Read Aramaic Peshita Proverbs 16 Bible Online

Proverbs 16 - Aramaic Peshita bible

Proverbs 16

¹ܡ̣ܢ ܒܲܪܢܵܫܵܐ ܬܲܪ̈ܥܝܼܬ̣ܵܐ ܕܠܸܒܵܐ. ܘܡ̣ܢ ܡܵܪܝܵܐ ܡܲܡܠܠܵܐ ܕܠܸܫܵܢܵܐ.

²ܟܠܗܹܝܢ ܐܘܼܪ̈ܚܵܬܹܗ ܕܓܲܒ̣ܪܵܐ ܕܲܟ݂̈ܝܵܢ ܐܸܢܹܝܢ ܒܥܲܝܢܲܝ̈ ܢܲܦ̮ܫܹܗ. ܘܡܵܪܝܵܐ ܡܲܬ̣ܩܸܢ ܐܘܼܪ̈ܚܵܬܹܗ.

³ܓܠܝܼ ܠܡܵܪܝܵܐ ܥܒ̣ܵܕܲܝ̈ܟ: ܘܢܲܬ̣ܩܸܢ ܡܲܚܫ̈ܒ̣ܵܬ̣ܵܟ݂.

⁴ܟܠܗܘܿܢ ܥܒ̣ܵܕ݂ܵܘ̈ܗܝ ܕܡܵܪܝܵܐ ܠܐܲܝܠܹܝܢ ܕܡܸܫܬܲܡܥܝܼܢ ܠܹܗ. ܘܥܵܘܵܠܵܐ ܢܛܝܼܪ ܠܝܵܘܡܵܐ ܒܝܼܫܵܐ.

⁵ܛܡܲܐܗ̄ܘܼ ܩܕ݂ܵܡ ܡܵܪܝܵܐ ܟܠ ܕܪܵܡ ܒܠܸܒܹ̇ܗ. ܘܲܕ݂ܡܵܘܫܸܛ ܐܝܼܕܹܗ ܥܲܠ ܚܲܒ̣ܪܹܗ: ܠܵܐ ܢܸܬ̣ܚܲܣܹܐ ܡ̣ܢ ܒܝܼܫܬܵܐ.

⁶ܒܛܲܝܒ̇ܘܼܬ̣ܵܐ ܘܲܒ̣ܩܘܼܫܬܵܐ ܡܸܣܬ̇ܒܸܩ ܥܵܘܼܠܵܐ. ܘܕܸܚ̱ܠܬܹܗ ܕܡܵܪܝܵܐ ܡܲܣ̄ܛܝܵܐ ܡ̣ܢ ܒܝܼܫܬܵܐ.

⁷ܒܨܸܒ̣ܝܵܢܹܗ ܕܡܵܪܝܵܐ ܐܘܼܪ̈ܚܵܬܹܗ ܕܓܲܒ̣ܪܵܐ. ܘܐܵܦ ܠܲܒ̣ܥܸܠܕ̇ܒ̣ܵܒ̣ܵܘ̈ܗܝ ܢܸܦܪܘܿܥ.

⁸ܛܵܒ̣ ܗ̄ܘܼ ܩܲܠܝܼܠ ܒܙܲܕ̇ܝܼܩܘܼܬ̣ܵܐ: ܡ̣ܢ ܣܘܿܓ̣ܵܐܐ ܕܥܲܠ̈ܠܵܬ̣ܵܐ ܕܠܵܐ ܒܕ݂ܝܼܢܵܐ.

⁹ܠܸܒܹ̇ܗ ܕܒܲܪܢܵܫܵܐ ܡܸܬ̣ܚܲܫܲܒ̣ ܐܘܼܪ̈ܚܵܬܹܗ. ܘܡܵܪܝܵܐ ܡܲܬ̣ܩܸܢ ܗܲܠܟ݂ܵܬܹ̈ܗ.

¹⁰ܩܸܨܡܵܐ ܥܲܠ ܣܸܦ̈ܘܵܬܹܗ ܕܡܲܠܟܵܐ. ܘܲܒ̣ܕ݂ܝܼܢܵܐ ܠܵܐ ܢܸܛܥܹܐ ܦܘܼܡܹܗ.

¹¹ܡܲܬ̣ܩܵܠܵܐ ܕܡܲܣܲܐܬ̣ܵܐ ܕܝܼܢܹܗ ܕܡܵܪܝܵܐ ܘܲܥܒ̣ܵܕ݂ܵܘ̈ܗܝ ܟܠܗܘܿܢ ܡܲܬ̣ܩܵܠܹ̈ܐ ܕܩܘܼܫܬܵܐ.

¹²ܛܲܡܐܝܼܢ ܐܸܢܘܿܢ ܡܲܠܟܹ̈ܐ ܕܥܵܒ̣ܕ̇ܝܼܢ ܥܵܘܼܠܵܐ. ܡܸܛܠ ܕܲܒ̣ܙܲܕ̇ܝܼܩܘܼܬ̣ܵܐ ܗ̄ܘܼ ܡܲܬ̣ܩܲܢ ܟܘܼܪܣܝܵܐ.

¹³ܨܸܒ̣ܝܵܢܹܗ ܕܡܲܠܡܵܐ ܣܸܦ̈ܘܵܬܹܗ ܕܙܲܕ̇ܝܼܩܵܐ. ܘܡܸܠܬ̣ܵܐ ܕܲܬ̣ܪ̈ܝܼܨܹܐ ܪܵܚܹ̇ܡ.

¹⁴ܚܸܡܬܹܗ ܕܡܲܠܟܵܐ ܡܲܠܲܐܟܹ̈ܐ ܐܸܢܘܿܢ ܕܡܵܘܬܵܐ. ܘܓܲܒ̣ܪܵܐ ܚܲܟ̇ܝܼܡܵܐ ܢܕܲܥܟ݂ܝܼܗ̇.

¹⁵ܒܢܘܼܗܪܵܐ ܕܦܲܪܨܘܿܦܹܗ ܕܡܲܠܟܵܐ ܚܲܝܹ̈ܐ. ܘܨܸܒ̣ܝܵܢܹܗ ܐܲܝܟ݂ ܥܢܵܢܵܐ ܒܟ݂ܝܼܪܵܝܬܵܐ.

¹⁶ܕܩܵܢܹ̇ܐ ܚܸܟ݂ܡ̱ܬ̣ܵܐ ܛܵܒܹ̇ܐ ܗ̄ܝܼ ܠܹܗ ܡ̣ܢ ܕܲܗܒ̣ܵܐ: ܘܲܕ݂ܩܵܢܹ̇ܐ ܣܘܼܟܵܠܵܐ: ܡܝܲܬܲܪ ܗ̄ܘܼ ܠܹܗ ܡ̣ܢ ܣܹܐܡܵܐ.

¹⁷ܫܒ̣ܝܼܠܵܐ ܕܲܬ̣ܪ̈ܝܼܨܹܐ ܡܲܣܛܹܐ ܡ̣ܢ ܒܝܼܫܬܵܐ. ܘܕܲܙܗܝܼܪ ܒܢܲܦ̮ܫܹܗ: ܢܵܛܲܪ ܐܘܼܪܚܹܗ.

¹⁸ܩܕ݂ܵܡ ܬܒ̣ܵܪܵܐ ܨܲܥܪܵܐ. ܘܲܩܕ݂ܵܡ ܟܘܼܪܗܵܢܵܐ ܪܵܡܘܼܬ̣ ܪܘܼܚܵܐ.

¹⁹ܛܵܒ̣ ܗ̄ܘܼ ܡܲܟ̇ܝܼܟ݂ ܪܘܼܚܵܐ ܘܡܲܟ̇ܝܼܟ݂ ܥܲܝ̈ܢܹܐ: ܡ̣ܢ ܗܵܘܿ ܕܲܡܦܲܠܸܓ̣ ܒܸܙܬ̣ܵܐ ܥܲܡ ܥܲܫܝܼܢܹ̈ܐ.

²⁰ܕܡܸܣܬܲܟܲܠ ܡܸܠܬ̣ܵܐ: ܡܸܫܟܲܚ ܛܵܒ̣ܬ̣ܵܐ ܘܕܲܬ̣ܟ݂ܝܼܠ ܥܲܠ ܡܵܪܝܵܐ ܛܘܼܒ̣ܵܘܗܝ.

²¹ܚܲܟ̇ܝܼܡ ܠܸܒܵܐ ܝܵܕܲܥ ܣܘܼܟܵܠܵܐ ܘܲܕ݂ܚܲܠ̈ܝܵܢ ܣܸܦ̈ܘܵܬܹܗ ܡܵܘܣܸܦ ܝܘܼܠܦܵܢܵܐ.

²²ܡܲܒ̇ܘܼܥܵܐ ܕܚܲܝܹ̈ܐ ܣܘܼܟܵܠܵܐ ܗ̄ܘܼ ܠܐܲܝܠܹܝܢ ܕܝܵܕ݂ܥܝܼܢ ܠܹܗ. ܘܡܲܪܕ̇ܘܼܬ̣ܵܐ ܕܣܲܟ݂ܠܹ̈ܐ ܫܵܛܝܘܼܬ̣ܵܐ ܗ̄ܝܼ.

²³ܠܸܒܵܐ ܚܲܟ̇ܝܼܡܵܐ ܝܵܕܲܥ ܡܹܐܡܪܵܐ ܕܦܘܼܡܹܗ ܘܥܲܠ ܣܸܦ̈ܘܵܬܹܗ ܡܵܘܣܸܦ ܝܘܼܠܦܵܢܵܐ.

²⁴ܟܲܟܵܪܝܼܬ̣ܵܐ ܕܕܸܒ̣ܫܵܐ ܡܹܐܡܪܹܗ ܕܚܲܟ̇ܝܼܡܵܐ: ܘܚܲܠܝܵܐܗ̄ܝܼ ܠܢܲܦ̮ܫܹܗ: ܘܐܵܣܝܘܼܬ̣ܵܐ ܗ̄ܝܼ ܠܓܲܪ̈ܡܵܘܗܝ.

²⁵ܐܝܼܬ̣ ܐܘܼܪܚܵܐ ܕܡܸܬ̣ܚܲܙܝܵܐ ܒܥܲܝܢܲܝ̈ ܒܢܲܝ̈ܢܵܫܵܐ: ܕܲܬ̣ܪܝܼܨܵܐ ܗ̄ܝܼ. ܘܐܘܼܪ̈ܚܵܬ̣ܵܗ̇ ܐܘܼܪ̈ܚܵܬ̣ܵܐ ܐܸܢܹܝܢ ܕܡܵܘܬܵܐ.

²⁶ܢܲܦ̮ܫܵܐ ܡܲܟ݂ܐܲܒ̣ܬܵܐ ܟܹܐܒܹ̈ܝܗ̇ ܠܵܗ̇. ܘܡ̣ܢ ܦܘܼܡܵܐ ܕܢܲܦ̮ܫܵܗ̇ ܐܵܬܹܐ ܠܵܗ̇ ܐܲܒ̣ܕܵܢܵܐ.

²⁷ܓܲܒ̣ܪܵܐ ܥܵܘܿܠܵܐ ܚܵܫܹ̇ܠ ܒܝܼܫܬܵܐ. ܘܡ̣ܢ ܦܘܼܡܹܗ ܝܵܩܕܵܐ ܢܘܼܪܵܐ.

²⁸ܓܲܒ̣ܪܵܐ ܥܵܘܿܠܵܐ ܡܓܲܪܸܓ̣ ܕܝܼܢܵܐ ܘܲܣܪܝܼܩܵܐ ܪܵܕܹܦ ܪ̈ܵܚܡܹܐ ܪ̈ܵܚܡܵܘܗܝ.

²⁹ܓܲܒ̣ܪܵܐ ܥܵܘܿܠܵܐ ܡܫܲܕܸ̇ܠ ܚܲܒ̣ܪܹܗ ܘܡܵܘܒܸ̇ܠ ܠܹܗ ܒܐܘܼܪܚܵܐ ܕܠܵܐ ܫܲܦܝܼܪܵܐ.

³⁰ܘܪܵܡܹ̇ܙ ܒܥܲܝܢܵܘ̈ܗܝ: ܘܡܸܬ̣ܚܲܫܲܒ̣ ܗܦܝܼ̈ܟ݂ܵܬ̣ܵܐ: ܘܡܸܬ̣ܪܲܥܹܐ ܒܣܸܦ̈ܘܵܬܹܗ: ܘܓ̣ܵܡܲܪ ܒܝܼ̈ܫܵܬ̣ܵܐ.

³¹ܟܠܝܼܠܵܐ ܕܬܸܫܒ̇ܘܿܚܬܵܐ ܣܲܝܒ̇ܘܼܬ̣ܵܐ. ܘܒ̣ܐܘܼܪܚܵܐ ܕܙܲܕ̇ܝܼܩܘܼܬ̣ܵܐ ܡܸܫܬܲܒ̇ܚܵܐ.

³²ܛܵܒ̣ ܗ̄ܘܼ ܢܲܓ̇ܝܼܪ ܪܘܼܚܵܐ ܡ̣ܢ ܓܲܢ̄ܒܵܪܵܐ. ܘܕܲܡܟܲܒܸ̇ܫ ܢܲܦ̮ܫܹܗ ܡ̣ܢ ܗܵܘ̇ ܕܐܲܚܝܼܕ݂ ܡܕ݂ܝܼܢ̄ܬܵܐ.

³³ܒܥܘܼܒܹ̇ܗ ܕܥܲܢܵܬ̣ܵܐ ܢܵܦ̇ܠܵܐ ܦܸܨܬܹܗ: ܘܡ̣ܢ ܩܕ݂ܵܡ ܡܵܪܝܵܐ ܢܵܦܹ̇ܩ ܕܝܼܢܹܗ.