Read Aramaic Peshita Proverbs 3 Bible Online

Proverbs 3 - Aramaic Peshita bible

Proverbs 3

¹ܒܹܪܝ: ܠܵܐ ܬܸܛܥܹܐ ܢܵܡܘܿܣܝ. ܘܦܘܼܩܕܵܢܲܝ̈ ܢܸܛܲܪ ܠܸܒܵܟ݂.

²ܡܸܛܠ ܕܢܘܼܓ̣ܪܵܐ ܕܝܵܘ̈ܡܵܬ̣ܵܐ ܘܲܫܢܲـ̈ـܝܵܐ ܕܚܲܝܹ̈ܐ ܢܸܬ̇ܬܵܘܣ̈ܦܵܢ ܠܵܟ݂.

³ܘܲܫܠܵܡܵܐ ܘܛܲܝܒ̇ܘܼܬ̣ܵܐ ܘܩܘܼܫܬܵܐ ܠܵܐ ܢܸܫܒ̇ܩܘܼܢܵܟ݂. ܐܸܠܵܐ ܩܛܘܿܪ ܐܸܢܘܿܢ ܒܨܵܘܪܵܟ݂. ܘܲܟ݂ܬ̣ܘܿܒ̣ ܐܸܢܘܿܢ ܥܲܠ ܠܘܼܚܹ̈ܐ ܕܠܸܒܵܟ݂.

⁴ܕܬܸܫܟܲܚ ܪ̈ܲܚܡܹܐ ܘܛܲܝܒ̇ܘܼܬ̣ܵܐ ܘܣܘܼܟܵܠܵܐ ܩܕ݂ܵܡ ܐܲܠܵܗܵܐ ܘܲܩܕ݂ܵܡ ܒܢܲܝ̈ܢܵܫܵܐ.

⁵ܣܲܒܲܪ ܒܡܵܪܝܵܐ ܡ̣ܢ ܟܠܹܗ ܠܸܒܵܟ݂. ܘܥܲܠ ܚܸܟ݂ܡ̱ܬ̣ܵܐ ܕܢܲܦ̮ܫܵܟ݂ ܠܵܐ ܬܸܬ̇ܟ݂ܠ.

⁶ܕܲܥܲܝܗܝ ܒܟ݂ܠܗܹܝܢ ܐܘܼܪ̈ܚܵܬ̣ܵܟ݂. ܘܗ̤ܘ ܬܵܪܹ̇ܨ ܫܒ̣ܝܼܠܲܝ̈ܟ.

⁷ܠܵܐ ܬܸܗܘܹܐ ܚܲܟ̇ܝܼܡ ܒܥܲܝܢܲܝ̈ ܢܲܦ̮ܫܵܟ݂. ܐܸܠܵܐ ܕܚܲܠ ܡ̣ܢ ܡܵܪܝܵܐ. ܘܲܣܛܝܼ ܡ̣ܢ ܒܝܼܫܬܵܐ.

⁸ܕܬܸܗܘܹܐ ܐܵܣܝܘܼܬ̣ܵܐ ܠܒܸܣܪܵܟ݂: ܘܕ݂ܘܼܗܵܢܵܐ ܠܓܲܪ̈ܡܲܝܟ.

⁹ܝܲܩܲܪ ܠܡܵܪܝܵܐ ܡ̣ܢ ܩܸܢܝܵܢܵܟ݂: ܘܡ̣ܢ ܪܹܫ ܟܠܗܹܝܢ ܥܲܠܠܵـ̈ـܬ̣ܵܟ݂.

¹⁰ܕܢܸܬ̣ܡ̱ܠܘܿܢ ܐܵܘܨܪܲܝܟ ܣܲܒ̣ܥܵܐ. ܘܡܲܥܨܪܵܬ̣ܵܟ݂ ܢܲܒ̇ـ̈ـܥܵܢ ܚܲܡܪܵܐ.

¹¹ܒܹܪܝ: ܡܲܪܕ̇ܘܼܬܹܗ ܕܡܵܪܝܵܐ ܠܵܐ ܬܲܣܠܹܐ. ܘܠܵܐ ܬܸܡܐܲܢ ܠܵܟ݂ ܒܡܲܟ̇ܣܵܢܘܼܬܹܗ.

¹²ܡܸܛܠ ܕܲܠܡ̇ܢ ܕܪܵܚܹ̇ܡ ܠܹܗ ܡܵܪܝܵܐ: ܪܵܕܹܐ ܠܹܗ: ܐܲܝܟ݂ ܐܲܒ̣ܵܐ ܕܪܵܕܹܐ ܠܲܒ̣ܪܹܗ.

¹³ܛܘܼܒ̣ܵܘܗܝ ܠܒܲܪܢܵܫܵܐ ܕܐܸܫ̣ܟܲܚ ܚܸܟ݂ܡ̱ܬ̣ܵܐ. ܘܲܠܒܲܪ ܒܸܣܪܵܐ ܕܐܸܫ̣ܟܲܚ ܣܘܼܟܵܠܵܐ.

¹⁴ܡܸܛܠ ܕܛܵܒ̣ܵܐ ܗ̄ܝܼ ܬܹܐܓ̣ܘܼܪܬܵܗ̇ ܡ̣ܢ ܬܹܐܓ̣ܘܼܪܬܵܐ ܕܣܹܐܡܵܐ. ܘܡ̣ܢ ܕܲܗܒ̣ܵܐ ܣܢܝܼܢܵܐ ܡܝܲܬ̇ܪ̈ܵܢ ܥܲܠ̈ܠܵܬ̣ܵܗ̇.

¹⁵ܝܲܩܝܼܪܵܐ ܗ̄ܝܼ ܓܹܝܪ ܡ̣ܢ ܟܹܐܦܹ̈ܐ ܛܵܒ̣ܵـ̈ـܬ̣ܵܐ. ܘܡܸܕܹ̇ܡ ܠܵܐ ܦܵܚܹ̇ܡ ܠܵܗ̇.

¹⁶ܢܘܼܓ̣ܪܵܐ ܕܝܵܘ̈ܡܵܬ̣ܵܐ ܒܝܲܡܝܼܢܵܗ̇: ܘܥܘܼܬ̣ܪܵܐ ܘܐܝܼܩܵܪܵܐ ܒܣܸܡܵܠܵܗ̇.

¹⁷ܐܘܼܪ̈ܚܵܬ̣ܵܗ̇ ܐܘܼܪ̈ܚܵܬ̣ܵܐ ܐܸܢܹܝܢ ܒܲܣܝܼ̈ܡܵܬ̣ܵܐ. ܘܟ݂ܠܗܘܿܢ ܫܒ̣ܝܼ̈ܠܹܝܗ̇ ܫܠܵܡܵܐ.

¹⁸ܐܝܼܠܵܢܵܐ ܗ̄ܝܼ ܕܚܲܝܹ̈ܐ ܠܐܲܝܠܹܝܢ ܕܲܡܚܲܡܣܢܝܼܢ ܒܵܗ̇. ܘܐܲܝܠܹܝܢ ܕܲܡܣܲܟܹ̇ܝܢ ܠܵܗ̇: ܛܘܼܒܲܝܗܘܿܢ.

¹⁹ܡܵܪܝܵܐ ܒܚܸܟ݂ܡ̱ܬܹܗ ܣܵܡ̣ ܫܲܬ̣ܐ̱ܣܹ̈ܝܗ̇ ܕܐܲܪܥܵܐ. ܘܐܲܬ̣ܩܸܢ ܫܡܲܝܵܐ ܒܣܘܼܟܵܠܹܗ.

²⁰ܘܒ̣ܝܲܕܲܥܬܹܗ ܐܸܬ̣ܒܲܙܲܥ̣ܘ ܬܗܘܿܡܹ̈ܐ. ܘܲܥܢܵܢܹ̈ܐ ܪܲܣ̣ ܛܲܠܵܐ.

²¹ܒܹܪܝ: ܠܵܐ ܢܸܙܲܠ ܒܥܲܝܢܲܝ̈ܟ ܠܡܸܛܲܪ ܝܘܼܠܦܵܢܝ ܘܬܲܪ̈ܥܝܵܬ̣ܝ.

²²ܘܢܸܗܘܘܿܢ ܚܲܝܹ̈ܐ ܠܢܲܦ̮ܫܵܟ݂: ܘܪܘܼܚܵܦܵܐ ܠܨܵܘܪܵܟ݂.

²³ܘܗܵܝܕܹ̇ܝܢ ܬܗܲܠܸܟ݂ ܒܐܘܼܪ̈ܚܵܬ̣ܵܟ݂ ܒܣܲܒ̣ܪܵܐ: ܘܲܒ̣ܪܸܓ̣ܠܵܟ݂ ܠܵܐ ܬܸܬ̇ܩܸܠ.

²⁴ܘܬܸܕ݂ܡܲܟ݂ ܘܠܵܐ ܬܸܕ݂ܚܲܠ. ܘܬܸܫܟܲܒ̣: ܘܬܸܒ̣ܣܲܡ ܠܵܟ݂ ܫܸܢܬ̣ܵܟ݂.

²⁵ܘܠܵܐ ܬܸܕ݂ܚܲܠ ܡ̣ܢ ܕܠܘܼܚܝܵܐ ܕܡ̣ܢ ܫܸܠܝܵܐ: ܘܡ̣ܢ ܚܹܐܦܵܐ ܕܚܲܛܵܝܹ̈ܐ ܡܵܐ ܕܐܵܬܹ̇ܐ.

²⁶ܡܸܛܠ ܕܡܵܪܝܵܐ ܥܲܡܵܟ݂. ܘܲܢܢܲܛܲܪ ܪܸܓ̣ܠܵܟ݂: ܕܠܵܐ ܬܸܬ̇ܨܝܼܕ݂.

²⁷ܠܵܐ ܬܸܬ̣ܟ̇ܠܹܐ ܠܡܸܥܒܲܕ݂ ܕܫܲܦܝܼܪ: ܟܡܵܐ ܕܣܵܦ̇ܩܵܐ ܒܐܝܼܕܲܝ̈ܟ ܠܡܸܥܒܲܕ݂.

²⁸ܘܟܲܕ݂ ܐܝܼܬ̣ ܠܵܟ݂: ܠܵܐ ܬܹܐܡܲܪ ܠܚܲܒ̣ܪܵܟ݂ ܕܙܸܠ: ܘܬ̣ܵܐ ܬܘܼܒ̣ ܟܚܵܪ: ܘܐܸܬܸ̇ܠ ܠܵܟ݂.

²⁹ܠܵܐ ܬܸܬ̣ܚܲܫܲܒ̣ ܒܝܼܫܬܵܐ ܥܲܠ ܚܲܒ̣ܪܵܟ݂ ܕܝܵܬܹ̇ܒ̣ ܥܲܡܵܟ݂ ܒܫܸܠܝܵܐ.

³⁰ܠܵܐ ܬܕ݂ܘܼܢ ܥܲܡ ܒܲܪܢܵܫܵܐ ܒܥܸܬܵܐ.

³¹ܘܠܵܐ ܬܸܛܲܢ ܒܓܲܒ̣ܪܵܐ ܥܵܘܿܠܵܐ. ܘܠܵܐ ܬܸܨܒܹ̇ܐ ܒܟ݂ܠܗܹܝܢ ܐܘܼܪ̈ܚܵܬܹܗ.

³²ܡܸܛܠ ܕܲܛܡܲܐ ܗ̄ܘܼ ܥܵܘܿܠܵܐ ܩܕ݂ܵܡ ܡܵܪܝܵܐ. ܘܫܘܿܥ̈ܝܵܬܹܗ ܕܡܵܪܝܵܐ ܥܲܡ ܬܪ̈ܝܼܨܹܐ.

³³ܠܵܘܛܬܹܗ ܕܡܵܪܝܵܐ ܒܒ̣ܵܬܲܝ̈ܗܘܿܢ ܕܥܵܘܿܠܹ̈ܐ ܘܕܲܝܪ̱ܗܘܿܢ ܕܙܲܕ̇ܝܼܩܹ̈ܐ ܢܒܲܪܸܟ݂.

³⁴ܘܢܸܣܚܘܿܦ ܠܲܡܡܲܝ̈ܩܵܢܹܐ. ܘܥܲܠ ܚܲܟ̇ܝܼܡܹ̈ܐ ܢܪܲܚܸܦ.

³⁵ܐܝܼܩܵܪܵܐ ܢܹܐܪܬ̇ܘܼܢ ܚܲܟ̇ܝܼܡܹ̈ܐ: ܘܣܲܟ݂̈ܠܹܐ ܢܩܲܒ̇ܠܘܼܢ ܨܲܥܪܵܐ.