Read Aramaic Peshita Proverbs 31 Bible Online

Proverbs 31 - Aramaic Peshita bible

Proverbs 31

¹ܡܸܠܵܘܗܝ ܕܡܘܼܐܹܝܠ ܡܲܠܟܵܐ ܢܒ̣ܝܼܵܐ: ܕܲܪܕ݂ܵܬܹܗ ܐܸܡܹܗ: ܘܐܸܡܪܲܬ̤ ܠܹܗ.

²ܝܵܝ ܒܹܪܝ: ܘܝܵܝ ܒܲܪ ܟܲܪܣܝ: ܘܝܵܝ ܒܲܪ ܢܸܕ݂ܪ̈ܲܝ.

³ܠܵܐ ܬܸܬܸ̇ܠ ܚܲܝܠܵܟ݂ ܠܢܹܫܹ̈ܐ: ܘܐܘܼܪ̈ܚܵܬ̣ܵܟ݂ ܠܡܹܐܟ݂ܠܵـ̈ـܬ̣ܵܐ ܕܡܲܠ̈ܟܹ̇ܐ.

⁴ܡ̣ܢ ܡܲܠ̈ܟܹ̇ܐ: ܡܘܼܐܹܝܠ: ܐܸܙܕܲܗ̄ܪ. ܡ̣ܢ ܡܲܠ̈ܟܹ̇ܐ ܕܫܵܬܹ̇ܝܢ ܚܡܪܵܐ: ܘܡ̣ܢ ܫܲܠܝܼܛܹ̈ܐ ܕܫܵܬܹ̇ܝܢ ܫܲܟ݂ܪܵܐ.

⁵ܕܠܵܐ ܬܸܫܬܹ̇ܐ ܘܬܸܛܥܸܐ ܠܲܡܒܲܕ̇ܩܵܢܵܐ. ܘܬܸܛܥܹܐ ܕܝܼܢܵܐ ܕܟ݂ܠܗܘܿܢ ܒܢܲܝ̈ ܡܸܣܟܹ̇ܢܹ̈ܐ.

⁶ܡܸܬ̣̱ܝܼܗܸܒ̣ ܫܲܟ݂ܪܵܐ ܠܐܲܒ̣ܝܼܠܹ̈ܐ: ܘܚܲܡܪܵܐ ܠܡܲܪܝܼܪ̈ܲܝ ܢܲܦ̮ܫܵܐ.

⁷ܕܢܸܫܬ̇ܘܿܢ ܘܢܸܛܥܘܿܢ ܟܹܐܒܲܝ̈ܗܘܿܢ: ܘܥܵܩܵܬ̣̈ܗܘܿܢ ܬܘܼܒ̣ ܠܵܐ ܢܸܬ̇ܕܲܟ݂ܪܘܼܢ.

⁸ܦܬܲܚ ܦܘܼܡܵܟ݂ ܒܡܸܠܬ̣ܵܐ ܕܩܘܼܫܬܵܐ. ܘܕ݂ܘܼܢ ܠܟ݂ܠܗܘܿܢ ܒܢܲـ̈ـܝܵܐ ܥܵܘܿܠܹ̈ܐ.

⁹ܦܬܲܚ ܦܘܼܡܵܟ݂ ܒܕ݂ܝܼܢܵܐ ܙܲܕ̇ܝܼܩܵܐ. ܘܕ݂ܘܼܢ ܠܡܸܣܟܹ̇ܢܹ̈ܐ ܘܲܠܒ̣ܵܝܫܹ̈ܐ.

¹⁰ܐܲܢ̄ܬ̇ܬ̣ܵܐ ܟܲܫܝܼܪܬܵܐ ܡܲܢ̣ܘܼ ܡܸܫܟܲܚ. ܝܲܩܝܼܪܵܐ ܗ̄ܝܼ ܓܹܝܪ ܡ̣ܢ ܟܹܐܦܹ̈ܐ ܛܵܒ̣ܵـ̈ـܬ̣ܵܐ: ܕܲܕ݂ܡ̈ܝܼܢ ܠܲܝܬ̇ ܠܗܹܝܢ.

¹¹ܘܲܬ̣ܟ݂ܝܼܠ ܥܠܹܝܗ̇ ܠܸܒܹ̇ܗ ܕܒܲܥܠܵܗ̇. ܘܐܲܣܵܢܵܐ ܠܵܐ ܚܵܣܲܪ ܠܵܗ̇.

¹²ܥܸܒ̣ܕܲܬ̤ ܠܹܗ ܛܲܒ̣ܵـ̈ـܬ̣ܵܐ ܘܠܵܐ ܒܝܼ̈ܫܵܬ̣ܵܐ ܟܠܗܘܿܢ ܝܵܘ̈ܡܵܬ̣ܵܐ ܕܚܲܝܵܘ̈ܗܝ.

¹³ܒܥܵܬ̤ ܥܲܡܪܵܐ ܘܟ݂ܬܵܢܵܐ. ܘܲܥ̣ܒܲܕ݂ ܐܝܼܕܹ̈ܝܗ̇ ܐܲܝܟ݂ ܨܸܒ̣ܝܵܢܵܗ̇.

¹⁴ܗܘ̤ܵܬ̣ ܐܲܝܟ݂ ܐܸܠܦܵܐ ܕܬܲܓܵܪܵܐ: ܕܡ̣ܢ ܪܘܼܚܩܵܐ ܐܵܬ̣̇ܝܵܐ ܬܹܐܓ̣ܘܼܪܬܵܗ̇.

¹⁵ܘܩܵܡܲܬ̤ ܒܠܸܠܝܵܐ: ܘܝܲܗ̄ܒܲܬ̤ ܡܹܐܟ݂ܘܼܠܬܵܐ ܠܲܒ̣ܢܲܝ̈ ܒܲܝܬܵܗ̇: ܘܲܥܒ̣ܵܕ݂ܵܐ ܠܛܲܠ̈ܝܵܬ̣ܵܗ̇.

¹⁶ܘܚܵܪܲܬ̤ ܒܦܘܼܠܚܵܢܵܐ ܘܲܙܒܲܢܬ̣ܗ. ܘܡ̣ܢ ܦܹܐܪܹ̈ܐ ܕܐܝܼܕܹ̈ܝܗ̇ ܢܸܨܒܲܬ̤ ܟܲܪܡܵܐ.

¹⁷ܘܐܸܣܪܲܬ̤ ܚܲܨ̈ܝܗ̇ ܒܥܘܼܫܢܵܐ. ܘܫܲܪܪܲܬ̤ ܕܪܵܥܹܝܗ̇.

¹⁸ܘܛܸܥܡܲܬ̤ ܕܛܵܒ̣ܵܐ ܗ̄ܝܼ ܬܹܐܓ̣ܘܼܪܬܵܗ̇. ܘܠܵܐ ܕܵܥܹ̇ܟ݂ ܗ̄ܘܼܵܐ ܫܪܵܓ̣ܵܗ̇ ܠܸܠܝܵܐ ܟܠܹܗ.

¹⁹ܕܪ̈ܵܥܹܝܗ̇ ܐܵܘܫܛܲܬ̤ ܒܟ݂ܫܝܼܪܘܼܬ̣ܵܐ: ܘܐܝܼܕܹ̈ܝܗ̇ ܠܡܘܼܥܙܵܠܵܐ.

²⁰ܐܝܼܕܹ̈ܝܗ̇ ܦܸܫܛܲܬ̤ ܠܡܸܣܟܹ̇ܢܹ̈ܐ: ܘܲܕ݂ܪ̈ܵܥܹܝܗ̇ ܐܵܘܫܛܲܬ̤ ܠܒ̣ܵܝܫܹ̈ܐ.

²¹ܘܠܵܐ ܕܵܚ̇ܠܝܼܢ ܗ̄ܘܼܵܘ ܒܢܲܝ̈ ܒܲܝܬܵܗ̇ ܡ̣ܢ ܬܲܠܓܵܐ. ܡܸܛܠ ܕܟ݂ܠܗܘܿܢ ܠܒ̣ܝܼܫܝܼܢ ܗ̄ܘܼܵܘ ܙܚܙܿܪ̈ܝܵܬ̣ܵܐ.

²²ܬܸܫܘܝܼܬ̣ܵܐ ܥܸܒ̣ܕܲܬ̤ ܠܵܗ̇: ܘܢܲܚ̈ܬܹ̇ܐ ܕܒ̣ܘܼܨܵܐ ܘܕܲܐܪܓ̇ܘܿܢܵܐ.

²³ܝܼܕܲܥ ܗ̄ܘܼܵܐ ܒܲܥܠܵܗ̇ ܒܲܝܢܵܬ̣ ܡܕ݂ܝܼ̈ܢܵܬ̣ܵܐ: ܟܲܕ݂ ܝܵܬܹ̇ܒ̣ ܗ̄ܘܼܵܐ ܒܹܝܬ̣ ܣܵܒܹ̈ܐ ܕܐܲܪܥܵܐ.

²⁴ܟܸܬܵܢܵܐ ܥܸܒ̣ܕܲܬ̤ ܘܙܲܒ̇ܢܲܬ̣. ܘܐܲܣܵܪ ܚܲܨܹ̈ܐ ܝܸܗ̄ܒܲܬ̤ ܠܲܟ݂ܢܲܥܢܵܝܹ̈ܐ.

²⁵ܥܘܼܫܢܵܐ ܘܗܸܕ݂ܪܵܐ ܠܒ̣ܘܼܫܵܗ̇: ܘܬܸܚܕܹ̇ܐ ܒܝܵܘܡܵܐ ܐ̄ܚܪܵܝܵܐ.

²⁶ܦܘܼܡܵܗ̇ ܦܸܬ̣ܚܲܬ̤ ܒܚܸܟ݂ܡ̱ܬ̣ܵܐ: ܘܢܵܡܘܿܣܵܐ ܕܪ̈ܲܚܡܹܐ ܥܲܠ ܠܸܫܵܢܵܗ̇.

²⁷ܘܓܲܠ̈ܝܵܢ ܐܘܼܪ̈ܚܵܬ̣ܵܐ ܕܒܲܝܬܵܗ̇. ܠܲܚܡܵܗ̇ ܚܒܸܢܵܢܵܐܝܼܬ̣ ܠܵܐ ܐܸܟ݂ܠܲܬ̤.

²⁸ܩܵܡ̣ܘ ܒܢܹ̈ܝܗ̇: ܘܝܲܗ̄ܒ̣ܘ ܠܵܗ̇ ܛܘܼܒ̣ܵܐ. ܘܒܲܥܠܵܗ̇ ܫܲܒ̇ܚ̣ܵܗ̇.

²⁹ܘܣܘܿܓ̣ܵܐܐ ܕܲܒ̣̈ܢܵܬ̣ܵܗ̇ ܩܢܲܝ̈ ܥܘܼܬ̣ܪܵܐ. ܘܐܲܢ̄ܬ̇ܝ ܥܸܒ̣ܪܬ̇ܝ ܥܲܠ ܟܠܗܹܝܢ.

³⁰ܕܲܓܵܠܵܐ ܗ̄ܝܼ ܝܵܐܝܘܼܬ̣ܵܐ: ܘܲܣܪܝܼܩ ܗ̄ܘܼ ܫܘܼܦܪܵܐ. ܘܐܲܢ̄ܬ̇ܬ̣ܵܐ ܕܕ݂ܵܚ̇ܠܵܐ ܡ̣ܢ ܡܵܪܝܵܐ: ܗ̤ܝ ܬܸܫܬܲܒܲܚ.

³¹ܗܲܒ̣ܘ ܠܵܗ̇ ܡ̣ܢ ܦܹܐܪܹ̈ܐ ܕܐܝܼܕܹ̇ܝܗ̇. ܘܲܢܫܲܒ̇ܚܘܼܢܵܗ̇ ܥܒ̣ܵܕܹ̈ܝܗ̇ ܒܬܲܪܥܵܐ.