Read Aramaic Peshita Proverbs 27 Bible Online

Proverbs 27 - Aramaic Peshita bible

Proverbs 27

¹ܠܵܐ ܬܸܫܬܲܒ̣ܗܲܪ ܠܝܵܘܡܵܐ ܕܲܡܚܵܪ. ܠܵܐ ܓܹܝܪ ܝܵܕܲܥ ܐܲܢ̄ܬ̇ ܡܵܢܵܐ ܝܵܠܸܕ݂.

²ܢܫܲܒ̇ܚܵܟ݂ ܢܘܼܟ݂ܪܵܝܵܐ: ܘܠܵܐ ܦܘܼܡܵܟ݂ ܘܐܲܚܝܼܪܹܢܵܐ: ܘܠܵܐ ܣܸܦ̈ܘܵܬ̣ܵܟ݂.

³ܝܲܩܝܼܪܵܐ ܟܹܐܦܵܐ: ܘܢܵܛܹ̇ܠ ܚܵܠܵܐ. ܘܪܘܼܓ̣ܙܹܗ ܕܣܲܟ݂ܠܵܐ ܝܲܩܝܼܪ ܡ̣ܢ ܬܪܲܝܗܘܿܢ.

⁴ܡܲܪܵܚܘܼܬ̣ܵܐ ܗ̄ܝܼ ܚܸܡܬ̣ܵܐ: ܘܚܹܐܦܵܐ ܪܘܼܓ̣ܙܵܐ. ܘܡܲܢ̣ܘܼ ܢܩܘܼܢ ܩܕ݂ܵܡ ܛܢܵܢܵܐ.

⁵ܛܵܒ̣ܵܐ ܗ̄ܝܼ ܡܲܟ̇ܣܵܢܘܼܬ̣ܵܐ ܕܓܲܠܝܵܐ: ܡ̣ܢ ܪܵܚ̇ܡܘܼܬ̣ܵܐ ܕܲܡܛܲܫܝܵܐ.

⁶ܫܲܦܝܼܪ̈ܵܢ ܡܲܚ̈ܘܵܬܹܗ ܕܪܵܚ̇ܡܹܐ: ܡ̣ܢ ܢܘܼܫ̈ܩܵܬܹܗ ܕܲܒ̣ܥܸܠܕ̇ܒ̣ܵܒ̣ܵܐ.

⁷ܢܲܦ̮ܫܵܐ ܕܣܲܒ̣ܥܵܐ ܕܵܝ̇ܫܵܐ ܟܲܟܵܪ̈ܝܵܬ̣ܵܐ: ܘܢܦ̮ܫܵܐ ܟܦܲܢܬ̣ܵܐ ܐܵܦ ܡܲܪܝܼܪܵܬ̣ܵܐ ܚܲܠ̈ܝܵܢ ܐܸܢܹܝܢ ܠܵܗ̇.

⁸ܐܲܝܟ݂ ܨܸܦܪܵܐ ܕܲܡܫܲܢܝܵܐ ܩܸܢܵܗ̇: ܗܵܟܲܢܵܐ ܗ̄ܘܼ ܓܲܒ̣ܪܵܐ ܕܙܵܐܲܥ̇ ܡ̣ܢ ܕܘܼܟ̇ܬܹܗ.

⁹ܐܲܝܟ݂ ܡܸܫܚܵܐ ܘܒܸܣܡܵܐ ܕܲܡܚܲܕܹ̇ܝܢ ܠܸܒܵܐ: ܗܵܟܲܢܵܐ ܗ̄ܘܼ ܡ̇ܢ ܕܲܡܒܲܣܸܡ ܠܚܲܒ̣ܪܹܗ ܒܡܸܠܟܵܐ ܕܢܲܦ̮ܫܹܗ.

¹⁰ܪܵܚ̇ܡܵܟ݂ ܘܪܵܚܡܹܗ ܕܐܲܒ̣ܘܼܟ݂ ܠܵܐ ܬܸܫܒ̇ܘܿܩ. ܘܲܠܒܹܝܬ̣ ܐܲܚܘܼܟ݂ ܠܵܐ ܬܸܥܘܿܠ ܒܝܵܘܡܵܐ ܕܲܬ̣ܒ̣ܵܪܵܟ݂. ܛܵܒ̣ ܗ̄ܘܼ ܫܒ̣ܵܒ̣ܵܐ ܕܩܲܪܝܼܒ̣: ܡ̣ܢ ܐܲܚܵܐ ܕܪܲܚܝܼܩ.

¹¹ܐܸܬ̣ܚܲܟܲܡ ܒܹܪܝ: ܘܚܲܕܵܐ ܠܹܒ̇ܝ. ܘܒܲܛܸܠ ܡܹܢܝ ܚܸܣܕܵܐ ܕܲܡܚܲܣܕ݂ܵܢܲܝ̈.

¹²ܥܪܝܼܡܵܐ ܚܙ̣ܵܐ ܒܝܼܫܬܵܐ: ܘܐܸܬ̇ܛܲܫܝܼ ܣܲܟ݂̈ܠܹܐ ܕܹܝܢ ܥܸܒܲܪܘ ܥܠܹܝܗ̇: ܘܲܚܣܲܪܘ.

¹³ܡܸܬ̣ܢ̱ܣܸܒ̣ ܡܲܪܛܘܼܛܹܗ ܕܡ̇ܢ ܕܥܵܪܸܒ̣ ܠܢܘܼܟ݂ܪܵܝܵܐ. ܘܥܲܠ ܐܲܦܲܝ̈ ܢܘܼܟ݂ܪܵܝܵܐ ܡܸܫܟܵܢܹܗ.

¹⁴܆ܕܲܡܒܲܪܸܟ݂ ܠܚܲܒ̣ܪܹܗ ܒܫܘܼܦܪܵܢܘܼܬ̣ܵܐ ܒܩܵܠܵܐ ܪܵܡܵܐ: ܠܵܐ ܗ̄ܘܼܵܐ ܦܪܝܼܫ ܡ̣ܢ ܗܵܘܿ ܕܠܵܐܹ̇ܛ.

¹⁵ܐܲܝܟ݂ ܕܸܠܦܵܐ ܕܢܵܛܹ̇ܦ ܒܝܵܘܡܵܐ ܕܣܲܓ̣ܪܵܐ: ܗܵܟܲܢܵܐ ܗ̄ܝܼ ܐܲܢ̄ܬ̇ܬ̣ܵܐ ܢܲܨܵܝܬܵܐ.

¹⁶ܪܘܼܚܵܐ ܕܓܲܪܒ̇ܝܵܐ ܩܲܫܝܵܐ. ܘܒܲܫܡܵܐ ܕܝܲܡܝܼܢܵܐ ܡܸܬ̣ܩܲܪܝܵܐ.

¹⁷ܦܲܪܙܠܵܐ ܠܦܲܪܙܠܵܐ ܠܵܛܹ̇ܫ. ܘܓܲܒ̣ܪܵܐ ܠܵܛܹ̇ܫ ܦܲܪܨܘܿܦܵܐ ܕܚܲܒ̣ܪܹܗ.

¹⁸ܕܢܵܛܲܪ ܬܹܐܬܵܐ: ܢܹܐܟ݂ܘܿܠ ܡ̣ܢ ܦܹܐܪܹ̈ܝܗ̇ ܘܕܲܙܗܝܼܪ ܒܡܵܪܹܗ: ܢܸܫܬܲܒܲܚ.

¹⁹ܐܲܝܟ݂ ܕܠܵܐ ܕܵܡܹ̇ܝܢ ܦܲܪ̈ܨܘܼܦܹܐ ܠܦܲܪ̈ܨܘܿܦܹܐ: ܗܵܟܲܢܵܐ ܠܵܐ ܕܵܡܹ̇ܝܢ ܠܸܒܵـ̈ـܘܵܬ̣ܵܐ ܠܠܸܒܵـ̈ـܘܵܬ̣ܵܐ.

²⁰ܫܝܘܿܠ ܘܐܲܒ̣ܕܵܢܵܐ ܠܵܐ ܣܵܒ̣ܥܝܼܢ: ܗܵܟܲܢܵܐ ܐܵܦ ܥܲܝܢܗܘܿܢ ܕܲܒ̣ܢܲܝ̈ܢܵܫܵܐ ܠܵܐ ܣܵܒܲܢܵܐ.

²¹ܨܪܵܦܵܐ ܒܵܩܹ̇ܐ ܠܣܹܐܡܵܐ: ܘܟ݂ܘܼܪܵܐ ܠܕܲܗܒ̣ܵܐ: ܘܓܲܒ̣ܪܵܐ ܡ̣ܢ ܦܘܼܡܵܐ ܕܲܡܫܲܒ̇ܚܵܢܵܘ̈ܗܝ. ܠܸܒܵܐ ܕܥܵܘܿܠܹ̈ܐ ܒܵܥܹ̇ܐ ܒܝܼܫܬܵܐ ܘܠܸܒܵܐ ܕܟܹܐܢܹ̈ܐ ܒܵܥܹ̇ܐ ܝܼܕܲܥܬ̣ܵܐ.

²²ܐܸܢ ܡܵܚܹ̇ܐ ܐܲܢ̄ܬ̇ ܠܣܲܟ݂ܠܵܐ ܒܓ̣ܵܘ ܟܢܘܼܫܬܵܐ: ܡܸܕܹ̇ܡ ܠܵܐ ܡܵܘܬܲܪ ܐܲܢ̄ܬ̇ ܠܹܗ. ܐܵܦܠܵܐ ܡܲܥܒܲܪ ܐܲܢ̄ܬ̇ ܣܲܟ݂ܠܘܼܬܹܗ.

²³ܡܵܐ ܕܪܵܥܹ̇ܐ ܐܲܢ̄ܬ̇: ܕܲܥ ܐܲܦܲܝ̈ ܥܵܢܵܟ݂. ܘܣܝܼܡ ܠܸܒܵܟ݂ ܥܲܠ ܓܙܵܪܵܟ݂.

²⁴ܡܸܛܠ ܕܠܵܐ ܗ̄ܘܼܵܐ ܠܥܵܠܲܡ ܐܘܼܚܕܵܢܵܐ. ܘܐܵܦܠܵܐ ܡܲܫܠܸܡ ܕܵܪܵܐ ܠܕ݂ܵܪܵܐ.

²⁵ܫܘܲܚ̣ ܥܡܝܼܪܵܐ: ܘܐܸܬ̣ܚܙܝܼ ܬܸܕ݂ܐܵܐ. ܘܐܸܬ̣ܟ̇ܢܸܫ ܥܸܣܒܵܐ ܕܛܘܼܪܹ̈ܐ.

²⁶ܐܸܡܪܹ̈ܐ ܠܲܠܒ̣ܘܼܫܵܟ݂: ܘܲܓ̣̈ܕܲܝܵܐ ܠܡܹܐܟ݂ܘܼܠܬܵܟ݂.

²⁷ܘܚܲܠܒ̣ܵܐ ܕܥܸܙܹ̈ܐ ܠܡܹܐܟ݂ܘܼܠܬܵܟ݂: ܘܲܠܡܹܐܟ݂ܘܼܠܬܵܐ ܕܒܲܝܬܵܟ݂.