Read Aramaic Peshita Proverbs 7 Bible Online

Proverbs 7 - Aramaic Peshita bible

Proverbs 7

¹ܒܹܪܝ ܛܲܪ ܡܸܠܲܝ̈: ܘܦܘܼܩ̈ܕܵܢܲܝ ܐܲܛܫܵܐ ܒܓ̣ܵܘܵܟ݂.

²ܛܲܪ ܦܘܼܩ̈ܕܵܢܲܝ ܘܲܚܝܝܼ: ܘܢܵܡܘܿܣܝ ܐܲܝܟ݂ ܒܵܒ̣ܬ̣ܵܐ ܕܥܲܝܢܵܐ.

³ܩܛܘܿܪ ܐܸܢܘܿܢ ܒܨܵܘܪܵܟ݂. ܘܲܟ݂ܬ̣ܘܿܒ̣ ܐܸܢܘܿܢ ܥܲܠ ܠܘܼܚܹ̈ܐ ܕܠܸܒܵܟ݂.

⁴ܘܐܸܡܲܪ ܠܚܸܟ݂ܡ̱ܬ̣ܵܐ ܚܵܬ̣ܝ ܐܲܢ̄ܬ̇ܝ. ܘܲܠܣܘܼܟܵܠܵܐ ܩܪܝܼ ܡܲܕ̇ܥܵܐ.

⁵ܕܲܢܢܲܛܪܵܟ݂ ܡ̣ܢ ܐܲܢ̄ܬ̇ܬ̣ܵܐ ܢܘܼܟ݂ܪܵܝܬܵܐ ܕܲܡܫܲܕ̇ܠܵܢ̈ܝܵܢ ܡܸܠܹ̈ܝܗ̇.

⁶ܡܸܛܠ ܕܡ̣ܢ ܟܵܘܬ̣ܵܐ ܕܒܲܝܬܵܗ̇: ܘܡ̣ܢ ܟܣܘܼܣܛܵܪܘܿܢ ܐܲܕ݂ܝܼܩܲܬ̤.

⁷ܘܲܚܙܵܬ̤ ܫܲܒ̣ܪܹ̈ܐ. ܘܚܵܪܲܬ̤ ܒܲܛܠܵܝܹ̈ܐ: ܘܲܒ̣ܚܲܣܝܼܪ̈ܲܝ ܪܸܥܝܵܢܵܐ.

⁸ܕܥܵܒ̣ܪܝܼܢ ܒܫܘܼܩܵܐ ܥܲܠ ܓܹܢ̄ܒ̣ ܙܵܘ̈ܝܵܬ̣ܵܐ ܕܲܫܒ̣ܝܼ̈ܠܲܝ ܒܲܝܬܵܗ̇.

⁹ܒܪܲܡܫܵܐ ܒܡܲܥܪ̈ܵܒܲܝ ܫܸܡܫܵܐ: ܒܚܸܫܘܿܟ݂ܵܐ ܕܠܸܠܝܵܐ ܘܲܒ̣ܥܲܡܛܵܢܵܐ.

¹⁰ܘܢܸܦܩܲܬ̤ ܐܲܢ̄ܬ̇ܬ̣ܵܐ ܠܐܘܼܪܥܹܗ ܒܐܸܣܟܹ̇ܡܵܐ ܕܙ̇ܢܝܼܬ̣ܵܐ: ܕܡܲܦ̱ܪܕ݂ܵܐ ܠܸܒ̇ܗܘܿܢ ܕܲܥܠܲܝܡܹ̈ܐ.

¹¹ܘܡܵܪܘܿܕ݂ܝܵܐ: ܘܐܵܣܘܿܛܝܵܐ. ܘܲܒ̣ܒܲܝܬܵܗ̇ ܪܸ̈ܓ̣ܠܹܝܗ̇ ܠܵܐ ܫܵܠ̈ܝܵܢ.

¹²ܐܸܠܵܐ ܒܲܙܒܲܢ ܠܒܲܪ ܦܵܗܝܵܐ. ܘܒܲܙܒܲܢ ܒܫܘܼ̈ܩܹܐ ܘܲܒ̣ܘܵܙ̈ܝܵܬ̣ܵܐ ܟܵܡܢܵܐ.

¹³ܘܐܸܚܲܕ݂ܬܹܗ ܘܲܢܫܲܩܬܹܗ. ܘܐܲܚܨܦܲܬ̣ ܐܲܦܹ̈ܝܗ̇: ܘܐܸܡܪܲܬ̤ ܠܹܗ.

¹⁴ܕܸܒ̣ܚܹ̈ܐ ܐܸܢܘܿܢ ܫܲܠܡܹ̈ܐ ܝܵܘܡܵܢܵܐ ܦܸܪܥܹ̇ܬ̣ ܢܸܕ݂ܪ̈ܲܝ.

¹⁵ܡܸܛܠ ܗܵܢܵܐ ܢܸܦܩܹ̇ܬ̣ ܠܐܘܼܪܥܵܟ݂: ܕܲܡܣܲܟ̇ܝܵܐ ܗ̄ܘܹ̇ܝܬ̣ ܠܡܸܚܙܝܵܟ݂: ܘܐܸܫܟܲܚ̇ܬܵܟ݂.

¹⁶ܒܬܸܫܘܝܼܬ̣ܵܐ ܫܵܘ̇ܝܼܬ̣ ܥܲܪܣܝ. ܘܒܲܩܪ̈ܵܡܹܐ ܡܸܨܪ̈ܵܝܹܐ ܩܪܲܡ̇ܬܵܗ̇.

¹⁷ܘܪܸܣܹ̇ܬ̣ ܥܲܠ ܥܲܪܣܝ: ܡܘܼܪܵܐ: ܘܟ݂ܘܼܪܟ̇ܡܵܐ: ܘܩܹܘܢܵܡܵܐ.

¹⁸ܬܵܐ ܢܸܬ̣ܒܲܣܲܡ ܒܪܸܚ̱ܡܬ̣ܵܐ ܥܕܲܡܵܐ ܠܨܲܦܪܵܐ. ܘܲܢܥܲܦܸܩ ܚܲܕ݂ ܠܚܲܕ݂ ܒܪܸܓ̇ܬ̣ܵܐ.

¹⁹ܠܵܐ ܗ̄ܘܼܵܐ ܓܹܝܪ ܒܒܲܝܬܵܐ ܓܲܒ̣ܪܝ ܐܸܙܲܠ ܠܹܗ ܒܐܘܼܪܚܵܐ ܪܲܚܝܼܩܬܵܐ.

²⁰ܘܲܨܪܵܪܵܐ ܕܟܸܣܦܵܐ ܫ̣ܩܲܠ ܒܐܝܼܕܹܗ. ܘܲܠܝܵܘ̈ܡܵܬ̣ܵܐ ܗ̄ܘܼ ܣܲܓܝܼ̈ܐܹܐ ܐܵܬܹ̇ܐ ܠܒܲܝܬܹܗ.

²¹ܘܐܲܛܥ̱ܝܵܬܹܗ ܒܣܘܿܓ̣ܵܐܐ ܕܡܸܠܹ̈ܝܗ̇. ܘܲܒ̣ܫܘܼܕܵܠܵܐ ܕܣܸܦ̈ܘܵܬ̣ܵܗ̇ ܠܘܵܬ̣ܵܗ̇ ܢܬܲܦܬܹܗ.

²²ܘܗ̤ܘ ܐܵܙܹ̇ܠ ܗ̄ܘܼܵܐ ܒܵܬ̣ܪܵܗ̇ ܐܲܝܟ݂ ܫܲܒ̣ܪܵܐ: ܘܐܲܝܟ݂ ܬܵܘܪܵܐ ܕܐܵܙܹ̇ܠ ܠܘܵܬ̣ ܛܲܒܵܚܵܐ: ܘܐܲܝܟ݂ ܟܲܠܒܵܐ ܠܐܣܘܼܪܝܵܐ.

²³ܘܐܲܝܟ݂ ܐܲܝܠܵܐ ܕܡܲܦܪܲܚ ܓܹܐܪܵܐ ܒܟܲܒ̣ܕܹ̇ܗ. ܘܡܸܣܬܲܪܗܲܒ̣ ܐܲܝܟ݂ ܚܲܝܘܲܬ̣ ܟܸܢܦܵܐ ܠܦܲܚܵܐ. ܘܠܵܐ ܝܵܕܲܥ ܕܲܠܡܵܘܬܵܐ ܗ̄ܘܼ ܕܢܲܦ̮ܫܹܗ ܐܵܙܹ̇ܠ.

²⁴ܡܸܟܹ̇ܝܠ ܒܢܲـ̈ـܝܵܐ ܫܘܼܡܥܘܼܢܝ ܘܨܘܼܬ̣ܘ ܡܸܠܵܘ̈ܗܝ ܕܦܘܼܡܝ.

²⁵ܠܵܐ ܢܸܨܛܠܹܐ ܠܸܒܵܟ݂ ܠܐܘܼܪ̈ܚܵܬ̣ܵܗ̇. ܘܠܵܐ ܬܸܛܥܹܐ ܒܲܫܒ̣ܝܼ̈ܠܹܗ.

²⁶ܡܸܛܠ ܕܣܘܿܓ̣ܵܐܐ ܕܲܩܛܝܼܠܹ̈ܐ ܐܲܪ̱ܡܝܲܬ̣ ܘܥܲܫܝܼܢܝܼܢ ܟܠܗܘܿܢ ܩܛܝܼ̈ܠܹܝܗ̇.

²⁷ܐܘܼܪ̈ܚܵܬ̣ܵܐ ܕܒܲܝܬܵܗ̇: ܐܘܼܪ̈ܚܵܬ̣ܵܐ ܐܸܢܹܝܢ ܕܲܫܝܘܿܠ: ܕܢܲܚ̈ܬ̣ܵܢ ܠܬ̣ܵܘܵܢܹ̈ܐ ܕܡܵܘܬܵܐ.