Read Aramaic Peshita Psalms 88 Bible Online

Psalms 88 - Aramaic Peshita bible

Psalms 88

¹ܡܵܪܝܵܐ ܐܲܠܵܗܵܐ ܕܦܘܼܪܩܵܢܝ.

²ܒܐܝܼܡܵܡܵܐ ܓܥܹܝ݁ܬ̣ ܘܲܒ̣ܠܸܠܝܵܐ ܩܕ݂ܵܡܲܝܟ.

³ܬܸܥܘܿܠ ܩܕ݂ܵܡܲܝܟ ܨܠܘܿܬ̣ܝ.

⁴ܘܐܲܪܟܸ̇ܢ ܐܸܕ݂ܢܵܟ݂ ܠܒ̣ܵܥܘܼܬ̣ܝ.

⁵ܡܸܛܠ ܕܣܸܒ̣ܥܲܬ݀ ܢܲܦ̮ܫܝ ܒܝܼ̈ܫܵܬ̣ܵܐ.

⁶ܘܚܲܝܲܝ̈ ܠܲܫܝܘܿܠ ܡܲܛܝܼܘ.

⁷ܐܸܬ̣ܚܲܫܒܹ̇ܬ̣ ܥܲܡ ܢܵܚܬܲܝ̈ ܓܘܼܒܵܐ.

⁸ܘܲܗܘܹܝܬ̣ ܐܲܝܟ݂ ܓܲܒ̣ܪܵܐ ܕܠܲܝܬ̇ ܠܹܗ ܐܝܼܵܠܵܐ.

⁹ܒܹܝܬ̣ ܡܝܼ̈ܬܹܐ ܒܲܪ ܚܹܐܪܹ̈ܐ.

¹⁰ܐܲܝܟ݂ ܩܛܝܼܠܹ̈ܐ ܕܲܫܟ̣ܝܼܒ̣ܝܼܢ ܒܩܲܒ̣ܪܹ̈ܐ.

¹¹ܐܲܝܠܹܝܢ ܕܬ̣ܘܼܒ̣ ܠܵܐ ܐܸܬ̇ܕ̇ܟܲܪܬ̇ ܐܸܢܘܿܢ.

¹²ܘܗܸܢ݂ܘܿܢ ܡ̣ܢ ܐܝܼ̈ܕܲܝܟ ܐܸܒܲܕ݂ܘ.

¹³ܐܲܚܸܬ̇ܬܵܢܝ ܠܓ̣ܘܼܒܵܐ ܬܲܚܬܵܝܵܐ.

¹⁴ܠܚܸܫܘܿܟ̣ܵܐ ܘܲܠܛܸܠܵܠܲܝ̈ ܡܲܘܬܵܐ.

¹⁵ܘܲܥܠܲܝ ܣܡ݂ܵܟ݂ ܪܘܼܓ̣ܙܵܟ݂.

¹⁶ܘܟ̣ܠܗܘܿܢ ܡܲܚܫܘܼܠܲܝ̈ܟ ܐܲܝܬ̇ܝܼܬ̇ ܥܠܲܝ.

¹⁷ܐܲܪܚܸܩܬ̇ ܡܹܢܝ ܝܵܕ݂ܥܲܝ̈ ܘܲܥܒܲܕ̇ܬܵܢܝ ܠܗܘܿܢ ܛܲܡܐܵܐ.

¹⁸ܐܸܬ̣ܟ̇ܠܝܼܬ̇ ܕܠܵܐ ܐܸܦܘܿܩ ܘܥܲܝܢܝ ܕܵܒܲܬ݀ ܡ̣ܢ ܡܘܼܟܵܟ̣ܝ.

¹⁹ܩܪܹܝܬ̣ܵܟ݂ ܡܵܪܝܵܐ ܒܟ̣ܠܝܘܿܡ.

²⁰ܘܦܸܫܛܹ݁ܬ̣ ܐܝܼ̈ܕܲܝ ܠܘܵܬ̣ܵܟ݂.

²¹ܗܵܐ ܠܡܝܼ̈ܬܹܐ ܥܵܒܹ̇ܕ݂ ܐܲܢ̄ܬ̇ ܬܸܕ݂ܡ̱ܪ̈ܵܬ̣ܵܐ.

²²ܘܓܲܢ̄ܒܵܪܹ̈ܐ ܢܩܘܼܡܘܼܢ ܘܢܲܘܕ̇ܘܼܢ ܠܵܟ݂.

²³ܘܢܸܫܬܲܥܘܼܢ ܕܲܒ̣ܩܲܒ̣ܪܹ̈ܐ ܛܲܝܒ̇ܘܼܬ̣ܵܟ݂.

²⁴ܘܗܲܝܡܵܢܘܼܬ̣ܵܟ݂ ܒܐܲܒ̣ܕܵܢܵܐ.

²⁵ܬܸܬ̣ܝܼܕܲܥ ܒܚܸܫܘܿܟ̣ܵܐ ܬܸܕ݂ܡܘܼܪܬܵܟ݂.

²⁶ܘܙܲܕ̇ܝܼܩܘܼܬ̣ܵܟ݂ ܒܐܲܪܥܵܐ ܕܐܸܬ̇ܛܲܥܝܲܬ݀.

²⁷ܘܐܸܢܵܐ ܠܘܵܬ̣ܵܟ݂ ܡܵܪܝܵܐ ܓܥܹܝ݁ܬ̣.

²⁸ܘܲܒ̣ܨܲܦܪܵܐ ܨܠܘܿܬ̣ܝ ܬܩܲܕܸܡ ܠܘܵܬ̣ܵܟ݂.

²⁹ܠܵܐ ܬܸܛܥܹܝܗ̇ ܠܢܲܦ̮ܫܝ ܡܵܪܝܵܐ.

³⁰ܘܠܵܐ ܬܲܗܦܸܟ݂ ܐܲܦܲܝ̈ܟ ܡܹܢܝ.

³¹ܒܵܝܫܵܐ ܐ̄ܢܵܐ ܘܠܲܐܝܵܐ ܡ̣ܢ ܛܲܠܝܘܼܬ̣ܝ.

³²ܐܸܬ̇ܬ̇ܪܝܼܡܹ̇ܬ̣ ܘܐܸܬ̣ܡܲܟ̇ܟܹܬ̣ ܘܬܸܘܪܹܬ̣.

³³ܘܲܥܠܲܝ ܥܒ݂ܲܪ ܪܘܼܓ̣ܙܵܟ݂.

³⁴ܘܲܕ݂ܠܘܼܚܝܵܟ݂ ܫܲܬ̇ܩܲܢܝ.

³⁵ܐܸܬ̣ܟܲܪܟ̇ܘܼܢܝ ܐܲܝܟ݂ ܡܲܝ̈ܵܐ ܟܠܹܗ ܝܲܘܡܵܐ.

³⁶ܘܣܵܡ̣ܘ ܥܠܲܝ ܐܲܟ̣ܚ̄ܕ݂ܵܐ.

³⁷ܐܲܪܚܸܩܬ̇ ܡܹܢܝ ܪ̈ܵܚܡܲܝ ܘܚܲܒ̣ܪ̈ܲܝ.

³⁸ܘܝܵܕ݂ܥܲܝ̈ ܐܲܦܪܸܩܬ̇ ܡܹܢܝ.