Read Aramaic Peshita Proverbs 19 Bible Online

Proverbs 19 - Aramaic Peshita bible

Proverbs 19

¹ܛܵܒ̣ ܗ̄ܘܼ ܡܸܣܟܹ̇ܢܵܐ ܕܲܡܗܲܠܸܟ݂ ܒܬܲܡܝܼܡܘܼܬ̣ܵܐ: ܝܲܬ̇ܝܼܪ ܡ̣ܢ ܥܲܬ̇ܝܼܪܵܐ ܕܲܡܥܲܩ̈ܡܵܢ ܐܘܼܪ̈ܚܵܬܹܗ.

²ܡ̇ܢ ܕܠܵܐ ܝܵܕܲܥ ܢܲܦ̮ܫܹܗ: ܠܵܐ ܫܲܦܝܼܪ ܠܹܗ ܘܲܕ݂ܩܲܠܝܼܠ ܒܪܸ̈ܓ̣ܠܵܘܗܝ: ܚܵܛܹ̇ܐ.

³ܫܵܛ̇ܝܘܼܬܹܗ ܕܓܲܒ̣ܪܵܐ ܡܥܲܩܡܵܐ ܐܘܼܪ̈ܚܵܬܹܗ. ܘܥܲܠ ܡܵܪܝܵܐ ܡܸܬ̣ܪܲܥܲܡ ܒܠܸܒܹ̇ܗ.

⁴ܩܸܢܝܵܢܵܐ ܡܵܘܣܸܦ ܪ̈ܵܚܡܹܐ ܣܲܓ̇ܝܼ̈ܐܹܐ. ܘܡܸܣܟܹ̇ܢܵܐ ܦܵܪܹܫ ܡ̣ܢ ܪ̈ܵܚܡܵܘܗܝ.

⁵ܣܵܗܕܵܐ ܕܲܓܵܠܵܐ ܠܵܐ ܢܸܬ̣ܚܲܣܸܐ. ܘܕܲܡܡܲܠܸܠ ܕܲܓܵܠܘܼܬ̣ܵܐ ܠܵܐ ܢܸܬ̣ܦܲܨܹܐ.

⁶ܣܲܓ̇ܝܼ̈ܐܹܐ ܕܲܡܫܲܡܫܝܼܢ ܩܕ݂ܵܡ ܪܲܒܵܐ. ܘܠܲܕ݂ܒ̣ܝܼܫܝܼܢ ܝܵܗܹ̇ܒ̣ ܡܵܘ̈ܗܒ̣ܵܬ̣ܵܐ.

⁷ܟܠܗܘܿܢ ܐܲܚܵܘ̈ܗܝ ܕܡܸܣܟܹ̇ܢܵܐ ܣܵܢܹ̇ܝܢ ܠܹܗ. ܘܐܵܦ ܪ̈ܵܚܡܵܘܗܝ ܡܸܬ̣ܪܲܚܩܝܼܢ ܡܸܢܹܗ.

⁸ܐܲܝܢܵܐ ܕܛܲܪܟܵܢ ܒܡܸܠܵܘ̈ܗܝ ܠܵܐ ܫܲܪܝܼܪ. ܘܲܕ݂ܩܵܢܹ̇ܐ ܚܸܟ݂ܡ̱ܬ̣ܵܐ: ܪܵܚܹ̇ܡ ܢܲܦ̮ܫܹܗ.

⁹ܕܢܵܛܲܪ ܗܲܝܡܵܢܘܼܬ̣ܵܐ: ܡܸܫܟܲܚ ܛܵܒ̣ܬ̣ܵܐ. ܘܣܵܗܕܵܐ ܕܲܓܵܠܵܐ ܠܵܐ ܢܸܬ̣ܚܲܣܸܐ. ܘܕܲܡܡܲܠܸܠ ܕܲܓܵـ̈ـܠܵܬ̣ܵܐ ܢܹܐܒܲܕ݂.

¹⁰ܠܵܐ ܝܵܐܹ̇ܐ ܠܣܲܟ݂ܠܵܐ ܦܘܼܢܵܩܵܐ: ܘܐܵܦܠܵܐ ܠܥܲܒ̣ܕܵܐ ܕܢܸܫܬܲܠܲܛ ܒܪܵܘ̱ܪ̈ܒ̣ܵܢܹܗ.

¹¹ܣܘܼܟܵܠܹܗ ܕܓܲܒ̣ܪܵܐ ܢܲܓ̇ܝܼܪܘܼܬ̣ ܪܘܼܚܹܗ ܗ̄ܝܼ. ܘܬܸܫܒ̇ܘܿܚܬܹ̇ܗ ܡܲܥܒ̇ܪܵܐ ܥܵܘܼܠܵܐ.

¹²ܢܵܗܹ̇ܡ ܐܲܝܟ݂ ܐܲܪܝܵܐ ܪܘܼܓ̣ܙܹܗ ܕܡܲܠܟܵܐ. ܘܐܲܝܟ݂ ܛܲܠܵܐ ܥܲܠ ܥܸܣܒܵܐ ܨܸܒ̣ܝܵܢܹܗ.

¹³ܒܸܗܬ̇ܬ̣ܵܐ ܗ̄ܘܼ ܠܐܲܒ̣ܵܐ ܒܪܵܐ ܣܲܟ݂ܠܵܐ. ܘܐܲܝܟ݂ ܕܸܠܦܵܐ ܕܢܵܛܹ̇ܦ: ܪܸܢܝܵܗ̇ ܕܐܲܢ̄ܬ̇ܬ̣ܵܐ.

¹⁴ܒܲܝܬܵܐ ܘܩܸܢܝܵܢܵܐ: ܝܘܼܪܬܵܢܵܐ ܗ̄ܘܼ ܕܐܲܒ̣ܵܐ. ܘܡ̣ܢ ܡܵܪܝܵܐ ܗ̄ܘܼ ܡܸܬ̣ܡܲܟ݂ܪܵܐ ܐܲܢ̄ܬ̇ܬ̣ܵܐ ܠܓܲܒ̣ܪܵܐ.

¹⁵ܢܵܘܡܬ̣ܵܐ ܝܵܗ̄ܒܵܐ ܫܸܢܬ̣ܵܐ. ܘܢܲܦ̮ܫܵܐ ܪܵܡܬ̣ܵܐ ܬܸܟ݂ܦܲܢ.

¹⁶ܕܢܵܛܲܪ ܦܘܼܩܕܵܢܵܐ ܡܸܙܕܲܗܲܪ ܒܢܲܦ̮ܫܹܗ. ܘܲܕ݂ܫܵܐܲܛ ܐܘܼܪ̈ܚܵܬܹܗ ܢܸܬ̣ܩܛܸܠ.

¹⁷ܕܡܸܬ̣ܠܵܘܸܐ ܠܡܵܪܝܵܐ: ܡܪܲܚܸܡ ܥܲܠ ܡܸܣܟܹ̇ܢܵܐ. ܘܐܲܝܟ݂ ܥܒ̣ܵܕ݂ܵܘ̈ܗܝ ܡܸܬ̣ܦܪܲܥ.

¹⁸ܪܕ݂ܝܼ ܒܪܵܟ݂: ܡܸܛܠ ܕܐܝܼܬ̣ ܣܲܒ̣ܪܵܐ. ܘܲܠܨܲܥܪܹܗ ܠܵܐ ܬܲܪܡܸܐ ܢܲܦ̮ܫܵܟ݂.

¹⁹ܓܲܒ̣ܪܵܐ ܚܸܡܬ̣ܵܢܵܐ ܡܩܲܒܸ̇ܠ ܬܘܼܟܵܐ. ܘܲܟ݂ܡܵܐ ܕܡܲܥܠܹܐ: ܥܲܠ ܛܲܥܢܹܗ ܡܵܘܣܸܦ.

²⁰ܫܡܲܥ ܡܸܠܟܵܐ: ܘܩܲܒܸ̇ܠ ܡܲܪܕ̇ܘܼܬ̣ܵܐ: ܐܲܝܟ݂ ܕܬܸܬ̣ܚܲܟܲܡ ܒܐܘܼܪ̈ܚܵܬ̣ܵܟ݂.

²¹ܣܲܓ̇ܝܼ̈ܐܵܢ ܡܲܚܫ̈ܒ̣ܵܬ̣ܵܐ ܒܠܸܒܹ̇ܗ ܕܓܲܒ̣ܪܵܐ. ܘܬܲܪܥܝܼܬ̣ܵܐ ܕܡܵܪܝܵܐ ܬܸܬ̣ܩܲܝܲܡ.

²²ܪܸܓ̇ܬܹܗ ܕܒܲܪܢܵܫܵܐ ܛܲܝܒ̇ܘܼܬܹܗ. ܘܛܵܒ̣ ܗ̄ܘܼ ܡܸܣܟܹ̇ܢܵܐ ܡ̣ܢ ܓܲܒ̣ܪܵܐ ܥܲܬ̇ܝܼܪܵܐ ܕܲܡܕܲܓܸ̇ܠ.

²³ܕܸܚ̱ܠܬܹܗ ܕܡܵܪܝܵܐ ܠܚܲܝܹ̈ܐ. ܘܡ̇ܢ ܕܣܲܒ̣ܥܵܗ̇: ܢܒ̣ܘܼܬ̣: ܘܠܵܐ ܢܸܦܩܘܿܕ݂ ܒܝܼܫܬܵܐ.

²⁴ܚܒܸܢܵܢܵܐ ܕܲܡܛܲܫܸܐ ܐܝܼܕ݂ܵܘ̈ܗܝ ܒܥܘܼܒܹ̇ܗ: ܐܵܦܠܵܐ ܠܦܘܼܡܹܗ ܢܩܲܪܸܒ̣ ܐܸܢܹܝܢ.

²⁵ܒܝܼܫܵܐ ܡܵܐ ܕܡܸܬ̣ܢܲܓܲܕ݂: ܚܲܟ̇ܝܼܡܵܐ ܡܸܙܕ̇ܗܲܪ. ܘܐܸܢ ܬܲܟܸ̇ܣ ܠܚܲܟ̇ܝܼܡܵܐ: ܡܸܣܬܲܟܲܠ ܝܼܕܲܥܬ̣ܵܐ.

²⁶ܕܒ̣ܵܐܹ̈ܙ ܠܐܲܒ̣ܘܼܗܝ: ܘܲܡܥܝܼܩ ܠܐܸܡܹܗ: ܒܪܵܐ ܗ̄ܘܼ ܡܲܒ̣ܗ̄ܬ̣ܵܢܵܐ ܘܡܲܚ̄ܦܪܵܢܵܐ.

²⁷ܦܘܼܫ ܒܹܪܝ: ܘܲܫܡܲܥ ܡܲܪܕ̇ܘܼܬ̣ܵܐ. ܘܠܵܐ ܬܸܛܥܹܐ ܡܹܐܡܪܵܐ ܕܝܼܕܲܥܬ̣ܵܐ.

²⁸ܣܵܗܕܵܐ ܥܵܘܿܠܵܐ ܡܲܥܫܸܢ ܕܝܼܢܵܐ. ܘܦܘܼܡܹܗ ܕܥܵܘܿܠܵܐ ܡܛܲܒܲܥ ܠܹܗ.

²⁹ܡܛܲܝܒ̣ܝܼܢ ܟܹܐܒܹ̈ܐ ܠܐܲܝܠܹܝܢ ܕܡܲܥܫܢܝܼܢ ܕܝܼܢܵܐ: ܘܲܡܚܘܿܬ̣ܵܐ ܠܥܲܡܵܐ ܣܲܟ݂ܠܵܐ.