Read Aramaic Peshita Proverbs 12 Bible Online

Proverbs 12 - Aramaic Peshita bible

Proverbs 12

¹ܕܪܵܚܹ̇ܡ ܡܲܪܕ̇ܘܼܬ̣ܵܐ: ܪܵܚܹ̇ܡ ܝܼܕܲܥܬ̣ܵܐ. ܘܲܕ݂ܣܵܢܹ̇ܐ ܡܲܟ̇ܣܵܢܘܼܬ̣ܵܐ: ܣܲܟ݂ܠܵܐ ܗ̄ܘܼ.

²ܢܸܛܐܲܒ̣ ܠܓܲܒ̣ܪܵܐ ܕܢܵܛܲܪ ܨܸܒ̣ܝܵܢܹܗ ܕܡܵܪܝܵܐ. ܘܓܲܒ̣ܪܵܐ ܥܵܘܿܠܵܐ ܢܸܬ̣ܚܲܝܲܒ̣.

³ܠܵܐ ܢܸܬ̣ܩܲܢ ܒܲܪܢܵܫܵܐ ܒܥܵܘܼܠܹܗ. ܘܥܸܩܵܪܵܐ ܕܙܲܕ̇ܝܼܩܹ̈ܐ ܠܵܐ ܢܙܘܿܥ.

⁴ܐܲܢ̄ܬ̇ܬ̣ܵܐ ܓܲܒ̣ܪܵܢܝܼܬ̣ܵܐ ܟܠܝܼܠܵܐ ܗ̄ܝܼ ܕܒܲܥܠܵܗ̇. ܘܐܲܝܟ݂ ܒܸܠܛܝܼܬ̣ܵܐ ܘܬ̣ܵܘܠܥܵܐ ܒܩܲܝܣܵܐ: ܗܵܟܲܢܵܐ ܡܵܘܒ̇ܕ݂ܵܐ ܠܓܲܒ̣ܪܵܐ ܐܲܢ̄ܬ̇ܬ̣ܵܐ ܥܵܒ̣ܕܲܬ̣ ܒܝܼ̈ܫܵܬ̣ܵܐ.

⁵ܡܲܚܫ̈ܒ̣ܵܬ̣ܗܘܿܢ ܕܙܲܕ̇ܝܼܩܹ̈ܐ ܕܝܼܢܵܐ. ܘܗܘܼܦܵܟ݂ܗܘܿܢ ܕܥܵܘܿܠܹ̈ܐ ܢܸܟ݂ܠܵܐ.

⁶ܡܸܠܹ̈ܐ ܕܥܵܘܿܠܹ̈ܐ ܟܵܡ̈ܢܵܢ ܠܲܕ݂ܡܵܐ. ܘܦܘܼܡܗܘܿܢ ܕܲܬ̣ܪܝܼܨܹܐ ܡܦܲܨܹܐ ܠܗܘܿܢ.

⁷ܢܸܬ̣ܗܲܦܟ̇ܘܼܢ ܥܵܘܿܠܹ̈ܐ: ܘܠܵܐ ܢܸܫܬܲܟ݂ܚܘܼܢ ܘܒܲܝܬܵܐ ܕܙܲܕ̇ܝܼܩܹ̈ܐ ܢܸܬ̣ܩܲܝܲܡ.

⁸ܠܦܘܼܡܵܐ ܣܲܟ̇ܘܼܠܬ̣ܵܢܵܐ ܡܫܲܒ̇ܚܝܼܢ ܒܢܲܝ̈ܢܵܫܵܐ ܘܲܕ݂ܚܲܣܝܼܪ ܪܸܥܝܵܢܹܗ: ܢܸܬ̇ܬ̇ܫܝܼܛ.

⁹ܛܵܒ̣ ܗ̄ܘܼ ܓܲܒ̣ܪܵܐ ܡܸܣܟܹ̇ܢܵܐ ܕܲܡܫܲܡܸܫ ܢܲܦ̮ܫܹܗ ܛܵܒ̣ ܡ̣ܢ ܗܵܘܿ ܕܡܸܫܬܲܒ̣ܗܲܪ ܘܲܨܪܝܼܟ݂ ܠܠܲܚܡܵܐ.

¹⁰ܙܲܕ̇ܝܼܩܵܐ ܝܵܕܲܥ ܡ̣ܢ ܢܲܦ̮ܫܵܐ ܕܲܒ̣ܥܝܼܪܹܗ. ܘܥܵܘܿܠܹ̈ܐ ܐܲܚܝܼܕ݂ܝܼܢ ܪ̈ܲܚܡܲܝܗܘܿܢ.

¹¹ܕܦܵܠܲܚ ܒܐܲܪܥܵܐ: ܢܸܣܒܲܥ ܠܲܚܡܵܐ. ܘܲܕ݂ܪܵܗܹ̇ܛ ܒܵܬܲܪ ܣܪܝܼܩܘܼܬ̣ܵܐ: ܚܲܣܝܼܪ ܪܸܥܝܵܢܵܐ ܗ̄ܘܼ.

¹²ܪܵܐܹ̇ܓ̣ ܥܵܘܿܠܵܐ ܠܡܸܥܒܲܕ݂ ܒܝܼܫܬܵܐ. ܘܥܸܩܪܵܐ ܕܙܲܕ̇ܝܼܩܹ̈ܐ ܢܸܫܘܲܚ.

¹³ܒܥܵܘܼܠܵܐ ܕܣܸܦ̈ܘܵܬܹܗ ܡܸܬ̇ܬ̇ܚܸܕ݂ ܒܝܼܫܵܐ. ܘܦܵܠܹ̇ܛ ܙܲܕ̇ܝܼܩܵܐ ܡ̣ܢ ܐܘܼܠܨܵܢܵܐ.

¹⁴ܓܲܒ̣ܪܵܐ ܛܵܒ̣ܵܐ: ܡ̣ܢ ܦܹܐܪ̈ܲܝ ܦܘܼܡܹܗ ܢܸܣܒܲܥ. ܘܟ݂ܠ ܒܲܪܢܵܫ ܐܲܝܟ݂ ܥܒ̣ܵܕ݂ ܐܝܼܕ݂ܵܘ̈ܗܝ ܡܸܬ̣ܦܪܲܥ.

¹⁵ܐܘܼܪܚܹܗ ܕܣܲܟ݂ܠܵܐ ܫܲܦܝܼܪܵܐ ܗ̄ܝܼ ܒܥܲܝܢܵܘ̈ܗܝ. ܘܲܕ݂ܡܸܫܬ̇ܡܲܥ ܠܡܸܠܟܵܐ: ܚܲܟ̇ܝܼܡܵܐ ܗ̄ܘܼ.

¹⁶ܣܲܟ݂ܠܵܐ ܒܲܪ ܝܵܘܡܹܗ ܡܵܘܕܲܥ ܪܘܼܓ̣ܙܹܗ. ܘܲܥܪܝܼܡܵܐ ܡܛܲܫܸܐ ܨܲܥܪܹܗ.

¹⁷ܗܲܝܡܵܢܘܼܬ̣ܵܐ ܕܡܸܬ̣ܚܲܙܝܵܐ ܡܡܲܠܸܠ ܙܲܕ̇ܝܼܩܵܐ. ܘܣܵܗܕܵܐ ܕܥܵܘܼܠܵܐ ܢܲܟ̇ܘܼܠܬ̣ܵܢܵܐ ܗ̄ܘܼ.

¹⁸ܐܝܼܬ̣ ܕܐܵܡ̇ܪܝܼܢ ܣܲܦ̮ܣܹܪܵܐ ܕܵܓ̣ܫܵܐ: ܠܸܫܵܢܵܐ ܕܹܝܢ ܕܚܲܟ̇ܝܼܡܹ̈ܐ ܡܲܐܣܸܐ.

¹⁹ܣܸܦ̈ܘܵܬ̣ܵܐ ܕܩܘܼܫܬܵܐ ܬܪ̈ܝܼܨܵܢ. ܘܣܵܗܕܵܐ ܡܣܲܪ̱ܗܒ̣ܵܐ: ܥܵܘܵܠ ܗ̄ܘܼ ܠܸܫܵܢܹܗ.

²⁰ܢܸܟ݂ܠܵܐ ܒܠܸܒܹ̇ܗ ܕܒ̣ܝܼܫܵܐ ܚܵܫܹ̇ܠ ܒܝܼܫܬܵܐ ܘܐܲܝܠܹܝܢ ܕܡܸܬ̣ܡܲܠܟ݂ܝܼܢ ܫܠܵܡܵܐ: ܬܸܗܘܹܐ ܠܗܘܿܢ ܚܲܕ݂ܘܼܬ̣ܵܐ.

²¹ܠܵܐ ܫܲܦܝܼܪ ܠܓܲܒ̣ܪܵܐ ܙܲܕ̇ܝܼܩܵܐ ܡܸܕܹ̇ܡ ܕܥܸܬܵܐ ܘܥܵܘܿܠܹ̈ܐ ܡܠܹܝܢ ܒܝܼ̈ܫܵܬ̣ܵܐ.

²²ܣܸܦ̈ܘܵܬ̣ܵܐ ܕܲܓܵـ̈ـܠܵܬ̣ܵܐ ܡܲܣܠܹܐ ܡܵܪܝܵܐ. ܘܨܵܒܹ̇ܐ ܒܐܲܝܠܹܝܢ ܕܥܵܒ̣ܕ̇ܝܼܢ ܗܲܝܡܵܢܘܼܬ̣ܵܐ.

²³ܒܲܪܢܵܫܵܐ ܥܪܝܼܡܵܐ: ܟܘܼܪܣܝܵܐ ܗ̄ܘܼ ܕܝܼܕܲܥܬ̣ܵܐ. ܘܠܸܒܵܐ ܕܣܲܟ݂̈ܠܹܐ ܩܵܪܹܐ ܠܒ̣ܝܼܫܬܵܐ.

²⁴ܐܝܼܕ݂ܵܐ ܕܥܲܫܝܼܢܹ̈ܐ ܬܸܫܬܲܠܲܛ. ܘܲܢܟ݂ܝܼ̈ܠܹܐ ܢܸܗܘܘܿܢ ܠܡܲܕܲܐܬ̣ܵܐ.

²⁵ܡܸܠܬ̣ܵܐ ܕܚܝܼܠܬܵܐ: ܠܸܒܹ̇ܗ ܕܓܲܒ̣ܪܵܐ ܕܵܠܚܵܐ. ܘܡܸܠܬ̣ܵܐ ܛܵܒ̣ܬ̣ܵܐ ܡܚܲܕ̇ܝܵܐ ܠܹܗ.

²⁶ܙܲܕ̇ܝܼܩܵܐ ܡܵܠܹ̇ܟ݂ ܡܸܠܟܵܐ ܛܵܒ̣ܵܐ ܠܪܵܚܡܹܗ ܘܐܘܼܪܚ̄ܗܘܿܢ ܕܥܵܘܿܠܹ̈ܐ ܬܲܛܥܹܐ ܐܸܢܘܿܢ.

²⁷ܠܵܐ ܢܸܣܬܲܩܒܲܠ ܨܲܝܕܵܐ ܠܓܲܒ̣ܪܵܐ ܢܟ݂ܝܼܠܵܐ. ܘܩܸܢܝܵܢܵܐ ܝܲܩܝܼܪܵܐ ܒܲܪܢܵܫܵܐ ܓܲܒ̣ܝܵܐ.

²⁸ܒܐܘܼܪܚܵܐ ܕܙܲܕ̇ܝܼܩܘܼܬ̣ܵܐ ܚܲܝܹ̈ܐ. ܘܐܘܼܪܚܵܐ ܕܐܲܟ̇ܬ̣ܵܢܹ̈ܐ ܠܡܵܘܬܵܐ.