Read Aramaic Peshita Proverbs 15 Bible Online

Proverbs 15 - Aramaic Peshita bible

Proverbs 15

¹ܡܸܠܬ̣ܵܐ ܪܲܟ̇ܝܼܟ݂ܬ̣ܵܐ ܡܲܗ̄ܦܟ݂ܵܐ ܚܸܡܬ̣ܵܐ. ܘܡܸܠܬ̣ܵܐ ܩܫܝܼܬܵܐ ܡܥܝܼܪܵܐ ܪܘܼܓ̣ܙܵܐ.

²ܠܸܫܵܢܵܐ ܕܚܲܟ̇ܝܼܡܹ̈ܐ ܡܲܫܦܲܪ ܝܼܕܲܥܬ̣ܵܐ. ܘܦܘܼܡܵܐ ܕܣܲܟ݂ܠܹ̈ܐ ܓܵܣܹ̇ܐ ܠܵܘܛܬ̣ܵܐ.

³ܒܟ݂ܠ ܐܲܬܲܪ ܥܲܝܢܵܘ̈ܗܝ ܕܡܵܪܝܵܐ ܚܵܝ̇ܪܵܢ ܒܛܵܒܹ̈ܐ ܘܲܒ̣ܒ̣ܝܼܫܹ̈ܐ.

⁴ܐܵܣ̇ܝܘܼܬ̣ܵܐ ܕܠܸܫܵܢܵܐ: ܐܝܼܠܵܢܵܐ ܗ̄ܝܼ ܕܚܲܝܹ̈ܐ ܘܕ݂ܵܐܟܹ̇ܠ ܡ̣ܢ ܦܹܐܪ̈ܵܘܗܝ: ܢܸܣܒܲܥ ܡܸܢܹܗ.

⁵ܣܲܟ݂ܠܵܐ ܡܡܲܝܸܩ ܒܡܲܪܕ̇ܘܼܬ̣ܵܐ ܕܐܲܒ̣ܘܼܗܝ. ܘܕܲܥܪܝܼܡ ܢܵܛܲܪ ܡܲܟ̇ܣܵܢܘܼܬ̣ܵܐ.

⁶ܒܒܲܝܬܹ̇ܗ ܕܙܲܕ̇ܝܼܩܵܐ ܣܵܓܹ̇ܐ ܚܲܝܠܵܐ. ܘܥܲܠܠܵܬ̣̈ܗܘܿܢ ܕܥܵܘܿܠܹ̈ܐ ܢܸܐܒ̣̈ܕܵܢ.

⁷ܣܸܦ̈ܘܵܬ̣ܵܐ ܕܚܲܟ̇ܝܼܡܹ̈ܐ ܡܡܲܠ̈ܠܵܢ ܝܼܕܲܥܬ̣ܵܐ. ܘܠܸܒܵـ̈ـܘܵܬ̣ܵܐ ܕܣܲܟ݂̈ܠܹܐ ܠܵܐ ܟܹܐܢܝܼܢ.

⁸ܕܸܒ̣ܚܹ̈ܐ ܕܥܵܘܿܠܹ̈ܐ ܡܲܣܠܹܐ ܡܵܪܝܵܐ: ܘܒܲܨܠܘܿܬ̣ܵܐ ܕܲܬ̣ܪ̈ܝܼܨܵܐ ܨܸܒ̣ܝܵܢܹܗ.

⁹ܐܘܼܪܚܵܐ ܕܥܵܘܿܠܹ̈ܐ ܡܲܣܠܸܐ ܡܵܪܝܵܐ. ܘܪܵܚܹ̇ܡ ܠܐܲܝܢܵܐ ܕܥܵܒܹ̇ܕ݂ ܙܲܕ̇ܝܼܩܘܼܬ̣ܵܐ.

¹⁰ܡܲܪܕ̇ܘܼܬ̣ܵܐ ܕܐܲܝܠܹܝܢ ܝܵܕ̇ܥܝܼܢ ܒܝܼܫܬܵܐ ܓܲܠܝܵܐ ܗ̄ܝܼ. ܘܐܲܝܠܹܝܢ ܕܣܵܢܹ̇ܝܢ ܡܲܟ̇ܣܵܢܘܼܬ̣ܵܐ: ܢܡܘܼܬ̣ܘܼܢ.

¹¹ܫܝܘܿܠ ܘܐܲܒ̣ܕܵܢܵܐ ܩܕ݂ܵܡ ܡܵܪܝܵܐ ܐܸܢܘܿܢ: ܘܐܵܦ ܠܸܒܵـ̈ـܘܵܬ̣ܵܐ ܕܲܒ̣ܢܲܝ̈ܢܵܫܵܐ.

¹²ܠܵܐ ܪܵܚܹ̇ܡ ܒܝܼܫܵܐ ܠܡ̇ܢ ܕܡܲܟܸ̇ܣ ܠܹܗ. ܘܥܲܡ ܚܲܟ̇ܝܼܡܹ̈ܐ ܠܵܐ ܡܗܲܠܸܟ݂.ܬܸܫܒ̇ܘܿܚܬܹ̇ܗ ܕܐܲܠܵܗܵܐ ܡ̇ܢ ܕܲܡܛܲܫܹܐ.

¹³ܠܸܒܵܐ ܚܲܕܵܝܵܐ ܡܲܫܦܲܪ ܓܘܼܫܡܵܐ: ܘܠܸܒܵܐ ܟܵܝ̇ܒܵܐ ܡܲܟ݂ܐܸܒ̣ ܪܘܼܚܵܐ.

¹⁴ܠܸܒܵܐ ܕܟܹܐܢܹ̈ܐ ܒܵܥܹ̇ܐ ܝܼܕܲܥܬ̣ܵܐ. ܘܦܘܼܡܵܐ ܕܥܵܘܿܠܹ̈ܐ ܡܡܲܠܸܠ ܒܝܼ̈ܫܵܬ̣ܵܐ.

¹⁵ܟܠܗܘܿܢ ܝܵܘ̈ܡܵܬܹܗ ܕܡܸܣܟܹ̇ܢܵܐ ܒܝܼܫܝܼܢ. ܘܒܲܣܝܼܡܹ̈ܐ ܫܠܹܝܢ ܒܟ݂ܠܙܒܲܢ.

¹⁶ܛܵܒ̣ ܠܡܸܕܚܲܠ ܠܡܵܪܝܵܐ ܩܲܠܝܼܠ: ܛܵܒ̣ ܡ̣ܢ ܣܝܼ̈ܡܵܬ̣ܵܐ ܪܵܘ̱ܪ̈ܒ̣ܵܬ̣ܵܐ ܕܥܵܘܿܠܹ̈ܐ.

¹⁷ܛܵܒ̣ܵܐ ܗ̄ܝܼ ܫܵܪܘܼܬ̣ܵܐ ܕܝܲܪܩܵܐ: ܘܚܘܼܒܵܐ ܪܸܫܡܵܐ: ܛܵܒ̣ ܡ̣ܢ ܬܵܘܪܹ̈ܐ ܡܦܲܛܡܹ̈ܐ ܒܣܸܢ̱ܐܬ̣ܵܐ.

¹⁸ܓܲܒ̣ܪܵܐ ܚܸܡܬ̣ܵܢܵܐ ܡܓܲܕ̇ܓ̣ ܗܸܪܬ̣ܵܐ. ܘܓܲܒ̣ܪܵܐ ܢܲܓܝܼܪ ܪܘܼܚܵܐ: ܥܲܕ݂ܠܵܐ ܗܵܘܝܵܐ ܡܕܲܥܸܟ݂ ܠܵܗ̇.

¹⁹ܐܘܼܪ̈ܚܵܬ̣ܗܘܿܢ ܕܲܚܒܸܢܵܢܹ̈ܐ ܡܲܠ̈ܝܵܢ ܟܘܼ̈ܒܹ̇ܐ. ܘܐܘܼܪ̈ܚܵܬ̣ܗܘܿܢ ܕܲܬ̣ܪܝܼܨܹܐ ܫܲܦ̈ܝܵܢ.

²⁰ܒܪܵܐ ܚܲܟ̇ܝܼܡܵܐ ܡܚܲܕܹ̇ܐ ܠܐܲܒ̣ܘܼܗܝ. ܘܲܒ̣ܪܵܐ ܣܲܟ݂ܠܵܐ ܒܸܗܬ̇ܬ̣ܵܐ ܗ̄ܘܼ ܕܐܸܡܹܗ.

²¹ܓܲܒ̣ܪܵܐ ܕܲܣܟܲܠ ܚܲܣܝܼܪ ܠܸܒܵܐ ܗ̄ܘܼ: ܘܓܲܒ̣ܪܵܐ ܣܲܟ̇ܘܼܠܬ̣ܵܢܵܐ ܬܪܝܼܨܵܐܝܼܬ̣ ܡܗܲܠܸܟ݂.

²²ܡܲܥܒ̇ܪܝܼܢ ܡܲܚܫ̈ܒ̣ܵܬ̣ܵܐ ܐܲܝܠܹܝܢ ܕܲܡܝܲܩܪܝܼܢ ܟܢܘܼܫܬܵܐ. ܘܲܒ̣ܣܘܿܓ̣ܵܐܐ ܕܡܵܠܟܲܝ̈ ܡܸܠܟܵܐ ܬܸܬ̣ܩܲܝܲܡ.

²³ܚܲܕ݂ܘܼܬ̣ܵܐ ܠܓܲܒ̣ܪܵܐ ܡܸܠܬ̣ܵܐ ܕܦܘܼܡܹܗ. ܘܕܲܡܡܲܠܸܠ ܒܙܲܒ̣ܢܹܗ: ܫܲܦܝܼܪ ܠܹܗ.

²⁴ܐܘܼܪܚܵܐ ܕܚܲܝܹ̈ܐ ܡܲܣܩܵܢܵܐܗ̄ܝܼ ܠܣܲܟ̇ܘܼܠܬ̣ܵܢܵܐ: ܕܢܸܣܛܹܐ ܡ̣ܢ ܫܝܘܿܠ ܬܲܚܬܵܝܬܵܐ.

²⁵ܒܲܝܬܵܐ ܕܫܲܒ̣ܗ̱ܪ̈ܵܢܹܐ ܥܵܩܲܪ ܡܵܪܝܵܐ. ܘܲܬ̣ܚܘܼܡܵܐ ܕܐܲܪ̈ܡ̱ܠܵܬ̣ܵܐ ܡܫܲܪܲܪ.

²⁶ܡܲܣ̱ܠ̈ܝܵܢ ܐܸܢܹܝܢ ܩܕ݂ܵܡ ܡܵܪܝܵܐ ܡܲܚܫ̈ܒ̣ܵܬ̣ܵܐ ܒܝܼ̈ܫܵܬ̣ܵܐ. ܘܕܲܟ݂̈ܝܵܐ ܡܸܠܹ̈ܐ ܒܲܣܝܼ̈ܡܵܬ̣ܵܐ.

²⁷ܡܵܘܒܸ̇ܕ݂ ܢܲܦ̮ܫܹܗ ܐܲܝܢܵܐ ܕܲܡܩܲܒܸ̇ܠ ܫܘܼܚܕܵܐ. ܘܲܕ݂ܣܵܢܹ̇ܐ ܠܡܸܣܲܒ̣ ܫܘܼܚܕܵܐ: ܚܵܝܹ̇ܐ.

²⁸ܠܸܒܹ̇ܗ ܕܙܲܕ̇ܝܼܩܵܐ: ܪܵܢܹ̇ܐ ܒܗܲܝܡܵܢܘܼܬ̣ܵܐ ܘܦܘܼܡܵܐ ܕܥܵܘܿܠܹ̈ܐ ܡܡܲܠܸܠ ܒܝܼ̈ܫܵܬ̣ܵܐ.

²⁹ܪܲܚܝܼܩ ܗ̄ܘܼ ܡܵܪܝܵܐ ܡ̣ܢ ܥܵܘܿܠܹ̈ܐ ܘܒܲܨܠܘܿܬ̣ܵܐ ܕܙܲܕ̇ܝܼܩܹ̈ܐ ܫܵܡܲܥ.

³⁰ܢܘܼܗܪܵܐ ܕܥܲܝܢܹ̈ܐ ܡܒܲܣܸܡ ܠܸܒܵܐ. ܘܠܸܒܵܐ ܛܵܒ̣ܵܐ ܡܲܫܡܸܢ ܓܲܪ̈ܡܹܐ.

³¹ܐܸܕ݂ܢܵܐ ܕܫܵܡ̇ܥܵܐ ܡܲܟ̇ܣܵܢܘܼܬ̣ܵܐ ܕܚܲܝܹ̈ܐ: ܒܲܝܢܵܬ̣ ܚܲܟ̇ܝܼܡܹ̈ܐ ܬܒ̣ܘܼܬ̣.

³²ܕܡܲܣܠܹܐ ܡܲܪܕ̇ܘܼܬ̣ܵܐ ܣܵܢܹ̇ܐ ܢܲܦ̮ܫܹܗ. ܘܲܕ݂ܫܵܡܲܥ ܡܲܟ̇ܣܵܢܘܼܬ̣ܵܐ ܩܵܢܹ̇ܐ ܚܸܟ݂ܡ̱ܬ̣ܵܐ.

³³ܕܸܚ̱ܠܬܹܗ ܕܡܵܪܝܵܐ ܝܘܼܠܦܵܢܵܐ ܗ̄ܝܼ ܕܚܲܝܹ̈ܐ ܘܬܸܫܒ̇ܘܿܚܬܹ̇ܗ ܕܡܲܟ̇ܝܼܟ݂ܵܐ ܐܵܙܵܠ̄ܐ ܩܕ݂ܵܡܵܘܗܝ.