Read Aramaic Peshita Proverbs 30 Bible Online

Proverbs 30 - Aramaic Peshita bible

Proverbs 30

¹ܡܸܠܵܘ̈ܗܝ ܕܐܵܓ̣ܘܿܪ ܒܲܪ ܝܲܩܝܼ: ܕܩܲܒܸ̇ܠ ܢܒ̣ܝܼܘܼܬ̣ܵܐ: ܘܐܸܬ̣ܡ̱ܨܝܼ ܚܲܝܠܵܐ: ܘܐܸܡܲܪ ܠܐܲܬ̣ܠܝܼܐܹܝܠ.

²ܡܸܛܠ ܕܚܲܣܝܼܪ ܗ̄ܘܼ ܪܸܥܝܵܢܝ. ܘܠܲܝܬ̇ ܒܝܼ ܣܘܼܟܵܠܵܐ ܕܲܒ̣ܢܲܝ̈ܢܵܫܵܐ.

³ܘܠܵܐ ܝܼܕ݂ܥܹ̇ܬ̣ ܚܸܟ݂ܡ̱ܬ̣ܵܐ. ܘܠܵܐ ܝܼܠܦܹ̇ܬ̣ ܝܼܕܲܥܬ̣ܵܐ ܕܩܲܕ̇ܝܼܫܹ̈ܐ.

⁴ܐܸܡܲܪ ܠܝܼ ܡܲܢ̣ܘܼ ܣܠܸܩ̣ ܠܲܫܡܲܝܵܐ ܘܲܢܚܸܬ̣. ܘܡܲܢ̣ܘܼ ܐܸܚܲܕ݂ ܪܘܼܚܵܐ ܒܚܘܼܦܢܵܘ̈ܗܝ ܘܡܲܢ̣ܘܼ ܨܲܪ ܡܲـ̈ـܝܵܐ ܒܫܘܿܫܸܦܵܐ. ܘܡܲܢ̣ܘܼ ܐܲܩܝܼܡ ܟܠܗܘܿܢ ܥܸܒ̣ܪܹ̈ܝܗ̇ ܕܐܲܪܥܵܐ. ܐܲܝܢܵܘ ܫܡܹܗ. ܘܐܲܝܢܵܘ ܫܡܵܐ ܕܲܒ̣ܪܹܗ: ܐܸܢ ܝܵܕܲܥ ܐܲܢ̄ܬ̇.

⁵ܟܠܗܘܿܢ ܡܹܐܡܪ̈ܵܘܗܝ ܕܐܲܠܵܗܵܐ ܓܒܹܝܢ. ܘܲܡܣܲܝܲܥ ܠܐܲܝܠܹܝܢ ܕܲܬ̣ܟ݂ܝܼܠܝܼܢ ܥܠܵܘܗܝ.

⁶ܠܵܐ ܬܵܘܣܸܦ ܥܲܠ ܡܸܠܵܘ̈ܗܝ: ܕܠܵܐ ܢܲܟ̇ܣܵܟ݂ ܘܬܸܬ̣ܟܲܕܲܒ̣.

⁷ܬܲܪܬܹ̇ܝܢ ܫܸܐ̈ܠܹܬ̣ ܡܸܢܵܟ݂. ܠܵܐ ܬܸܟ݂ܠܵܐ ܡܹܢܝ ܥܲܕ݂ܠܵܐ ܐܹܡܘܼܬ̣.

⁸ܐܲܪܚܸܩ ܡܹܢܝ ܣܪܝܼܩܘܼܬ̣ܵܐ ܘܡܲܡܠܠܵܐ ܟܲܕ݂ܒ̣ܵܐ. ܘܡܸܣܟܹ̇ܢܘܼܬ̣ܵܐ ܘܥܘܼܬ̣ܪܵܐ ܠܵܐ ܬܸܬܸ̇ܠ ܠܝܼ. ܗܲܒ̣ܠܝܼ ܥܘܼܡܪܵܐ ܡܸܣܲܬ̣ܝ.

⁹ܕܠܵܐ ܐܸܣܒܲܥ ܘܐܹܟܲܕܸ̇ܒ̣: ܘܐܸܡܲܪ ܡܲܢ̣ܘܼ ܡܵܪܝܵܐ. ܘܲܕ݂ܠܵܐ ܐܸܬ̣ܡܲܣܟܲܢ ܘܐܸܓ̣ܢܘܿܒ̣: ܘܐܹܡܵܐ ܒܲܫܡܹܗ ܕܐܲܠܗܝ.

¹⁰ܠܵܐ ܬܲܫܠܸܡ ܥܲܒ̣ܕܵܐ ܠܡܵܪ̈ܵܘܗܝ: ܕܠܵܐ ܢܠܘܼܛܵܟ݂ ܘܬܸܬ̣ܚܲܝܲܒ̣.

¹¹ܠܕ݂ܵܪܵܐ ܕܐܲܒ̣ܵܗܵܘ̈ܗܝ ܢܨܚܸܐ. ܘܠܐܸܡܹܗ ܠܵܐ ܢܒܲܪܸܟ݂.

¹²ܕܵܪܵܐ ܕܲܕ݂ܟ݂ܐ ܒܥܲܝܢܲܝ̈ ܢܲܦ̮ܫܹܗ. ܘܡ̣ܢ ܨܵܐܬܹܗ ܠܵܐ ܐܸܬ̇ܬ̇ܫܝܼܓ̣.

¹³ܕܵܪܵܐ ܡܵܐ ܕܪ̈ܵܡܵܢ ܥܲܝܢܵܘ̈ܗܝ: ܬܸܡܪ̈ܵܘܗܝ ܡܫܲܩܸܠ.

¹⁴ܕܵܪܵܐ ܕܣܲܦ̮ܣܹܪܹ̈ܐ ܐܸܢܹܝܢ ܫܸܢܵܘ̈ܗܝ. ܘܣܲܟ̇ܝܼ̈ܢܵܬ̣ܵܐ ܢܝܼܒ̣ܵܘ̈ܗܝ: ܠܡܹܐܟܲܠ ܠܡܸܣܟܹ̇ܢܹ̈ܐ ܕܐܲܪܥܵܐ: ܘܒܵܝܫܹ̈ܐ ܕܲܒ̣ܢܲܝ̈ܢܵܫܵܐ.

¹⁵ܠܥܲܠܘܼܩܵܐ ܬܠܵܬ̣ ܗܸܘܲܝ̈ ܠܹܗ ܒ̈ܢܵܢ ܚܲܒ̇ܝܼ̈ܒܵܢ. ܬܠܵܬ̣ ܐܸܢܹܝܢ ܕܠܵܐ ܣܵܒ̣̈ܥܵܢ: ܘܕܲܐܪܒܲܥ ܠܵܐ ܐܵܡ̇ܪܵܐ ܟܲܕ݂ܘܼ.

¹⁶ܫܝܘܿܠ: ܘܐܲܚܝܼܕܲܬ̣ ܪ̈ܲܚܡܹܝܗ̇: ܘܐܲܪܥܵܐ ܠܵܐ ܣܵܒ̣ܥܵܐ ܡܲـ̈ـܝܵܐ: ܘܢܘܼܪܵܐ ܠܵܐ ܐܵܡ̇ܪܵܐ ܟܲܕ̇ܘܼ.

¹⁷ܥܲܝܢܵܐ ܕܓ̣ܵܚ̇ܟܵܐ ܥܲܠ ܠܵܐ ܐܲܒ̣ܘܼܗ̇: ܘܫܵܝ̇ܛܵܐ ܣܲܝܒ̇ܘܼܬ̣ܵܐ ܕܐܸܡܵܗ̇: ܢܸܚܨܘܿܢܵܗ̇ ܥܘܼܪ̈ܒܹܐ ܕܢܲܚܠܵܐ. ܘܢܹܐܟ݂ܠܘܼܢܵܗ̇ ܒܢܲܝ̈ ܢܸܫܪܵܐ.

¹⁸ܬܠܵܬ̣ ܐܸܢܹܝܢ ܕܟܲܣ̈ܝܵܢ ܡܹܢܝ. ܘܕܲܐܪܒܲܥ ܠܵܐ ܝܼܕܲܥܹ̇ܬ̣ ܐܸܢܹܝܢ.

¹⁹ܐܘܼܪܚܵܐ ܕܢܸܫܪܵܐ ܒܲܫܡܲܝܵܐ: ܘܐܘܼܪܚܵܐ ܕܚܸܘܝܵܐ ܥܲܠ ܫܘܿܥܵܐ: ܘܐܘܼܪܚܵܐ ܕܐܸܠܦܵܐ ܒܠܸܒܹ̇ܗ ܕܝܲܡܵܐ. ܘܐܘܼܪܚܵܐ ܕܓܲܒ̣ܪܵܐ ܒܲܥܠܲܝܡܘܼܬܹܗ.

²⁰ܗܵܟܲܢܵܐ ܗ̄ܝܼ ܐܘܼܪܚܵܐ ܕܐܲܢ̄ܬ̇ܬ̣ܵܐ ܓܲܝܵܪܬܵܐ. ܐܲܟ݂ܠܵܐ ܘܲܡܟܲܦܪܵܐ ܦܘܼܡܵܗ̇. ܘܐܵܡ̇ܪܵܐ ܡܸܕܹ̇ܡ ܠܵܐ ܥܸܒ̣ܕܹ̇ܬ̣.

²¹ܬܚܹܝܬ̣ ܬܠܵܬ̣ ܙܵܝ̇ܥܵܐ ܐܲܪܥܵܐ. ܘܲܬ̣ܚܹܝܬ̣ ܐܲܪܒܲܥ ܠܵܐ ܡܸܫܟ̇ܚܵܐ ܠܲܡܣܲܝܒܵܪܘܼ.

²²ܬܚܹܝܬ̣ ܥܲܒ̣ܕܵܐ ܟܲܕ݂ ܢܲܡܠܸܟ݂ ܘܲܬ̣ܚܹܝܬ̣ ܣܲܟ݂ܠܵܐ ܕܣܵܒܲܥ ܠܲܚܡܵܐ.

²³ܘܲܬ̣ܚܹܝܬ̣ ܣܸܢܘܼܙ̱ܬ̣ܵܐ ܕܗܵܘ̇ܝܵܐ ܠܓܲܒ̣ܪܵܐ ܘܲܬ̣ܚܹܝܬ̣ ܐܲܡܬ̣ܵܐ ܕܡܲܦܩܵܐ ܠܡܵܪܬܵܗ̇.

²⁴ܐܲܪܒܲܥ ܐܸܢܹܝܢ ܕܲܙܥܘܿܪ̈ܝܵܢ ܒܐܲܪܥܵܐ: ܘܗܸܢܹܝܢ ܚܲܟ̇ܝܼܡܵܢ ܡ̣ܢ ܚܲܟ̇ܝܼܡܹ̈ܐ.

²⁵ܫܵܘܫܡܵܢܹ̈ܐ ܕܚܲܝܠܵܐ ܠܲܝܬ̇ ܒܗܘܿܢ. ܘܲܡܛܲܝܒ̣ܝܼܢ ܡ̣ܢ ܩܲܝܛܵܐ ܠܲܚ̱ܡܗܘܿܢ.

²⁶ܘܲܚܓ̣ܵܣܹ̈ܐ ܕܲܒ̣ܨܝܼܪܝܼܢ ܒܚܲܝܠܵܐ: ܘܥܵܒ̣ܕ̇ܝܼܢ ܠܗܘܿܢ ܒܵܬܹ̈ܐ ܒܫ̈ܘܿܥܹܐ.

²⁷ܘܩܲܡܨܹ̈ܐ ܕܡܲܠܟܵܐ ܠܲܝܬ̇ ܠܗܘܿܢ: ܘܡܸܬ̣ܟܲܢܫܝܼܢ ܟܠܗܘܿܢ ܐܲܟ݂ܚ̄ܕ݂ܵܐ.

²⁸ܘܐܲܡܲܩܬ̣ܵܐ ܕܲܡܣܲܒ̇ܟ݂ܵܐ ܒܐܝܼܕܹ̈ܝܗ̇: ܘܥܵܡ̇ܪܵܐ ܒܒ̣ܵـ̈ـܬܹܐ ܕܡܲܠ̈ܟܹ̇ܐ.

²⁹ܬܠܵܬ̣ ܐܸܢܹܝܢ ܕܲܬ̣ܪ̈ܝܼܨܵܢ ܗܲܠ̈ܟ݂ܵܬ̣ܗܹܝܢ. ܘܕܲܐܪܒܲܥ ܫܲܦܝܼܪ ܡܗܲܠ̈ܟ݂ܵܢ.

³⁰ܓܘܼܪܝܵܐ ܕܐܲܪܝܵܐ ܓܲܢ̄ܒܵܪ ܗ̄ܘܼ ܡ̣ܢ ܟܠܵܗ̇ ܒܥܝܼܪܵܐ. ܘܠܵܐ ܕܵܚܹ̇ܠ: ܘܠܵܐ ܗܵܦܹ̇ܟ݂ ܡ̣ܢ ܟܠܵܗ̇ ܒܥܝܼܪܵܐ.

³¹ܘܐܲܒܵܟ݂ܵܐ ܕܡܸܙܕܲܪܟܲܠ ܒܲܝܢܵܬ̣ ܬܲܪ̈ܢܵܓ̣ܘܿܠܝܵܬ̣ܵܐ: ܘܬܲܝܫܵܐ ܕܐܵܙܹ̇ܠ ܒܪܹܫ ܓܙܵܪܵܐ: ܘܡܲܠܟܵܐ ܕܲܡܡܲܠܸܠ ܒܹܝܬ̣ ܥܲܡܡܹ̈ܐ.

³²ܠܵܐ ܬܸܪܲܓ̣: ܕܠܵܐ ܬܸܨܛܲܥܲܪ. ܘܠܵܐ ܬܵܘܫܸܛ ܐܝܼܕ݂ܵܟ݂ ܠܦܘܼܡܵܟ݂ ܒܥܸܬܵܐ.

³³ܡ̣ܢ ܫܘܼܡܢܹܗ ܕܚܲܠܒ̣ܵܐ ܢܵܦܩܵܐ ܚܹܐܘܬ̣ܵܐ. ܘܐܸܢ ܬܸܟ݂ܒ̇ܘܿܫ ܐܝܼܕ݂ܵܟ݂ ܥܲܠ ܚܸܛܬ̣ܵܐ: ܢܸܦܘܿܩ ܕܡܵܐ. ܗܵܟܲܢܵܐ ܡ̣ܢ ܚܸܪܝܵܢܵܐ ܕܐܲܦ̈ܐ ܢܵܦܹ̇ܩ ܕܝܼܢܵܐ.