Read Aramaic Peshita Psalms 94 Bible Online

Psalms 94 - Aramaic Peshita bible

Psalms 94

¹ܐܲܠܵܗܵܐ ܬܵܒ̣ܘܿܥܵܐ ܡܵܪܝܵܐ.

²ܐܲܠܵܗܵܐ ܬܵܒ̣ܘܿܥܵܐ ܐܸܬ̣ܓܲܠܝܝ.

³ܐܸܬ̇ܬ̇ܪܝܼܡ ܕܲܝܵܢܵܗ̇ ܕܐܲܪܥܵܐ.

⁴ܘܐܲܗܦܸܟ݂ ܦܘܼܪܥܵܢܵܐ ܥܲܠ ܐܲܝܠܹܝܢ ܕܡܸܬ̣ܓܲܐܹܝܢ.

⁵ܥܕܲܡܵܐ ܠܐܸܡܲܬ̣ܝ ܪ̈ܲܫܝܼܥܹܐ ܡܵܪܝܵܐ.

⁶ܥܕܲܡܵܐ ܠܐܸܡܲܬ̣ܝ ܪ̈ܲܫܝܼܥܹܐ ܡܸܫܬܲܒ̣ܗ̱ܪܝܼܢ.

⁷ܓܵܣܹ̇ܝܢ ܘܲܡܡܲܠܠܝܼܢ ܥܲܘܠܵܐ.

⁸ܘܐܵܡ̇ܪܝܼܢ ܟܠ ܥܵܒ݂̈ܕܲܝ ܥܲܘܠܵܐ.

⁹ܕܡܲܟܸܟ̣ܘ ܠܥܲܡܵܟ݂ ܡܵܪܝܵܐ.

¹⁰ܘܲܠܝܵܪܬ̇ܘܼܬ̣ܵܟ݂ ܫܲܥ݂ܒܸܕ݂ܘ.

¹¹ܠܐܲܪ̈ܡ̱ܠܵܬ̣ܵܐ ܘܲܠܥܵܡܘܿܪܹ̈ܐ ܩܛܲܠ݂ܘ.

¹²ܘܲܠܝܲܬ̣ܡܹ̈ܐ ܚܪ݂ܲܒ̣ܘ.

¹³ܘܐܸܡܲܪ݂ܘ ܕܠܵܐ ܚܵܙܹ̇ܐ ܡܵܪܝܵܐ.

¹⁴ܘܠܵܐ ܡܸܣܬܲܟܲܠ ܐܲܠܵܗܹܗ ܕܝܲܥܩܘܿܒ̣.

¹⁵ܐܸܣܬܲܟܲܠܘ ܫܵܛܲܝ̈ܵܐ ܒܥܲܡܵܐ.

¹⁶ܣܲܟ̣ܠܹ̈ܐ ܥܕܲܡܵܐ ܠܐܸܡܲܬ̣ܝ ܠܵܐ ܡܸܣܬܲܟ̇ܠܝܼܢ ܐܢ̄ܬ̇ܘܿܢ.

¹⁷ܗܵܘ̇ ܕܲܢܨ݂ܲܒ̣ ܐܸܕ݂ܢܹ̈ܐ ܕܲܠܡܵܐ ܠܵܐ ܫܵܡܲܥ̇.

¹⁸ܗܵܘ̇ ܕܲܒ̣ܪܵܐ ܥܲܝܢܹ̈ܐ ܕܲܠܡܵܐ ܠܵܐ ܡܸܣܬܲܟܲܠ.

¹⁹ܗܵܘ̇ ܕܪܵܕܹܐ ܥܲܡܡܹ̈ܐ ܕܲܠܡܵܐ ܠܵܐ ܡܲܟܸ̇ܣ.

²⁰ܗܵܘ̇ ܕܡܲܠܸܦ ܠܒܲܪܢܵܫܵܐ ܝܑܼܕܲܥܬ̣ܵܐ.

²¹ܡܵܪܝܵܐ ܝܵܕܲܥ̇ ܡܲܚܫ̈ܒ̣ܵܬ̣ܗܘܿܢ ܕܲܒ̣ܢܲܝ̈ܢܵܫܵܐ.

²²ܡܸܛܠ ܕܠܲܗܓܵܐ ܐܸܢܘܿܢ.

²³ܛܘܼܒ̣ܵܘܗܝ ܠܒܲܪܢܵܫܵܐ ܕܬܸܪܕܹ̇ܝܘܗܝ ܐܲܢ̄ܬ̇ ܡܵܪܝܵܐ.

²⁴ܘܡ̣ܢ ܢܵܡܘܿܣܵܟ݂ ܬܲܠܦܝܼܘܗܝ.

²⁵ܘܲܬ̣ܢܝܼܚܝܼܘܗܝ ܡ̣ܢ ܝܲܘ̈ܡܵܬ̣ܵܐ ܒܝܼܫܹ̈ܐ.

²⁶ܥܕܲܡܵܐ ܕܢܸܬ̣ܚܦܲܪ ܠܪ̈ܲܫܝܼܥܹܐ ܓܘܼܡܵܨܵܐ.

²⁷ܡܸܛܠ ܕܠܵܐ ܡܲܪܦܸܐ ܡܵܪܝܵܐ ܠܥܲܡܹܗ.

²⁸ܘܲܠܝܵܪܬ̇ܘܼܬܹܗ ܠܵܐ ܫܵܒܹܩ݁.

²⁹ܡܸܛܠ ܕܒ̣ܵܬܲܪ ܙܲܕ݂ܝܼܩܵܐ ܗܵܦܹ̇ܟ݂ ܕܝܼܢܵܐ.

³⁰ܘܒ̣ܵܬ̣ܪܹܗ ܟܠܗܘܿܢ ܬܪ̈ܝܼܨܲܝ ܠܸܒܵܐ.

³¹ܡܲܢ̣ܘܼ ܢܩܘܼܡ ܠܝܼ ܥܲܡ ܒܝܼܫܹ̈ܐ.

³²ܘܡܲܢ̣ܘܼ ܢܸܬ̇ܛܲܝܲܒ̣ ܠܝܼ ܥܲܡ ܥܵܒ̣ܕܲܝ̈ ܥܲܘܠܵܐ.

³³ܐܸܠܘܼܠܵܐ ܡܵܪܝܵܐ ܕܲܗ̤ܘܵܐ ܠܝܼ ܥܵܕ݂ܘܿܪܵܐ.

³⁴ܥܲܕ݂ ܩܲܠܝܼܠ ܫܵܪܝܵܐ ܗ̄ܘ̣ܵܬ̣ ܢܲܦ̮ܫܝ ܒܕ݂ܵܘܘܿܢܵܐ.

³⁵ܐܸܢܵܐ ܐܸܡ̇ܪܹܬ̣ ܕܡܵܛ݂ ܪܸ̈ܓ̣ܠܲܝ.

³⁶ܘܛܲܝܒ̇ܘܼܬ̣ܵܟ݂ ܡܵܪܝܵܐ ܣܡܲܟ̣ܬܲܢܝ.

³⁷ܒܣܘܿܓ̣ܐܵܐ ܕܟܹܐܒ̣ܵܘ̈ܗܝ ܕܠܹܒ̇ܝ.

³⁸ܒܘܼܝܵܐܲܝ̈ܟ ܦܲܪܩܘܼܗ̇ ܠܢܲܦ̮ܫܝ.

³⁹ܠܵܐ ܢܚܲܒܲܪ ܥܲܡܵܟ݂ ܟܘܼܪܣܝܵܐ ܕܥܲܘܵܠܹ̈ܐ.

⁴⁰ܕܲܓ̣ܒܲܠܘ ܥܲܘܠܵܐ ܥܲܠ ܢܵܡܘܿܣܵܟ݂.

⁴¹ܘܨܵܠܹ̇ܝܢ ܠܲܡܨܵܕ݂ ܢܲܦ̮ܫܹܗ ܕܙܲܕ̇ܝܼܩܵܐ.

⁴²ܘܲܕ݂ܡܹܗ ܕܙܲܟܵܝܵܐ ܡܚܲܝܒ̣ܝܼܢ.

⁴³ܘܲܗܘ݀ܵܐ ܠܝܼ ܡܵܪܝܵܐ ܡܥܲܫܢܵܢܵܐ.

⁴⁴ܐܲܠܵܗܵܐ ܬܲܩܝܼܦܵܐ ܡܥܲܕ̇ܪܵܢܵܐ.

⁴⁵ܐܲܗܦܸܟ݂ ܥܠܲܝܗܘܿܢ ܥܲܘܠ̱ܗܘܿܢ.

⁴⁶ܘܲܒ̣ܒ̣ܝܼܫܘܼܬ̣ܗܘܿܢ ܫܲܬܸܩ ܐܸܢܘܿܢ.

⁴⁷ܫܲܬܸܩ ܐܸܢܘܿܢ ܡܵܪܝܵܐ ܐܲܠܵܗܲܢ.