Read Aramaic Peshita Psalms 83 Bible Online

Psalms 83 - Aramaic Peshita bible

Psalms 83

¹ܐܲܠܵܗܵܐ ܡܲܢ̣ܘܼ ܕܕ݂ܵܡܹܐ ܠܵܟ݂.

²ܠܵܐ ܬܸܫܬ̇ܘܿܩ ܘܠܵܐ ܬܸܫܠܸܐ ܐܲܠܗܵܐ.

³ܡܸܛܠ ܕܗܵܐ ܒܥܸܠܕ̇ܒ̣ܵܒܲܝ̈ܟ ܡܸܬ̣ܪܲܓ̣ܫܝܼܢ.

⁴ܘܣܵܢܐܲܝ̈ܟ ܐܲܪܝܼܡܘ ܪܹܫܵܐ ܥܲܠ ܥܲܡܵܟ݂.

⁵ܒܚܲܪܥܘܼܬ̣ܗܘܿܢ ܚܫܲܠܘ ܐ̄ܪܵܙܵܐ.

⁶ܘܐܸܬ̣ܡܲܠܲܟ̣ܘ ܥܲܠ ܩܲܕ̇ܝܼܫܲܝ̈ܟ ܘܐܸܡܲܪ݂ܘ.

⁷ܬܵܘ ܢܲܘܒܸ̇ܕ݂ ܐܸܢܘܿܢ ܡ̣ܢ ܥܲܡܵܐ.

⁸ܘܠܵܐ ܢܸܬ̇ܕ̇ܟܲܪ ܬܘܼܒ̣ ܫܡܹܗ ܕܝܼܣܪܵܝܹܠ.

⁹ܡܸܛܠ ܕܐܸܬ̣ܪܲܥܝܼܘ ܒܠܸܒ̇ܗܘܿܢ ܐܲܟ̣ܚ̄ܕ݂ܵܐ.

¹⁰ܘܲܥܠܲܝܟ ܐܲܩܝܼܡܘ ܩܝܵܡܵܐ.

¹¹ܡܲܫܟ̇ܢܵܐ ܕܐܲܕ݂ܘܿܡ ܘܲܕ݂ܥܲܪ̈ܒ̣ܵܝܹܐ.

¹²ܘܲܕ݂ܡܘܼܐܵܒ̣ ܘܲܕ݂ܓܸܕ݂ܪ̈ܵܝܹܐ.

¹³ܬܚܘܼܡܵܐ ܕܥܲܡܘܿܢ ܘܕܲܥܡܵܠܹܝܩ.

¹⁴ܘܕܲܦܠܸܫܬ̇ ܥܲܡ ܝܵܬ̣ܒܲܝ̈ ܨܘܿܪ.

¹⁵ܐܵܦ ܐܵܬ̣ܘܿܪܵܝܵܐ ܐܸܫܬ̇ܘܝܼ ܥܲܡܗܘܿܢ.

¹⁶ܘܲܗܘ݀ܵܘ ܥܘܼܕ݂ܪܵܢܵܐ ܠܲܒ̣ܢܲܝ̈ ܠܘܿܛ.

¹⁷ܥܒܸܕ݂ ܠܗܘܿܢ ܐܲܝܟ݂ ܕܲܠܡܸܕ݂ܝܲܢ ܘܐܲܝܟ݂ ܕܲܠܣܝܼܣܪܵܐ.

¹⁸ܘܐܲܝܟ݂ ܕܲܠܢܵܒ̣ܝܼܢ ܒܢܲܚܠܵܐ ܕܩܝܼܫܘܿܢ.

¹⁹ܕܐܸܬ̣ܚܪܸܒ̣ܘ ܒܥܝܼܢܕ̇ܘܿܪ ܘܲܗܘ݀ܵܘ ܙܸܒ̣ܠܵܐ ܒܐܲܪܥܵܐ.

²⁰ܚܪܘܿܒ̣ ܐܸܢܘܿܢ ܘܐܲܘܒܸ̇ܕ݂ ܐܸܢܘܿܢ.

²¹ܐܲܝܟ݂ ܕܲܠܥܘܿܪܝܼܒ̣ ܘܐܲܝܟ݂ ܙܝܼܒ̣ ܘܐܲܝܟ݂ ܙܵܒ̣ܵܚ ܘܐܲܝܟ݂ ܨܲܠܡ̱ܢܲܥ.

²²ܟܠܗܘܿܢ ܫܲܠܝܼܛܵܢܲܝ̈ܗܘܿܢ ܕܐܸܡܲܪ݂ܘ.

²³ܢܹܐܪܲܬ̣ ܠܲܢ ܩܪܝܼܬܹܗ ܕܐܲܠܵܗܵܐ.

²⁴ܐܲܠܵܗܵܐ ܥܒܸܕ݂ ܐܸܢܘܿܢ ܐܲܝܟ݂ ܓܝܼܓ̣ܠܵܐ ܘܐܲܝܟ݂ ܓܸܠܵܐ ܩܕ݂ܵܡ ܪܘܼܚܵܐ.

²⁵ܘܐܲܝܟ݂ ܢܘܼܪܵܐ ܕܡܸܫܬܲܒ̣ܩܵܐ ܒܥܵܒ̣ܵܐ.

²⁶ܘܐܲܝܟ݂ ܫܲܠܗܹܒ̣ܝܼܬ̣ܵܐ ܕܡܲܘܩܕ݂ܵܐ ܛܘܼܪܹ̈ܐ.

²⁷ܗܵܟܲܢܵܐ ܪܕ݂ܘܿܦ ܐܸܢܘܿܢ ܒܥܲܠܥܵܠܲܝ̈ܟ.

²⁸ܘܲܒ̣ܩܲܪ̈ܚܲܝܟ ܕܲܠܲܚ ܐܸܢܘܿܢ.

²⁹ܡܠܝܼ ܐܲܦܲܝ̈ܗܘܿܢ ܨܲܥܪܵܐ.

³⁰ܕܢܸܒ̣ܥܘܿܢ ܠܲܫܡܵܟ݂ ܡܵܪܝܵܐ.

³¹ܢܸܒ̣ܗ̱ܬ̣ܘܼܢ ܘܢܸܬ̇ܕܲܠܚܘܼܢ ܠܥܵܠܲܡ ܥܵܠܡܝܼܢ.

³²ܘܢܸܚܦܪܘܼܢ ܘܢܹܐܒ̣ܕ̇ܘܼܢ.

³³ܘܢܸܕ̇ܥܘܼܢ ܕܲܫܡܵܟ݂ ܗ̄ܘ̣ ܡܵܪܝܵܐ ܒܲܠܚܘܿܕܲܝܟ.

³⁴ܪܵܡ ܒܟ̣ܠܵܗ̇ ܐܲܪܥܵܐ.