Read Aramaic Peshita Psalms 86 Bible Online

Psalms 86 - Aramaic Peshita bible

Psalms 86

¹ܨܠܝܼ ܡܵܪܝܵܐ ܐܸܕ݂ܢܵܟ݂ ܘܲܥܢܝܼܢܝ.

²ܡܸܛܠ ܕܡܸܣܟܹ̇ܢܵܐ ܐ̄ܢܵܐ ܘܒ̣ܵܝܫܵܐ.

³ܢܲܛܲܪ ܠܢܲܦ̮ܫܝ ܡܸܛܠ ܕܛܵܒ̣ ܐܲܢ̄ܬ̇.

⁴ܦܪܘܿܩ ܠܥܲܒ̣ܕܵܟ݂ ܐܲܢ̄ܬ̇ ܐܲܠܵܗܵܐ ܕܲܡܣܲܒܲܪ ܒܵܟ݂.

⁵ܪܲܚܸܡܥܠܲܝ ܡܵܪܝܵܐ.

⁶ܡܸܛܠ ܕܲܠܘܵܬ̣ܵܟ݂ ܐܸܩܪܸܐ ܒܟ̣ܠܝܘܿܡ.

⁷ܚܲܕܵܐ ܢܲܦ̮ܫܹܗ ܕܥܲܒ̣ܕܵܟ݂.

⁸ܡܸܛܠ ܕܲܠܘܵܬ̣ܵܟ݂ ܡܵܪܝܵܐ ܐܲܪܝܼܡܹ̇ܬ̣ ܢܲܦ̮ܫܝ.

⁹ܡܸܛܠ ܕܐܲܢ̄ܬ̇ ܡܵܪܝܵܐ ܛܵܒ̣ ܐܲܢ̄ܬ̇.

¹⁰ܘܣܲܓ̇ܝܼܐܵܐ ܗ̄ܝ̣ ܛܲܝܒ̇ܘܼܬ̣ܵܟ݂ ܠܟ̣ܠ ܕܩܵܪܹܝܢ ܠܵܟ݂.

¹¹ܨܘܼܬ̣ ܡܵܪܝܵܐ ܨܠܘܿܬ̣ܝ.

¹²ܘܲܫܡܲܥ ܒܩܵܠܵܐ ܕܲܓ̣ܥܵܬ̣ܝ.

¹³ܒܝܲܘܡܵܐ ܕܐܘܼܠܨܵܢܝ ܩܪܹܝܬ̣ܵܟ݂ ܘܲܥܢܲܝܬܵܢܝ.

¹⁴ܠܲܝܬ̇ ܐܲܟ̣ܘܵܬ̣ܵܟ݂ ܡܵܪܝܵܐ ܐܲܠܵܗܝ ܘܠܲܝܬ̇ ܐܲܝܟ݂ ܥܒ̣ܵܕܲܝ̈ܟ.

¹⁵ܟܠܗܘܿܢ ܥܲܡܡܹ̈ܐ ܕܲܥܒܲܕ̇ܬ̇.

¹⁶ܢܹܐܬ̣ܘܿܢ ܘܢܸܣܓ̇ܕ݂ܘܼܢ ܠܵܟ݂ ܡܵܪܝܵܐ.

¹⁷ܘܲܢܫܲܒ̇ܚܘܼܢ ܠܲܫܡܵܟ݂ ܡܸܛܠ ܕܪܲܒ̇ ܐܲܢ̄ܬ̇.

¹⁸ܥܵܒܸܕ݂ ܐܲܢ̄ܬ̇ ܬܸܕ݂ܡ̱ܪ̈ܵܬ̣ܵܐ ܐܲܢ̄ܬ̇ ܐܲܠܵܗܵܐ ܒܲܠܚܘܿܕܲܝܟ.

¹⁹ܚܲܘܵܢܝ ܡܵܪܝܵܐ ܐܘܼܪܚܵܟ݂ ܘܐܹܗܲܠܸܟ݂ ܒܩܘܼܫܬܵܐ.

²⁰ܢܸܚܕܸ̇ܐ ܠܹܒ̇ܝ ܒܐܲܝܠܹܝܢ ܕܕ݂ܵܚܠܝܼܢ ܠܲܫܡܵܟ݂.

²¹ܐܲܘܕܸ̇ܐ ܠܵܟ݂ ܡܵܪܝܵܐ ܐܲܠܵܗܝ ܡ̣ܢ ܟܠܹܗ ܠܹܒ̇ܝ.

²²ܘܐܹܫܲܒܲܚ ܫܡܵܟ݂ ܠܥܵܠܲܡ.

²³ܡܸܛܠ ܕܛܲܝܒ̇ܘܼܬ̣ܵܟ݂ ܣܸܓ̣ܝܲܬ݀ ܥܠܲܝ.

²⁴ܘܦܲܨܝܼܬ̇ ܢܲܦ̮ܫܝ ܡ̣ܢ ܫܝܘܿܠ ܬܲܚܬܵܝܬܵܐ.

²⁵ܐܲܠܵܗܵܐ ܥܲܘܵܠܹ̈ܐ ܩܵܡ̣ܘ ܥܠܲܝ.

²⁶ܘܲܟ̣ܢܘܼܫܬܵܐ ܕܥܲܫܝܼܢܹ̈ܐ ܒܥܵܐܘܼܗ̇ ܠܢܲܦ̮ܫܝ ܘܠܵܐ ܐܸܬ̇ܕܲܟ̣ܪܘܼܟ݂.

²⁷ܘܐܲܢ̄ܬ̇ ܡܵܪܝܵܐ ܐܲܠܵܗܵܐ ܡܪܲܚܡܵܢܵܐ ܘܲܡܪܲܚܦܵܢܵܐ.

²⁸ܢܲܓ̇ܝܼܪ ܪܘܼܚܵܐ ܘܣܲܓ̇ܝܼ ܛܲܝܒ̇ܘܼܬ̣ܵܐ ܘܩܘܼܫܬܵܐ.

²⁹ܐܸܬ̣ܦܲܢ ܥܠܲܝ ܘܪܲܚܸܡ ܥܠܲܝ.

³⁰ܗܲܒ̣ ܚܲܝܠܵܐ ܠܥܲܒ̣ܕܵܟ݂ ܘܲܦܪܘܿܩ ܠܒܲܪ ܐܲܡܬ̣ܵܟ݂.

³¹ܘܲܥܒܸܕ݂ ܥܲܡܝ ܐܵܬ̣ܵܐ ܛܵܒ̣ܬ̣ܵܐ.

³²ܕܢܸܚܙܘܿܢ ܣܵܢܐܲܝ̈ ܘܢܸܒ̣ܗ̱ܬ̣ܘܼܢ.

³³ܕܐܲܢ̄ܬ̇ ܡܵܪܝܵܐ ܥܲܕܲܪܬܵܢܝ ܘܒܲܝܲܐܬܵܢܝ.