Read Aramaic Peshita Proverbs 2 Bible Online

Proverbs 2 - Aramaic Peshita bible

Proverbs 2

¹ܒܹܪܝ: ܐܸܢ ܬܩܲܒܸ̇ܠ ܡܸܠܲܝ̈: ܘܦܘܼ̈ܩܕܵܢܲܝ ܬܲܛܫܹܐ ܒܠܸܒܵܟ݂.

²ܘܬܸܨܠܹܐ ܐܸܕ݂ܢܵܟ݂ ܠܚܸܕܡ̱ܬ̣ܵܐ: ܘܬܲܦܢܹܐ ܠܸܒܵܟ݂ ܠܣܘܼܟܵܠܵܐ.

³ܘܬܸܩܪܹܐ ܠܣܘܼܟܵܠܵܐ: ܘܲܠܣܘܼܟܵܠܵܐ ܬܪܝܼܡ ܩܵܠܵܟ݂.

⁴ܘܬܸܒ̣ܥܹܝܘܗܝ ܐܲܝܟ݂ ܣܹܐܡܵܐ: ܘܬܸܒ̣ܨܝܘܗܝ ܐܲܝܟ݂ ܣܝܼܡܬ̣ܵܐ.

⁵ܗܵܝܕܹ̇ܝܢ ܬܸܣܬܲܟܲܠ ܕܸܚ̱ܠܬܹܗ ܕܡܵܪܝܵܐ. ܘܬܸܫܟܲܚ ܝܼܕܲܥܬܹܗ ܕܐܲܠܵܗܵܐ.

⁶ܡܸܛܠ ܕܡܵܪܝܵܐ ܗ̄ܘܼ ܝܵܗܹ̇ܒ̣ ܚܸܟ݂ܡ̱ܬ̣ܵܐ. ܘܡ̣̤ܢ ܦܘܼܡܹܗ ܝܼܕܲܥܬ̣ܵܐ ܘܣܘܼܟܵܠܵܐ.

⁷ܘܢܵܛܲܪ ܣܲܒ̣ܪܵܐ ܠܐܲܝܠܹܝܢ ܕܲܬ̣ܪܝܼܨܝܼܢ. ܘܲܡܣܲܝܲܥ ܠܐܲܝܠܹܝܢ ܕܲܡܗܲܠܟ݂ܝܼܢ ܕܠܵܐ ܡܘܼܡ.

⁸ܘܢܵܛ̇ܲܪ ܐܘܼܪ̈ܚܵܬ̣ܵܐ ܕܕ݂ܝܼܢܵܐ. ܘܐܘܼܪ̈ܚܵܬ̣ܵܐ ܕܚܲܣܝܵܘ̈ܗܝ ܢܢܲܛܲܪ.

⁹ܗܵܝܕܹ̇ܝܢ ܬܸܣܬܲܟܲܠ ܙܲܕ̇ܝܼܩܘܼܬ̣ܵܐ ܘܕ݂ܝܼܢܵܐ: ܘܲܬ̣ܪܝܼܨܘܼܬ̣ܵܐ ܕܟ݂ܠܗܘܿܢ ܫܒ̣ܝܼ̈ܠܹܐ ܫܲܦܝܼܪܹ̈ܐ.

¹⁰ܟܲܕ ܬܲܥܸܠ ܚܸܟ݂ܡ̱ܬ̣ܵܐ ܠܠܸܒܵܟ݂. ܘܝܼܕܲܥܬ̣ܵܐ ܠܢܲܦ̮ܫܵܟ݂ ܬܒܲܣܸܡ.

¹¹ܬܲܪܥܝܼܬ̣ܵܐ ܛܵܒ̣ܬ̣ܵܐ ܬܢܲܛܪܵܟ݂. ܘܣܘܼܟܵܠܵܐ ܕܟܹܐܢܹ̈ܐ ܢܫܵܘܒ̣ܵܟ݂.

¹²ܕܬܸܬ̣ܦܲܨܹܐ ܡ̣ܢ ܐܘܼܪ̈ܚܵܬ̣ܵܐ ܒܝܼ̈ܫܵܬ̣ܵܐ: ܘܡ̣ܢ ܓܲܒ̣ܪܹ̈ܐ ܕܲܡܡܲܠܠܝܼܢ ܗܦܝܼ̈ܟ݂ܵܬ̣ܵܐ.

¹³ܕܫܵܒ̣ܩܝܼܢ ܐܘܼܪܚܵܐ ܬܪܝܼܨܬܵܐ. ܘܲܡܗܲܠܟ݂ܝܼܢ ܒܐܘܼܪܚܵܐ ܕܚܸܫܘܿܟ݂ܵܐ.

¹⁴ܘܚܵـ̇ـܕܹܝܢ ܠܡܸܥܒܲܕܲ ܒܝܼܫܬܵܐ. ܘܕ݂ܵܝܨ̇ܝܼܢ ܒܗܘܼܦܵܟ݂ܵܐ ܕܒ̣ܝܼ̈ܫܵܬ̣ܵܐ.

¹⁵ܐܘܼܪ̈ܚܵܬ̣ܗܘܿܢ ܡܥܲܩ̈ܡܵܢ. ܘܲܡܦܲܬ̇ܠܝܼܢ ܫܒ̣ܝܼ̈ܠܲܝܗܘܿܢ.

¹⁶ܬܦܲܨܝܼܟ݂ ܚܸܟ݂ܡ̱ܬ̣ܵܐ ܡ̣ܢ ܐܲܢ̄ܬ̇ܬ̣ܵܐ: ܢܘܼܟ݂ܪܵܝܬܵܐ: ܕܲܡܗܲܦܟ݂ܵܐ ܡܸܠܹ̈ܝܗ̇.

¹⁷ܕܫܸܒ̣ܩܲܬ̤ ܡܪܲܒ̇ܝܵܢܵܐ ܕܛܲܠܝܘܼܬ̣ܵܗ̇. ܘܲܛܥܵܬ̤ ܩܝܵܡܵܐ ܕܐܲܠܵܗܵܗ̇.

¹⁸ܛܥܵܬ̤ ܐܸܣ̈ܟ̇ܦܵܬ̣ܵܗ̇: ܘܗܲܠܟ݂ܵܬ̣ܵܐ ܕܲܫܒ̣ܝܼ̈ܠܹܝܗ̇.

¹⁹ܟܠ ܕܥܵܐ̇ܠܝܼܢ ܠܘܵܬ̣ܵܗ̇ ܠܵܐ ܗܵܦ̇ܟ̇ܝܼܢ. ܘܠܵܐ ܡܸܬ̇ܕܲܟ݂ܪܝܼܢ ܐܘܼܪܚܵܐ ܕܚܲܝܹ̈ܐ.

²⁰ܗܲܠܸܟ݂ ܗܵܟܹܝܠ ܒܐܘܼܪܚܵܐ ܕܛܵܒܹ̈ܐ. ܘܛܲܪ ܐܘܼܪܚܵܐ ܕܙܲܕ̇ܝܼܩܵܐ.

²¹ܡܸܛܠ ܕܲܬ̣ܪ̈ܝܼܨܹܐ ܥܵܡ̇ܪܝܼܢ ܒܐܲܪܥܵܐ. ܘܐܲܝܠܹܝܢ ܕܲܕ݂ܠܵܐ ܡܘܼܡ ܐܸܢܘܿܢ: ܡܸܫܬܲܚܪܝܼܢ ܒܵܗ̇.

²²ܘܚܲܛܵܝܹ̈ܐ ܣܵܝ̇ܦܝܼܢ ܡ̣ܢ ܐܲܪܥܵܐ. ܘܥܵܘܿܠܹ̈ܐ ܡܸܬ̣ܥܲܩܪܝܼܢ ܡܸܢܵܗ̇.