Read Aramaic Peshita Proverbs 5 Bible Online

Proverbs 5 - Aramaic Peshita bible

Proverbs 5

¹ܒܹܪܝ: ܨܘܼܬ̣ ܠܚܸܟ݂ܡܲܬ̣ܝ: ܘܲܠܣܘܼܟܵܠܝ ܐܲܪܟܸ̇ܢ ܐܸܕ݂ܢܵܟ݂.

²ܕܬܸܙܕ̇ܗܲܪ ܒܬܲܪܥܝܼܬ̣ܵܐ. ܘܝܼܕܲܥܬ̣ܵܐ ܣܸܦ̈ܘܵܬ̣ܵܟ݂ ܢܢܲܛܪ̈ܵܢ.

³ܡܸܛܠ ܕܕܸܒ̣ܫܵܐ ܗ̄ܘܼ ܡܲܛ̈ܦܵܢ ܣܸܦ̈ܘܵܬ̣ܵܗ̇ ܕܢܘܼܟ݂ܪܵܝܬܵܐ. ܘܪ̈ܲܟ̇ܝܼܟ݂ܵܢ ܡ̣ܢ ܡܸܫܚܵܐ ܡܸܠܹ̈ܝܗ̇.

⁴ܘܚܲܪܬ̣ܗܹܝܢ ܡ̣ܢ ܓܸܕ̇ܕܹ̈ܐ ܡܲܪܝܼܪܵܐ. ܚܲܪܝܼܦܵܐ ܗ̄ܝܼ ܓܹܝܪ ܡ̣ܢ ܣܲܝܦܵܐ ܕܲܬ̣ܪܹܝܢ ܦܘܼܡܵܘ̈ܗܝ.

⁵ܘܪܸ̈ܓ̣ܠܹܝܗ̇ ܡܲܚ̈ܬ̣ܵܢ ܠܡܵܘܬܵܐ. ܫܝܘܿܠ ܗܲܠܟ݂ܵـ̈ـܬ̣ܵܗ̇ ܡܣܲܡܟ݂ܵܐ.

⁶ܘܠܵܐ ܕܵܪܟܵܐ ܒܐܲܪܥܵܐ ܕܚܲܝܹ̈ܐ. ܬܵܘܫܵܐ ܐܸܢܘܿܢ ܓܹܝܪ ܫܒ̣ܝܼ̈ܠܹܝܗ̇ ܘܠܵܐ ܝܼܕ݂ܝܼܥܝܼܢ.

⁷ܡܸܟܹ̇ܝܠ ܒܢܲـ̈ـܝܵܐ ܫܘܼܡܥܘܼܢܝ. ܘܠܵܐ ܬܸܣܛܘܿܢ ܡ̣ܢ ܡܹܐܡܪܹܗ ܕܦܘܼܡܝ.

⁸ܐܲܪܚܸܩ ܡܸܢܵܗ̇ ܐܘܼܪܚܵܟ݂. ܘܠܵܐ ܬܸܬ̣ܩܲܪܲܒ̣ ܠܬܲܪܥܵܐ ܕܒܲܝܬܵܗ̇.

⁹ܕܠܵܐ ܬܸܬܸ̇ܠ ܠܐܲܚܪ̈ܵܢܹܐ ܚܲܝܠܵܟ݂: ܘܲܫܢܲܝ̈ܟ ܠܐܲܝܠܹܝܢ ܕܠܵܐ ܡܪܲܚܡܵܢܝܼܢ.

¹⁰ܘܢܸܣܒ̇ܥܘܼܢ ܢܘܼܟ݂ܪ̈ܵܝܹܐ ܚܲܝܠܵܟ݂. ܘܠܹܐܘܬ̣ܵܟ݂ ܬܲܥܸܠ ܠܒܲܝܬܵܐ ܕܢܘܼܟ݂ܪ̈ܵܝܹܐ.

¹¹ܘܲܒ̣ܣܲܝܒ̇ܘܼܬ̣ܵܟ݂ ܬܸܬ̇ܘܹܝܟ݂ ܢܲܦ̮ܫܵܟ݂: ܡܵܐ ܕܲܓ̣ܡܲܪ ܒܸܣܪܵܐ ܕܓ̣ܘܼܫܡܵܟ݂.

¹²ܘܬܹ̇ܐܡܲܪ ܕܲܠܡܵܢܵܐ ܓܹܝܪ ܣܢܹ̇ܝܬ̣ ܡܲܪܕ̇ܘܼܬ̣ܵܐ. ܘܡܲܟ̇ܣܵܢܘܼܬ̣ܵܐ ܐܲܣܓܝܼ ܠܹܒ̇ܝ.

¹³ܘܠܵܐ ܫܸܡ̇ܥܹܬ̣ ܠܩܵܠܵܐ ܕܡܲܠܦܵܢܲܝ̈. ܘܲܠܡܲܫ̱ܡ̈ܥܵܢܲܝ ܠܵܐ ܨܠܹ̇ܝܬ̣ ܐܸܕ݂ܢܝ.

¹⁴ܥܲܕ݂ ܩܲܠܝܼܠ ܗܵܘܹ̇ܐ ܗ̄ܘܹ̇ܝܬ̣ ܠܝܼ ܒܟ݂ܠ ܒܝܼ̈ܫܵܢ: ܒܲܟ݂ܢܘܼܫܬܵܐ ܘܲܒ̣ܥܹܕܬܵܐ.

¹⁵ܐܸܫܬܲܝ ܡܲـ̈ـܝܵܐ ܡ̣ܢ ܒܹܪܵܟ݂: ܘܪ̈ܵܕܲܝܵܐ ܡ̣ܢ ܡܥܝܼܢܵܟ݂.

¹⁶ܘܢܸܫܬܲܦܥܘܼܢ ܡܲܝ̈ܟ ܒܫܘܼ̈ܩܲܝܟ ܘܲܒ̣ܫܘܼ̈ܩܲܝܟ ܢܸܪܕ̇ܘܿܢ.

¹⁷ܘܢܸܗܘܘܿܢ ܠܵܟ݂ ܒܲܠܚܘܿܕܲܝܟ. ܘܢܘܼܟ݂ܪ̈ܵܝܹܐ ܠܵܐ ܢܸܫܬܵܘܬ̇ܦܘܼܢ ܥܲܡܵܟ݂.

¹⁸ܘܢܸܗܘܹܐ ܒܪܝܼܟ݂ ܡܲܒ̇ܘܼܥܵܟ݂. ܘܲܚܕ݂ܝܼ ܥܲܡ ܐܲܢ̄ܬܲܬ̣ ܛܲܠܝܘܼܬ̣ܵܟ݂.

¹⁹ܐܲܝ̱ܠܬ̣ܵܐ ܕܪܸܚ̱ܡܬ̣ܵܐ: ܘܕܲܝܨܬ̣ܵܐ ܕܕ̇ܚ̱ܡܬ̣ܵܐ. ܐܘܼܪ̈ܚܵܬ̣ܵܗ̇ ܝܼܠܲܦ ܒܟ݂ܠܙܒܲܢ ܘܲܒ̣ܪܸܚ̱ܡܬ̣ܵܗ̇ ܪܥܝܼ.

²⁰ܘܠܵܐ ܬܥܲܦܸܩ ܥܘܼܒܵܗ̇ ܕܢܘܼܟ݂ܪܵܝܬܵܐ.

²¹ܡܸܛܠ ܕܲܩܕ݂ܵܡ ܥܲܝܢܵܘ̈ܗܝ ܐܸܢܹܝܢ ܕܡܵܪܝܵܐ ܐܘܼܪ̈ܚܵܬܹܗ ܕܓܲܒ̣ܪܵܐ. ܘܟ݂ܠܗܘܿܢ ܫܒ̣ܝܼܠܵܘ̈ܗܝ ܓܠܹܝܢ ܩܕ݂ܵܡܵܘܗܝ.

²²ܒܚܵܘܒܵܘ̈ܗܝ ܢܸܬ̇ܬ̇ܚܸܕ݂ ܥܵܘܿܠܵܐ. ܘܲܒ̣ܚܲܒ̣̈ܠܹܐ ܕܲܚܛܵܗܵܘ̈ܗܝ ܢܸܬ̣ܦܟܲܪ.

²³ܗ̤ܘ ܢܡܘܼܬ̣ ܕܠܵܐ ܡܲܪܕ̇ܘܼ ܘܲܒ̣ܣܘܿܓ̣ܵܐܐ ܕܛܵܥ̇ܝܘܼܬܹܗ ܢܸܬ̇ܛܥܹܐ.