Read Aramaic Peshita Proverbs 21 Bible Online

Proverbs 21 - Aramaic Peshita bible

Proverbs 21

¹ܐܲܝܟ݂ ܬܲܦܵܐ ܕܡܲـ̈ـܝܵܐ ܠܸܒܹ̇ܗ ܕܡܲܠܟܵܐ ܒܐܝܼܕ݂ܵܘ̈ܗܝ ܕܐܲܠܵܗܵܐ. ܘܠܲܐܬܲܪ ܕܨܵܒܹ̇ܐ: ܡܲܪܟܸ̇ܢ ܠܹܗ.

²ܟܠܗܹܝܢ ܐܘܼܪ̈ܚܵܬܹܗ ܕܓܲܒ̣ܪܵܐ ܬܪ̈ܝܼܨܵܢ ܐܸܢܹܝܢ ܒܥܲܝܢܲܝ̈ ܢܲܦ̮ܫܹܗ. ܘܡܵܪܝܵܐ ܡܲܬ̣ܩܸܢ ܠܸܒܵܐ.

³ܡ̇ܢ ܕܥܵܒܹ̇ܕ݂ ܙܲܕ̇ܝܼܩܘܼܬ̣ܵܐ ܘܕ݂ܝܼܢܵܐ: ܓܒܸܐ ܗ̄ܘܼ ܠܡܵܪܝܵܐ ܡ̣ܢ ܕܸܒ̣ܚ̱ܬ̣ܵܐ.

⁴ܪܵܘܡܵܐ ܕܥܲܝܢܹ̈ܐ ܘܲܪܘܲܚܬ̣ܵܐ ܕܠܸܒܵܐ: ܘܲܫܪܵܓ̣ܵܐ ܕܥܵܘܿܠܹ̈ܐ ܚܛܝܼܬ̣ܵܐ.

⁵ܡܲܚܫ̈ܒ̣ܵܬܹܗ ܕܓܲܒ̣ܝܵܐ ܡܗܲܝ̱ܡ̈ܢܵܢ. ܘܲܕ݂ܒ̣ܝܼܫܵܐ ܡܲܚ̄ܣܪ̈ܵܢ.

⁶ܡܲܥܒ̇ܕ݂ܵܢܘܼܬ̣ܵܐ ܕܣܝܼܡܬ̣ܵܐ ܒܠܸܫܵܢܵܐ ܕܲܓܵܠܵܐ: ܘܠܲܐܒ̣ܕܵܢܵܐ ܢܸܣܬܲܚܦܘܼܢ ܐܲܝܠܹܝܢ ܕܒ̣ܵܥܹ̇ܝܢ ܠܡܵܘܬܵܐ.

⁷ܬܒ̣ܵܪܵܐ ܕܥܵܘܿܠܹ̈ܐ ܢܹܐܬܹܐ ܥܠܲܝܗܘܿܢ: ܥܲܠ ܕܠܵܐ ܨܒ̣ܵܘ ܠܡܸܥܒܲܕ݂ ܕܝܼܢܵܐ.

⁸ܕܗܵܦܹ̇ܟ݂ ܐܘܼܪܚܹܗ: ܓܲܒ̣ܪܵܐ ܗ̄ܘܼ ܢܘܼܟ݂ܪܵܝܵܐ. ܘܐܲܝܢܵܐ ܕܲܕ݂ܟ݂ܐ: ܬܪܝܼܨܝܼܢ ܥܒ̣ܵܕ݂ܵܘ̈ܗܝ.

⁹ܦܲܩܵܚ ܠܡܸܬܲܒ̣ ܥܲܠ ܩܲܪܢܵܐ ܕܐܸܓܵܪܵܐ: ܡ̣ܢ ܕܲܠܡܸܥܡܲܪ ܥܲܡ ܐܲܢ̄ܬ̇ܬ̣ܵܐ ܢܲܨܵܝܬܵܐ.

¹⁰ܢܲܦ̮ܫܹܗ ܕܥܵܘܿܠܵܐ ܠܵܐ ܡܸܬ̣ܚܲܙܝܵܐ ܒܥܲܝܢܲܝ̈ ܚܲܒ̣ܪ̈ܵܘܗܝ.

¹¹ܘܲܒ̣ܬ̣ܘܼܟܹ̇ܗ ܕܒ̣ܝܼܫܵܐ ܡܸܬ̣ܚܲܟܲܡ ܫܲܒ̣ܪܵܐ. ܘܚܲܟ̇ܝܼܡܵܐ ܒܬܲܪܥܝܼܬܹܗ ܡܩܲܒܸ̇ܠ ܝܼܕܲܥܬ̣ܵܐ.

¹²ܘܡܸܣܬܲܟܲܠ ܙܲܕ̇ܝܼܩܵܐ ܠܸܒ̇ܗܘܿܢ ܕܥܵܘܿܠܹ̈ܐ. ܘܕ݂ܵܚܹ̇ܩ ܠܥܵܘܿܠܹ̈ܐ ܠܒ̣ܝܼܫܬܵܐ.

¹³ܕܲܡܣܲܟܲܪ ܐܸܕ݂ܢܵܘ̈ܗܝ ܕܠܵܐ ܢܸܫܡܲܥ ܠܡܸܣܟܹ̇ܢܵܐ: ܐܵܦ ܗ̤ܘ ܠܐܲܠܵܗܵܐ: ܘܠܵܐ ܢܸܥܢܹܝܘܗܝ.

¹⁴ܡܵܘܗܲܒ̣ܬ̣ܵܐ ܕܲܒ̣ܛܘܼܫܝܵܐ: ܡܲܦ̱ܪܩܵܐ ܪܘܼܓ̣ܙܵܐ. ܘܲܕ݂ܚܵܐܹ̇ܣ ܠܡܸܬܲܠ: ܡܥܝܼܪ ܪܘܼܓ̣ܙܵܐ.

¹⁵ܚܲܕ݂ܘܼܬܹܗ ܕܙܲܕ̇ܝܼܩܵܐ ܥܵܒ̣ܕܵܐ ܕܝܼܢܵܐ. ܘܲܬ̣ܒ̣ܵܪܵܐ ܠܥܵܒ̣ܕܲܝ̈ ܥܵܘܼܠܵܐ.

¹⁶ܒܲܪܢܵܫܵܐ ܕܛܵܥܹ̇ܐ ܡ̣ܢ ܐܘܼܪܚܵܐ ܕܣܘܼܟܵܠܵܐ: ܥܲܡ ܒܢܲܝ̈ ܐܲܪܥܵܐ ܢܸܬ̇ܬܲܢܲܚ.

¹⁷ܓܲܒ̣ܪܵܐ ܕܚܲܣܝܼܪ ܠܹܗ: ܘܪܵܚܹ̇ܡ ܚܲܕ݂ܘܼܬ̣ܵܐ: ܘܚܲܡܪܵܐ: ܘܲܒ̣ܣܵܡܵܐ: ܠܵܐ ܢܸܥܬܲܪ.

¹⁸ܬܲܚܠܘܼܦܹܗ ܕܙܲܕ̇ܝܼܩܵܐ ܥܵܘܿܠܵܐ. ܘܲܚܠܵܦ ܬܪܝܼܨܵܐ ܕܲܓܵܠܵܐ.

¹⁹ܛܵܒ̣ ܠܡܸܬܲܒ̣ ܒܐܲܪܥܵܐ ܕܡܲܕ݂ܒ̇ܪܵܐ: ܡ̣ܢ ܕܲܠܡܸܥܡܲܪ ܥܲܡ ܐܲܢ̄ܬ̇ܬ̣ܵܐ ܢܲܨܵܝܬܵܐ ܘܡܲܪܓ̇ܙܵܢܝܼܬ̣ܵܐ.

²⁰ܣܝ̣ܡܬ̣ܵܐ ܪܓ̣ܝܼܓ̣ܬܵܐ ܘܡܸܫܚܵܐ ܒܕܲܝܪܵܐ: ܚܸܟ݂ܡ̱ܬ̣ܵܐ. ܘܣܘܼܟܵܠܵܐ ܕܲܒ̣ܢܲܝ̈ܢܵܫܵܐ ܢܸܒ̣ܠ̱ܥܝܼܗ̇.

²¹ܕܒ̣ܵܥܹ̇ܐ ܙܲܕܝܼܩܘܼܬ̣ܵܐ ܘܛܲܝܒ̇ܘܼܬ̣ܵܐ: ܡܸܫܟܲܚ ܚܲܝܹ̈ܐ: ܘܙܲܕܝܼܩܘܼܬ̣ܵܐ: ܘܬܸܫܒ̇ܘܿܚܬܵܐ.

²²ܠܲܡܕ݂ܝܼܢ̄ܬܵܐ ܕܓܲܢ̄ܒܵܪܹ̈ܐ ܣܠܸܩ ܚܲܟ̇ܝܼܡܵܐ. ܘܲܟ݂ܒܲܫ ܚܸܣܢܵܐ ܕܬ̣ܘܼܟ݂ܠܵܢܵܗ̇.

²³ܕܢܵܛ̇ܲܪ ܦܘܼܡܹܗ ܘܠܸܫܵܢܹܗ: ܢܵܛܲܪ ܢܲܦ̮ܫܹܗ ܡ̣ܢ ܐܘܼܠܨܵܢܵܐ.

²⁴ܡܲܪܚܵܐ ܕܥܲܫܝܼܢ ܫܡܹܗ: ܥܵܒܹ̇ܕ݂ ܥܵܘܼܠܵܐ ܒܐܲܟ̇ܬܹܗ.

²⁵ܪܸܓ̇ܬܹܗ ܕܲܚܒܸܢܵܢܵܐ ܩܵܛ̇ܠܵܐ ܠܹܗ. ܡܸܛܠ ܕܠܵܐ ܨܵܒܹ̇ܐ ܕܢܸܥܒ̇ـ̈ـܕ݂ܵܢ ܐܝܼܕ݂ܵܘ̈ܗܝ ܥܒ̣ܵܕ݂ܵܐ.

²⁶ܘܟ݂ܠܹܗ ܝܵܘܡܵܐ ܪܵܐܹ̇ܓ̣ ܪܸܓ̇ܬ̣ܵܐ. ܙܲܕ̇ܝܼܩܵܐ ܝܵܗܹ̇ܒ̣: ܘܠܵܐ ܚܵܐܹ̇ܣ.

²⁷ܘܕܸܒ̣ܚܵܐ ܕܥܵܘܿܠܹ̈ܐ ܛܡܲܐ ܗ̄ܘܼ. ܡܸܛܠ ܕܲܒ̣ܥܵܘܼܠܵܐ ܡܲܝܬܹ̇ܝܢ ܠܹܗ.

²⁸ܣܵܗܕܵܐ ܕܲܓܵܠܵܐ ܢܹܐܒܲܕ݂. ܘܓܲܒ̣ܪܵܐ ܫܵܡ̇ܘܿܥܵܐ ܬܪܝܼܨܵܐܝܼܬ̣ ܡܡܲܠܸܠ.

²⁹ܚܲܨܝܼ̈ܦܵܢ ܐܲܦܵܘ̈ܗܝ ܕܓܲܒ̣ܪܵܐ ܥܵܘܿܠܵܐ. ܘܐܲܝܢܵܐ ܕܲܬ̣ܪܝܼܨ ܗ̄ܘܼ: ܐܘܼܪ̈ܚܵܬ̣ܵܐ ܕܢܲܦ̮ܫܹܗ.

³⁰ܠܲܝܬ̇ ܚܸܟ݂ܡ̱ܬ̣ܵܐ ܐܵܦܠܵܐ ܣܘܼܟܵܠܵܐ: ܐܵܦܠܵܐ ܬܲܪܥܝܼܬ̣ܵܐ: ܐܲܝܟ݂ ܕܡܵܪܝܵܐ.

³¹ܣܘܼܣܝܵܐ ܡܛܲܝܲܒ̣ ܠܝܵܘܡܵܐ ܕܲܩܪܵܒ̣ܵܐ: ܘܲܕ݂ܡܵܪܝܵܐ ܗ̄ܘܼ ܦܘܼܪܩܵܢܵܐ.