Read Aramaic Peshita Proverbs 24 Bible Online

Proverbs 24 - Aramaic Peshita bible

Proverbs 24

¹ܠܵܐ ܬܸܛܲܢ ܒܓܲܒ̣ܪܹ̈ܐ ܒܝܼܫܹ̈ܐ. ܘܠܵܐ ܬܸܪܲܓ̣ ܠܡܸܗܘܵܐ ܥܲܡܗܘܿܢ.

²ܡܸܛܠ ܕܒ̣ܝܼܫܬܵܐ ܗ̄ܘܼ ܪܵܢܹ̇ܐ ܠܸܒ̇ܗܘܿܢ. ܘܥܵܘܼܠܵܐ ܡܡܲܠ̈ܠܵܢ ܣܸܦ̈ܘܵܬ̣ܗܘܿܢ.

³ܒܚܸܟ݂ܡ̱ܬ̣ܵܐ ܡܸܬ̣ܒ̇ܢܸܐ ܒܲܝܬܵܐ. ܘܲܒ̣ܣܘܼܟܵܠܵܐ ܟܠܹܗ ܬܵܩܹ̇ܢ.

⁴ܘܒ̣ܝܲܕܲܥܬ̣ܵܐ ܡܸܬ̣ܡ̱ܠܹܝܢ ܬܵܘܵܢܹ̈ܐ ܟܠ ܩܸܢܝܵܢܵܐ ܘܐܝܼܩܵܪܵܐ ܘܒ̣ܘܼܣܵܡܵܐ.

⁵ܛܵܒ̣ ܗ̄ܘܼ ܚܲܟ̇ܝܼܡܵܐ ܡ̣ܢ ܥܲܫܝܼܢܵܐ. ܘܓܲܒ̣ܪܵܐ ܕܝܼܕܲܥܬ̣ܵܐ ܡ̣ܢ ܓܲܢ̄ܒܵܪ ܚܲܝܠܵܐ.

⁶ܒܓ̣ܘܼܪܵܓ̣ܵܐ ܡܸܬ̣ܥ̱ܒܸܕ݂ ܩܪܵܒ̣ܵܐ. ܘܦܘܼܪܩܵܢܵܐ ܒܣܘܿܓ̣ܵܐܐ ܕܡܸܠܟܵܐ.

⁷ܚܸܟ݂ܡ̱ܬ̣ܵܐ ܪܵܡܝܵܐ ܠܣܲܟ݂ܠܵܐ. ܘܲܒ̣ܬܲܪܥܵܐ ܠܵܐ ܦܵܬܲܚ ܦܘܼܡܹܗ.

⁸ܕܡܸܬ̣ܚܲܫܲܒ̣ ܠܡܲܒ̣ܐܵܫܘܼ: ܥܵܘܿܠܵܐ ܡܸܬ̣ܩܪܸܐ.

⁹ܬܲܪܥܝܼܬܹܗ ܕܣܲܟ݂ܠܵܐ ܚܛܝܼܬ̣ܵܐ ܗ̄ܝܼ. ܘܛܲܡܐܘܼܬ̣ܵܐ ܕܒܲܪܢܵܫܵܐ ܒܝܼܫܬܵܐ.

¹⁰ܘܲܠܥܵܘܿܠܹ̈ܐ ܒܝܼܫܬܵܐ ܬܸܕ݂ܒܲܪ ܐܸܢܘܿܢ: ܒܝܵܘܡܵܐ ܕܐܘܼܠܨܵܢܵܐ.

¹¹ܦܲܨܵܐ ܠܐܲܝܠܹܝܢ ܕܡܸܬ̇ܕܲܒ̣ܪܝܼܢ ܠܡܵܘܬܵܐ. ܘܲܠܡܸܙܒܲܢ ܠܐܲܝܠܹܝܢ ܕܡܸܬ̇ܬܲܚܕ̇ܝܼܢ ܠܩܸܛܠܵܐ: ܠܵܐ ܬܚܘܿܣ.

¹²ܘܐܸܢ ܬܹܐܡܲܪ ܕܠܵܐ ܝܵܕܲܥ ܐ̄ܢܵܐ: ܕܲܥ ܕܬܲܪܥܝܼܬ̣ܵܐ ܕܠܸܒܵܐ: ܐܲܠܵܗܵܐ ܗ̄ܘܼ ܒܵܨܹ̇ܐ. ܘܲܕ݂ܢܛܲܪ ܢܲܦ̮ܫܵܟ݂: ܗ̤ܘ ܝܵܕܲܥ ܘܦܵܪܲܥ ܠܒܲܪܢܵܫܵܐ ܐܲܝܟ݂ ܥܒ̣ܵܕ݂ܵܘ̈ܗܝ.

¹³ܐܲܟ݂ܘܿܠ ܒܹܪܝ ܕܸܒ̣ܫܵܐ: ܡܸܛܠ ܕܛܵܒ̣ ܗ̄ܘܼ: ܘܟܲܟܵܪܝܼܬ̣ܵܐ ܚܠܝܼܬ̣ܵܐ ܒܚܸܟܵܟ݂.

¹⁴ܗܵܟܲܢܵܐ ܐܵܦ ܚܸܟ݂ܡ̱ܬ̣ܵܐ ܠܢܲܦ̮ܫܵܟ݂ ܬܸܫܟܲܚ. ܘܬܸܗܘܹܐ ܠܵܟ݂ ܚܲܪܬܵܐ: ܘܣܲܒ̣ܪܵܟ݂ ܠܵܐ ܢܸܬ̣ܦܣܸܩ.

¹⁵ܠܵܐ ܬܲܟ݂ܡܸܢ ܥܵܘܼܠܵܐ ܒܕܲܝܪܹܗ ܕܙܲܕ̇ܝܼܩܵܐ. ܘܠܵܐ ܬܸܒ̇ܘܿܙ ܒܹܝܬ̣ ܡܲܫ̱ܪܝܹܗ.

¹⁶ܡܸܛܠ ܕܲܫܒܲܥ ܙܲܒ̣ܢ̈ܝܼܢ ܢܵܦܹ̇ܠ ܙܲܕ̇ܝܼܩܵܐ ܘܩܵܐܹ̇ܡ. ܘܪ̈ܲܫܝܼܥܹܐ ܒܒ̣ܝܼܫܬܵܐ ܢܸܣܬܲܚܦܘܼܢ.

¹⁷ܡܵܐ ܕܢܵܦܹ̇ܠ ܒܥܸܠܕ̇ܒ̣ܵܒ̣ܵܟ݂: ܠܵܐ ܬܸܚܕܹ̇ܐ. ܘܡܵܐ ܕܡܸܣܬ̇ܚܸܦ: ܠܵܐ ܢܕ݂ܘܼܨ ܠܸܒܵܟ݂.

¹⁸ܕܲܠܡܵܐ ܢܸܚܙܹܐ ܡܵܪܝܵܐ: ܘܢܸܬ̣ܒ̇ܐܸܫ ܒܥܲܝܢܵܘ̈ܗܝ: ܘܢܲܗܦܸܟ݂ ܪܘܼܓ̣ܙܹܗ ܡܸܢܹܗ.

¹⁹ܠܵܐ ܬܸܚܣܲܡ ܒܒ̣ܝܼܫܹ̈ܐ. ܘܠܵܐ ܬܸܛܲܢ ܒܥܵܘܿܠܹ̈ܐ.

²⁰ܡܸܛܠ ܕܲܠܒ̣ܝܼ̈ܫܹܐ ܠܵܐ ܗܵܘ̇ܝܵܐ ܠܗܘܿܢ ܚܲܪܬܵܐ. ܘܲܫܪܵܓ̃ܗܘܿܢ ܕܥܵܘܿܠܹ̈ܐ ܢܸܕ݂ܥܲܟ݂.

²¹ܕܚܲܠ ܒܹܪܝ ܡ̣ܢ ܡܵܪܝܵܐ: ܘܐܲܡܠܸܟ݂. ܘܥܲܡ ܫܵܛ̇ܝܵܐ ܠܵܐ ܬܸܬ̣ܚܲܠܲܛ.

²²ܡ̣ܢ ܫܸܠܝܵܐ ܓܹܝܪ ܐܵܬܹ̇ܐ ܬܒ̣ܵܪܗܘܿܢ. ܘܣܵܘܦܵܐ ܕܲܫܢܲܝ̈ܗܘܿܢ ܡܲܢ̣ܘܼ ܝܵܕܲܥ.

²³ܗܵܠܹܝܢ ܠܚܲܟ̇ܝܼܡܹ̈ܐ ܐܵܡܲܪ ܐ̄ܢܵܐ. ܠܡܸܣܲܒ̣ ܒܐܲܦܹ̈ܐ ܒܕ݂ܝܼܢܵܐ: ܠܵܐ ܫܲܦܝܼܪ.

²⁴ܐܵܦܠܵܐ ܠܡܹܐܡܲܪ ܠܥܵܘܿܠܵܐ ܕܙܲܕ̇ܝܼܩ ܐܲܢ̄ܬ̇. ܢܠܘܼܛܘܼܢܹܗ ܥܲܡܡܹ̈ܐ: ܘܲܢܨܲܚ̈ܝܵܢܹܗ ܐܸܡ̈ܘܵܬ̣ܵܐ.

²⁵ܡܲܟ̇ܣܵܢܹ̈ܐ ܢܸܬ̣ܒܲܣܡܘܼܢ. ܘܲܥܠܲܝܗܘܿܢ ܬܹܐܬܹܐ ܒܘܼܪܟ̇ܬ̣ܵܐ ܛܵܒ̣ܬ̣ܵܐ.

²⁶ܘܣܸܦ̈ܘܵܬ̣ܵܐ ܢܢܲܫܩܘܼܢ ܕܐܲܝܠܹܝܢ ܕܡܲܟ̇ܣܵܢܝܼܢ.

²⁷ܛܵܝܸܒ̣ ܒܫܘܼܩܵܐ ܥܒ̣ܵܕܲܝ̈ܟ: ܘܥܲܬܸ̇ܕ݂ ܒܚܲܩܠܵܟ݂. ܘܒ̣ܵܬܲܪܟܸ̇ܢ ܬܸܒ̣ܢܸܐ ܒܲܝܬܵܟ݂.

²⁸ܠܵܐ ܬܸܗܘܹܐ ܣܵܗܕܵܐ ܕܲܓܵܠܵܐ ܥܲܠ ܚܲܒ̣ܪܵܟ݂. ܠܵܐ ܬܦܲܬ̣ܦܬ̣ܝܼܘܗܝ ܒܣܸܦ̈ܘܵܬ̣ܵܟ݂.

²⁹ܘܠܵܐ ܬܹܐܡܲܪ ܕܐܸܥܒܸ̇ܕ݂ ܠܹܗ ܐܲܝܟ݂ ܕܲܥܒܲܕ݂ ܠܝܼ: ܘܐܸܦܪ̱ܥܝܼܘܗܝ ܐܲܝܟ݂ ܥܒ̣ܵܕ݂ܵܘ̈ܗܝ.

³⁰ܥܲܠ ܚܲܩܠܹܗ ܕܓܲܒ̣ܪܵܐ ܚܒܸܢܵܢܵܐ ܥܸܒ̣̇ܪܹܬ̣: ܘܥܲܠ ܟܲܪܡܹܗ ܕܒܲܪܢܵܫܵܐ ܚܲܣܝܼܪ ܠܸܒܵܐ.

³¹ܘܲܣܠܸܩ ܟܠܹܗ: ܐܸܬ̣ܡ̱ܠܝܼ ܝܲܥܪܵܐ. ܘܟܲܣܝܼܘ ܐܲܦܵܘ̈ܗܝ ܚܘܼ̈ܠܕܹ̇ܐ. ܘܲܣܝܵܛܵܘܗܝ ܕܟܹܐܦܹ̈ܐ ܐܸܣܬ̇ܚܸܦܘ.

³²ܘܲܚܙܹ̇ܝܬ̣ ܐܸܢܵܐ ܘܣܵܡܹ̇ܬ̣ ܒܠܹܒ̇ܝ: ܘܩܲܒ̇ܠܹ̇ܬ̣ ܡܲܪܕ̇ܘܼܬ̣ܵܐ.

³³ܘܐܸܢ ܩܲܠܝܼܠ ܬܢܘܿܡ: ܘܩܲܠܝܼܠ ܬܸܕ݂ܡܲܟ݂: ܘܩܲܠܝܼܠ ܬܣܝܼܡ ܐܝܼܕ݂ܵܟ݂ ܥܲܠ ܚܲܕ̇ܝܵܟ݂.

³⁴ܬܹܐܙܲܠ ܩܕ݂ܵܡܲܝܟ ܡܸܣܟܹ̇ܢܘܼܬ̣ܵܐ: ܘܬܲܕܪ̱ܟ݂ܵܟ݂ ܨܪܝܼܟ݂ܘܼܬ̣ܵܐ ܐܲܝܟ݂ ܓܲܒ̣ܪܵܐ ܛܒ̣ܠܵܪܵܐ.