Read Aramaic Peshita Proverbs 25 Bible Online

Proverbs 25 - Aramaic Peshita bible

Proverbs 25

¹ܘܐܵܦ ܗܵܠܹܝܢ ܡܲܬ̣ܠܵܘ̈ܗܝ ܕܲܫܠܹܝܡܘܿܢ ܥܲܡܝܼ̈ܩܹܐ: ܕܲܟ݂ܬܲܒ̣ܘ ܪ̈ܵܚܡܵܘܗܝ ܕܚܸܙܲܩܝܵܐ ܡܲܠܟܵܐ ܕܲܝܗܘܼܕܵܐ.

²ܬܸܫ̇ܒ̇ܘܼܚܬܹ̇ܗ ܕܐܲܠܵܗܵܐ ܡ̇ܢ ܕܲܡܛܲܫܸܐ ܡܸܠܬ̣ܵܐ: ܘܬܸܫܒ̇ܘܿܚܬܹ̇ܗ ܕܡܲܠܟܵܐ ܡ̇ܢ ܕܒ̣ܵܨܹ̇ܐ ܡܸܠܬ̣ܵܐ.

³ܫܡܲܝܵܐ ܪܵܡܝܼܢ: ܘܐܲܪܥܵܐ ܥܲܡܝܼܩܵܐ. ܘܠܸܒܹ̇ܗ ܕܡܲܠܟܵܐ ܠܵܐ ܡܸܬ̣ܒ̇ܨܹܐ.

⁴ܓܒ̣ܵܘ ܣܘܼܠܐܵܢܵܐ ܡ̣ܢ ܣܹܐܡܵܐ: ܕܢܸܦܘܿܩ ܡܵܐܢܵܐ ܟܲܕ݂ ܕܟ݂ܐ.

⁵ܢܸܬ̣ܒܲܕ̇ܪܘܼܢ ܥܵܘܿܠܹܐ ܡ̣ܢ ܩܕ݂ܵܡ ܡܲܠܟܵܐ. ܘܢܸܬ̣ܩܲܢ ܟܘܼܪܣܝܹܗ ܒܙܲܕ̇ܝܼܩܘܼܬ̣ܵܐ.

⁶ܠܵܐ ܬܸܫܬܲܒ̣ܗܲܪ ܩܕ݂ܵܡ ܡܲܠܟܵܐ. ܘܲܒ̣ܕ݂ܘܼܟ̇ܬ̣ܵܐ ܕܪܵܘ̱ܪ̈ܒ̣ܵܢܹܐ ܠܵܐ ܬܩܘܼܡ.

⁷ܫܲܦܝܼܪ ܗ̄ܘܼ ܓܹܝܪ ܕܢܹܐܡܲܪ ܠܵܟ݂: ܐܸܬ̣ܩܲܪܲܒ̣ ܠܥܸܠ: ܛܵܒ̣ ܡ̣ܢ ܕܲܢܡܲܟ̇ܟ݂ܵܟ݂: ܩܕ݂ܵܡ ܫܲܠܝܼܛܵܐ. ܡܸܕܹ̇ܡ ܕܲܚ̈ܙܲܝ ܥܲܝܢܲܝ̈ܟ: ܗܵܘܿ ܐܸܡܲܪ.

⁸ܘܠܵܐ ܬܸܦܘܿܩ ܠܲܡܕ݂ܵܢ ܡܣܲܪ̱ܗܒ̣ܵܐܝܼܬ̣. ܕܠܵܐ ܟܲܕ݂ ܬܕ݂ܘܼܢ ܒܐܲܚܪܵܝܬܵܐ: ܢܚܲܣܕ݂ܵܟ݂ ܪܵܚ̇ܡܵܟ݂.

⁹ܕܝܼܢܵܟ݂ ܕܘܼܢ ܥܲܡ ܚܲܒ̣ܪܵܟ݂. ܘܐ̄ܪܵܙܵܐ ܐ̈ܚܪܹܢܵܐ ܠܵܐ ܬܸܓ̣ܠܹܐ.

¹⁰ܕܠܵܐ ܡ̇ܢ ܕܫܵܡܲܥ: ܢܚܲܣܕ݂ܵܟ݂. ܘܢܸܪܢܘܿܢ ܒܵܟ݂ ܣܲܓ̇ܝܼ̈ܐܹܐ.

¹¹ܚܲܙܘܼܪܵܐ ܕܕܲܗܒ̣ܵܐ ܒܲܢܓ̣ܘܼܕ݂ܵܐ ܕܣܹܐܡܵܐ: ܕܲܡܡܲܠܸܠ ܡܸܠܬ̣ܵܐ.

¹²ܩܕ݂ܵܫܵܐ ܕܕܲܗܒ̣ܵܐ ܘܣܲܪܕ̇ܘܿܢ ܛܵܒ̣ܵܐ: ܗܵܟܲܢܵܐ ܡܲܟ̇ܣܵܢܘܼܬ̣ܵܐ ܕܚܲܟ̇ܝܼܡܹ̈ܐ ܠܐܸܕ݂ܢܵܐ ܕܫܵܡ̇ܥܵܐ.

¹³ܐܲܟ݂ܙܢܵܐ ܕܡܵܐ ܕܢܵܚܹ̇ܬ̣ ܬܲܠܓܵܐ ܒܝܵܘܡܵܐ ܕܲܚܨܵܕ݂ܵܐ: ܡܦܲܝܸܓ̣ ܚܘܼܡܵܐ. ܗܵܟܲܢܵܐ ܐܝܼܙܓܲܕܵܐ ܡܗܲܝܡܢܵܐ ܠܲܡܫܲܕ̇ܪ̈ܵܢܵܘܗܝ: ܘܢܲܦ̮ܫܵܐ ܕܡܵܪ̈ܵܘܗܝ ܡܲܗܦܸܟ݂.

¹⁴ܐܲܟ݂ܙܢܵܐ ܕܡܵܐ ܕܐܝܼܬ̣ ܥܢܵܢܹ̈ܐ ܘܪܘܼܚܵܐ: ܘܡܸܛܪܵܐ ܠܲܝܬ̇: ܗܵܟܲܢܵܐ ܗ̄ܘܼ ܓܲܒ̣ܪܵܐ ܕܡܸܫܬܲܒ̣ܗܲܪ ܒܡܵܘ̈ܗܒ̣ܵܬ̣ܵܐ ܕܲܓܵܠܵـ̈ـܬ̣ܵܐ.

¹⁵ܒܢܲܓ̇ܝܼܪܘܼܬ̣ ܪܘܼܚܵܐ ܡܫܲܕܲܠ ܫܲܠܝܼܛܵܐ. ܘܠܸܫܵܢܵܐ ܪܲܟ̇ܝܼܟ݂ܵܐ ܬܵܒܲܪ ܓܲܪ̈ܡܹܐ.

¹⁶ܡܵܐ ܕܐܸܫ̣ܟܲܚܬ̇ ܕܸܒ̣ܫܵܐ: ܡܸܣܬ̣ܵܟ݂ ܐܲܟ݂ܘܿܠ. ܕܠܵܐ ܟܲܕ݂ ܬܸܣܒܲܥ: ܬܬ̣ܝܼܒ̣ܝܼܘܗܝ.

¹⁷ܠܵܐ ܬܲܬ̣ܟܸ̇ܒ̣ ܪܸܓ̣ܠܵܟ݂ ܠܒܹܝܬ̣ ܪܵܚ̇ܡܵܟ݂. ܕܠܵܐ ܢܸܣܒ̇ܥܵܟ݂ ܘܢܸܣܢܹܝܟ݂.

¹⁸ܐܲܝܟ݂ ܦܵܕ݂ܘܿܥܵܐ ܘܣܲܝܦܵܐ ܘܓܹܐܪܵܐ ܫܢܝܼܢܵܐ: ܗܵܟܲܢܵܐ ܗ̄ܘܼ ܓܲܒ̣ܪܵܐ ܕܡܲܣܗܸܕ݂ ܣܵܗܕ̇ܘܼܬ̣ܵܐ ܕܲܓܵܠܬܵܐ ܥܲܠ ܚܲܒ̣ܪܹܗ.

¹⁹ܐܲܝܟ݂ ܫܸܢܵܐ ܕܒ̣ܝܼܫܵܐ: ܘܐܲܝܟ݂ ܪܸܓ̣ܠܵܐ ܡܙܵܥܬ̣ܵܐ: ܗܵܟܲܢܵܐ ܗ̄ܘܼ ܬܘܼܟ݂ܠܵܢܹܗ ܕܕܲܓܵܠܵܐ ܒܝܵܘܡܵܐ ܕܐܘܼܠܨܵܢܵܐ.

²⁰ܡ̇ܢ ܕܫܵܩܹ̇ܠ ܡܪܛܘܼܛܵܐ ܡ̣ܢ ܚܲܒ̣ܪܹܗ ܒܝܵܘܡܵܐ ܕܩܲܪܬ̣ܵܐ: ܐܲܝܟ݂ ܗܵܘܿ ܕܪܵܡܹ̇ܐ ܚܲܠܵܐ ܥܲܠ ܝܲܬ̣ܪܵܐ: ܘܡܲܨܪܸܦ ܠܠܸܒܵܐ ܟܵܝ̇ܒܵܐ. ܐܲܝܟ݂ ܣܵܣܵܐ ܠܡܵܐܢܵܐ: ܘܐܲܝܟ݂ ܒܸܠܛܝܼܬ̣ܵܐ ܠܩܲܝܣܵܐ: ܗܵܟܲܢܵܐ ܟܲܪܝܘܼܬ̣ܵܐ ܡܲܗܪܵܐ ܠܠܸܒܹ̇ܗ ܕܓܲܒ̣ܪܵܐ.

²¹ܐܸܢ ܟܦܸܢ ܒܥܸܠܕ̇ܒ̣ܵܒ̣ܵܟ݂: ܐܵܘܟܸ̇ܠܲܝܗܝ. ܘܐܸܢ ܨܗܸܐ: ܐܲܫܩܵܝܗܝ.

²²ܘܟܲܕ݂ ܗܵܠܹܝܢ ܬܸܥܒܸ̇ܕ݂ ܠܹܗ: ܓܘܼܡܪܹ̈ܐ ܕܢܘܼܪܵܐ ܚܵܕܹ̇ܐ ܐܲܢ̄ܬ̇ ܥܲܠ ܪܹܫܹܗ. ܘܡܵܪܝܵܐ ܦܵܪܲܥ ܠܵܟ݂.

²³ܐܲܝܟ݂ ܕܪܘܼܚܵܐ ܕܓܲܪܒ̇ܝܵܐ ܒܵܛ̇ܢܵܐ ܡܸܛܪܵܐ: ܗܵܟܲܢܵܐ ܐܲܦܹ̈ܐ ܒܝܼ̈ܫܵܬ̣ܵܐ ܘܠܸܫܵܢܵܐ ܡܛܲܫܝܵܐ.

²⁴ܫܲܦܝܼܪ ܠܡܸܥܡܲܪ ܥܲܠ ܩܲܪܢܵܐ ܕܐܸܓܵܪܵܐ: ܡ̣ܢ ܕܲܠܡܸܥܡܲܪ ܥܲܡ ܐܲܢ̄ܬ̇ܬ̣ܵܐ ܢܲܨܵܝܬܵܐ: ܘܲܒ̣ܒ̣ܝܬܵܐ ܕܦܵܠ̈ܓ̇ܘܵܬ̣ܵܐ.

²⁵ܐܲܟ݂ܙܢܵܐ ܕܡܲـ̈ـܝܵܐ ܩܲܪܝܼܪܹ̈ܐ ܠܢܲܦ̮ܫܵܐ ܨܗܝܼܬ̣ܵܐ: ܗܵܟܲܢܵܐ ܗ̄ܘܼ ܛܸܒܵܐ ܫܲܦܝܼܪܵܐ ܕܐܵܬܹ̇ܐ ܡ̣ܢ ܐܲܪܥܵܐ ܪܲܚܝܼܩܬܵܐ.

²⁶ܐܲܝܟ݂ ܕܣܵܟܲܪ ܐ̄ܢܵܫ ܡܲܒ̇ܘܼܥܵܐ: ܘܡܲܦܩܵܢܵܐ ܕܡܲـ̈ـܝܵܐ ܡܚܲܒܸ̇ܠ: ܗܵܟܲܢܵܐ ܗ̄ܘܼ ܙܲܕ̇ܝܼܩܵܐ ܡܵܐ ܕܢܵܦܹ̇ܠ ܩܕ݂ܵܡ ܥܵܘܿܠܵܐ.

²⁷ܠܡܹܐܟܲܠ ܕܸܒ̣ܫܵܐ ܣܲܓ̇ܝܼ: ܠܵܐ ܫܲܦܝܼܪ. ܘܐܵܦܠܵܐ ܠܡܸܒ̣ܨܵܐ ܡܸܠܹ̈ܐ ܡܫܲܒ̇ܚܵـ̈ـܬ̣ܵܐ.

²⁸ܐܲܝܟ݂ ܡܕ݂ܝܼܢ̄ܬܵܐ ܬܪܝܼܥܬܵܐ: ܕܠܲܝܬ̇ ܠܵܗ̇ ܫܘܼܪܵܐ: ܗܵܟܲܢܵܐ ܗ̄ܘܼ ܓܲܒ̣ܪܵܐ ܕܠܵܐ ܢܲܓ̇ܝܼܪܵܐ ܪܘܼܚܹܗ.