Read Aramaic Peshita Psalms 9 Bible Online

Psalms 9 - Aramaic Peshita bible

Psalms 9

¹ܐܵܘܕܹ̇ܐ ܠܡܵܪܝܵܐ ܡ̣ܢ ܟܠܹܗ ܠܹܒ̇ܝ.

²ܘܐܸܫܬܲܥܸܐ ܟܠܗܹܝܢ ܬܸܕ݂ܡ̱ܪ̈ܵܬ̣ܵܟ݂.

³ܐܸܚܕܸ̇ܐ ܘܐܸܪܘܲܙ ܒܵܟ݂.

⁴ܘܐܸܙܡܲܪ ܠܲܫܡܵܟ݂ ܡܪܲܝܡܵܐ.

⁵ܟܲܕ݂ ܢܸܗܦܟ̣ܘܼܢ ܒܥܸܠܕ̇ܒ̣ܵܒܲܝ̈ ܠܒܸܣܬܲܪܗܘܿܢ.

⁶ܢܸܬ̇ܬܲܩܠܘܼܢ ܘܢܹܐܒ̣ܕ̇ܘܼܢ ܡ̣ܢ ܩܕ݂ܵܡܲܝܟ.

⁷ܡܸܛܠ ܕܲܥܒܲܕ̇ܬ̇ ܦܘܼܪܥܵܢܝ ܘܕ݂ܝܼܢܝ.

⁸ܘܝܼܬܸܒ̣ܬ̇ ܥܲܠ ܟܘܼܪܣܝܵܐ ܕܲܝܵܢܵܐ ܙܲܕ̇ܝܼܩܵܐ.

⁹ܟܐܲܝܬ̇ ܒܥܲܡܡܹ̈ܐ ܘܐܲܘܒܸܿܕ̇ܬ̇ ܠܪ̈ܲܫܝܼܥܹܐ.

¹⁰ܘܲܫܡܵܗܲܝ̈ܗܘܿܢ ܥܛܲܝܬ̇ ܠܥܵܠܲܡ ܥܵܠܡܝܼܢ.

¹¹ܒܥܸܠܕ̇ܒ̣ܵܒܲܝ̈ ܓܡܲܪܘ ܒܣܲܝܦܵܐ ܠܥܵܠܲܡ.

¹²ܩܘܼܖ̈ܝܵܐ ܥܩܲܪܬ̇ ܘܐܲܘܒܸܕ̇ܬ̇ ܕܘܼܟ̣ܪܵܢܗܹܝܢ.

¹³ܘܡܵܪܝܵܐ ܠܥܵܠܲܡ ܩܲܝܵܡ.

¹⁴ܘܡܲܬ̣ܩܲܢ ܟܘܼܪܣܝܹܗ ܠܕ݂ܝܼܢܵܐ.

¹⁵ܕܲܢܕ݂ܘܼܢ ܬܹܒܹܝܠ ܒܩܘܼܫܬܵܐ.

¹⁶ܘܲܠܥܲܡܡܹ̈ܐ ܒܲܬ̣ܪܝܼܨܘܼܬ̣ܵܐ.

¹⁷ܢܸܗܘܸܐ ܡܵܪܝܵܐ ܒܹܝܬ̣ ܓܲܘܣܵܐ ܠܡܸܣܟܹ̇ܢܹ̈ܐ.

¹⁸ܘܲܡܥܲܕ̇ܪܵܢܗܘܿܢ ܒܙܲܒ̣ܢܹ̈ܐ ܕܐܘܼܠܨܵܢܵܐ.

¹⁹ܢܣܲܒ̇ܪܘܼܢ ܒܵܟ݂ ܟܠ ܝܵܕ݂ܥܲܝ̈ ܫܡܵܟ݂.

²⁰ܡܸܛܠ ܕܠܵܐ ܫܵܒܸܩ ܐܲܢ̄ܬ̇ ܠܐܲܝܠܹܝܢ ܕܒ̣ܵܥܹ̇ܝܢ ܠܵܟ݂ ܡܵܪܝܵܐ.

²¹ܙܡܲܪܘ ܠܡܵܪܝܵܐ ܕܥܵܡܲܪ ܒܨܸܗܝܘܿܢ.

²²ܘܚܲܘܵܘ ܒܥܲܡܡܹ̈ܐ ܨܸܢ̈ܥܵܬܹܗ.

²³ܡܸܛܠ ܕܐܸܬ̇ܕ̇ܟܲܪ ܠܡܸܬ̣ܒܲܥ ܕܸܡܗܘܿܢ.

²⁴ܘܠܵܐ ܛܵܥܹ̇ܐ ܓܥܵܬܹܗ ܕܡܸܣܟܹ̇ܢܵܐ.

²⁵ܪܲܚܸܡ ܥܠܲܝ ܡܵܪܝܵܐ.

²⁶ܘܲܚܙܝܼ ܫܘܼܥܒܵܕ݂ܝ ܕܡ̣ܢ ܣܵܢ̈ܐܲܝ.

²⁷ܡܪܲܡ̱ܪܡܵܢܝ ܡ̣ܢ ܬܲܪ̈ܥܵܘܗܝ ܕܡܲܘܬܵܐ.

²⁸ܡܸܛܠ ܕܐܸܫܬܲܥܸܐ ܟܠܗܹܝܢ ܬܸܕ݂ܡܪ̈ܵܬ̣ܵܟ݂.

²⁹ܒܬܲܖ̈ܥܹܐ ܕܒܲܪ̄ܬ̣ ܨܸܗܝܘܿܢ.

³⁰ܐܹܕ̇ܘܼܨ ܒܦܘܼܪܩܵܢܵܟ݂.

³¹ܛܒܲܥܘ ܥܲܡܡܹ̈ܐ ܒܓ̣ܘܼܡܵܨܵܐ ܕܲܥܒܲܕ݂ܘ.

³²ܘܒܲܡܨܝܼܕ̇ܬܵܐ ܕܲܛܡܲܪܘ ܐܸܬ̇ܬܲܚܕܲܬ̤ ܪܸܓ̣ܠ̱ܗܘܿܢ.

³³ܡܲܘܕܲܥ ܡܵܪܝܵܐ ܕܝܼܢܵܐ ܕܥܵܒܸ݁ܕ݂.

³⁴ܘܒܲܥܒ̣ܵܕ݂ ܐܝܼܕ݂ܵܘ̈ܗܝ ܡܸܬ̇ܬ̇ܚܸܕ݂ ܪܲܫܝܼܥܵܐ.

³⁵ܢܸܗܦܟ̣ܘܼܢ ܖ̈ܲܫܝܼܥܹܐ ܠܲܫܝܘܿܠ.

³⁶ܘܟ̣ܠܗܘܿܢ ܥܲܡܡܹ̈ܐ ܕܛܵܥܹ̇ܝܢ ܠܐܲܠܵܗܵܐ.

³⁷ܡܸܛܠ ܕܠܵܐ ܠܥܵܠܲܡ ܡܸܬ̇ܛܥܸܐ ܡܸܣܟܹ̇ܢܵܐ.

³⁸ܘܣܲܒ̣ܪܵܐ ܕܡܸܣܟܹ̇ܢܹ̈ܐ ܠܵܐ ܬܲܘܒܸ̇ܕ݂ ܠܥܵܠܲܡ.

³⁹ܩܘܼܡ ܡܵܪܝܵܐ ܘܠܵܐ ܢܸܬ̣ܥܲܫܲܢ ܒܲܪܢܵܫܵܐ.

⁴⁰ܢܸܬ̇ܬ̇ܕ̇ܝܼܢܘܼܢ ܥܲܡܡܹ̈ܐ ܩܕ݂ܵܡ ܐܲܦܲܝ̈ܟ.

⁴¹ܐܲܩܝܼܡ ܠܗܘܿܢ ܣܵܐܹܡ ܢܵܡܘܿܣܵܐ.

⁴²ܕܢܸܕ̇ܥܘܼܢ ܥܲܡܡܹ̈ܐ ܕܲܒ̣ܢܲܝ̈ܢܵܫܵܐ ܐܸܢܘܿܢ܀