Read Aramaic Peshita Psalms 76 Bible Online

Psalms 76 - Aramaic Peshita bible

Psalms 76

¹ܝܑܼܕ݂ܝܼܥ ܒܲܝܗܘܼܕ݂ܵܐ ܐܲܠܵܗܵܐ.

²ܘܒ̣ܝܼܣܪܵܝܹܠ ܪܲܒ̇ ܫܡܹܗ.

³ܢܸܗܘܸܐ ܒܫܵܠܝܼܡ ܡܲܛܠܠܹܗ.

⁴ܘܡܲܥܡ̱ܪܹܗ ܒܨܸܗܝܘܿܢ.

⁵ܬܲܡܵܢ ܬܲܒܲܪ ܕܪ̈ܵܥܹܐ ܕܩܸܫ̈ܬܵܬ̣ܵܐ.

⁶ܙܲܝܢܵܐ ܘܣܲܝܦܵܐ ܒܲܩܪܵܒ̣ܵܐ.

⁷ܢܲܗܝܼܪ ܐܲܢ̄ܬ̇ ܘܲܫܒ̣ܝܼܚ ܡ̣ܢ ܛܘܼܪܵܟ݂ ܥܲܫܝܼܢܵܐ.

⁸ܐܸܬ̇ܕܲܠܲܚܘ ܟܠܗܘܿܢ ܣܲܟ݂ܠܲܝ ܠܸܒܵܐ.

⁹ܘܲܕ݂ܡܸܟ̣ܘ ܫܸܢܵܬ̣ܗܘܿܢ ܓܲܒ̣ܪܹ̈ܐ ܚܲܝܠ̱ܬ̣ܵܢܹ̈ܐ.

¹⁰ܘܠܵܐ ܐܸܫܟܲܚܘ ܐܝܼܕܲܝ̈ܗܘܿܢ ܡ̣ܢ ܟܐܵܬ̣ܵܟ݂ ܐܲܠܵܗܹܗ ܕܝܲܥܩܘܿܒ̣.

¹¹ܢܵܡ̣ܘ ܪ̈ܵܟ̣ܒܲܝ ܪ̈ܲܟ̣ܫܵܐ ܘܐܲܢ̄ܬ̇ ܕܚܝܼܠ ܐܲܢ̄ܬ̇.

¹²ܡܲܢ̣ܘܼ ܢܩܘܼܡ ܩܕ݂ܵܡܲܝܟ ܒܗܵܢܵܐ ܪܘܼܓ̣ܙܵܐ.

¹³ܡ̣ܢ ܫܡܲܝܵܐ ܫܡܲܥܬ̇ ܕܝܼܢܵܐ.

¹⁴ܐܲܪܥܵܐ ܚܙܵܬ̤ ܘܕܸܚܠܲܬ̤.

¹⁵ܡܵܐ ܕܩܵܐܹ̇ܡ ܐܲܠܵܗܵܐ ܠܲܡܕ݂ܵܢ.

¹⁶ܘܲܠܡܸܦܪܲܩ ܠܟ̣ܠܗܘܿܢ ܡܸܣܟܹ̇ܢܹ̈ܐ ܕܐܲܪܥܵܐ.

¹⁷ܡܸܛܠ ܕܬܲܪܥܝܼܬܹܗ ܕܒܲܪܢܵܫܵܐ ܬܲܘܕܸ̇ܐ ܠܵܟ݂.

¹⁸ܘܫܲܪܟܵܐ ܕܚܸܡܬܹܗ ܬܲܦܪܸܩ ܪܘܼܓ̣ܙܵܐ.

¹⁹ܢܕ݂ܘܿܪܘ ܘܫܲܠܸܡܘ ܠܡܵܪܝܵܐ ܐܲܠܵܗܟ̣ܘܿܢ.

²⁰ܟܠ ܕܲܚܕ݂ܝܼܪܝܼܢ ܠܹܗ ܢܲܘܒ̇ܠܘܼܢ ܩܘܼܪ̈ܒܵܢܹܐ ܠܲܕ݂ܚܝܼܠܵܐ.

²¹ܕܲܡܡܲܟܸ̇ܟ݂ ܪܘܼܚܵܐ ܕܫܲܠܝܼܛܵܢܹ̈ܐ.

²²ܘܲܕ݂ܚܝܼܠ ܥܲܠ ܡܲܠ̈ܟܹ̇ܐ ܕܐܲܪܥܵܐ.