Read Aramaic Peshita Psalms 81 Bible Online

Psalms 81 - Aramaic Peshita bible

Psalms 81

¹ܫܲܒܲܚܘ ܠܐܲܠܵܗܵܐ ܡܥܲܫܢܵܢܲܢ.

²ܘܲܩܥܵܘ ܠܐܲܠܵܗܹܗ ܕܝܲܥܩܘܿܒ̣.

³ܫܩܘܿܠܘ ܦܠܲــ̈ـܓܹ̇ܐ ܘܟܸܢܵܪܹ̈ܐ.

⁴ܒܲܣܝܼܡܹ̈ܐ ܥܲܡ ܩܝܼܬ̣ܵܪܹ̈ܐ.

⁵ܩܪܵܘ ܩܲܪ̈ܢܵܬ̣ܵܐ ܒܪܹܫ ܝܲܪ̈ܚܹܐ.

⁶ܘܲܒ̣ܟܸܣ̈ܐܹܐ ܒܝܲܘ̈ܡܵܬ̣ܵܐ ܕܥܲܕ݂ܥܹ̈ܕܹܐ.

⁷ܡܸܛܠ ܕܢܵܡܘܿܣܵܐ ܗ̄ܘ̣ ܠܝܼܣܪܵܝܹܠ.

⁸ܘܕ݂ܝܼܢܵܐ ܠܐܲܠܵܗܹܗ ܕܝܲܥܩܘܿܒ̣.

⁹ܣܵܗܕ̇ܘܼܬܹܗ ܒܝܲܘܣܸܦ ܣܵܡܵܗ̇.

¹⁰ܟܲܕ݂ ܢܦܲܩ ܠܐܲܪܥܵܐ ܕܡܸܨܪܹܝܢ.

¹¹ܠܸܫܵܢܵܐ ܕܠܵܐ ܝܵܕܲܥ ܗ̄ܘ̣ܵܐ ܫܡܲܥ݂.

¹²ܐܲܥܒ̇ܪܹܬ̣ ܢܝܼܪܵܐ ܡ̣ܢ ܟܲܬ̣ܦܹܗ.

¹³ܘܐܝܼ̈ܕ݂ܵܘܗܝ ܡ̣ܢ ܐܲܣܘܼܪܝܵܐ ܫܪܹܝ݁ܬ̣.

¹⁴ܒܐܘܼܠܨܵܢܵܐ ܩܪܵܢܝ ܘܦܲܨܝܼܬܹ̇ܗ.

¹⁵ܘܟܲܣܝܼܬܹ̇ܗ ܒܣܸܬܵܪܵܐ ܕܝܼܠܝ ܡܫܲܒ̇ܚܵܐ.

¹⁶ܘܲܒ̣ܚܲܪܬܹ̇ܗ ܒܡܲܝ̈ܵܐ ܕܚܸܪܝܵܢܵܐ.

¹⁷ܫܡܲܥ ܥܲܡܝ ܘܐܹܡܲܠܸܠ.

¹⁸ܘܝܼܣܪܵܝܹܠ ܐܹܣܲܗܸܕ݂ ܒܵܟ݂.

¹⁹ܐܸܢ ܬܸܫܡܥܲܢܝ ܠܵܐ ܢܸܗܘܸܐ ܠܵܟ݂ ܐܲܠܵܗ ܢܘܼܟ̣ܪܵܝ.

²⁰ܘܠܵܐ ܬܸܣܓ̇ܘܿܕ݂ ܠܕܸܚܠܵܐ ܐ̄ܚܪܹܢܝܵܐ.

²¹ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܵܟ݂.

²²ܕܐܲܣܸܩܬܵܟ݂ ܡ̣ܢ ܐܲܪܥܵܐ ܕܡܸܨܪܹܝܢ.

²³ܦܬܲܚ ܦܘܼܡܵܟ݂ ܘܐܸܡܠܹܝܘܗܝ.

²⁴ܘܥܲܡܝ ܠܵܐ ܫܡܲܥ݂ ܒܩܵܠܝ.

²⁵ܘܝܼܣܪܵܝܹܠ ܠܵܐ ܐܸܬ̇ܛܦܝܼܣܘ ܡܹܢܝ.

²⁶ܘܗܲܠܸܟ̣ܘ ܒܨܸܒ̣ܝܵܢܵܐ ܕܠܸܒ̇ܗܘܿܢ.

²⁷ܘܲܒ̣ܬܲܪܥܝܼܬ̣ܵܐ ܕܢܲܦ̮ܫܗܘܿܢ.

²⁸ܐܸܠܘܼ ܥܲܡܝ ܫܲܡܥܲܢܝ ܘܝܼܣܪܵܝܹܠ ܒܐܘܼܪܚܵܬ̣ܝ ܗܲܠܸܟ̣ܘ.

²⁹ܥܲܕ݂ ܩܲܠܝܼܠ ܡܲܘܒܸ̇ܕ݂ ܗ̄ܘܹܝܬ̣ ܠܲܒ̣ܥܸܠܕ̇ܒ̣ܵܒܲܝ̈ܗܘܿܢ.

³⁰ܘܥܲܠ ܣܵܢܐܲܝ̈ܗܘܿܢ ܡܲܗܦܸܟ݂ ܗ̄ܘܹܝܬ̣ ܐܝܼܕ݂ܝ.

³¹ܣܵܢܐܵܘ̈ܗܝ ܕܡܵܪܝܵܐ ܟܲܕܸ̇ܒ̣ܘ ܒܹܗ.

³²ܘܲܗܘܵ݀ܐ ܙܲܘܥ̱ܗܘܿܢ ܠܥܵܠܲܡ.

³³ܐܲܘܟ̇ܠܹܗ ܡ̣ܢ ܫܘܼܡܢܵܐ ܕܚܸܛܬ̣ܵܐ.

³⁴ܘܡ̣ܢ ܟܹܐܦܵܐ ܕܸܒ̣ܫܵܐ ܣܲܒ̇ܥܹܗ.