Read Aramaic Peshita Proverbs 18 Bible Online

Proverbs 18 - Aramaic Peshita bible

Proverbs 18

¹ܘܲܒ̣ܫܲܬ̇ܝܼܩܘܼܬܹܗ ܪܵܢܹ̇ܐ ܒܪܸܓ̇ܬ̣ܵܐ: ܘܲܡܡܲܝܸܩ ܒܝܘܼܠܦܵܢܵܐ ܛܵܒ̣ܵܐ.

²ܣܲܟ݂ܠܵܐ ܠܵܐ ܨܵܒܹ̇ܐ ܒܚܸܟ݂ܡ̱ܬ̣ܵܐ. ܡܸܛܠ ܕܪܵܢܹ̇ܐ ܠܸܒܹ̇ܗ ܒܫܵܛ̇ܝܘܼܬ̣ܵܐ.

³ܘܡܵܐ ܕܐܸܬ̣ܵܐ ܥܵܘܿܠܵܐ ܠܥܘܼܡܩܵܐ ܕܒ̣ܝܼ̈ܫܵܬ̣ܵܐ: ܐܵܬ̣ܝܵܐ ܥܠܵܘܗܝ ܫܵܛ̇ܝܘܼܬ̣ܵܐ ܘܥܵܘܼܠܵܐ ܘܨܲܥܪܵܐ ܘܚܸܣܕܵܐ.

⁴ܡܲـ̈ـܝܵܐ ܥܲܡܝܼܩܹ̈ܐ ܡܸܠܲܝ̈ ܦܘܼܡܹܗ ܕܓܲܒ̣ܪܵܐ: ܘܢܲܚܠܵܐ ܕܢܵܒܲܥ ܡܲܒ̇ܘܼܥܵܐ ܕܚܸܟ݂ܡ̱ܬ̣ܵܐ.

⁵ܠܡܸܟܲܒ̣ ܒܐܲܦܹ̈ܐ ܕܥܵܘܿܠܵܐ: ܠܵܐ ܫܲܦܝܼܪ: ܐܵܦܠܵܐ ܠܡܸܨܠܵܐ ܕܝܼܢܵܐ ܥܲܠ ܙܲܕ̇ܝܼܩܵܐ.

⁶ܣܸܦ̈ܘܵܬܹܗ ܕܣܲܟ݂ܠܵܐ ܥܵܐ̈ܠܵܢ ܒܕ݂ܝܼܢܵܐ. ܘܦܘܼܡܹܗ ܡܡܲܛܹܐ ܠܹܗ ܠܡܵܘܬܵܐ.

⁷ܦܘܼܡܹܗ ܕܣܲܟ݂ܠܵܐ ܬܒ̣ܵܪܵܐ ܗ̄ܘܼ ܠܢܲܦ̮ܫܹܗ: ܘܲܒ̣ܣܸܦ̈ܘܵܬܹܗ ܨܵܐܹ̇ܕ݂ ܢܲܦ̮ܫܹܗ.

⁸ܡܸܠܵܘ̈ܗܝ ܕܲܚܒܸܢܵܢܵܐ ܪ̈ܵܡܝܵܢ ܠܹܗ ܒܒ̣ܝܼܫܬܵܐ. ܘܗܸܢܹܝܢ ܡܲܚ̈ܬ̣ܵܢ ܠܹܗ ܠܬ̣ܵܘܵܢܹ̈ܐ ܕܲܫܝܘܿܠ.

⁹ܘܐܲܝܢܵܐ ܕܲܡܪܲܦܹܐ ܐܝܼܕ݂ܵܘ̈ܗܝ ܒܲܥܒ̣ܵܕܹ̇ܗ: ܐܲܚܝܼܘܗܝ ܗ̄ܘܼ ܕܓܲܒ̣ܪܵܐ ܡܚܲܒ̇ܠܵܢܵܐ.

¹⁰ܡܲܓ̣ܕ̇ܠܵܐ ܗ̄ܘܼ ܥܲܫܝܼܢܵܐ ܫܡܹܗ ܕܡܵܪܝܵܐ. ܘܠܹܗ ܢܸܪܗܲܛ ܙܲܕ̇ܝܼܩܵܐ ܘܥܲܫܝܼܢܵܐ.

¹¹ܐܝܼܩܵܪܵܐ ܘܥܘܼܬ̣ܪܵܐ ܡܕ݂ܝܼܢ̄ܬܵܐ ܕܥܘܼܫܢܹܗ. ܘܲܒ̣ܫܘܼܪܵܐ ܥܲܫܝܼܢܵܐ ܡܲܫ̱ܪܝܹܗ.

¹²ܩܕ݂ܵܡ ܬܒ̣ܵܪܵܐ ܢܸܬ̇ܬ̇ܪܝܼܡ ܠܸܒܹ̇ܗ ܕܓܲܒ̣ܪܵܐ. ܘܲܩܕ݂ܵܡ ܐܝܼܩܵܪܵܐ ܡܘܼܟܵܟ݂ܵܐ.

¹³ܕܝܵܗܹ̇ܒ̣ ܦܸܬ̣ܓ̣ܵܡܵܐ ܥܲܕ݂ܠܵܐ ܢܸܫܡܲܥ: ܣܲܟ݂ܠܵܐ ܗ̄ܘܼ ܘܲܡܚܲܣܕ݂ܵܐ.

¹⁴ܪܘܼܚܹܗ ܕܓܲܒ̣ܪܵܐ ܡܣܲܝܒ̇ܪܵܐ ܚܲܫܹܗ. ܘܪܘܼܚܵܐ ܡܲܟ݂ܐܲܒ̣ܬܵܐ ܡ̇ܢ ܢܣܲܝܒ̇ܪܝܼܗ̇.

¹⁵ܠܸܒܵܐ ܬܲܩܢܵܐ ܩܵܢܹ̇ܐ ܚܸܟ݂ܡ̱ܬ̣ܵܐ. ܘܐܸܕ݂ܢܵܐ ܚܲܟ̇ܝܼܡܬܵܐ ܨܵܝ̇ܬܵܐ ܝܼܕܲܥܬ̣ܵܐ.

¹⁶ܡܵܘܗ̈ܒ̣ܵܬ̣ܵܐ ܕܒܲܪܢܵܫܵܐ ܡܲܪ̈ܘ̱ܚܵܢ ܠܹܗ. ܘܲܩܕ݂ܵܡ ܪܵܘ̱ܪ̈ܒ̣ܵܢܹܐ ܡܩܝܼ̈ܡܵܢ ܠܹܗ.

¹⁷ܙܲܟܵܝ ܗ̄ܘܼ ܒܲܪܢܵܫܵܐ ܒܕ݂ܝܼܢܹܗ. ܘܡܵܐ ܕܐܸܬ̣ܵܐ ܚܲܒ̣ܪܹܗ: ܒܵܕܹ̇ܩ ܠܹܗ.

¹⁸ܦܸܨܬ̣ܵܐ ܫܵܪܝܵܐ ܚܸܪܝܵܢܵܐ. ܘܒܲܝܢܵܬ̣ ܥܲܫܝܼܢܹ̈ܐ ܦܵܪܫܵܐ.

¹⁹ܐܲܚܵܐ ܕܡܸܬ̣ܥܲܕܲܪ ܡ̣ܢ ܐܲܚܘܼܗܝ: ܐܲܝܟ݂ ܡܕ݂ܝܼܢ̄ܬܵܐ ܡ̣ܢ ܚܸܣܢܵܗ̇. ܘܐܲܚܵܕܹ̈ܝܗ̇ ܐܲܝܟ݂ ܣܘܼܟ̇ܪܵܐ ܕܚܸܣܢܵܐ.

²⁰ܘܡ̣ܢ ܦܹܐܪ̈ܲܝ ܦܘܼܡܹܗ ܕܓܲܒ̣ܪܵܐ ܬܸܣܒܲܥ ܟܲܪܣܹܗ. ܘܥܲܠ̈ܠܵܬ̣ܵܐ ܕܣܸܦ̈ܘܵܬܹܗ ܢܸܣܒܲܥ.

²¹ܡܵܘܬܵܐ ܘܚܲܝܹ̈ܐ ܒܝܲܕ݂ ܠܸܫܵܢܵܐ ܗ̄ܘܼ. ܘܲܕ݂ܪܵܚܹ̇ܡ ܠܹܗ: ܢܹܐܟ݂ܘܿܠ ܡ̣ܢ ܦܹܐܪ̈ܵܘܗܝ.

²²ܕܡܸܫܟܲܚ ܐܲܢ̄ܬ̇ܬ̣ܵܐ ܛܵܒ̣ܬ̣ܵܐ: ܡܸܫܟܲܚ ܛܵܒ̣ܬܵܐ. ܘܲܡܩܲܒܸ̇ܠ ܨܸܒ̣ܝܵܢܵܐ ܡ̣ܢ ܡܵܪܝܵܐ ܘܲܕ݂ܡܲܦܸܩ ܐܲܢ̄ܬ̇ܬ̣ܵܐ ܛܵܒ̣ܬ̣ܵܐ: ܡܲܦܸܩ ܛܵܒ̣ܬ̣ܵܐ ܡ̣ܢ ܒܲܝܬܹ̇ܗ.

²³ܡܸܣܟܹ̇ܢܵܐ ܡܡܲܠܸܠ ܪ̈ܲܟ̇ܝܼܟ݂ܵܬ̣ܵܐ. ܘܥܲܬ̇ܝܼܪܵܐ ܡܡܲܠܸܠ ܥܲܫܝܼ̈ܢܵܬ̣ܵܐ.

²⁴ܐܝܼܬ̣ ܪ̈ܵܚ̇ܡܹܐ ܕܪ̈ܵܚܡܹܐ ܐܸܢܘܿܢ. ܘܐܝܼܬ̣ ܪܵܚ̇ܡܵܐ ܕܢܵܦܹ̇ܩ ܝܲܬ̇ܝܼܪ ܡ̣ܢ ܐܲܚܵܐ.