Read Aramaic Peshita Proverbs 29 Bible Online

Proverbs 29 - Aramaic Peshita bible

Proverbs 29

¹ܓܲܒ̣ܪܵܐ ܕܠܵܐ ܡܩܲܒܸ̇ܠ ܡܲܟ̇ܣܵܢܘܼܬ̣ܵܐ: ܘܲܩܫܸܐ ܩܕ݂ܵܠܹܗ: ܒܲܥܓܲܠ ܢܸܬ̇ܬ̇ܒܲܪ. ܘܠܵܐ ܬܸܗܘܹܐ ܠܹܗ ܐܵܣܝܘܼܬ̣ܵܐ.

²ܒܣܘܿܓ̣ܵܐܐ ܕܙܲܕ̇ܝܼܩܹ̈ܐ ܣܵܓܹ̇ܐ ܥܲܡܵܐ. ܘܲܒ̣ܫܘܼܠܛܵܢܵܐ ܕܥܵܘܿܠܹ̈ܐ ܡܸܬ̇ܬܲܢܲܚ ܥܲܡܵܐ.

³ܓܲܒ̣ܪܵܐ ܕܪܵܚܹ̇ܡ ܚܸܟ݂ܡ̱ܬ̣ܵܐ: ܢܚܲܕܹ̇ܐ ܠܐܲܒ̣ܘܼܗܝ ܘܲܕ݂ܪܵܥܹ̇ܐ ܒܙܵܢܝܘܼܬ̣ܵܐ: ܢܵܘܒܸ̇ܕ݂ ܩܸܢܝܵܢܹܗ.

⁴ܡܲܠܟܵܐ ܒܕ݂ܝܼܢܵܐ ܡܩܝܼܡ ܐܲܪܥܵܐ. ܘܓܲܒ̣ܪܵܐ ܥܵܘܿܠܵܐ ܡܲܚܣܲܪ ܠܵܗ̇.

⁵ܓܲܒ̣ܪܵܐ ܕܡܸܬ̣ܦܲܠܲܓ̣ ܥܲܠ ܚܲܒ̣ܪܹܗ: ܡܨܝܼܕ̇ܬܵܐ ܦܵܪܹܣ ܥܲܠ ܗܲܠܟ݂ܵܬܹ̈ܗ.

⁶ܓܲܒ̣ܪܵܐ ܒܝܼܫܵܐ ܒܥܵܘܼܠܹܗ ܡܸܬ̇ܬ̇ܨܝܼܕ݂. ܘܙܲܕ̇ܝܼܩܵܐ ܢܫܲܒܲܚ ܘܢܸܚܕܹ̇ܐ.

⁷ܙܲܕ̇ܝܼܩܵܐ ܓܹܝܪ ܝܵܕܲܥ ܕܝܼܢܵܐ ܕܡܸܣܟܹ̇ܢܹ̈ܐ ܘܥܵܘܿܠܵܐ ܠܵܐ ܡܸܣܬܲܟܲܠ ܝܼܕܲܥܬ̣ܵܐ.

⁸ܓܲܒ̣ܪܹ̈ܐ ܡܡܲܝ̈ܩܵܢܹܐ ܡܵܘܩܕ݂ܝܼܢ ܟܲܪ̈ܟܹܐ. ܘܚܲܟ̇ܝܼܡܹ̈ܐ ܡܲܗܦܟ݂ܝܼܢ ܪܘܼܓ̣ܙܵܐ.

⁹ܓܲܒ̣ܪܵܐ ܚܲܟ̇ܝܼܡܵܐ ܕܵܐܹ̇ܢ ܥܲܡ ܓܲܒ̣ܪܵܐ ܣܲܟ݂ܠܵܐ. ܘܪܵܓܹ̇ܙ ܘܓ̣ܵܚܹ̇ܟ ܘܠܵܐ ܡܸܬ̇ܬ̇ܦܝܼܪ.

¹⁰ܓܲܒ̣ܪܹ̈ܐ ܐܵܫ̇ܕܲܝ̈ ܕܡܵܐ ܣܵܢܹ̇ܝܢ ܠܚܲܣܝܵܐ. ܘܙܲܕ̇ܝܼܩܹ̈ܐ ܪܵܚ̇ܡܝܼܢ ܠܹܗ.

¹¹ܚܸܡܬܹܗ ܟܠܵܗ̇ ܡܲܦܸܩ ܣܲܟ݂ܠܵܐ. ܘܚܲܟ̇ܝܼܡܵܐ ܒܪܸܥܝܵܢܹܗ ܡܸܬ̣ܚܲܫܲܒ̣.

¹²ܫܲܠܝܼܛܵܐ ܕܫܵܡܲܥ ܡܸܠܬ̣ܵܐ ܕܲܓܵܠܬܵܐ: ܟܠܗܘܿܢ ܦܵܠ̇ܚܵܘ̈ܗܝ ܥܵܘܠܝܼܢ ܐܸܢܘܿܢ.

¹³ܡܸܣܟܹ̇ܢܵܐ ܘܡܲܟ݂ܐ̱ܒ̣ܵܐ ܦܓܲܥܘ ܚܲܕ݂ ܒܚܲܕ݂. ܘܡܵܪܝܵܐ ܡܲܢܗܲܪ ܥܲܝܢܹ̈ܐ ܕܲܬ̣ܪ̈ܲܝܗܘܿܢ.

¹⁴ܡܲܠܟܵܐ ܕܕ݂ܵܐܲܢ ܒܩܘܼܫܬܵܐ: ܟܘܼܪܣܝܹܗ ܒܕ݂ܝܼܢܵܐ ܢܸܬ̣ܩܲܢ.

¹⁵ܫܲܒ̣ܛܵܐ ܘܡܲܟ̇ܣܵܢܘܼܬ̣ܵܐ ܝܵܗ̄ܒ̇ܝܼܢ ܚܸܟ݂ܡ̱ܬܵܐ. ܘܛܲܠܝܵܐ ܕܠܵܐ ܪܕܸܐ: ܡܲܒ̣ܗܸܬ̣ ܠܐܸܡܹܗ.

¹⁶ܒܣܘܿܓ̣ܐܗܘܿܢ ܕܥܵܘܠܹ̈ܐ ܣܵܓܹ̇ܐ ܥܵܘܼܠܵܐ. ܘܙܲܕ̇ܝܼܩܹ̈ܐ ܢܸܚܕ̇ܘܿܢ ܒܡܲܦܘܼܠܬ̇ܗܘܿܢ.

¹⁷ܪܕ݂ܝܼ ܒܪܵܟ݂: ܘܲܢܢܝܼܚܵܟ݂: ܘܲܢܒܲܣܸܡ ܢܲܦ̮ܫܵܟ݂.

¹⁸ܒܣܘܿܓ̣ܵܐܐ ܕܥܵܘܿܠܹ̈ܐ ܡܸܬ̇ܬ̇ܪܲܥ ܥܲܡܵܐ. ܘܲܕ݂ܢܵܛܲܪ ܢܵܡܘܿܣܵܐ ܛܘܼܒ̣ܵܘܗܝ.

¹⁹ܒܡܸܠܹ̈ܐ ܠܵܐ ܡܸܬ̣̱ܪܕܹܐ ܥܲܒ̣ܕܵܐ. ܝܵܕܲܥ ܓܹܝܪ ܕܠܵܐ ܒܵܠܲܥ.

²⁰ܐܸܢ ܚܙܲܝܬ̇ ܓܲܒ̣ܪܵܐ ܕܲܡܣܲܪܗܲܒ̣ ܒܡܸܠܵܘ̈ܗܝ: ܕܲܥ ܕܛܵܒ̣ ܗ̄ܘܼ ܡܸܢܹܗ ܣܲܟ݂ܠܵܐ.

²¹ܕܡܸܬ̣ܦܲܢܲܩ ܡ̣ܢ ܛܲܠܝܘܼܬܹܗ: ܥܲܒ̣ܕܵܐ ܢܸܗܘܹܐ. ܘܒܲܐܚܪܵܝܬܹ̇ܗ ܢܸܬ̇ܬܲܢܲܚ.

²²ܓܲܒ̣ܪܵܐ ܚܸܡܬ̣ܵܢܵܐ ܡܸܓ̇ܪܸܓ̣ ܕܝܼܢܵܐ. ܘܓܲܒ̣ܪܵܐ ܪܵܓ̇ܘܼܙܬ̣ܵܢܵܐ ܡܲܣܓܹ̇ܐ ܥܵܘܼܠܵܐ.

²³ܪܵܡܘܼܬܹܗ ܕܒܲܪܢܵܫܵܐ ܬܡܲܟ̇ܟ݂ܝܼܘܗܝ. ܘܡܲܟ̇ܝܼܟ݂ܘܼܬܹܗ ܬܲܣܓܹ̇ܐ ܠܹܗ ܐܝܼܩܵܪܵܐ.

²⁴ܕܦܵܠܹ̇ܓ̣ ܥܲܡ ܓܲܢܵܒ̣ܵܐ: ܣܵܢܹ̇ܐ ܢܲܦ̮ܫܹܗ ܘܦܵܣܩܝܼܢ ܥܠܵܘܗܝ ܡܵܘ̈ܡܵܬ̣ܵܐ ܘܠܵܐ ܡܵܘܕܹ̇ܐ.

²⁵ܥܵܘܼܠܹܗ ܕܓܲܒ̣ܪܵܐ ܗܵܒܹ̇ܕ݂ ܠܹܗ ܬܘܼܩ̱ܠܬ̣ܵܐ. ܘܕܲܬ̣ܟ݂ܝܼܠ ܥܲܠ ܡܵܪܝܵܐ ܢܸܥܫܲܢ.

²⁶ܣܲܓ̇ܝܼ̈ܐܹܐ ܕܒ̣ܵܥܹ̇ܝܢ ܐܲܦܲܝ̈ ܫܲܠܝܼܛܵܐ. ܘܡ̣ܢ ܡܵܪܝܵܐ ܢܵܦܹ̇ܩ ܗ̄ܘܼ ܕܝܼܢܹܗ ܕܓܲܒ̣ܪܵܐ.

²⁷ܛܡܲܐ ܗ̄ܘܼ ܠܙܲܕ̇ܝܼܩܵܐ ܓܲܒ̣ܪܵܐ ܥܵܘܵܠܵܐ. ܘܐܘܼܪܚܵܐ ܬܪܝܼܨܬܵܐ ܛܲܡܐܵܐ ܗ̄ܝܼ ܠܥܵܘܿܠܹ̈ܐ.