Read Aramaic Peshita Proverbs 28 Bible Online

Proverbs 28 - Aramaic Peshita bible

Proverbs 28

¹ܢܸܥ̱ܪܩܘܼܢ ܥܵܘܵܠܹ̈ܐ ܟܲܕ݂ ܠܲܝܬ̇ ܕܪܵܕܸܦ̇ ܠܗܘܿܢ. ܘܙܲܕ̇ܝܼܩܹ̈ܐ ܐܲܝܟ݂ ܐܲܪܝܵܐ ܢܸܬ̇ܬܲܟ݂ܠܘܼܢ.

²ܒܥܵܘ̣ܠܵܗ̇ ܕܐܲܪܥܵܐ ܣܵܓܹ̇ܝܢ ܫܲܠܝܼܛܵܢܹ̈ܝܗ̇. ܘܲܒ̣ܢܲܝ̈ܢܵܫܵܐ ܙܲܕ̇ܝܼܩܹ̈ܐ ܕܝܵܕ݂ܥܝܼܢ ܟܹܐܢܘܼܬ̣ܵܐ ܢܲܓ̇ܪܘܼܢ.

³ܓܲܒ̣ܪܵܐ ܡܸܣܟܹ̇ܢܵܐ ܕܬ̣ܵܐܹ̇ܟ݂ ܠܡܸܣܟܹ̇ܢܵܐ: ܐܲܝܟ݂ ܡܸܛܪܵܐ ܚܒ̣ܝܼܛܵܐ ܕܠܲܝܬ̇ ܒܹܗ ܝܘܼܬ̣ܪܵܢ.

⁴ܐܲܝܠܹܝܢ ܕܫܵܒ̣̇ܩܝܼܢ ܢܵܡܘܿܣܵܐ: ܡܸܫܬܲܒ̇ܚܝܼܢ ܒܥܵܘܼܠܵܐ. ܘܐܲܝܠܹܝܢ ܕܢܵܛܪܝܼܢ ܢܵܡܘܿܣܵܐ: ܡܲܥ̄ܫܢܝܼܢ ܢܲܦ̮ܫܗܘܿܢ.

⁵ܓܲܒ̣ܪܹ̈ܐ ܒܝܼܫܹ̈ܐ ܠܵܐ ܡܸܣܬܲܟ̇ܠܝܼܢ ܕܝܼܢܵܐ. ܘܲܕ݂ܒ̣ܵܥܹ̇ܝܢ ܠܡܵܪܝܵܐ. ܝܵܕ݂ܥܝܼܢ ܟܠܗܹܝܢ ܛܵܒ̣ܵـ̈ـܬ̣ܵܐ.

⁶ܡܸܣܟܹ̇ܢܵܐ ܡܗܲܠܸܟ݂ ܒܬܲܡܝܼܡܘܼܬ̣ܵܐ. ܘܥܲܬ̇ܝܼܪܵܐ ܡܥܲܩ̈ܡܵܢ ܐܘܼܪ̈ܚܵܬܹܗ.

⁷ܕܢܵܛܲܪ ܢܵܡܘܿܣܵܐ: ܒܪܵܐ ܗ̄ܘܼ ܣܲܟ̇ܘܼܠܬ̣ܵܢܵܐ. ܘܲܕ݂ܦܵܠܲܚ ܣܪܝܼܩܘܼܬ̣ܵܐ: ܡܲܒ̣ܗܸܬ̣ ܠܐܲܒ̣ܘܼܗܝ.

⁸ܕܡܲܣܓܹ̇ܐ ܩܸܢܝܵܢܹܗ ܡ̣ܢ ܩܨܵܨܵܐ ܘܡ̣ܢ ܪܸܒ̇ܝܼܬ̣ܵܐ: ܢܸܫܒ̇ܩܝܼܘܗܝ ܠܡ̇ܢ ܕܲܡܪܲܚܸܡ ܥܲܠ ܡܸܣܟܹ̇ܢܵܐ.

⁹ܕܲܡܣܲܟܲܪ ܐܸܕ݂ܢܵܘ̈ܗܝ: ܕܠܵܐ ܢܸܫܡܲܥ ܢܵܡܘܿܣܵܐ: ܐܵܦ ܨܠܘܿܬܹܗ ܛܲܡܲܐ ܗ̄ܝܼ.

¹⁰ܕܡܲܛܥܹܐ ܬܪܝܼܨܵܐ ܒܐܘܼܪܚܵܐ ܒܝܼܫܬܵܐ: ܒܓ̣ܘܼܡܵܨܵܐ ܢܵܦܹ̇ܠ. ܘܬܲܡܝܼܡܹ̈ܐ ܢܹܐܪܬ̇ܘܼܢ ܛܵܒ̣ܵـ̈ـܬ̣ܵܐ.

¹¹ܓܲܒ̣ܪܵܐ ܥܲܬ̇ܝܼܪܵܐ ܚܲܟ̇ܝܼܡ ܒܥܲܝܢܲܝ̈ ܢܲܦ̮ܫܹܗ. ܘܡܸܣܟܹ̇ܢܵܐ ܣܲܟ̇ܘܼܠܬ̣ܵܢܵܐ ܒܵܣܲܪ ܠܹܗ.

¹²ܒܥܘܼܫܢܵܐ ܕܙܲܕ̇ܝܼܩܹ̈ܐ ܣܵܓ̇ܝܵܐ ܬܸܫܒ̇ܘܿܚܬܵܐ. ܘܲܒ̣ܩܵܘܡܵܐ ܕܥܵܘܿܠܹ̈ܐ ܡܸܬ̣ܒܲܨܪܵܐ.

¹³ܒܲܪܢܵܫܵܐ ܕܲܡܟܲܣܸܐ ܥܵܘܼܠܹܗ: ܠܵܐ ܢܨܠܚ ܘܲܕ݂ܡܵܘܕܹ̇ܐ ܒܲܚܛܵܗܵܘ̈ܗܝ ܘܥܵܒܲܪ ܡܸܢܗܘܿܢ: ܡܸܬ̣ܪܲܚܲܡ ܥܠܵܘܗܝ ܐܲܠܵܗܵܐ.

¹⁴ܛܘܼܒ̣ܵܘܗܝ ܠܒܲܪܢܵܫܵܐ ܕܕ݂ܵܚܹ̇ܠ ܒܟ݂ܠܙܒܲܢ. ܘܐܲܝܢܵܐ ܕܲܡܩܲܫܸܐ ܠܸܒܹ̇ܗ: ܢܵܦܹ̇ܠ ܒܒ̣ܝܼܫܬܵܐ.

¹⁵ܐܲܪܝܵܐ ܢܗܲܡܘ ܘܕܸܒܵܐ ܝܸܗ̄ܒܲܬ̤ ܩܵܠܵܐ. ܕܐܸܫܬܲܠܲܛ ܥܵܘܿܠܵܐ ܥܲܠ ܥܲܡܵܐ ܡܸܣܟܹ̇ܢܵܐ.

¹⁶ܫܲܠܝܼܛܵܐ ܚܲܣܝܼܪ ܪܸܥܝܵܢܵܐ: ܣܲܓ̇ܝܼܐܝܼܢ ܬܘܼܟܵܘ̈ܗܝ. ܘܐܲܝܢܵܐ ܕܣܵܢܹ̈ܐ ܢܸܟ݂ܠܵܐ: ܢܲܓ̇ܪܘܼܢ ܝܵܘ̈ܡܵܬܹܗ.

¹⁷ܒܲܪܢܵܫܵܐ ܕܲܚܫܝܼܫ ܒܲܕ݂ܡܵܐ ܕܢܲܦ̮ܫܵܐ: ܥܕܲܡܵܐ ܠܓܘܼܒܵܐ ܢܸܥܪܘܿܩ. ܘܠܵܐ ܢܓܲܕ̇ܪܘܼܢܹܗ.

¹⁸ܕܲܡܗܲܠܸܟ݂ ܕܠܵܐ ܡܘܼܡ: ܢܸܬ̣ܦܪܸܩ ܘܕܲܡܥܲܩ̈ܡܵܢ ܐܘܼܪ̈ܚܵܬܹܗ: ܢܸܦܸܠ ܒܓ̣ܘܼܡܵܨܵܐ.

¹⁹ܕܦܵܠܲܚ ܒܐܲܪܥܵܐ: ܢܸܣܒܲܥ ܠܲܚܡܵܐ. ܘܲܕ݂ܪܵܗܹ̇ܛ ܒܵܬܲܪ ܣܪܝܼܩܘܼܬ̣ܵܐ: ܢܸܣܒܲܥ ܡܸܣܟܹ̇ܢܘܼܬ̣ܵܐ.

²⁰ܓܲܒ̣ܪܵܐ ܡܗܲܝܡܢܵܐ ܣܲܓ̇ܝܼ̈ܐܵܢ ܒܘܼܪ̈ܟܵܬܹܗ. ܘܒ̣ܝܼܫܵܐ ܒܥܵܘܼܠܹܗ ܠܵܐ ܢܸܬ̣ܚܲܣܸܐ.

²¹ܓܲܒ̣ܪܵܐ ܕܢܵܣܹ̇ܒ̣ ܒܐܲܦܹ̈ܐ ܠܵܐ ܫܲܦܝܼܪ. ܒܩܲܨܝܵܐ ܓܹܝܪ ܕܠܚܡܵܐ ܡܲܫܠܸܡ ܓܲܒ̣ܪܵܐ.

²²ܡܸܣܬܲܪܗܲܒ̣ ܠܡܸܥܬܲܪ ܓܲܒ̣ܪܵܐ ܕܒ̣ܝܼܫܵܐ ܥܲܝܢܹܗ. ܘܠܵܐ ܝܵܕܲܥ ܕܚܘܼܣܪܵܢܵܐ ܐܵܬܹ̇ܐ ܥܠܵܘܗܝ.

²³ܕܡܲܟܸ̇ܣ ܠܒܲܪܢܵܫܵܐ: ܪ̈ܲܚܡܹܐ ܢܸܫܟܲܚ: ܛܵܒ̣ ܡ̣ܢ ܗܵܘܿ ܕܲܡܦܲܠܸܓ̣ ܒܠܸܫܵܢܹܗ.

²⁴ܕܚܵܛܹ̇ܦ ܡ̣ܢ ܐܲܒ̣ܘܗܝ ܘܡ̣ܢ ܐܸܡܹܗ: ܘܐܵܡܲܪ ܕܠܲܝܬ̇ ܠܝܼ ܚܛܵܗܵܐ: ܫܵܘܬܵܦܵܐ ܗ̄ܘܼ ܕܓܲܒ̣ܪܵܐ ܥܵܘܿܠܵܐ.

²⁵ܓܲܒ̣ܪܵܐ ܝܲܥܢܵܐ ܡܓܲܪܸܓ̣ ܚܸܪܝܵܢܵܐ. ܘܲܕ݂ܡܬ̇ܬ̇ܟܸܠ ܥܲܠ ܡܵܪܝܵܐ ܢܸܕ݂ܗܲܢ.

²⁶ܕܲܬ̣ܟ݂ܝܼܠ ܥܲܠ ܠܸܒܹ̇ܗ: ܣܲܟ݂ܠܵܐ ܗ̄ܘܼ. ܘܕܲܡܗܲܠܸܟ݂ ܒܬܲܡܝܼܡܘܼܬ̣ܵܐ ܢܸܬ̣ܦܲܨܹܐ.

²⁷ܕܝܵܗܹ̇ܒ̣ ܠܡܸܣܟܹ̇ܢܵܐ: ܠܵܐ ܢܸܚܣܲܪ ܠܹܗ. ܘܲܕ݂ܡܲܪܟܸ̇ܢ ܥܲܝܢܵܘ̈ܗܝ ܡ̣ܢ ܡܸܣܟܹ̇ܢܵܐ: ܬܸܣܓܹ̇ܐ ܠܵܘܛܬܹܗ.

²⁸ܒܩܵܘܡܵܐ ܕܥܵܘܿܠܹ̈ܐ ܡܸܬ̇ܛܲܫܸܐ ܒܲܪܢܵܫܵܐ. ܘܒܲܐܒ̣ܕܵܢܗܘܿܢ ܢܸܣܓ̇ܘܿܢ ܙܲܕ̇ܝܼܩܹ̈ܐ.