Read Aramaic Peshita Ecclesiastes 12 Bible Online

Ecclesiastes 12 - Aramaic Peshita bible

Ecclesiastes 12

¹ܘܲܥܗܲܕܼ ܠܒ̣ܵܪܝܵܟ ܒܝܵܘ̈ܡܲܝ ܥܠܲܝܡܘܼܬ̣ܵܟ. ܥܲܕܼܠܵܐ ܢܹܐܬ̣ܘܼܢ ܝܵܘ̈ܡܲܝ ܒܝܼ̈ܫܵܬ̣ܵܐ: ܘܢܸܩ̱ܪ̈ܒ̣ܵܢ ܫܢܲـ̈ـܝܵܐ ܕܬܹܐܡܲܪ ܕܠܲܝܬ̇ ܒܗܹܝܢ ܨܸܒ̣ܝܵܢܝ.

²ܥܲܕܼܠܵܐ ܢܸܚܫܲܟ ܫܸܡܫܵܐ: ܘܢܘܼܗܪܵܐ ܕܣܲܗܪܵܐ ܘܲܕܼܟܵܘܟ̇ܒܹ̈ܐ. ܘܢܸܬ̣ܦ̈ܟܵܢ ܥܢܵܢܹ̈ܐ ܒܵܬܲܪ ܡܸܛܪܵܐ.

³ܒܝܵܘܡܵܐ ܕܢܸܬ̇ܬ̇ܙܝܼܥܘܼܢ ܢܵܛ̇ܘܿܪ̈ܲܝ ܒܷܲܬܵܐ. ܘܢܸܬ̇ܕܵܘܕܼܘܼܢ ܡܵܪ̈ܲܝ ܚܲܝܠܵܐ. ܘܢܸܬ̣ܒܲܛ̈ܠܵܢ ܛܲܚܵܢܵـ̈ـܬ̣ܵܐ ܡܸܛܠ ܕܲܙܥܲܪ. ܘܢܸܚ̈ܫܟ̣ܵܢ ܚܵܙ̈ܝܵܬ̣ܵܐ ܒܟ̣ܵܘܹ̈ܐ.

⁴ܘܢܸܬ̇ܬܲܚܕ̇ܘܼܢ ܬܲܪ̈ܥܹܐ ܒܫܘܼ̈ܩܹܐ: ܒܫܲܦܠܘܼܬ̣ܵܐ ܕܩܵܠܵܐ ܕܛܲܚܵـ̈ـܢܵܬ̣ܵܐ. ܘܲܢܩܘܼܡ ܠܩܵܠܵܐ ܕܨܸܦܪܹ̈ܐ. ܘܢܸܬ̣ܡܲـ̈ـܟ̇ܟ̣ܵܢ ܟܠ ܒ̈ܢܵܬ̣ ܫܘܼܒ̣ܚܵܐ.

⁵ܘܐܵܦ ܡ̣ܢ ܪܵܘܡܵܐ ܢܸܕܼܚܲܠ ܘܢܸܬ̇ܬܙܝܼܥ ܒܐܘܼܪ̈ܚܵܬܹܗ. ܘܢܸܒܲܥ ܥܠܵܘܗܝ ܫܲܗܪܵܐ. ܘܢܲܦܪܲܥ ܫܵܪܕܵܐ. ܘܢܸܣܓܸ̇ܐ ܩܲܡܨܵܐ: ܘܬܸܬ̣ܒܲܕܲܪ ܩܲܦܵܪ. ܘܬܸܒ̣ܛܲܠ ܒܵܝܫܵܢܘܼܬ̣ܵܐ. ܡܸܛܠ ܕܐܵܙܹ̇ܠ ܒܲܪܢܵܫܵܐ ܠܒܹܝܬ̣ ܥܲܡܠܹܗ. ܘܐܸܬ̣ܟ̇ܪܸܟ̣ܘ ܒܫܘܼܩܹ̈ܐ ܡܲܪ̈ܩܕܼܵܢܹܐ.

⁶ܥܲܕܼܠܵܐ ܢܸܬ̣ܦ̱ܣܸܩ ܒܚܸܠ ܟܸܣܦܵܐ. ܘܢܸܫܬ̇ܚܸܩ ܚܲܙܘܼܪ ܕܲܗܒ̣ܵܐ. ܘܬܸܬ̇ܒܲܪ ܩܘܼܠܬ̣ܵܐ ܥܲܠ ܡܲܒ̇ܘܼܥܵܐ. ܘܬܸܪܗܲܛ ܓܝܼܓ̣ܠܵܐ ܥܲܠ ܒܹܪܵܐ.

⁷ܘܢܸܗܦܘܿܟ ܥܲܦܪܵܐ ܠܐܲܪܥܵܐ ܐܲܝܟ ܕܲܗܘ̤ܵܐ. ܘܪܘܼܚܵܐ ܬܸܗܦܘܿܟ ܠܘܵܬ̣ ܡܵܪܝܵܐ ܕܝܲܗ̄ܒ̣ܵܗ̇.

⁸ܗܒܸܠ ܗܸܒ̣̈ܠܝܼܢ: ܐܵܡܲܪ ܩܘܿܗܠܲܬ̣. ܗܒܸܠ ܗܒ̣̈ܠܝܼܢ: ܟܠ ܡܸܕܹ̇ܡ ܗܸܒ̣ܠܵܐ.

⁹ܘܝܲܬ̇ܝܼܪ ܕܲܗܘ̤ܵܐ ܩܘܿܗܠܲܬ̣ ܚܲܟ̇ܝܼܡܵܐ. ܕܡܲܠܸܦ ܗ̄ܘܼܵܐ ܝܼܕܲܥܬ̣ܵܐ ܠܥܲܡܵܐ. ܘܨܵܬ̣ ܘܒܲܕܸ̇ܩ̣: ܘܐܲܬ̣ܩܸܢ ܡܲܬ̣̈ܠܹܐ ܣܲܓ̇ܝܼ̈ܐܹܐ.

¹⁰ܣܲܓ̇ܝܼ ܒܥ̣ܵܐ ܩܘܿܗܠܲܬ̣ ܠܡܸܫܟܵܚܘܼ ܦܸܬ̣ܓ̣ܵܡܹ̈ܐ ܕܨܸܒ̣ܝܵܢܵܐ. ܘܲܟ̣ܬܲܒ̣ ܒܩܘܼܫܬܵܐ ܦܸܬ̣ܓ̣ܵܡܲܝ̈ ܩܘܼܫܬܵܐ.

¹¹ܡܸܠܲܝ̈ ܚܲܟ̇ܝܼܡܹ̈ܐ ܐܲܝܟ ܙܵܩܘܿܬܹ̈ܐ: ܘܐܲܝܟ ܣܸ̈ܟܹ̇ܐ ܕܲܩܒ̣̈ܝܼܥܵܢ. ܡܵܪ̈ܲܝ ܐܸܣܟ̇ܦܵܬ̣ܵܐ ܐܸܬ̣̱ܝܼܗܸܒ̣. ܡ̣ܢ ܪܵܥܝܵܐ ܚܲܕܼ.

¹²ܘܝܲܬ̇ܝܼܪܵܐܝܼܬ̣ ܡܸܢܗܘܿܢ ܒܹܪܝ ܐܸܙܕܲܗ̄ܪ: ܠܡܸܟ̣ܬܲܒ̣ ܣܸܦܪܹ̈ܐ ܣܲܓ̇ܝܼ̈ܐܹܐ ܠܲܝܬ̇ ܣܘܿܦ. ܘܡܲܡܠܠܵܐ ܣܲܓ̇ܝܼܐܵܐ: ܠܹܐܘܬ̣ܵܐ ܗ̄ܝܼ ܕܒܸܣܪܵܐ.

¹³ܐ̄ܚܪܹܝܬܹ̇ܗ ܕܦܸܬ̣ܓ̣ܵܡܵܐ ܒܣܵܟܹܗ ܟܠ ܫܡܲܥ. ܘܡ̣ܢ ܩܕܼܵܡ ܡܵܪܝܵܐ ܕܚܲܠ. ܘܦܘܼܩܕܵܢܵܘ̈ܗܝ ܛܲܪ. ܡܸܛܠ ܕܗܵܢܵܘ ܕܡ̣ܢ ܐܘܼܡܵܢܵܐ ܚܲܕܼ ܐܸܬ̣̱ܝܼܗܸܒ̣ ܟܠ ܐ̄ܢܵܫ.

¹⁴ܡܸܛܠ ܕܟ̣ܠ ܥܒ̣ܵܕܼܵܐ ܡܵܪܝܵܐ ܡܲܥܸܠ ܒܕܼܝܼܢܵܐ: ܥܲܠ ܟܠ ܕܲܟ̣ܣܸܐ ܘܲܓ̣ܠܸܐ: ܐܸܢ ܛܵܒ̣ ܘܐܸܢ ܒܝܼܫ.