Read Aramaic Peshita Proverbs 10 Bible Online

Proverbs 10 - Aramaic Peshita bible

Proverbs 10

¹ܒܪܵܐ ܚܲܟ̇ܝܼܡܵܐ ܡܚܲܕܹ̇ܐ ܠܐܲܒ̣ܘܼܗܝ. ܘܲܒ̣ܪܵܐ ܚܲܣܝܼܪ ܪܸܥܝܵܢܵܐ ܡܲܒ̣ܗܸܬ̣ ܠܐܸܡܹܗ.

²ܠܲܝܬ̇ ܝܘܼܬ̣ܪܵܢ ܒܣܝܼ̈ܡܵܬܹܗ ܕܥܵܘܵܠܐ. ܙܲܕ̇ܝܼܩܘܼܬ̣ܵܐ ܕܹܝܢ ܡܦܲܨܝܵܐ ܡ̣ܢ ܡܵܘܬܵܐ.

³ܠܵܐ ܓܹܝܪ ܡܲܟ݂ܦܸܢ ܡܵܪܝܵܐ ܢܲܦ̮ܫܹܗ ܕܙܲܕ̇ܝܼܩܵܐ. ܘܩܸܢܝܵܢܵܐ ܕܥܵܘܿܠܹ̈ܐ ܡܣܲܚܸܦ.

⁴ܡܸܣܟܹ̇ܢܘܼܬ̣ܵܐ ܡܡܲܟ̇ܟ݂ܵܐ ܠܓܲܒ̣ܪܵܐ. ܐܝܼܕܲܝܵܐ ܕܹܝܢ ܕܟܲܫܝܼܪܹ̈ܐ ܡܲܥܬ̇ܪ̈ܵܢ.

⁵ܕܦܵܠܲܚ ܒܩܲܝܛܵܐ: ܒܪܵܐ ܗ̄ܘܼ ܣܲܟ̇ܘܼܠܬ̣ܵܢܵܐ. ܘܲܕ̇ܕ݂ܵܡܹ̇ܟ݂ ܒܲܚܨܵܕ݂ܵܐ: ܒܪܵܐ ܗ̄ܘܼ ܡܲܒ̣ܗ̱ܬ̣ܵܢܵܐ.

⁶ܒܘܼܪܟ̇ܬ̣ܵܐ ܬܸܗܘܹܐ ܥܲܠ ܪܹܫܹܗ ܕܙܲܕ̇ܝܼܩܵܐ. ܘܲܠܦܘܼܡܗܘܿܢ ܕܥܵܘ̈ܠܹܐ ܢܟܲܣܹܐ ܥܵܘܼܠܵܐ.

⁷ܥܘܼܗܕܵܢܹܗ ܕܙܲܕ̇ܝܼܩܵܐ ܠܒ̣ܘܼܪܟ̇ܬ̣ܵܐ ܘܲܫܡܵܐ ܕܥܵܘܿܠܹ̈ܐ ܢܸܕ݂ܥܲܟ݂.

⁸ܕܚܲܟ̇ܝܼܡ ܠܸܒܹ̇ܗ: ܢܩܲܒܸ̇ܠ ܦܘܼܩܕܵܢܵܐ. ܘܲܕ݂ܫܵܛ̈ܝܵܢ ܣܸܦ̈ܘܵܬ̣ܵܗ̇: ܢܸܬ̇ܬ̇ܚܸܕ݂.

⁹ܕܲܡܗܲܠܸܟ݂ ܒܬܲܡܝܼܡܘܼܬ̣ܵܐ: ܢܹܐܙܲܠ ܒܣܲܒ̣ܪܵܐ. ܘܕܲܡܥܲܩ̈ܡܵܢ ܐܘܼܪ̈ܚܵܬܹܗ: ܢܸܬ̣̱ܝܼܕܲܥ.

¹⁰ܕܪܵܡܹ̇ܙ ܒܥܲܝܢܵܘ̈ܗܝ ܒܢܸܟ݂ܠܵܐ: ܝܵܗܹ̇ܒ̣ ܟܹܐܒ̣ܵܐ. ܘܲܕ݂ܡܲܟܸ̇ܣ ܓܲܠܝܵܐܝܼܬ̣: ܥܵܒܹ̇ܕ݂ ܫܠܵܡܵܐ.

¹¹ܡܲܒ̇ܘܼܥܵܐ ܕܚܲܝܹ̈ܐ ܦܘܼܡܹܗ ܕܙܲܕ̇ܝܼܩܵܐ. ܘܲܠܦܘܼܡܗܘܿܢ ܕܥܵܘܿܠܹ̈ܐ ܢܟܲܣܹܐ ܥܵܘܼܠܵܐ.

¹²ܣܸܢܐ̱ܬ̣ܵܐ ܬܓܲܪܸܓ̣ ܕܝܼܢܵܐ. ܘܲܠܟ݂ܠܗܘܿܢ ܥܵܘܿܠܹ̈ܐ ܬܟܲܣܹܐ ܒܸܗܬ̇ܬ̣ܵܐ.

¹³ܡ̇ܢ ܕܡ̣ܢ ܣܸܦ̈ܘܵܬܹܗ ܡܲܦܸܩ ܚܸܟ݂ܡ̱ܬ̣ܵܐ: ܒܫܲܒ̣ܛܵܐ ܫܵܩܹ̇ܦ ܠܓܲܒ̣ܪܵܐ ܚܲܣܝܼܪ ܠܸܒܵܐ.

¹⁴ܚܲܟ̇ܝܼܡܹ̈ܐ ܢܛܲܫܘܿܢ ܝܼܕܲܥܬ̣ܵܐ. ܘܦܘܼܡܹܗ ܡܣܲܪ̱ܗܒ̣ܵܐ: ܩܲܪܝܼܒ̣ ܗܘܼ ܠܲܬ̣ܒ̣ܵܪܵܐ.

¹⁵ܩܸܢܝܵܢܵܐ ܕܥܲܬ̇ܝܼܟܹ̈ܐ ܟܲܪ̈ܟܹܐ ܥܲܫܝܼܢܹ̈ܐ. ܘܲܬ̣ܒ̣ܵܪܵܐ ܕܡܸܣܟܹܢܹ̈ܐ ܡܸܣܟܲܘܼܬ̣ܗܘܿܢ.

¹⁶ܥܒ̣ܵܕܹ̇ܗ ܕܙܲܕ̇ܝܼܩܵܐ ܠܚܲܝܹ̈ܐ. ܘܥܲܠܠܵܬܹ̈ܗ ܕܥܵܘܵܠܐ ܠܲܚܛܝܼܬ̣ܵܐ.

¹⁷ܐܘܼܪܚܵܐ ܕܚܲܝܹ̈ܐ ܢܵܛ̇ܪܵܐ ܡܲܪܕ̇ܘܼܬ̣ܵܐ. ܘܲܕ݂ܣܵܢܹ̇ܐ ܡܲܟ̇ܣܵܢܘܼܬ̣ܵܐ: ܣܲܟ݂ܠܵܐ ܗ̄ܘܼ.

¹⁸ܡܲܟ݂ܡ̈ܢܵܢ ܒܥܸܠܕ̇ܒ̣ܵܒ̣ܘܼܬ̣ܵܐ ܣܸܦ̈ܘܵܬ̣ܵܐ ܕܥܵܘܿܠܵܐ ܘܲܕ݂ܡܲܦܸܩ ܠܵܘܛܬ̣ܵܐ: ܚܲܣܝܼܪ ܪܸܥܝܵܢܵܐ ܗ̄ܘܼ.

¹⁹ܒܣܘܿܓ̣ܵܐܐ ܕܡܸܠܹ̈ܐ ܠܵܐ ܡܸܬ̣ܦܲܨܵܐ ܥܵܘܿܠܵܐ. ܘܲܕ݂ܚܵܣܹ̇ܟ݂ ܣܸܦ̈ܘܵܬܹܗ: ܣܲܟ̇ܘܼܠܬ̣ܵܢ.

²⁰ܣܹܐܡܵܐ ܓܲܒ̣ܝܵܐ ܠܸܫܵܢܹܗ ܕܙܲܕ̇ܝܼܩܵܐ. ܘܠܸܒܵܐ ܕܥܵܘܿܠܹܐ ܡܸܪܬ̣ܵܐܗ̄ܘܼ.

²¹ܣܸܦ̈ܘܵܬܹܗ ܕܙܲܕ̇ܝܼܩܵܐ ܣܲܓ̇ܝܼ ܡܪ̈ܲܚܡܵܢܝܵܢ. ܘܫܵܛܲـ̈ـܝܵܐ ܒܚܲܣܝܼܪܘܼܬ̣ ܪܸܥܝܵܢܗܘܿܢ ܢܡܘܼܬ̣ܘܼܢ.

²²ܒܘܼܪܟ̇ܬܹܗ ܕܡܵܪܝܵܐ ܡܲܥ̄ܬ̇ܪܵܐ. ܘܟܹܐܒ̣ܵܐ ܠܵܐ ܢܸܗܘܹܐ ܥܲܡܵܗ̇.

²³ܣܲܟ݂ܠܵܐ ܟܲܕ݂ ܓܵܚܹ̇ܟ: ܥܵܒܹ̇ܕ݂ ܒܝܼܫܬܵܐ ܘܚܸܟ݂ܡ̱ܬ̣ܵܐ ܠܓܲܒ̣ܪܵܐ ܣܘܼܟܵܠܹܗ.

²⁴ܥܵܘܿܠܵܐ ܠܐܲܒ̣ܕܵܢܵܐ ܡܸܬ̣̱ܢܥܸܓ̣ ܘܣܲܒ̣ܪܵܐ ܡܸܬ̣̱ܝܼܗܸܒ̣ ܠܙܲܕ̇ܝܼܩܹ̈ܐ.

²⁵ܐܲܝܟ݂ ܕܡ̣ܢ ܫܸܠܝܵܐ ܥܵܒ̣ܪܵܐ ܥܲܠܥܵܠܵܐ. ܗܵܟܲܢܵܐ ܢܹܐܒܲܕ݂ ܥܵܘ̇ܠܵ ܘܠܵܐ ܢܸܫܬ̇ܟܲܚ ܙܲܕ̇ܝܼܩܵܐ ܕܹܝܢ ܢܸܬ̇ܬ̇ܣܝܼ̈ܡܵܢ ܫܲܬ̣ܐ̱ܣܵܘ̈ܗܝ ܠܥܵܠܲܡ.

²⁶ܐܲܝܟܲܢܵܐ ܕܒܸܣܪܹ̈ܐ: ܠܫܸܢܹ̈ܐ ܢܵܟܹ̇ܝܢ: ܘܬܸܢܵܢܵܐ ܠܥܲܝܢܹ̈ܐ. ܗܵܟܲܢܵܐ ܢܵܟܹ̇ܐ ܥܵܘܼܠܵܐ ܠܥܵܒ̣̇ܘܿܕ݂ܵܘ̈ܗܝ.

²⁷ܕܸܚ̱ܠܬܹܗ ܕܡܵܪܝܵܐ ܬܵܘܣܸܦ ܝܵܘ̈ܡܵܬ̣ܵܐ. ܘܲܫܢܲܝ̈ܗܘܿܢ ܕܥܵܘܿܠܹܐ ܢܸܬ̣ܒܲܨܪ̈ܵܢ.

²⁸ܣܲܒ̣ܪ̱ܗܘܿܢ ܕܙܲܕ̇ܝܼܩܹ̈ܐ ܒܚܲܕ݂ܘܼܬ̣ܵܐ. ܘܣܲܒ̣ܪܵܐ ܕܥܵܘܿܠܹܐ ܢܹܐܒܲܕ݂.

²⁹ܡܲܥ̄ܫܢܵܐ ܐܘܼܪܚܹܗ ܕܡܵܪܝܵܐ ܠܬܲܡܝܼ̈ܡܹܐ. ܘܬ̣ܵܒܲܪ! ܠܥܵـ̇ـܒ̣ܕܲܝ ܥܵܘܼܠܵܐ.

³⁰ܙܲܕ̇ܝܼܩܵܐ ܥܵܠܲܡ ܠܵܐ ܢܙܘܼܥ. ܘܥܵܘܿܠܹܐ ܠܵܐ ܢܸܥ̱ܡܪܘܿܢ ܒܐܲܪܥܵܐ.

³¹ܦܘܼܡܹܗ ܕܙܲܕ̇ܝܼܩܵܐ ܡܡܲܠܸܠ ܚܸܟ݂ܡ̱ܬ̣ܵܐ. ܘܠܸܫܵܢܵܐ ܗܦܝܼܟ݂ܵܐ ܢܸܬ̣ܦܣܸܩ.

³²ܣܸܦ̈ܘܵܬܹܗ ܕܙܲܕ̇ܝܼܩܵܐ ܝܵܕ̇ܥܵـ̈ـܢ ܛܲܝܒ̇ܘܼܬ̣ܵܐ. ܘܦܘܼܡܗܘܿܢ ܕܥܵܘܿܠܹܐ ܗܦܝܼ̈ܟ݂ܵܬ̣ܵܐ.