Read Aramaic Peshita Proverbs 6 Bible Online

Proverbs 6 - Aramaic Peshita bible

Proverbs 6

¹ܒܹܪܝ: ܐܸܢ ܥ̣ܪܲܒ̣ܬ̇ ܠܚܲܒ̣ܪܵܟ݂: ܐܲܫܠܸܡ̣ܬ̇ ܐܝܼܕ݂ܵܟ݂ ܠܢܘܼܟ݂ܪܵܝܵܐ.

²ܐܸܬ̇ܬ̇ܨܝܼܕܲܬ̇ ܒܡܹܐܡܪܵܐ ܕܦܘܼܡܵܟ݂. ܘܐܸܬ̇ܬ̇ܚܸܕ̇ܬ̇ ܒܡܲܡܠܠܵܐ ܕܣܸܦ̈ܘܵܬ̣ܵܟ݂.

³ܥܒܸܕ݂ ܗܵܟܲܢܵܐ ܒܹܪܝ: ܘܐܸܬ̣ܦܲܨܵܐ. ܡܸܛܠ ܕܥܲܠ ܐܲܦܲܝ̈ ܚܲܒ̣ܪܵܟ݂ ܢܦܲܠ̣ܬ̇ ܒܐܝܼ̈ܕܲܝ ܒܥܸܠܕ̇ܒ̣ܵܒ̣ܵܟ݂. ܓܲܪܸܓ̣ ܗܵܟܹܝܠ ܚܲܒ̣ܪܵܟ݂ ܕܲܥ̣ܪܲܒ̣ܬ̇ ܥܠܵܘܗܝ.

⁴ܘܠܵܐ ܬܸܬܸ̇ܠ ܫܸܢܬ̣ܵܐ ܠܥܲܝܢܲܝ̈ܟ: ܘܐܵܦܠܵܐ ܢܵܘܡܬ̣ܵܐ ܠܲܓܒ̣ܝܼ̈ܢܲܝܟ.

⁵ܕܬܸܬ̣ܦܲܨܵܐ ܐܲܝܟ݂ ܛܲܒ̣ܝܵܐ ܡ̣ܢ ܢܸܫܒܵܐ: ܘܐܲܝܟ݂ ܨܸܦܪܵܐ ܡ̣ܢ ܦܲܚܵܐ.

⁶ܐܸܬ̇ܕܲܡܵܐ ܠܫܘܼܫܡܵܢܵܐ: ܘܲܚܙܝܼ ܐܘܼܪ̈ܚܵܬܹܗ. ܘܝܼܠܲܦ ܕܠܲܝܬ̇ ܠܹܗ ܚܨܵܕ݂ܵܐ.

⁷ܘܠܲܝܬ̇ ܠܥܸܠ ܡܸܢܹܗ ܫܲܠܝܼܛܵܐ: ܘܐܵܦܠܵܐ ܡ̇ܢ ܕܐܵܟܹ̇ܦ ܠܹܗ.

⁸ܘܲܡܛܲܝܸܒ̣ ܠܹܗ ܡ̣ܢ ܩܲܝܛܵܐ ܠܲܚܡܹܗ. ܘܩܵܦܹ̇ܣ ܒܲܚܨܵܕ݂ܵܐ ܡܹܐܟ݂ܘܼܠܬܹ̇ܗ.

⁹ܥܕܲܡܵܐ ܠܐܸܡܲܬ̣ܝ ܕܵܡܹ̇ܟ݂ ܐܲܢ̄ܬ̇ ܚܒܸܢܵܢܵܐ. ܐܸܡܲܬ̣ܝ ܡ̣ܢ ܫܸܢܬ̣ܵܟ݂ ܬܩܘܼܡ.

¹⁰ܩܲܠܝܼܠ ܬܢܘܼܡ: ܘܩܲܠܝܼܠ ܬܸܕ݂ܡܲܟ݂. ܘܩܲܠܝܼܠ ܬܣܝܼܡ ܐܝܼܕ݂ܵܟ݂ ܥܲܠ ܚܲܕ݂ܝܵܟ݂.

¹¹ܘܬܹܐܬܹܐ ܥܠܲܝܟ ܡܸܣܟܹ̇ܢܘܼܬ̣ܵܐ. ܘܬܲܕܪ̱ܟ݂ܵܟ݂ ܨܪܝܼܟ݂ܘܼܬ̣ܵܐ. ܐܲܝܟ݂ ܓܲܒ̣ܪܵܐ ܟܲܫܝܼܪܵܐ: ܒܲܪܢܵܫܵܐ ܣܲܟ݂ܠܵܐ.

¹²ܓܲܒ̣ܪܵܐ ܥܵܘܿܠܵܐ ܡܗܲܠܸܟ݂ ܒܲܥܫܝܼܩܘܼܬ̣ܵܐ.

¹³ܪܵܡܹ̇ܙ ܒܥܲܝܢܵܘ̈ܗܝ: ܘܬ̣ܵܪܹܣ ܒܪܸܓ̣ܠܹܗ: ܘܪܵܡܹ̇ܙ ܒܨܸܒ̣ـ̈ـܥܵܬܹܗ.

¹⁴ܘܡܸܬ̣ܗܲܦܲܟ݂ ܒܠܸܒܹ̇ܗ. ܘܚܵܫܹ̇ܠ ܒܝܼܫܬܵܐ ܒܟ݂ܠܙܒܲܢ. ܘܫܵܓ̣ܹ̇ܫ ܒܹܝܬ̣ ܬܪܹܝܢ.

¹⁵ܡܸܛܠ ܗܵܢܵܐ ܡ̣ܢ ܫܸܠܝܵܐ ܢܹܐܬܹܐ ܬܒ̣ܵܪܹܗ. ܘܡ̣ܢ ܫܸܠܝܵܐ ܢܸܬ̇ܬ̇ܒܲܪ: ܘܠܵܐ ܬܸܗܘܹܐ ܠܹܗ ܐܵܣܝܘܼܬ̣ܵܐ.

¹⁶ܫܸܬ̣ ܐܸܢܹܝܢ ܕܲܣܢ̣ܵܐ ܡܵܪܝܵܐ. ܘܕܲܫܒܲܥ ܐܲܣ̱ܠܝܲܬ̤ ܢܲܦ̮ܫܹܗ.

¹⁷ܥܲܝܢܵܐ ܪܵܡܬ̣ܵܐ: ܘܠܸܫܵܢܵܐ ܕܲܓܵܠܵܐ: ܘܐܝܼܕܲܝܵـ̈ـܐ ܕܐܵܫ̈ܕܵܢ ܕܡܵܐ ܙܲܟܵܝܵܐ.

¹⁸ܘܠܸܒܵܐ ܕܡܸܬ̣ܚܲܫܲܒ̣ ܡܲܚܫ̈ܒ̣ܵܬ̣ܵܐ ܕܥܸܬܵܐ: ܘܪܸܓ̣ܠܵܐ ܕܡܸܣܬܲܪ̱ܗܒ̣ܵܐ ܠܡܸܪܗܲܛ ܠܒ̣ܝܼܫܬܵܐ.

¹⁹ܘܣܵܗܕܵܐ ܕܲܓܵܠܵܐ ܕܲܡܡܲܠܸܠ ܟܲܕܵܒ̣ܘܼܬ̣ܵܐ: ܘܠܲܕ݂ܪܵܡܹ̇ܐ ܒܹܝܬ̣ ܐܲܚܹ̈ܐ.

²⁰ܛܲܪ ܒܹܪܝ ܦܘܼܩܕܵܢܵܐ ܕܐܲܒ̣ܘܼܟ݂. ܘܠܵܐ ܬܸܛܥܹܐ ܢܵܡܘܿܣܵܐ ܕܐܸܡܵܟ݂.

²¹ܩܒ̣ܘܿܠ ܐܸܢܘܿܢ ܒܠܸܒܵܟ݂ ܐܲܡܝܼܢܵܐܝܼܬ̣. ܘܲܟ݂ܪܘܿܟ݂ ܐܸܢܘܿܢ ܒܨܵܘܪܵܟ݂.

²²ܘܡܵܐ ܕܲܡܗܲܠܸܟ݂ ܐܲܢ̄ܬ̇: ܐܲܩܸܦ ܐܸܢܘܿܢ ܠܵܟ݂. ܘܥܲܡܵܟ݂ ܢܸܗܘܘܿܢ. ܛܲܪ ܐܸܢܘܿܢ ܕܲܢܢܲܛܪܘܼܢܵܟ݂. ܘܡܵܐ ܕܐܸܬ̇ܬ̇ܥܝܼܪܬ̇: ܗܸܢ̣ܘܿܢ ܢܸܗܘܘܿܢ ܠܵܟ݂ ܪܸܢܝܵܐ.

²³ܫܪܵܓ̣ܵܐ ܗ̄ܘܼ ܓܹܝܪ ܦܘܼܩܕܵܢܵܐ. ܘܢܵܡܘܿܣܵܐ ܢܘܼܗܪܵܐ. ܐܘܼܪܚܵܐ ܕܹܝܢ ܕܚܲܝܹ̈ܐ ܡܲܟ̇ܣܵܢܘܼܬ̣ܵܐ ܘܡܲܪܕ̇ܘܼܬ̣ܵܐ.

²⁴ܕܲܬ̣ܢܲܛܪܵܟ݂ ܡ̣ܢ ܐܲܢ̄ܬ̇ܬ̣ܵܐ ܒܝܼܫܬܵܐ: ܘܡ̣ܢ ܡܹܐܟܲܠܩܲܪܨܵܐ ܕܠܸܫܵܢܵܗ̇ ܕܢܘܼܟ݂ܪܵܝܬܵܐ.

²⁵ܠܵܐ ܬܸܪܲܓ̣ ܫܘܼܦܪܵܗ̇ ܒܠܸܒܵܟ݂. ܘܠܵܐ ܬܸܬ̇ܨܝܼܕ݂ ܒܥܲܝܢܹ̈ܝܗ̇. ܘܠܵܐ ܬܸܫܒܹ̇ܝܟ݂ ܒܬܸܡܪܹ̈ܝܗ̇.

²⁶ܕܘܼܡܝܵܗ̇ ܓܹܝܪ ܕܐܲܢ̄ܬ̇ܬ̣ܵܐ ܙܵܢܝܼܬ̣ܵܐ: ܐܲܝܟ݂ ܓܪܝܼܨܬܵܐ ܗ̄ܘܼ ܕܠܲܚܡܵܐ. ܘܐܲܢ̄ܬܲܬ̣ ܓܲܒ̣ܪܵܐ: ܢܲܦ̮ܫܵܐ ܝܲܩܝܼܪܬܵܐ ܨܵܝܕܵܐ.

²⁷ܕܲܠܡܵܐ ܣܵܐܹ̇ܡ ܒܲܪܢܵܫܵܐ ܢܘܼܪܵܐ ܒܥܘܼܒܹ̇ܗ. ܘܢܲܚܬܵܘ̈ܗܝ ܠܵܐ ܡܵܘܩܸܕ݂.

²⁸ܐܵܘ ܕܲܠܡܵܐ ܡܗܲܠܸܟ݂ ܓܲܒ̣ܪܵܐ ܥܲܠ ܓܘܼܡܪܹ̈ܐ ܕܢܘܼܪܵܐ: ܘܪܸ̈ܓ̣ܠܵܘܗܝ ܠܵܐ ܡܸܬ̣ܟܵܘ̈ܝܵܢ.

²⁹ܗܵܟܲܢܵܐ ܡ̇ܢ ܕܥܵܐܹ̇ܠ ܥܲܠ ܐܲܢ̄ܬܲܬ̣ ܚܲܒ̣ܪܹܗ: ܘܩܵܪܸܒ̣ ܠܵܗ̇: ܠܵܐ ܢܸܙܟܹ̇ܐ.

³⁰ܠܵܐ ܠܡܸܬ̇ܕܲܡܵܪܘܼ ܒܐܲܝܢܵܐ ܕܡܸܬ̇ܬ̇ܚܸܕ݂ ܕܓ̣ܵܢܹ̇ܒ̣. ܕܓ̣ܵܢܹ̇ܒ̣ ܓܹܝܪ: ܕܲܢܣܲܒܲܥ ܢܲܦ̮ܫܹܗ ܕܟܲܦܢܵܐ.

³¹ܘܐܸܢ ܡܸܬ̇ܬ̇ܚܸܕ݂ ܕܓ̣ܵܢܹ̇ܒ̣: ܦܵܪܲܥ ܚܲܕ݂ ܒܫܲܒ̣ܥܵܐ. ܘܟ݂ܠܹܝܗ ܩܸܢܝܵܢܵܐ ܕܒܲܝܬܹ̇ܗ ܝܵܗܹ̇ܒ̣.

³²ܕܓ̣ܵܐܲܪ ܕܹܝܢ ܐܲܢ̄ܬ̇ܬ̣ܵܐ: ܚܲܣܝܼܪ ܪܸܥܝܵܢܵܐ ܗ̄ܘܼ: ܘܲܡܚܲܒܸ̇ܠ ܢܲܦ̮ܫܹܗ.

³³ܘܗܘ̤ܝܘܼ ܥܵܒܹ̇ܕ݂ ܕܢܸܩܪܘܿܒ̣ ܠܹܗ ܨܲܥܪܵܐ: ܘܢܲܕ݂ܪ̱ܟ݂ܝܼܘܗܝ: ܘܚܸܣܕܹ̇ܗ ܠܵܐ ܢܸܬ̇ܛܥܹܐ.

³⁴ܚܸܡܬܹܗ ܓܹܝܪ ܕܓܲܒ̣ܪܵܐ ܡܸܛܠ ܕܡܲܠܝܵܐ ܛܢܵܢܵܐ. ܠܵܐ ܚܵܐܹ̇ܣ ܒܝܵܘܡܵܐ ܕܦܘܼܪܥܵܢܵܐ.

³⁵ܘܠܵܐ ܢܵܣܹ̇ܒ̣ ܒܐܲܦܹ̈ܐ ܕܩܘܼܪܒܵܢܵܐ. ܘܠܵܐ ܡܸܬ̇ܛܦܝܼܣ ܟܲܕ݂ ܬܲܣܓܹ̇ܐ ܫܘܼܚܕ݂ܵܐ.