Read Aramaic Peshita Proverbs 22 Bible Online

Proverbs 22 - Aramaic Peshita bible

Proverbs 22

¹ܡܝܲܬܲܪ ܗ̄ܘܼ ܫܡܵܐ ܡ̣ܢ ܥܘܼܬ̣ܪܵܐ ܣܲܓ̇ܝܼܐܵܐ. ܘܛܵܒ̣ܵܐ ܡܪܲܚܡܵܢܘܼܬ̣ܵܐ ܡ̣ܢ ܕܲܗܒ̣ܵܐ ܘܡ̣ܢ ܣܹܐܡܵܐ.

²ܥܲܬ̇ܝܼܪܵܐ ܘܡܸܣܟܹ̇ܢܵܐ ܦܓܲܥ̣ܘ ܚܲܕ݂ ܒܚܲܕ݂. ܘܠܲܬ̣ܪ̈ܲܝܗܘܿܢ ܡܵܪܝܵܐ ܥ̣ܒܲܕ݂.

³ܥܪܝܼܡܵܐ ܚ̣ܙܵܐ ܒܝܼܫܵܐ ܕܡܸܬ̣ܢܲܓܲܕ݂: ܘܥܲܫܝܼܢܵܐܝܼܬ̣ ܐܸܬ̣ܪ̱ܕ݂ܝܼ. ܣܲܟ݂̈ܠܹܐ ܕܹܝܢ ܥ̣ܒܲܪܘ ܥܠܵܘܗܝ: ܘܲܚܣܲܪܘ.

⁴ܥܸܩܒܹ̈ܝܗ̇ ܕܡܲܟ̇ܝܼܟ݂ܘܼܬ̣ܵܐ ܕܸܚ̱ܠܬܹܗ ܕܡܵܪܝܵܐ: ܘܥܘܼܬ̣ܪܵܐ: ܘܐܝܼܩܵܪܵܐ: ܘܚܲܝܹ̈ܐ.

⁵ܢܸܫ̈ܒܹ̇ܐ ܘܦܲܚܹ̈ܐ ܒܐܘܼܪܚܵܐ ܥܣܲܩܬ̣ܵܐ. ܘܡ̇ܢ ܕܢܵܛܲܪ ܢܲܦ̮ܫܹܗ: ܢܸܬ̣ܪܲܚܲܩ ܡܸܢܗܘܿܢ.

⁶ܕܡܲܟܸ̇ܣ ܠܛܲܠܝܵܐ ܥܲܠ ܦܘܼܡܵܗ̇ ܕܐܘܼܪܚܵܐ: ܐܵܦ ܐܸܢ ܢܸܩܲܫ: ܠܵܐ ܢܸܣܛܹܐ ܡܸܢܵܗ̇.

⁷ܥܲܬ̇ܝܼܪܵܐ ܢܸܫܬܲܠܲܛ ܒܹܗ ܡܸܣܟܹ̇ܢܵܐ. ܘܥܲܒ̣ܕܵܐ ܢܵܘܙܸܦ ܠܡ̇ܢ ܕܡܵܘܙܸܦ ܗ̄ܘܼܵܐ ܠܹܗ.

⁸ܕܙܵܪܲܥ ܥܵܘܼܠܵܐ: ܢܸܚܨܘܿܕ݂ ܥܸܬܵܐ. ܘܫܲܒ̣ܛܵܐ ܕܐܲܟ̇ܬܹܗ ܢܸܓ̣ܡܘܿܪ.

⁹ܡ̇ܢ ܕܛܵܒ̣ܵܐ ܥܲܝܢܹܗ: ܗ̤ܘ ܢܸܬ̣ܒܲܪܲܟ݂. ܡܸܛܠ ܕܝܵܗܹ̇ܒ̣ ܡ̣ܢ ܠܲܚܡܹܗ ܠܡܸܣܟܹ̇ܢܵܐ.

¹⁰ܐܵܘܒܸ̇ܕ݂ ܠܒ̣ܝܼܫܵܐ: ܘܐܲܦܸܩ ܠܚܸܪܝܵܝܵܐ: ܘܒܲܛܸܠ ܕܝܼܢܵܐ ܘܨܲܥܪܵܐ. ܕܠܵܐ ܐܸܢ ܢܸܬܸ̇ܒ̣ ܒܲܟ݂ܢܘܼܫܬܵܐ: ܠܟ݂ܠܗܘܿܢ ܢܨܲܥܲܪ.

¹¹ܪܵܚܹ̇ܡ ܐܲܠܵܗܵܐ ܠܐܲܝܢܵܐ ܕܲܕ݂ܟ݂ܐ ܒܠܸܒܹ̇ܗ. ܘܲܡܪܲܚܸܡ ܥܲܠ ܣܸܦ̈ܘܵܬ̣ܵܐ ܕܪ̈ܵܚܡܵܘܗܝ ܕܡܲܠܟܵܐ.

¹²ܥܲܝܢܵܘ̈ܗܝ ܕܡܵܪܝܵܐ ܢܵܛ̇ܪܵܢ ܝܼܕܲܥܬ̣ܵܐ. ܘܡܵܘ̈ܒ̇ܕ݂ܵܢ ܡܸܠܹ̈ܐ ܕܲܓܵܠܵـ̈ـܬ̣ܵܐ.

¹³ܐܵܡܲܪ ܚܒܸܢܵܢܵܐ ܡܵܐ ܕܡܸܫܬܲܕܲܪ: ܐܲܪܝܵܐ ܒܐܘܼܪܚܵܐ: ܘܗܵܐ ܩܸܛܠܵܐ ܒܫܘܼܩܹ̈ܐ.

¹⁴ܓܘܼܡܵܨܵܐ ܥܲܡܝܼܩܵܐ ܦܘܼܡܵܗ̇ ܕܢܘܼܟ݂ܪܵܝܬܵܐ. ܘܐܲܝܢܵܐ ܕܪܵܓܹ̇ܙ ܥܠܵܘܗܝ ܡܵܪܝܵܐ: ܢܵܦܹ̇ܠ ܬܲܡܵܢ.

¹⁵ܫܵܛ̇ܝܘܼܬ̣ܵܐ ܡܲܦܪ̱ܕܵܐ ܠܸܒܹ̇ܗ ܕܛܲܠܝܵܐ. ܘܫܲܒ̣ܛܵܐ ܕܡܲܪܕ̇ܘܼܬ̣ܵܐ ܡܲܪܚܸܩ ܡܸܢܹܗ.

¹⁶ܕܬ̣ܵܐܲܟ݂ ܠܡܸܣܟܹ̇ܢܵܐ ܡܲܣܓܹ̇ܐ ܒܝܼܫܬܹ̇ܗ: ܘܲܕ݂ܝܵܗܹ̇ܒ̣ ܠܥܲܬ̇ܝܼܪܵܐ: ܚܘܼܣܪܵܢܵܐ ܗ̄ܘܼ ܠܢܲܦ̮ܫܹܗ.

¹⁷ܐܲܪܟܸ̇ܢ ܐܸܕ݂ܢܵܟ݂: ܘܲܫܡܲܥ ܡܸܠܹ̈ܐ ܕܚܲܟ̇ܝܼܡܹ̈ܐ. ܘܣܝܼܡ ܠܸܒܵܟ݂ ܠܝܼܕܲܥܬ̣ܝ.

¹⁸ܡܸܛܠ ܕܒܲܣܝܼ̈ܡܵܢ ܐܸܢܹܝܢ: ܛܲܪ ܐܹܢܹܝܢ ܒܟܲܪܣܵܟ݂. ܘܢܸܬ̣ܩ̈ܢܵܢ ܐܲܟ݂ܚ̄ܕ݂ܵܐ ܥܲܠ ܣܸܦ̈ܘܵܬ̣ܵܟ݂.

¹⁹ܕܢܸܗܘܹܐ ܬܘܼܟ݂ܠܵܢܵܟ݂ ܥܲܠ ܡܵܪܝܵܐ: ܐܵܘܕܲܥ̇ܬܵܟ݂ ܝܵܘܡܵܢܵܐ.

²⁰ܘܗܵܐ ܟܸܬ̣ܒܹ̇ܬ̣ ܐܸܢܹܝܢ ܠܵܟ݂ ܥܲܠ ܬܠܵܬ̣ ܙܲܒ̣ܢ̈ܝܼܢ.

²¹ܕܐܵܘܕ̇ܥܵܟ݂ ܡܸܠܟܵܐ ܘܝܼܕܲܥܬ̣ܵܐ: ܘܫܸܠܝܵܐ ܘܡܸܠܹ̈ܐ ܕܩܘܼܫܬܵܐ. ܕܬܲܗܦܸܟ݂ ܡܸܠܬ̣ܵܐ ܕܩܘܼܫܬܵܐ ܠܡ̇ܢ ܕܫܲܕ̇ܪܵܟ݂.

²²ܠܵܐ ܬܸܬ̇ܘܿܟ݂ ܠܡܸܣܟܹ̇ܢܵܐ ܡܸܛܠ ܕܡܸܣܟܹ̇ܝܢ ܗ̄ܘܼ. ܘܠܵܐ ܬܡܲܟܸ̇ܟ݂ ܠܒ̣ܵܝ̇ܫܵܐ ܒܬܲܪܥܵܐ.

²³ܡܸܛܠ ܕܡܵܪܝܵܐ ܕܵܐܹ̇ܢ ܕܝܼܢܗܘܿܢ. ܘܡܸܬ̣ܦܪܲܥ ܥܘܼܠܒܵܢܵܐ ܕܢܲܦ̮ܫܗܘܿܢ.

²⁴ܠܵܐ ܬܸܗܘܹܐ ܪܵܚ̇ܡܵܐ ܠܓܲܒ̣ܪܵܐ ܚܸܡܬ̣ܵܢܵܐ. ܘܥܲܡ ܓܲܒ̣ܪܵܐ ܕܲܡܠܹܐ ܪܘܼܓ̣ܙܵܐ ܠܵܐ ܬܸܥܘܿܠ.

²⁵ܕܠܵܐ ܬܹܐܠܲܦ ܡ̣ܢ ܢܵܡܘܿܣܵܘ̈ܗܝ. ܘܬܸܫܟܲܚ ܬܘܼܩ̱ܠܬ̣ܵܐ ܠܢܲܦ̮ܫܵܟ݂.

²⁶ܠܵܐ ܬܸܬܸ̇ܠ ܢܲܦ̮ܫܵܟ݂ ܠܥܲܪܵܒ̣ܘܼܬ̣ܵܐ: ܒܲܕ݂ܒܵܗܹ̇ܬ̣ ܐܲܢ̄ܬ̇ ܡ̣ܢ ܦܲܪ̈ܨܘܿܦܵܐ.

²⁷ܐܸܢ ܠܲܝܬ̇ ܠܵܟ݂ ܓܹܝܪ ܡ̣ܢ ܐܲܬܲܪ ܕܬܸܦܪܘܿܥ: ܢܵܣ̇ܒ̇ܝܼܢ ܬܸܫܘܝܼܬ̣ܵܐ ܡ̣ܢ ܬܚܘܿܬܲܝܟ.

²⁸ܠܵܐ ܬܫܲܢܸܐ ܬܚܘܼܡܵܐ ܕܡ̣ܢ ܥܵܠܲܡ: ܕܬܲܚܸܡ̣ܘ ܐܲܒ̣ܵܗܲܝ̈ܟ.

²⁹ܐܸܢ ܚܸܙܲܝܬ̇ ܓܲܒ̣ܪܵܐ ܕܲܡܗܝܼܪ ܒܲܥܒ̣ܵܕܹ̇ܗ: ܩܕ݂ܵܡ ܡܲܠܟܹ̈ܐ ܢܩܘܼܡ. ܘܠܵܐ ܢܩܘܼܢ ܩܕ݂ܵܡ ܚܲܫܝܼ̈ܟܹܐ.