Read Aramaic Peshita Psalms 73 Bible Online

Psalms 73 - Aramaic Peshita bible

Psalms 73

¹ܐܲܠܵܗܵܐ ܛܵܒ̣ ܠܝܼܣܪܵܝܹܠ ܘܠܲܒ̣ܪܝܼܪ̈ܲܝ ܠܸܒܵܐ.

²ܘܐܸܢܵܐ ܥܲܕ݂ ܩܲܠܝܼܠ ܡܸܨܛܲܠ̈ܝܵܢ ܗ̣̄ܘܲܝ̈ ܪܸ̈ܓ̣ܠܲܝ.

³ܘܐܲܝܟ݂ ܠܵܐ ܡܸܕܸ̇ܡ ܡܸܬ̣ܐܲܫ̈ܕܵܢ ܗ̣̄ܘܲܝ̈ ܗܲܠ̈ܟ̣ܵܬ̣ܝ.

⁴ܡܸܛܠ ܕܛܸܢܹ̇ܬ̣ ܒܥܲܘܵܠܹ̈ܐ.

⁵ܟܲܕ݂ ܚܵܙܹ݁ܐ ܗ̄ܘܹ̇ܝܬ̣ ܫܠܵܡܵܐ ܕܪ̈ܲܫܝܼܥܹܐ.

⁶ܡܸܛܠ ܕܠܲܝܬ̇ ܣܵܟ̣ܵܐ ܠܡܲܘܬ̇ܗܘܿܢ.

⁷ܘܣܲܓ̇ܝܼܐܵܐ ܗ̄ܝ̣ ܫܵܛܝܘܼܬ̣ܗܘܿܢ.

⁸ܒܥܲܡܠܵܐ ܕܐ̄ܢܵܫܵܐ ܠܲܝܬ̇ ܐܸܢܘܿܢ.

⁹ܘܥܲܡ ܒܢܲܝ̈ܢܵܫܵܐ ܠܵܐ ܡܸܬ̣ܢܲܓ̇ܕ݂ܝܼܢ.

¹⁰ܡܸܛܠ ܗܵܢܵܐ ܐܸܚܕܲܬ݀ ܐܸܢܘܿܢ ܡܒܲܣܪܵܢܘܼܬ̣ܵܐ.

¹¹ܐܸܬ̣ܟܲܣܝܼܘ ܥܲܘܠ̱ܗܘܿܢ ܘܪܘܼܫܥ̱ܗܘܿܢ.

¹²ܘܲܢܦ݂ܲܩ ܐܲܝܟ݂ ܬܲܪܒܵܐ ܥܲܘܠ̱ܗܘܿܢ.

¹³ܘܲܥܒ݂ܲܕ݂ ܐܲܝܟ݂ ܬܲܪܥܝܼܬ̣ܵܐ ܕܠܸܒܵܐ.

¹⁴ܐܸܬ̣ܚܲܫܲܒ̣ܘ ܘܡܲܠܸܠܘ ܒܝܼܫܬܵܐ.

¹⁵ܘܲܛܠܘܼܡܝܵܐ ܥܲܠ ܡܪܲܝܡܵܐ ܡܲܠܸܠܘ.

¹⁶ܣܵܡ̣ܘ ܦܘܼܡܗܘܿܢ ܒܲܫܡܲܝܵܐ.

¹⁷ܘܠܸܫܵܢܗܘܿܢ ܡܗܲܠܸܟ݂ ܒܐܲܪܥܵܐ.

¹⁸ܡܸܛܠ ܗܵܢܵܐ ܢܸܗܦܘܿܟ݂ ܥܲܡܝ ܠܗܵܪܟܵܐ.

¹⁹ܘܡܲܠܝܵܐܝܼܬ̣ ܢܸܫܟ̇ܚܘܼܢ ܠܗܘܿܢ.

²⁰ܘܢܹܐܡܪܘܼܢ ܐܲܝܟ݂ܢ ܝܵܕܲܥ̇ ܐܲܠܵܗܵܐ.

²¹ܘܐܝܼܬ̣ ܝܼܕܲܥܬ̣ܵܐ ܒܲܡܪܲܝܡܵܐ.

²²ܕܗܵܐ ܗܵܠܹܝܢ ܪ̈ܲܫܝܼܥܹܐ ܟܲܗܝܼܢܝܼܢ ܒܥܵܠܡܵܐ.

²³ܘܥܲܫܝܼܢܝܼܢ ܒܚܲܝܠܵܐ.

²⁴ܘܐܸܢܵܐ ܒܲܠܚܘܿܕܲܝ ܕܲܟ̇ܝܼ̇ܬ̣ ܠܹܒ̇ܝ.

²⁵ܘܐܲܫܝܼܓܹ̇ܬ̣ ܐܝܼ̈ܕܲܝ ܒܕܲܟ̣ܝܼܘܼܬ̣ܵܐ.

²⁶ܘܲܗ̤ܘܹܝܬ̣ ܠܲܡܚܘܿܬ̣ܵܐ ܟܠܹܗ ܝܲܘܡܵܐ.

²⁷ܘܡܲܟ̇ܣܵܢܘܼܬ̣ܝ ܠܨܲܦܪܵܐ.

²⁸ܐܸܢ ܐܸܡ̇ܪܹܬ ܕܐܸܥܒܸ̇ܕ݂ ܐܲܟ̣ܘܵܬ̣ܗܘܿܢ ܥܲܘܠܵܐ ܗ̄ܘ̣ ܒܥܲܝܢܲܝ̈.

²⁹ܥܕܲܡܵܐ ܕܐܸܥܘܿܠ ܠܡܲܩܕ̇ܫܹܗ ܕܐܲܠܵܗܵܐ.

³⁰ܘܐܸܬ̣ܒܲܝܲܢ ܒܚܲܪܬ̣ܗܘܿܢ.

³¹ܐܲܝܟ݂ ܢܸܟ̣ܠܗܘܿܢ ܬܣܝܼܡ ܠܗܘܿܢ.

³²ܘܬܲܪܡܸܐ ܐܸܢܘܿܢ ܟܲܕ݂ ܢܸܬ̇ܬ̇ܪܝܼܡܘܼܢ.

³³ܐܲܝܟ݂ܢ ܗܘ̤ܵܘ ܠܬܸܡܗܵܐ ܡ̣ܢ ܫܸܠܝܵܐ.

³⁴ܘܣܵܦܘ ܘܲܓ̣ܡܲܪܘ ܡ̣ܢ ܕܠܘܼܚܝܵܐ.

³⁵ܐܲܝܟ݂ ܗܵܘ̇ ܕܡܸܬ̇ܬ̇ܥܝܼܪ ܡܵܐ ܕܲܚܙ݂ܵܐ ܚܸܠܡܵܐ.

³⁶ܡܵܪܝܵܐ ܒܲܩܪܝܼܬ̣ܵܐ ܨܲܠܡ̱ܗܘܿܢ ܬܫܘܼܛ.

³⁷ܘܐܸܢܵܐ ܐܸܬ̇ܕܲܠܲܚ ܠܹܒ̇ܝ ܘܟ̣ܘܿܠ̈ܝܵܬ̣ܝ ܐܸܫܬܲܢܝܼ.

³⁸ܘܐܸܢܵܐ ܒܪܝܼܪ ܗ̄ܘܹ̇ܝܬ̣ ܘܠܵܐ ܝܵܕܲܥ̇.

³⁹ܘܲܒ̣ܥܝܼܪܵܐ ܗ̄ܘܹ̇ܝܬ̣ ܥܲܡܵܟ݂.

⁴⁰ܒܬܲܪܥܝܼܬ̣ܵܟ݂ ܒܲܝܲܐܲܝܢܝ.

⁴¹ܘܒ̣ܵܬܲܪ ܐܝܼܩܵܪܵܟ݂ ܕܲܒܲܪܲܝܢܝ.

⁴²ܡܵܢܵܐ ܐܝܼܬ̣ ܠܝܼ ܒܲܫܡܲܝܵܐ ܥܲܡܵܟ݂.

⁴³ܘܡܵܢܵܐ ܨܒܹ̇ܝܬ̣ ܒܐܲܪܥܵܐ.

⁴⁴ܕܐܸܚܲܕ̇ܬ̇ ܐܝܼܕ݂ܝ ܕܝܲܡܝܼܢܵܐ.

⁴⁵ܘܲܓ̣ܡܲܪ ܠܹܒ̇ܝ ܘܒܸܣܪ̱ܝ ܘܥܘܼܫܢܹܗ ܕܠܹܒ̇ܝ.

⁴⁶ܡܢܵܬ̣ܝ ܒܐܲܠܵܗܵܐ ܗ̄ܝ̣ ܠܥܵܠܲܡ.

⁴⁷ܡܸܛܠ ܕܗܵܐ ܪ̈ܲܚܝܼܩܲܝܟ ܢܹܐܒ̣ܕ̇ܘܼܢ.

⁴⁸ܘܬܲܘܒܸ̇ܕ݂ ܠܟ̣ܠ ܕܛܵܥܹ̇ܝܢ ܡܸܢܵܟ݂ ܠܥܵܠܲܡ.

⁴⁹ܘܐܸܢܵܐ ܨܒܹ̇ܝܬ̣ ܕܐܸܬ̣ܩܲܪܲܒ̣ ܠܐܲܠܵܗܵܐ.

⁵⁰ܛܐܸܒ̣ ܠܝܼ ܫܡܵܟ݂ ܡܵܪܝܵܐ ܬܘܼܟ̣ܠܵܢܝ.

⁵¹ܘܐܸܫܬܲܥܸܐ ܟܠܗܹܝܢ ܬܸܕ݂ܡ̱ܪ̈ܵܬ̣ܵܟ݂.