Read Aramaic Peshita Psalms 7 Bible Online

Psalms 7 - Aramaic Peshita bible

Psalms 7

¹ܡܵܪܝܵܐ ܐܲܠܵܗܝ ܒܵܟ݂ ܣܲܒ̇ܪܹܬ̣ ܦܪܘܿܩܲܝܢܝ.

²ܘܡ̣ܢ ܟܠ ܪ̈ܵܕ݂ܘܿܦܲܝ ܦܲܨܵܢܝ.

³ܕܲܠܡܵܐ ܐܲܝܟ݂ ܐܲܪܝܵܐ ܠܡܸܬ̣ܒܲܪ ܠܢܲܦ̮ܫܝ.

⁴ܘܠܲܝܬ̇ ܕܦܵܪܹܩ ܘܲܡܦܲܨܸܐ.

⁵ܡܵܪܝܵܐ ܐܲܠܵܗܝ ܐܸܢ ܥܸܒ̣ܕܹ̇ܬ̣ ܗܵܕܹܐ.

⁶ܘܐܸܢ ܐܝܼܬ̣ ܥܲܘܠܵܐ ܒܐܝܼ̈ܕܲܝ.

⁷ܘܐܸܢ ܦܸܪܥܹ̇ܬ̣ ܠܡܲܢ ܕܲܥܼܒܲܕ݂ ܠܝܼ ܒܝܼܫܬܵܐ.

⁸ܘܐܸܢ ܐܲܠܨܹܬ̣ ܠܲܒ̣ܥܸܠܕܒ̣ܵܒ̣ܝ ܣܪܝܼܩܵܐܝܼܬ̣.

⁹ܢܸܪܕ̇ܘܿܦ ܒܥܸܠܕ̇ܒ̣ܵܒ̣ܵܐ ܠܢܲܦ̮ܫܝ ܘܢܲܕ݂ܪ̱ܟ̣ܝܼܗ̇.

¹⁰ܘܲܢܕ݂ܘܼܫ ܚܲܝܲܝ̈ ܒܐܲܪܥܵܐ.

¹¹ܘܫܘܼܒ̣ܚܝ ܒܥܲܦܪܵܐ ܢܲܫܪܸܐ.

¹²ܩܘܼܡ ܡܵܪܝܵܐ ܒܪܘܼܓ̣ܙܵܟ݂.

¹³ܘܐܸܫܬܲܩܲܠ ܥܲܠ ܩܕ݂ܵܠܵܐ ܕܲܒ̣ܥܸܠܕ̇ܒ̣ܵܒܲܝ̈.

¹⁴ܘܐܸܬ̇ܬ̇ܥܝܼܪ ܥܠܲܝ ܒܕ݂ܝܼܢܵܐ ܕܲܦܩܲܕ̇ܬ̇.

¹⁵ܘܥܹܕ̇ܬܵܐ ܕܐܸܡ̈ܘܵܬ̣ܵܐ ܬܸܚܕ̇ܪܵܟ݂.

¹⁶ܘܥܲܠ ܐܲܦܹܝ̈ܗ̇ ܠܲܡܪܲܘܡܵܐ ܬܹܗܦܘܿܟ݂.

¹⁷ܡܵܪܝܵܐ ܢܕ݂ܘܼܢ ܥܲܡܡܹ̈ܐ.

¹⁸ܕܘܼܢ ܠܝܼ ܡܵܪܝܵܐ ܐܲܝܟ݂ ܙܲܕܝܼܩܘܼܬ̣ܝ ܘܐܲܝܟ݂ ܬܲܡܝܼܡܘܼܬ̣ܝ.

¹⁹ܬܸܓ̣ܡܲܪ ܒܝܼܫܬܵܐ ܥܲܠ ܪ̈ܲܫܝܼܥܹܐ.

²⁰ܘܬܲܬ̣ܩܸܢ ܠܙܲܕܝܼܩܹ̈ܐ.

²¹ܒܵܚܲܪ ܠܸܒܵܐ ܘܟ̣ܘܼܠ̈ܝܵܬ̣ܵܐ.

²²ܐܲܠܵܗܵܐ ܙܲܕܝܼܩܵܐ ܡܣܲܝܥܵܢܝ.

²³ܐܲܠܵܗܵܐ ܕܦܵܪܸܩ ܠܲܬ̣ܖ̈ܝܼܨܲܝ ܠܸܒܵܐ.

²⁴ܐܲܠܵܗܵܐ ܕܲܝܵܢܵܐ ܕܩܘܼܫܬܵܐ ܘܠܵܐ ܪܵܓܹ݁ܙ ܟܠܝܘܿܡ.

²⁵ܐܸܢ ܠܵܐ ܗܵܦܹ̇ܟ݂ ܣܲܝܦܹܗ ܠܵܛܹ݁ܫ ܘܩܸܫܬܹ̇ܗ ܡܵܬܲܚ.

²⁶ܐܲܬ̣ܩܸܢ ܘܡܲܬ̣ܩܸܢ ܠܹܗ ܡܵܐܢܹ̈ܐ ܕܪܘܼܓ̣ܙܵܐ.

²⁷ܓܹܐܖ̈ܵܘܗܝ ܥ̣ܒܲܕ݂ ܠܲܕ݂ܝܵܩܕ݁ܝܼܢ.

²⁸ܡܸܛܠ ܕܚܲܒܸ̇ܠ ܥܲܘܵܠܵܐ ܘܲܒ̣ܛܸܢ ܫܘܼܩܪܵܐ ܘܝܼܠܸܕ݂ ܥܸܬܵܐ.

²⁹ܒܹܪܵܐ ܚ̣ܦܲܪ ܘܚܲܛܵܗ̇.

³⁰ܘܲܢ̣ܦܲܠ ܒܓ̣ܘܼܡܵܨܵܐ ܕܲܥܼܒܲܕ݂.

³¹ܢܸܗܦܘܿܟ݂ ܥܲܘܠܹܗ ܒܪܹܫܹܗ.

³²ܘܥܲܠ ܒܹܥܬܹܗ ܥܲܘܠܹܗ ܢܸܚܘܿܬ̣.

³³ܐܵܘܕܸ̇ܐ ܠܡܵܪܝܵܐ ܐܲܝܟ݂ ܙܲܕܝܼܩܘܼܬ̣ܝ.

³⁴ܘܐܸܙܡܲܪ ܠܲܫܡܹܗ ܕܡܵܪܝܵܐ ܡܪܲܝܡܵܐ܀