܪܵܟ݂ ܕܚܲܝܹ̈ܐ.

⁵⁸(19) ܘܥܲܡ ܙܲܕ̇ܝܼܩܲܝ̈ܟ ܠܵܐ ܢܸܬ̣ܟܲܬ̣ܒ̇ܘܼܢ.

⁵⁹(20) ܘܐܸܢܵܐ ܡܸܣܟܹܢܵܐ ܐ̄ܢܵܐ ܘܡܲܟ̣ܐ̱ܒ̣ܵܐ.

⁶⁰(21) ܦܘܼܪܩܵܢܵܟ݂ ܐܲܠܵܗܵܐ ܥܲܕ̇ܪܲܢܝ.

⁶¹(22) ܐܹܫܲܒܲܚ ܫܡܹܗ ܕܐܲܠܵܗܵܐ ܒܬܸܫܒ̇ܘܿܚܬܵܐ.

⁶²(23) ܘܐܲܘܪ̱ܒ̣ܝܼܘܗܝ ܒܬ̣ܵܘܕ̇ܝܼܬ̣ܵܐ.

⁶³(24) ܐܸܫܦܲܪ ܠܡܵܪܝܵܐ ܡ̣ܢ ܬܲܘܪܹ̈ܐ ܡܦܲܛܡܹ̈ܐ.

⁶⁴(25) ܩܲܪ̈ܢܵܢܹܐ ܘܦܲܪ̈ܣܵܢܹܐ.

⁶⁵(26) ܚܙܵܘ ܡܸܣܟܹ̇ܢܹ̈ܐ ܘܲܚܕ݂ܵܘ ܘܢܸܚܸܐ ܠܸܒ̇ܟ̣ܘܿܢ.

⁶⁶(27) ܡܸܛܠ ܕܫܵܡܲ݁ܥ ܡܵܪܝܵܐ ܠܡܸܣܟܹ̇ܢܹ̈ܐ.

⁶⁷(28) ܘܠܲܐܣܝܼܪ̈ܵܘܗܝ ܠܵܐ ܫܵܐܹ̇ܛ.

⁶⁸(29) ܢܫܲܒ̇ܚܘܼܢܵܝܗܝ ܫܡܲܝܵܐ ܘܐܲܪܥܵܐ.

⁶⁹(30) ܘܝܲܡܡܹ̈ܐ ܘܟ̣ܠ ܕܪܵܚܹܫ ܒܗܘܿܢ.

⁷⁰(31) ܡܸܛܠ ܕܐܲܠܵܗܵܐ ܦܵܪܸܩ ܠܨܸܗܝܘܿܢ.

⁷¹(32) ܘܲܡܒܲܢܸܐ ܠܩܘܼܪ̈ܝܵܐ ܕܲܝܗܘܼܕ݂ܵܐ.

⁷²(33) ܕܢܸܬ̇ܒ̣ܘܼܢ ܒܵܗ̇ ܥܲܒ̣ܕܵܘ̈ܗܝ ܘܢܹܐܪܬ̇ܘܼܢܵܗ̇.

⁷³(34) ܘܪ̈ܲܚܡܲܝ ܫܡܹܗ ܢܸܫܪܘܼܢ ܒܵܗ.