Read Aramaic Peshita Psalms 89 Bible Online

Psalms 89 - Aramaic Peshita bible

Psalms 89

¹ܛܲܝܒ̇ܘܼܬܹܗ ܕܡܵܪܝܵܐ ܠܥܵܠܲܡ ܐܸܙܡܲܪ.

²ܘܲܠܕ݂ܵܪܕܵܪ̈ܝܼܢ ܐܲܘܕܲܥ ܗܲܝܡܵܢܘܼܬܹܗ ܒܦܘܼܡܝ.

³ܡܸܛܠ ܕܐܸܡܲܪܬ̇ ܕܥܵܠܡܵܐ ܒܛܲܝܒ̇ܘܼܬ̣ܵܐ ܢܸܬ̣ܒ̇ܢܸܐ.

⁴ܘܲܫܡܲܝܵܐ ܬܲܬ̣ܩܸܢ ܗܲܝܡܵܢܘܼܬ̣ܵܟ݂.

⁵ܩܝܵܡܵܐ ܐܲܩܝܼܡܹ̇ܬ̣ ܠܓܲܒ̣ܝܝ.

⁶ܘܝܼܡܝܼ̇ܬ̣ ܠܕ݂ܵܘܝܼܕ݂ ܥܲܒ̣ܕ̇ܝ.

⁷ܕܲܥܕܲܡܵܐ ܠܥܵܠܲܡ ܐܲܬ̣ܩܸܢ ܙܲܪܥܵܟ݂.

⁸ܘܐܸܒ̣ܢܸܐ ܠܕ݂ܵܪܕܵܪ̈ܝܼܢ ܟܘܼܪܣܝܵܟ݂.

⁹ܢܲܘܕ̇ܘܿܢ ܫܡܲܝܵܐ ܬܸܕ݂ܡܪ̈ܵܬ̣ܵܟ݂ ܡܵܪܝܵܐ.

¹⁰ܘܗܲܝܡܵܢܘܼܬ̣ܵܟ݂ ܒܥܹܕ̄ܬܵܐ ܕܩܲܕ̇ܝܼܫܹ̈ܐ.

¹¹ܡܲܢ̣ܘܼ ܕܦܵܚܸܡ݁ ܠܡܵܪܝܵܐ ܒܲܫܡܲܝ ܫܡܲܝܵܐ.

¹²ܘܲܕ̇ܕ݂ܵܡܹܐ ܠܡܵܪܝܵܐ ܒܲܒ̣ܢܲܝ̈ ܡܲܠܲܐܟܹ̈ܐ.

¹³ܐܲܠܵܗܵܐ ܩܵܡ݂ ܒܥܹܕ̄ܬܵܐ ܕܩܲܕ̇ܝܼܫܹ̈ܐ.

¹⁴ܪܲܒ̇ ܘܲܕ݂ܚܝܼܠ ܥܲܠ ܟܠܗܘܿܢ ܕܲܚܕ݂ܵܪܵܘܗܝ.

¹⁵ܡܵܪܝܵܐ ܐܲܠܵܗܵܐ ܚܲܝܠ̱ܬ̣ܵܢܵܐ.

¹⁶ܡܲܢ̣ܘܼ ܐܲܟ̣ܘܵܬ̣ܵܟ݂ ܥܲܫܝܼܢܵܐ.

¹⁷ܘܗܲܝܡܵܢܘܼܬ̣ܵܟ݂ ܚܕ݂ܵܪܲܝܟ.

¹⁸ܐܲܢ̄ܬ̇ ܫܲܠܝܼܛ ܐܲܢ̄ܬ̇ ܒܓܲܐܝܘܼܬܹܗ ܕܝܲܡܵܐ.

¹⁹ܘܲܕ݂ܠܘܼܚܝܵܐ ܕܓܲܠܠܵܘ̈ܗܝ ܐܲܢ̄ܬ̇ ܡܫܲܬܸ̇ܩ.

²⁰ܐܲܢ̄ܬ̇ ܡܡܲܟܸ̇ܟ݂ ܐܲܢ̄ܬ̇ ܠܫܲܒ̣ܗ̱ܪ̈ܵܢܹܐ ܐܲܝܟ݂ ܕܠܲܩܛܝܼ̈ܠܹܐ.

²¹ܒܲܕ݂ܪܵܥܵܟ݂ ܥܲܫܝܼܢܵܐ ܒܲܕܲܪܬ̇ ܠܲܒ̣ܥܸܠܕ̇ܒ̣ܵܒܲܝ̈ܟ.

²²ܕܝܼܠܵܟ݂ ܐܸܢܘܿܢ ܫܡܲܝܵܐ ܘܕ݂ܝܼܠܵܟ݂ ܗ̄ܝ̣ ܐܲܪܥܵܐ.

²³ܬܹܒܹܝܠ ܒܲܡܠܹܐܵܗ̇ ܐܲܢ̄ܬ̇ ܬܲܩܸܢܬ̇.

²⁴ܠܓܲܪܒ̇ܝܵܐ ܘܲܠܬܲܝܡ̱ܢܵܐ ܐܲܢ̄ܬ̇ ܒܪܲܝܬ̇.

²⁵ܬܵܒ̣ܘܿܪ ܘܚܸܪܡܘܿܢ ܠܲܫܡܵܟ݂ ܗ̄ܘ̣ ܡܫܲܒ̇ܚܝܼܢ.

²⁶ܕܝܼܠܵܟ݂ ܗ̄ܘ̣ ܕܪܵܥܵܐ ܘܕ݂ܝܼܠܵܟ݂ ܗ̄ܝ̣ ܓܲܢ̄ܒܵܪܘܼܬ̣ܵܐ.

²⁷ܬܸܥܫܲܢ ܐܝܼܕ݂ܵܟ݂ ܘܬܸܬ̇ܪܝܼܡ ܝܲܡܝܼܢܵܟ݂.

²⁸ܒܙܲܕ̇ܝܼܩܘܼܬ̣ܵܐ ܘܲܒ̣ܕ݂ܝܼܢܵܐ ܡܲܬ̣ܩܲܢ ܟܘܼܪܣܝܵܟ݂.

²⁹ܒܛܲܝܒ̇ܘܼܬ̣ܵܐ ܘܲܒ̣ܩܘܼܫܬܵܐ ܡܩܲܕ̇ܡܝܼܢ ܐܲܦܲܝ̈ܟ.

³⁰ܛܘܼܒ̣ܵܘܗܝ ܠܥܲܡܵܐ ܕܝܵܕܲܥ ܬܸܫ̈ܒ̇ܚܵܬ̣ܵܟ݂.

³¹ܡܵܪܝܵܐ ܒܢܘܼܗܪܵܐ ܕܐܲܦܲܝ̈ܟ ܢܗܲܠܟ̣ܘܼܢ.

³²ܘܒܲܫܡܵܟ݂ ܢܕ݂ܘܼܨܘܼܢ ܟܠܝܘܿܡ.

³³ܘܲܒ̣ܙܲܕ̇ܝܼܩܘܼܬ̣ܵܟ݂ ܢܸܬ̇ܬ̇ܪܝܼܡܘܼܢ.

³⁴ܡܸܛܠ ܕܬܸܫܒ̇ܘܿܚܬܵܐ ܕܥܘܼܫܢܲܢ ܐܲܢ̄ܬ̇ܘܼ.

³⁵ܘܲܒ̣ܨܸܒ̣ܝܵܢܵܟ݂ ܬܸܬ̇ܪܝܼܡ ܩܲܪܢܲܢ.

³⁶ܡܸܛܠ ܕܡܵܪܝܵܐ ܗ̄ܘ̣ ܬܘܼܟ̣ܠܵܢܲܢ.

³⁷ܘܩܲܕ̇ܝܼܫܵܐ ܕܝܼܣܪܵܝܹܠ ܡܲܠܟܲܢ.

³⁸ܗܵܝܕܹ̇ܝܢ ܡܲܠܸܠ ܒܚܸܙܘܵܢܹ̈ܐ ܥܲܡ ܙܲܕ̇ܝܼ̈ܩܵܘܗܝ.

³⁹ܘܐܸܡܲܪ ܕܣܵܡܹ̇ܬ̣ ܥܘܼܕ݂ܪܵܢܵܐ ܠܓܲܒ̣ܪܵܐ.

⁴⁰ܘܐܲܪܝܼܡܹ̇ܬ̣ ܓܲܒ̣ܝܵܐ ܡ̣ܢ ܥܲܡܵܐ.

⁴¹ܘܐܸܫܟ̇ܚܹ̇ܬ̣ ܠܕ݂ܵܘܝܼܕ݂ ܥܲܒ̣ܕ̇ܝ.

⁴²ܡܸܫܚܵܐ ܕܩܘܼܕ݂ܫܝ ܡܫܲܚܬܹ̇ܗ.

⁴³ܐܝܼܕ݂ܝ ܥܲܕܲܪܬܹ̇ܗ ܘܐܵܦ ܕܪܵܥܝ ܚܲܝܠܹܗ.

⁴⁴ܘܠܵܐ ܐܲܗܢܝܼ ܡܕܸ̇ܡ ܒܥܸܠܕ̇ܒ̣ܵܒܹܗ.

⁴⁵ܘܲܒ̣ܪܹܗ ܕܥܲܘܵܠܵܐ ܠܵܐ ܡܲܟ̇ܟܹܗ.

⁴⁶ܐܲܘܒܸ̇ܕ݂ ܡ̣ܢ ܩܕ݂ܵܡܵܘܗܝ ܠܲܒ̣ܥܸܠܕ̇ܒ̣ܵܒ̣ܵܘ̈ܗܝ.

⁴⁷ܘܲܠܣܵܢܐܵܘ̈ܗܝ ܐܸܬ̣ܒܲܪ.

⁴⁸ܗܲܝܡܵܢܘܼܬ̣ܝ ܘܛܲܝܒ̇ܘܼܬ̣ܝ ܥܲܡܹܗ.

⁴⁹ܘܲܒ̣ܫܹܡܝ ܬܸܬ̇ܪܝܼܡ ܩܲܪܢܹܗ.ܦܵܣܘܿܩܵܐ.

⁵⁰(1) ܐܹܣܝܼܡ ܐܝܼܕܹܗ ܒܝܲܡܵܐ.

⁵¹(2) ܘܲܒ̣ܢܲܗܪ̈ܵܘܵܬ̣ܵܐ ܝܲܡܝܼܢܹܗ.

⁵²(3) ܗܘ݀ ܢܸܩܪܹܝܢܝ ܐܵܒ̣ܝ ܐܲܢ̄ܬ̇.

⁵³(4) ܐܲܠܵܗܝ ܘܦܵܪܘܿܩܝ ܬܲܩܝܼܦܵܐ.

⁵⁴(5) ܐܵܦ ܐܸܢܵܐ ܒܘܼܟ̣ܪܵܐ ܐܸܥܒ̇ܕ݂ܝܼܘܗܝ.

⁵⁵(6) ܘܐܲܪܝܼܡܝܼܘܗܝ ܥܲܠ ܡܲܠܟܹ̈ܐ ܕܐܲܪܥܵܐ.

⁵⁶(7) ܘܲܠܥܵܠܲܡ ܐܸܛܲܪ ܠܹܗ ܛܲܝܒ̇ܘܼܬ̣ܝ.

⁵⁷(8) ܘܲܩܝܵܡܝ ܢܸܬ̣ܗܲܝܡܲܢ ܒܹܗ.

⁵⁸(9) ܐܹܣܝܼܡ ܠܥܵܠܲܡ ܙܲܪܥܹܗ.

⁵⁹(10) ܘܟ̣ܘܼܪܣܝܹܗ ܐܲܝܟ݂ ܝܲܘ̈ܡܵܬ̣ܵܐ ܕܲܫܡܲܝܵܐ.

⁶⁰(11) ܐܸܢ ܢܸܫܒ̇ܩܘܼܢ ܒܢܵܘ̈ܗܝ ܢܵܡܘܿܣܝ.

⁶¹(12) ܘܲܒ̣ܦܘܼܩܕܵܢܲܝ̈ ܠܵܐ ܢܗܲܠܟ̣ܘܼܢ.

⁶²(13) ܐܸܦܩܘܿܕ݂ ܒܫܲܒ̣ܛܵܐ ܥܲܘܠ̱ܗܘܿܢ.

⁶³(14) ܘܒܲܡܚܘܿܬ̣ܵܐ ܚܛܵܗܲܝ̈ܗܘܿܢ.

⁶⁴(15) ܛܲܝܒ̇ܘܼܬ̣ܝ ܠܵܐ ܐܲܥܒܲܪ ܡܸܢܹܗ.

⁶⁵(16) ܘܠܵܐ ܐܹܕܲܓܸ̇ܠ ܒܗܲܝܡܵܢܘܼܬ̣ܝ ܘܠܵܐ ܐܲܣܠܸܐ ܩܝܵܡܝ.

⁶⁶(17) ܡܸܕܸ̇ܡ ܕܲܢܦܲܩ݂ ܡ̣ܢ ܣܸܦ̈ܘܵܬ̣ܝ ܠܵܐ ܐܹܫܲܚܠܸܦ.

⁶⁷(18) ܚܕ݂ܵܐ ܝܑܼܡܝܼܬ̣ ܒܩܘܼܕ݂ܫܝ ܠܕ݂ܵܘܝܼܕ݂ ܘܠܵܐ ܐܹܟܲܕܸ̇ܒ̣.

⁶⁸(19) ܕܙܲܪܥܹܗ ܠܥܵܠܲܡ ܢܸܗܘܸܐ.

⁶⁹(20) ܘܟ̣ܘܼܪܣܝܹܗ ܐܲܝܟ݂ ܫܸܡܫܵܐ ܠܘܼܩܒܲܠܝ.

⁷⁰(21) ܘܐܲܝܟ݂ ܣܲܗܪܵܐ ܢܸܬ̣ܩܲܢ ܠܥܵܠܲܡ.

⁷¹(22) ܣܵܗܕܵܐ ܒܲܫܡܲܝܵܐ ܡܗܲܝܡܵܢ.

⁷²(23) ܘܐܲܢ̄ܬ̇ ܛܥܲܝܬܵܢܝ ܘܐܲܣܠܝܼܬܵܢܝ.

⁷³(24) ܘܐܲܗܦܸܟ̣ܬ̇ ܐܲܦܵܘ̈ܗܝ ܕܲܡܫܝܼܚܵܟ݂.

⁷⁴(25) ܘܐܲܣܠܝܼܬ̇ ܩܝܵܡܹܗ ܕܥܲܒ̣ܕܵܟ݂.

⁷⁵(26) ܘܐܲܪܡܝܼܬ̇ ܒܐܲܪܥܵܐ ܟܠܝܼܠܹܗ.

⁷⁶(27) ܗܓܲܡܬ̇ ܣܝܵܓ̣ܵܘ̈ܗܝ ܘܣܲܚܸܦܬ̇ ܚܸܣܢܵܘ̈ܗܝ.

⁷⁷(28) ܘܕ݂ܵܫܘܼܗܝ ܟܠ ܥܵܒ̣ܪ̈ܲܝ ܐܘܼܪܚܵܐ.

⁷⁸(29) ܘܲܗ̤ܘܵܐ ܚܸܣܕܵܐ ܠܲܫܒ̣ܵܒ̣ܵܘ̈ܗܝ.

⁷⁹(30) ܘܐܲܪܝܼܡܬ̇ ܝܲܡܝܼܢܵܐ ܕܲܒ̣ܥܸܠܕ̇ܒ̣ܵܒ̣ܵܘ̈ܗܝ.

⁸⁰(31) ܘܚܲܕ̇ܝܼܬ̇ ܠܟ̣ܠܗܘܿܢ ܣܵܢܐܵܘ̈ܗܝ.

⁸¹(32) ܘܐܲܗܦܸܟ̣ܬ̇ ܥܘܼܕ݂ܪܵܢܵܐ ܕܣܲܦ̮ܣܹܪܹܗ.

⁸²(33) ܘܠܵܐ ܣܲܝܲܥܬܵܝܗܝ ܒܲܩܪܵܒ̣ܵܐ.

⁸³(34) ܒܲܛܸܠܬ̇ ܡܙܲܟ̇ܝܵܢܵܘ̈ܗܝ.

⁸⁴(35) ܘܟ̣ܘܪܣܝܹܗ ܠܐܲܪܥܵܐ ܣܚܲܦܬ̇.

⁸⁵(36) ܒܲܨܲܪܬ̇ ܝܲܘ̈ܡܵܬ̣ܵܐ ܕܛܲܠܝܘܼܬܹܗ.

⁸⁶(37) ܘܐܲܥܛܸܦܬܵܝܗܝ ܒܸܗܬ̇ܬ̣ܵܐ.

⁸⁷(38) ܥܕܲܡܵܐ ܠܐܸܡܲܬ̣ܝ ܪܵܓܹܙ݁ ܐܲܢ̄ܬ̇ ܡܵܪܝܵܐ ܠܥܵܠܲܡ.

⁸⁸(49) ܘܝܵܩܹ̇ܕ݂ ܐܲܝܟ݂ ܢܘܼܪܵܐ ܪܘܼܓ̣ܙܵܟ݂.

⁸⁹(40) ܐܸܬ̇ܕܲܟ̣ܪܲܝܢ ܡ̣ܢ ܚܸܦܪܵܐ.

⁹⁰(41) ܡܸܛܠ ܕܠܵܐ ܗ̄ܘ̣ܵܐ ܣܪܝܼܩܵܐܝܼܬ̣ ܒܪܲܝܬ̇ ܠܟ̣ܠܗܘܿܢ ܒܢܲܝ̈ܢܵܫܵܐ.

⁹¹(42) ܡܲܢ̣ܘܼ ܓܲܒ̣ܪܵܐ ܕܢܸܚܸܐ ܘܠܵܐ ܢܸܚܙܸܐ ܡܲܘܬܵܐ.

⁹²(43) ܘܲܢܦܲܨܸܐ ܢܲܦ̮ܫܹܗ ܡ̣ܢ ܐܝܼܕ݂ܵܐ ܕܲܫܝܘܿܠ.

⁹³(44) ܐܲܝܟܵܐ ܐܸܢܹܝܢ ܛܲܝ̈ܒ̇ܘܵܬ̣ܵܟ݂ ܡܵܪܝܵܐ ܩܲܕ݂ܡܵܝ̈ܵܬ̣ܵܐ.

⁹⁴(45) ܕܝܼܡܲܝܬ̇ ܠܕ݂ܵܘܝܼܕ݂ ܒܗܲܝܡܵܢܘܼܬ̣ܵܐ.

⁹⁵(46) ܐܸܬ̇ܕܲܟ̣ܪ ܡܵܪܝܵܐ ܚܸܣܕܹ̇ܗ ܕܥܲܒ̣ܕܵܟ݂.

⁹⁶(47) ܕܫܸܩ݁ܠܹܬ̣ ܒܚܲܝܲܝ̈ ܟܠܹܗ ܪܸܢܝܼܗܘܿܢ ܕܥܲܡܡܹ̈ܐ.

⁹⁷(48) ܚܲܣܕ݂ܘܼܢܝ ܒܥܸܠܕ̇ܒ̣ܵܒܲܝ̈ܟ ܡܵܪܝܵܐ.

⁹⁸(49) ܘܚܲܣܸܕ݂ܘ ܥܸܩܒ̣ܵܘ̈ܗܝ ܕܲܡܫܝܼܚܵܟ݂.

⁹⁹(50) ܒܪܝܼܟ̣ܘܼ ܡܵܪܝܵܐ ܠܥܵܠܲܡ ܐܵܡܹܝܢ ܘܐܵܡܹܝܢ.