Read Aramaic Peshita Proverbs 9 Bible Online

Proverbs 9 - Aramaic Peshita bible

Proverbs 9

¹ܚܸܟ݂ܡ̱ܬ̣ܵܐ ܒܢܵܬ̤ ܒܲܝܬܵܐ. ܘܐܲܩܝܼܡܲܬ̤ ܒܹܗ ܫܲܒ̣ܥܵܐ ܥܲܡܘܼ̈ܕ݂ܝܼܢ.

²ܘܢܸܟ݂ܣܲܬ̤ ܢܸܟ݂ܣܬ̣ܵܗ̇. ܘܡܸܙܓܲܬ̤ ܚܲܡܪܵܗ̇ ܘܛܲܝܒܲܬ̤ ܦܵܬ̣ܘܿܪܹ̈ܝܗ̇.

³ܘܫܲܕ̇ܪܲܬ̤ ܥܲܒ̣ܕܹ̇ܝ̈ܗ̇ ܕܢܸܩܪܘܿܢ ܥܲܠ ܪ̈ܵܡܵܬ̣ܵܐ: ܘܢܹܐܡܪܘܼܢ.

⁴ܡܲܢ̣ܘܼ ܕܲܫܒܲܪ: ܢܹܐܬܹܐ ܠܘܵܬ̣ܝ ܘܲܕ݂ܚܲܣܝܼܪ ܪܸܥܝܵܢܹܗ: ܘܐܹܡܲܪ ܠܹܗ.

⁵ܬܵܘ ܐܲܟ݂ܘܿܠܘ ܡ̣ܢ ܠܲܚܡܝ ܘܐܸܫܬܵܘ ܡ̣ܢ ܚܲܡܪܵܐ ܕܡܸܙ̇ܥܹ̇ܬ̣.

⁶ܘܐܲܢܝܼܚܘ ܡܸܢܟ݂ܘܿܢ ܚܲܣܝܼܪܘܼܬ̣ ܪܸܥܝܵܢܵܐ: ܘܲܚܝܵܘ. ܘܐܘܼܪܚܵܐ ܬܪܝܼܨܬܵܐ ܐܸܬ̣ܪܲܥܵܘ.

⁷ܡܲܪܕ̇ܘܼܬ̣ܵܐ ܠܒ̣ܝܼܫܵܐ ܝܵܗ̄ܒ̣ܵܐ ܠܹܗ ܨܲܥܪܵܐ. ܘܡܲܟܸ̇ܣ ܠܥܵܘܿܠܵܐ ܡܘܼܡܹܗ.

⁸ܠܵܐ ܬܲܟܸ̇ܣ ܠܒ̣ܝܼܫܵܐ: ܕܠܵܐ ܢܸܣܢܹܝܢ ܐܸܠܵܐ ܐܲܟܸ̇ܣ ܠܚܲܟ̇ܝܼܡܵܐ: ܕܢܸܪܚ̄ܡܵܟ݂.

⁹ܗܲܒ̣ ܐܲܦ̮ܬ̣ܵܐ ܠܚܲܟ̇ܝܼܡܵܐ: ܕܬ̣ܘܼܒ̣ ܢܸܬ̣ܚܲܟܲܡ. ܘܐܵܘܕܲܥ ܠܙܲܕ̇ܝܼܩܵܐ: ܘܢܵܘܣܸܦ ܥܲܠ ܝܘܼܠܦܵܢܹܗ.

¹⁰ܪܹܫ ܚܸܟ݂ܡ̱ܬ̣ܵܐ ܕܸܚ̱ܠܬܹܗ ܕܡܵܪܝܵܐ. ܘܝܼܕܲܥܬ̣ܵܐ ܕܙܲܕ̇ܝܼܩܵܐ: ܣܘܼܟܵܠܵܐ.

¹¹ܡܸܛܠ ܕܒ̣ܵܗ̇ ܢܸܣܓ̇ܘܿܢ ܝܵܘ̈ܡܵܬ̣ܵܟ݂ ܘܢܸܬ̇ܬܵܘܣ̈ܦܵܢ ܠܵܟ݂ ܫܢܲـ̈ـܝܵܐ ܕܚܲܝܹ̈ܐ.

¹²ܒܹܪܝ ܐܸܢ ܚܲܟ̇ܝܼܡ ܐܲܢ̄ܬ̇: ܠܢܲܦ̮ܫܵܟ݂ ܚܲܟ̇ܝܼܡ ܐܲܢ̄ܬ̇: ܕܲܠܪ̈ܵܚܡܲܝܟ ܘܐܸܢ ܬܸܗܘܹܐ ܒܝܼܫ: ܒܲܠܚܘܿܕܲܝܟ ܬܕܲܠܹܐ ܐܸܢܹܝܢ ܒܝܼ̈ܫܵܬ̣ܵܟ݂ ܐܲܝܢܵܐ ܕܣܵܪܹܒ̣ ܕܲܓܵܠܵܐܝܼܬ̣: ܪܵܥܹ̇ܐ ܪ̈ܘܼܚܝܼܢ: ܘܪܵܕܹܦ ܥܵܘܦܵܐ ܕܲܫܡܲܝܵܐ. ܫ̣ܒܲܩ ܓܹܝܪ ܐܘܼܪܚܵܐ ܕܟܲܪܡܹܗ: ܘܲܛܥ̣ܵܐ ܫܒ̣ܝܼܠ ܦܘܼܠܚܵܢܹܗ: ܠܡܸܪܕܵܐ ܒܚܘܼܪܒܵܐ ܕܠܵܐ ܡܝܼ̈ܢ: ܘܡ̣ܢ ܐܲܝܕܵܐ ܕܲܕ݂ܪܝܼܫܵܐ ܪܵܕܹܐ ܒܨܲܗܝܵܐ. ܐܵܦ ܗ̤ܘ ܢܟ݂ܢܸܫ ܠܵܐ ܡܸܕܹ̇ܡ.

¹³ܐܲܢ̄ܬ̇ܬ̣ܵܐ ܚܲܣܝܼܪܲܬ̣ ܪܸܥܝܵܢܵܐ ܡܫܲܕ̇ܠܵܢ̄ܝܵܐ. ܘܠܵܐ ܝܵܕ̇ܥܵܐ ܒܹܗܬ̇ܬ̣ܵܐ.

¹⁴ܝܵܬ̣ܒܵܐ ܥܲܠ ܬܲܪܥܵܐ ܕܒܲܝܬܵܗ̇: ܥܲܠ ܟܘܼܪܣܝܵܐ ܪܵܡܵܐ.

¹⁵ܘܩܵܪܝܵܐ ܠܥܵܒ̣̇ܪ̈ܲܝ ܐܘܼܪܚܵܐ ܕܲܬ̣ܪ̈ܝܼܨܵܢ ܐܘܼܪ̈ܚܵܬ̣ܗܘܿܢ ܘܐܵܡܪܵܐ.

¹⁶ܡܲܢ̣ܘܼ ܕܲܫܒܲܪ: ܢܹܐܬܹܐ ܠܘܵܬ̣ܝ ܘܲܕ݂ܚܲܣܝܼܪ ܪܸܥܝܵܢܹܗ: ܘܐܹܡܲܪ ܠܹܗ.

¹⁷ܡܲـ̈ـܝܵܐ ܓܢܝܼ̈ܒܹܐ ܚܠܹܝܢ. ܘܠܲܚܡܵܐ ܡܛܲܫܝܵܐ ܒܲܣܝܼܡ.

¹⁸ܘܠܵܐ ܝܵܕܲܥ ܕܓܲܢ̄ܒܵܪܹ̈ܐ ܠܘܵܬ̣ܵܗ̇ ܐܲܒ̣ܕ̇ܝܼܢ: ܘܲܒ̣ܥܘܼܡܩܵܐ ܕܲܫܝܘܿܠ ܟܠ ܕܲܡܙܲܡܢܝܼܢ ܠܵܗ̇. ܐܸܠܵܐ ܫܘܲܪ: ܘܠܵܐ ܬܸܫܬܵܘܚܲܪ ܒܐܲܬ̣ܪܵܐ ܗܵܘܿ. ܘܠܵܐ ܬܲܨܸܕ݂ ܒܵܗ̇ ܥܲܝܢܵܟ݂. ܗܵܟܲܢܵܐ ܓܹܝܪ ܬܸܥܒܲܪ ܡܲـ̈ـܝܵܐ ܢܘܼܟ݂ܪ̈ܵܝܹܐ: ܘܢܲܗܪܵܐ ܢܘܼܟ݂ܪܵܝܵܐ ܬܸܥܒܲܪ. ܘܬܸܣܛܹܐ ܡ̣ܢ ܡܲـ̈ـܝܵܐ ܢܘܼܟ݂ܪ̈ܵܝܹܐ ܘܡ̣ܢ ܡܲـ̈ـܝܵܐ ܢܘܼܟ݂ܪ̈ܵܝܹܐ ܠܵܐ ܬܸܫܬܹ̇ܐ. ܡܸܛܠ ܕܣܘܿܓ̣ܵܐܐ ܕܝܵܘ̈ܡܵܬ̣ܵܐ: ܘܲܫܢܲܝܵـ̈ـܐ ܕܚܲܝܹ̈ܐ ܢܸܬ̇ܬܵܘܣ̈ܦܵܢ ܠܵܟ݂.