Read Aramaic Peshita Proverbs 11 Bible Online

Proverbs 11 - Aramaic Peshita bible

Proverbs 11

¹ܡܲܣ̈ܐܵܬ̣ܵܐ ܕܢܸܟ݂ܠܵܐ ܡܲܣܠܹܐ ܡܵܪܝܵܐ. ܘܲܒ̣ܡܲܬ̣̈ܩܵܠܹܐ ܬܪ̈ܝܼܨܐ ܨܵܒܹ̇ܐ.

²ܐܲܬܲܪ ܕܥܵܐܠܹ̈ܐ ܙܲܠܝܼܠܘܼܬ̣ܵܐ: ܥܵܐܹ̇ܠ ܨܲܥܪܵܐ ܘܲܠܡܲܟ̇ܝܼܟܹ̈ܐ ܚܸܟ݂ܡ̱ܬ̣ܵܐ.

³ܣܲܒ̣ܪܵܐ ܕܲܬ̣ܪ̈ܝܼܨܹܐ ܢܸܬ̣ܦ̄ܢܸܐ. ܘܪܵܡܘܼܬ̣ܵܐ ܕܥܵܘܿܠܹ̈ܐ ܬܸܣܬ̇ܚܸܦ.

⁴ܠܵܐ ܡܲܗܢܹܐ ܥܘܼܬ̣ܪܵܐ ܒܝܵܘܡܵܐ ܕܪܘܼܓ̣ܙܵܐ. ܙܲܕ̇ܝܼܩܘܼܬ̣ܵܐ ܕܹܝܢ ܡܦܲܨܝܵܐ ܡ̣ܢ ܡܵܘܬܵܐ.

⁵ܙܲܕ̇ܝܼܩܘܼܬܹܗ ܕܬܲܡܝܼܡܵܐ ܬܸܬ̣ܪܘܿܨ ܐܘܼܪܚܹܗ. ܘܲܒ̣ܥܵܘܼܠܹܗ ܢܸܦܸܠ ܥܵܘܿܠܵܐ.

⁶ܙܲܕ̇ܝܼܩܘܼܬ̣ܗܘܿܢ ܕܲܬ̣ܪ̈ܝܼܨܹܐ ܬܦܲܨܹܐ ܐܸܢܘܿܢ. ܘܥܵܘܿܠܹܐ ܒܥܵܘܼܠ̱ܗܘܿܢ ܢܸܬ̇ܬܲܚܕ̇ܘܼܢ.

⁷ܡܵܐ ܕܡܝܼܬ̣ ܓܲܒ̣ܪܵܐ ܥܵܘܿܠܵܐ: ܐܵܒܹ̇ܕ݂ ܣܲܒ̣ܪܹܗ. ܘܣܲܒ̣ܪ̱ܗܘܿܢ ܕܒ̣ܝܼܫܹ̈ܐ ܐܵܒܹ̇ܕ݂.

⁸ܙܲܕ̇ܝܼܩ̣ܵܐ ܡ̣ܢ ܐܘܼܠܨܵܢܵܐ ܢܸܬ̣ܦܲܨܹܐ. ܘܢܸܥܘܿܠ ܥܵܘܿܠܵܐ ܚܠܵܦܘܗܝ.

⁹ܥܵܘܿܠܵܐ ܒܦܘܼܡܹܗ ܡܚܲܒܸ̇ܠ ܚܲܒ̣ܪܹܗ. ܘܙܲܕ̇ܝܼܩܹ̈ܐ ܒܝܼܕܲܥܬ̣ܵܐ ܢܸܬ̣ܥܲܫܢܘܿܢ.

¹⁰ܒܛܵܒܲܬ̣ܗܘܿܢ ܕܙܲܕ̇ܝܼܩܹ̈ܐ ܬܸܥܫܲܢ ܡܕ݂ܝܼܢ̄ܬܵܐ ܘܒܲܐܒ̣ܕܵܢܗܘܿܢ ܕܥܵܘܿܠܹܐ ܬܸܚܕܹ̇ܐ.

¹¹ܒܒ̣ܘܼܪܟ݂ܬ̣ܗܘܿܢ ܕܲܬ̣ܪ̈ܝܼܨܹܐ ܬܸܬ̇ܪܝܼܡ ܡܕ݂ܝܼܢ̄ܬܵܐ. ܘܲܒ̣ܦܘܼܡܗܘܿܢ ܕܥܵܘܿܠܹ̈ܐ ܬܸܣܬ̇ܚܸܦ.

¹²ܕܫܵܐܹ̇ܠ ܠܚܲܒ̣ܪܹܗ: ܚܲܣܝܼܪ ܪܸܥܝܵܢܵܐܗ̄ܘܼ. ܘܓܲܒ̣ܪܵܐ ܣܲܟ̇ܘܼܠܬ̣ܵܢܵܐ: ܒܫܸܬ̣ܩܵܐ ܥܵܡܲܪ.

¹³ܐܵܟܹ̇ܠܩܲܪܨܵܐ ܓܵܠܹ̇ܐ ܐ̄ܪܵܙܵܐ. ܘܕܲܡܗܲܝܡܲܢ ܒܪܘܼܚܹܗ: ܟܵܣܹ̇ܐ ܡܸܠܬ̣ܵܐ.

¹⁴ܥܲܡܵܐ ܕܲܡܕܲܒ̇ܪܵܢܵܐ ܠܲܝܬ̇ ܠܹܗ: ܢܵܦܹ̇ܠ: ܘܦܘܼܪܩܵܢܹܗ ܒܡܸܠܟܵܐ ܣܲܓ̇ܝܼܐܵܐ.

¹⁵ܒܝܼܫܵܐ ܡܲܒ̣ܐܸܫ ܡܵܐ ܕܐܵܪܲܥ ܠܙܲܕ̇ܝܼܩܵܐ. ܡܸܛܠ ܕܣܵܢܹ̇ܐ ܠܕ݂ܵܡܣܲܟܹ̇ܝܢ ܠܣܲܒ̣ܪܵܐ.

¹⁶ܐܲܢ̄ܬ̇ܬ̣ܵܐ ܡܪܲܚܡܵܢܝܼܬ̣ܵܐ ܡܣܲܡܟ݂ܵܐ ܬܸܫܒ̇ܘܿܚܬܵܐ ܠܓܲܒ̣ܪܵܐ. ܟܘܼܪܣܝܵܐ ܕܹܝܢ ܕܨܲܥܪܵܐ: ܐܲܢ̄ܬ̇ܬ̣ܵܐ ܣܵܢܝܲܬ̣ ܫܪܵܪܵܐ. ܚܒܸܢܵܢܹ̈ܐ ܐܵܦ ܒܥܘܼܬ̣̱ܪܗܘܿܢ ܗܵܘܹ̇ܝܢ ܨܪܝܼܟ݂ܝܼܢ. ܘܥܲܫܝܼ̈ܢܹܐ ܡܣܲܡܟ݂ܝܼܢ ܝܼܕܲܥܬ̣ܵܐ.

¹⁷ܓܲܒ̣ܪܵܐ ܚܲܣܝܼܢܵܐ ܪܵܡܹ̇ܐ ܠܢܲܦ̮ܫܹܗ ܚܘܼܒ̣̈ܠܹܗ ܛܵܒܹ̈ܐ. ܘܡܵܘܒܸ̇ܕ݂ ܦܲܓ̣ܪܹܗ ܓܲܒ̣ܪܵܐ ܕܠܵܐ ܡܪܲܚܸܡ.

¹⁸ܪܲܫܝܼܥܵܐ ܥܵܒܹ̇ܕ݂ ܥܒ̣ܵܕܹ̈ܐ ܕܥܸܬܵܐ. ܘܲܕ݂ܙܵܪܲܥ ܙܲܕ̇ܝܼܩܘܼܬ̣ܵܐ: ܩܘܼܫܬܵܐ ܗ̄ܘܼ ܐܲܓ̣ܪܹܗ.

¹⁹ܒܪܵܐ ܕܙܲܕ̇ܝܼܩܘܼܬ̣ܵܐ ܠܚܲܝܹ̈ܐ. ܘܲܕ݂ܥܵܒܹ̇ܕ݂ ܒܝܼܫܬܵܐ: ܠܡܵܘܬܵܐ.

²⁰ܡܲܣܠܹܐ ܡܵܪܝܵܐ ܠܲܥܩܝܼ̈ܡܲܝ ܠܸܒܵܐ. ܘܨܵܒܹ̇ܐ ܒܐܲܝܠܹܝܢ ܕܲܕ݂ܠܵܐ ܡܘܼܡ ܐܸܢܘܿܢ ܒܐܘܼܪܚܵܐ.

²¹ܕܡܵܘܫܸܛ ܐܝܼܕܹܗ ܥܲܠ ܚܲܒ̣ܪܹܗ: ܠܵܐ ܢܸܙܟܹ̇ܐ ܡ̣ܢ ܒܝܼܫܬܵܐ. ܘܙܲܪܥܵܐ ܕܙܲܕ̇ܝܼܩܹ̈ܐ ܢܸܬ̣ܦܲܨܹܐ.

²²ܐܲܝܟ݂ ܩܕ݂ܵܫܵܐ ܕܕܲܗܒ̣ܵܐ ܒܲܢܚܝܼܪܵܗ̇ ܕܲܚܙܝܼܪܬܵܐ: ܗܵܟܲܢܵܐ ܗ̄ܝܼ ܐܲܢ̄ܬ̇ܬ̣ܵܐ ܫܲܦܝܼܪܬܵܐ ܣܲܪܝܲܬ̣ ܛܲܥܡܵܐ.

²³ܪܸܓ̇ܬ̣ܵܐ ܕܙܲܕ̇ܝܼܩܹ̈ܐ ܒܛܵܒ̣ܵـ̈ـܬ̣ܵܐ. ܘܣܲܒ̣ܪ̱ܗܘܿܢ ܕܥܵܘܿܠܹ̈ܐ ܒܪܘܼܓ̣ܙܵܐ.

²⁴ܐܝܼܬ̣ ܕܕ݂ܝܼܠܹܗ ܙܵܪܲܥ: ܘܣܲܓ̇ܝܼ ܡܲܥܸܠ. ܘܐܝܼܬ̣ ܕܲܕ݂ܠܵܐ ܕܝܼܠܹܗ ܡܟܲܢܸܫ: ܘܲܙܥܘܿܪ ܗ̄ܘܼܠܹܗ.

²⁵ܢܲܦ̮ܫܵܐ ܒܪܝܼܟ݂ܬܵܐ ܬܸܕ݂ܗܲܢ. ܘܠܝܼܛܵܐ ܬܘܼܒ̣ ܢܸܬ̇ܬ̇ܠܝܼܛ.

²⁶ܕܟ݂̈ܠܹܐ ܥܒ̣ܘܼܪܵܐ ܒܐܘܼܠܨܵܢܵܐ: ܢܸܫܒ̇ܩܝܼܘܗܝ ܠܲܒ̣ܥܸܠܕ̇ܒ̣ܵܒ̣ܵܘ̈ܗܝ. ܘܒܘܼܪܟ̇ܬ̣ܵܐ ܬܸܗܘܹܐ ܥܲܠ ܪܹܫܹܗ ܕܐܲܝܢܵܐ ܕܲܡܙܲܒܸ̇ܢ.

²⁷ܕܒ̣ܵܥܹ̇ܐ ܛܵܒ̣ܬ̣ܵܐ: ܒܵܥܹ̇ܐ ܨܸܒ̣ܝܵܢܵܐ. ܘܲܕ݂ܒ̣ܵܥܹܐ ܒܝܼܫܬܵܐ: ܬܹܐܬܹܐ ܥܵܠܘܗܝ.

²⁸ܕܲܬ̣ܟ݂ܝܼܠ ܥܲܠ ܥܘܼܬ̣ܪܹܗ ܢܵܦܹ̇ܠ. ܘܙܲܕ̇ܝܼܩܹ̈ܐ ܐܲܝܟ݂ ܛܲܪ̈ܦܹܐ ܢܲܦ̱ܪܥܘܼܢ.

²⁹ܕܒ̣ܵܢܹ̇ܐ ܒܲܝܬܹ̇ܗ ܒܥܸܬܵܐ: ܢܸܫܒ̇ܘܿܩ ܠܲܒ̣ܢܵܘ̈ܗܝ ܬܸܢܚܵـ̈ـܬ̣ܵܐ. ܘܲܕ݂ܠܵܐ ܟܵܐܹ̇ܫ ܒܒܲܝܬܹ̇ܗ: ܢܦܲܠܸܓ̣ ܠܲܒ̣ܢܵܘ̈ܗܝ ܪܘܼܚܵܐ. ܘܣܲܟ݂ܠܵܐ ܢܸܗܘܹܐ ܥܲܒ̣ܕܵܐ ܠܚܲܟ̇ܝܼܡܵܐ.

³⁰ܦܹܐܪ̈ܵܘܗܝ ܕܙܲܕ̇ܝܼܩܵܐ ܐܝܼܠܵܢܵܐ ܕܚܲܝܹ̈ܐ. ܘܡܸܬ̣ܒܲܕ̇ܪ̈ܵܢ ܢܲܦ̮ܫܵܬ̣ܵܐ ܕܥܵܘܿܠܹܐ.

³¹ܐܸܢ ܙܲܕ̇ܝܼܩܵܐ ܠܡܲܚܣܸܢ ܚܵܝܹ̇ܐ: ܪܲܫܝܼܥܵܐ ܘܚܲܛܵܝܵܐ ܐܲܝܟܵܐ ܡܸܫܬ̇ܟܲܚ.